Eastern Tamang Language Bible
लेवी 8
हारूनदेन थेला झागदेदा धम्बा
थोन्बा २९:१-३७
परमप्रभुसे मोशादा दोःसी चुह्रङ् भिसी सुङ्जी, “एसे हारूनदेन थेला झागदे ओच्छे थेनीगदेला क्वानगदे, धम्बा धुइरी फोर्बा छ्युगु, पापबलि फुल्बाला लागिरी म्हे बहर, ग्यु बोको न्हीदेन खमिर आयुबा गेङला डालो भसी खउ। ओच्छे इस्राएलीगदे जम्मादान ह्रुप तबा पालला म्रापरी ङ्योइगो।”
जमाहेन्से परमप्रभुसे कुल्बा ह्रङ्नोन मोशासे लजी, ओच्छे ह्रुप तबा पालला म्रापरी इस्राएलीगदे जम्मान पोप तजी। मोशासे जम्मान इस्राएलीगदेदा चुह्रङ् भिसी पाङ्जी, “परमप्रभुसे लउ भिसी कुल्बा गे चा चुनोन हिन्ना।” मोशासे हारूनदेन थेला झागदेदा भसी ठिम अन्छार क्युइसे नुहाब लसी पिन्जी। जमाहेन्से थेसे हारूनदा लबिदा क्वान्सी पिन्जी ओच्छे के खीसी, अलखा क्वान्सी पिन्जी, ओच्छे एपोद क्वान्सी पिन्जी, ओच्छे एपोदथोरी ज्यना लसी राबा के खीसी पिन्जी। जमाहेन्से थेसे हारूनदा कुरी क्वान्बा पाता क्वान्सी पिन्जी ओच्छे कुरी क्वान्बा पातारी “ऊरीम” देन “तुम्मीम1” कार्सी पिन्जी। थेसे थेला थोबोरी फेटा थोइसी पिन्जी। ओच्छे मोशासे छ्युगु फोर्सी धम्बा मुला भिबा चिनुला रुपरी थेला ङ्होपट्टि फेटाथोरी म्हारला मुकुट कूसी पिन्जी। चुह्रङ् लसी परमप्रभुसे कुल्बा अन्छार मोशासे जम्मान गे लजी।
जमाहेन्से मोशासे धम्बा धुइरी फोर्बा छ्युगु किन्सी परमप्रभु धन्छ्याबा पालदेन थेरी मुबा जम्मान स्हेरी फोर्जी। ओच्छे परमप्रभुला लागिरी फेसी परमप्रभुला छ्यारी अर्पण लजी। थेसे थेनोन छ्युगुग्याम जजाकी किन्सी मेरी ख्राङ्सी बलि फुल्बा ग्लारी निसरेमधोना स्वाजी। ओच्छे बलि फुल्बा ग्लादेन थेला जम्मान ताङ्गदे, काङ् या ख्रुबा बाटा ओच्छे बाटा थान्बा ग्लादाएनोन थेनोन छ्युगु स्वासी परमप्रभुला लागिरी फेजी, ओच्छे परमप्रभुला छ्यारी अर्पण लजी। दोःसी थेसे धम्बा धुइरी फोर्बा छ्युगु किन्जी, ओच्छे थे छ्युगु हारूनना थोबोरी युसी थेदा परमप्रभुला लागिरी फेजी। जमाहेन्से मोशासे हारूनना झागदेदा भसी लबिदा क्वान्सी पिन्जी, ओच्छे के खीसी पिन्जी, ओच्छे थेनीगदेदा फेटाएनोन थोइसी पिन्जी। चुह्रङ् लसी परमप्रभुसे कुल्बा अन्छार मोशासे जम्मान गे लजी।
जमाहेन्से मोशासे पापबलि फुल्बाला लागिरी म्हे बहर भजी, ओच्छे हारूनदेन थेला झागदेसे थे बहरला थोबोरी ह्राङ ह्राङला या थान्जी। जमाहेन्से मोशासे थे म्हे बहर साइजी, ओच्छे थेसे जजाकी का किन्सी कारी ह्राङला या जुम्बी ब्लुम्सी बलि फुल्बा ग्लाला रूगदेरी फोर्सी बलि फुल्बा ग्लादा चोख्याब लजी। ओच्छे लेङ्बा का चा थेसे बलि फुल्बा ग्लाला धिरी ल्हूजी। चुह्रङ् लसी थेसे बलि फुल्बा ग्लादा परमप्रभुला लागिरी फेसी परमप्रभुला छ्यारी अर्पण लजी। मोशासे पापबलि फुल्बा थे म्हे बहरला फो ग्रुङ घप्बा जम्मान छि, ज्यबा खाल्ला न्हे टोगल गिक ओच्छे खैरू न्हीदेन छिक्मा ङाम्ला छि तेःसी बलि फुल्बा ग्लारी ख्राङ्जी। तर थे म्हे बहरला ढि, स्यादेन म्हेक्ली पालगदे फ्रेङ्सी चिबा ग्लाग्याम मङ्ग्यार भोर्सी मेरी ख्राङ्जी। चुह्रङ् लसी परमप्रभुसे कुल्बा अन्छार मोशासे जम्मान गे लजी।
जमाहेन्से मोशासे मेरी ख्राङ्सी फुल्बा बलिला लागिरी ग्यु बोको भजी। ओच्छे हारूनदेन थेला झागदेसे थे ग्यु बोकोला थोबोरी ह्राङ ह्राङला या थान्जी। मोशासे थे ग्यु बोकोदा साइजी ओच्छे बलि फुल्बा ग्लाला क्युर्सीन थेसे थे ग्यु बोकोला का फोर्जी। जमाहेन्से थेसे थे ग्युला स्या जम्मान तुप्जी। ओच्छे थे ग्युला थोबोदेन तुप्बा छि जम्मान मेरी ख्राङ्जी। थेसे थे ग्यु बोकोला फो ग्रुङदेन काङ क्युइसे ख्रुजी। ओच्छे थेसे परमप्रभुला लागिरी फेसी थान्बा परमप्रभुदा सेम निबा बास्ना खबा बलि दोगै भिसी थे ग्यु बोकोला जम्मान स्या बलि फुल्बा ग्लारी ख्राङ्जी। चुह्रङ् लसी परमप्रभुसे कुल्बा अन्छार मोशासे जम्मान गे लजी।
जमाहेन्से थेसे पूजाहारी धम्बाला लागिरी थान्बा अर्गु ग्यु बोको भजी। ओच्छे हारूनदेन थेला झागदेसे थे ग्यु बोकोला थोबोरी ह्राङ ह्राङला या थान्जी। जमाहेन्से मोशासे थे ग्यु बाकोदा साइजी, ओच्छे थेसे हारूनना दाहिनेपट्टिला नाब्यङ्ला न्हज्यारी, दाहिनेपट्टिला या पबारीदेन दाहिनेपट्टिला काङ पबारी थे ग्यु बोकोला का फोर्सी पिन्जी। जमाहेन्से थेसे हारूनना झागदेदा भजी, ओच्छे थेसे थेनीगदेला दाहिनेपट्टिला नाब्यङ्ला न्हज्यारी, दाहिनेपट्टिला या पबारीदेन दाहिनेपट्टिला काङ पबारी थे ग्यु बोकोला का फोर्सी पिन्जी, ओच्छे बलि फुल्बा ग्लाला क्युर्सीन थे का स्वाजी। जमाहेन्से थेसे छि, छि मुबा मेः, फो ग्रुङ घप्बा जम्मान छि, ज्यबा खाल्ला न्हे टोगल गिक ओच्छे खैरू न्हीदेन छिक्मा ङाम्ला छि ओच्छे दाहिनेपट्टिला काङ्स्हु किन्जी। ओच्छे परमप्रभुला ओन्छाङ्री मुबा डालोग्याम खमिर आयुबा रूङ्बा गेङ गिक, जैतूनना छ्युगुरी झ्योप्सी ख्राङ्बा रूङ्बा गेङ गिकदेन जजाबा पाबा गेङ गिक किन्सी थेसे थे छिदेन दाहिनेपट्टिला काङ्स्हुथोरी थान्जी। मोशासे थे जम्मान हारूनदेन थेला झागदेला यारी पिन्जी, ओच्छे थेनीगदेसे परमप्रभुला ओन्छाङ्री यारी थीबान थीबान बलि फुल्जी। जमाहेन्से थेनीगदेला याग्याम मोशासे थे जम्मान स्हे किन्जी। ओच्छे परमप्रभुदा सेम निबा बास्ना खबा बलि दोगै भिसी परमप्रभुला लागिरी फेसी थान्बा बलिथोरीन धम्बा धुइरी फुल्बा बलिदा बलि फुल्बा ग्लारी ख्राङ्जी। जमाहेन्से परमप्रभुला ओन्छाङ्री मोशासे कुला स्याएनोन किन्सी यारी थीबान थीबान फुल्जी। थे स्या चा पूजाहारी धम्बा धुइरी बलि लबा ग्युला स्याग्याम मोशासे याङ्तोःबा भो मुबा। चुह्रङ् लसी परमप्रभुसे मोशादा कुल्बा अन्छार मोशासे जम्मान गे लजी।
जमाहेन्से मोशासे धम्बा धुइरी फोर्बा छ्युगुदेन बलि फुल्बा ग्लाथोरी मुबा का उदिदि किन्सी हारूनदेन थेला क्वानगदेरी ओच्छे थेला झागदेदेन थेला झागदेला क्वानगदेरी स्वाजी। चुह्रङ् लसी थेसे हारूनदेन थेला क्वानगदेदा ओच्छे थेदेन थेला झागदेला क्वानगदेदा परमप्रभुला लागिरी फेजी।
जमाहेन्से हारूनदेन थेला झागदेदा मोशासे चुह्रङ् भिसी पाङ्जी, “ङाइ हारूनदेन थेला झागदेदा चउ भिसी कुल्बा ह्रङ्नोन ह्रुप तबा पालला म्रापरी स्या ब्लोगो ओच्छे धम्बा धुइरी फुल्बा भेटीला डालोरी मुबा गेङदेन छ्यामनोन चउ। ओच्छे चसी लेङ्बा स्यादेन गेङ चा मेरी ख्राङ्गो। एनीगदेदा धम्बाला लागिरी फेबा धिन आजिन्देधोना ह्रुप तबा पालला म्रापग्याम एनीगदे खानैनोन आनिउ। तिग्दा भिसम एनीगदेदा धम्बाला लागिरी फेबा धिन चा निसरे हिन्ना। तिनी जुन जुन ताम लबा मुला थे चा परमप्रभुसे कुल्बा अन्छार एनीगदेदा परमप्रभुदेन छ्याम ढिक्ना लबाला लागिरी लबा हिन्ना। एनीगदे धिन म्हुननोन निसरेधोना ह्रुप तबा पालला म्रापरी चिसी परमप्रभुसे कुल्बा अन्छार लउ। आहिन्सम एनीगदे सिला। तिग्दा भिसम ङादा परमप्रभुसे चुनोन ताम कुल्बा हिन्ना।”
थेतबासेलमा परमप्रभुसे मोशादा कुल्बा अन्छार जम्मान ताम हारूनदेन थेला झागदेसे लजी।
Source notes (1)
- Footnote “ऊरीम” देन “तुम्मीम” ला बारेरी थोन्बा २८:३० देन १ शमू १४:४१ री स्हीगो।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.