Eastern Tamang Language Bible
लेवी 4
पापबलि
परमप्रभुसे मोशादा चुह्रङ् भिसी सुङ्जी, “इस्राएलीगदेदा चुह्रङ् भिसी पाङ्गो, ‘आसेना आघोना खालै म्हिसे परमप्रभुसे लबारी आत भिसी सुङ्बा खजिबै ताम लजी भिसम
“‘ओच्छे पूजाहारी स्होसी धम्बा खजिबै म्हिसे पाप लसी म्हिगदेदा दोष लगब तना लजी भिसम थेसे लबा थे पापला लागिरी परमप्रभुला ओन्छाङ्री तिगै दाग आरेबा म्हे बहर गिक भसी पापबलि फुल्गो। थेसे ह्रुप तबा पालला म्राप ङाम्री परमप्रभु मुबा ग्लारी थे म्हे बहरदा भगै। ओच्छे थेसे थे म्हे बहरला थोबोरी ह्राङला या थान्गै। जमाहेन्से परमप्रभुला ओन्छाङ्री थे म्हे बहरदा साइगै। ओच्छे पूजाहारी स्होसी धम्बा म्हिसे चा थे म्हे बहरला का ह्रुप तबा पालरी भगै। थेसे ह्राङला या जुम्बी थे कारी ब्लुम्सी चोखो ग्लाला पर्दाला ङाच्छापट्टि परमप्रभुला ङाच्छा निसरेमधोना स्वागै। जमाहेन्से परमप्रभुला ओन्छाङ्री पूजाहारीसे ह्रुप तबा पाल न्हङ्री मुबा धूप म्राबा ग्लाला रूगदेरीनोन थे का फोर्गै, ओच्छे लेङ्बा का चा ह्रुप तबा पालला म्रापरी मुबा मेरी ख्राङ्सी बलि फुल्बा ग्लाला धिरी ल्हूगै। थेसे पापबलिला जन्तुग्याम परमप्रभुला लागिरी फेसी थान्बा भो बलि फुल्गै। थे भो चा थे जन्तुला फो ग्रुङ्दा घप्बा छिदेन ग्रुङ्री मुबा जम्मान छि, खैरू न्हीदेन छिक्मा ङाम्ला छि ओच्छे ज्यबा खाल्ला न्हे टोगल गिक तेःगो। थे छिगदे ढिक्ना लबा बलि फुल्बा म्हे बहरला छि ह्रङ् लसीन पूजाहारीगदेसे मेरी ख्राङ्सी बलि फुल्बा ग्लारी ख्राङ्गै। तर थे म्हे बहरला ढि, जम्मान स्या, थोबो, काङ्, क्लिदेन छ्यामनोन फो ग्रुङ् पालगदे फ्रेङ्सी चिबा ग्लाग्याम मङ्ग्यार मेफ्रा भ्याङ्बा चोखो ग्लारी भोर्सी सिङथोरी थान्सी मेरी ख्राङ्गै।
“‘चुदे इस्राएलला पूरन य्हुलसे आसेना आघोना पाप लबा मुला भिसम ओच्छे परमप्रभुसे आलउ भिसी सुङ्बा खजिबै गे लबा मुला भिसम थे ताम इस्राएल य्हुलसे था आयाङ्सैनोन थेनीगदेदा दोष लगब तला। थेनीगदेसे लबा थे पापला बारेरी थेनीगदेसे था याङ्माहेन्से ह्रुप तबा पालला ङाच्छापट्टि म्हे बहर भसी पापबलि फुल्तोःला। परमप्रभुला ओन्छाङ्री इस्राएल य्हुल्ला गन्बागदेसे थे म्हे बहरला थोबोरी ह्राङ ह्राङला या थान्गै। ओच्छे परमप्रभुला ओन्छाङ्री थे म्हे बहर साइगै। जमाहेन्से पूजाहारी स्होसी धम्बा म्हिसे ह्रुप तबा पालरी थे म्हे बहरला का उदिद भगै। पूजाहारीसे ह्राङला या जुम्बी थे कारी ब्लुम्सी चोखो ग्लाला पर्दाला ङाच्छापट्टि परमप्रभुला ङाच्छा निसरेमधोना स्वागै। जमाहेन्से परमप्रभुला ओन्छाङ्री पूजाहारीसे ह्रुप तबा पाल न्हङ्री मुबा धूप म्राबा ग्लाला रूगदेरीनोन थे का फोर्गै। ओच्छे लेङ्बा का चा ह्रुप तबा पालला म्रापरी मुबा मेरी ख्राङ्सी बलि फुल्बा ग्लाला धिरी ल्हूगै। थे म्हे बहरला जम्मान छि तेःसी थेसे बलि फुल्बा ग्लारी ख्राङ्गै। पापबलिला म्हे बहर बलि फुल्मा थेसे ख्राह्रङ् लसी फुल्मुबा चु म्हे बहरदाएनोन थेह्रङ् लसीन बलि फुल्गै। पूजाहारीसे चुह्रङ् लसी थेनीगदेदा परमप्रभुदेन छ्याम ढिक्ना लबाला लागिरी बलि फुल्माहेन्से थेनीगदेला पाप माफ तला। थे म्हे बहरदा थेसे पालगदे फ्रेङ्सी चिबा ग्लाग्याम मङ्ग्यार भोर्गै ओच्छे अर्गु खाल्ला पापबलिला लागिरी फुल्बा म्हे बहरदा मेरी ख्राङ्बा ह्रङ्नोन चु म्हे बहरदाएनोन मेरी ख्राङ्गै। चु चा इस्राएल य्हुल्ला लागिरी पापबलि हिन्ना।
“‘चुदे शासन लबा खजिबै म्हिसे आसेना आघोना पाप लजी, ओच्छे परमप्रभु थेला परमेश्वरसे आलउ भिसी सुङ्बा ताम न्हङ्ला खजिबै ताम लजी भिसम थेदा दोष लगब तला। थेसे लबा पापला बारेरी थेसे था याङ्माहेन्से भेटी फुल्बाला लागिरी थेसे तिगै दाग आरेबा बोको गिक भतोःला। थेसे थे बोकोला थोबोरी ह्राङला या थान्गै, ओच्छे परमप्रभुला ओन्छाङ्री मेरी ख्राङ्सी बलि फुल्बा ग्लारीन थे बोकोदा साइगै। चु चा पापबलि हिन्ना। जमाहेन्से पूजाहारीसे ह्राङला या जुम्बी पापबलिला कारी ब्लुम्सी मेरी ख्राङ्सी बलि फुल्बा ग्लाला रूगदेरी फोर्गै, ओच्छे लेङ्बा का चा बलि फुल्बा ग्लाला धिरी ल्हूगै। थे बोकोला जम्मान छिगदेएनोन ढिक्ना लबा बलिला लागिरी फुल्बा जन्तुला छिदा ह्रङ्नोन लसी बलि फुल्बा ग्लारी ख्राङ्गै। पूजाहारीसे चुह्रङ् लसी थे म्हिदा परमप्रभुदेन छ्याम ढिक्ना लबाला लागिरी बलि फुल्माहेन्से थेला पाप माफ तला।
“‘चुदे इस्राएल य्हुल्ला खजिबै म्हिसे आसेना आघोना पाप लजी, ओच्छे परमप्रभुसे आलउ भिसी सुङ्बा ताम न्हङ्ला खजिबै ताम लजी भिसम थेदा दोष लगब तला। थे पापला बारेरी थेसे था याङ्माहेन्से ह्राङसे लबा पापला लागिरी थेसे भेटी चा तिगै दाग आरेबा रा भतोःला। थेसे थे राला थोबोरी ह्राङला या थान्गै। ओच्छे मेरी ख्राङ्सी बलि फुल्बा ग्लारी थेसे थे रादा साइसी पापबलि फुल्गै। जमाहेन्से पूजाहारीसे ह्राङला या जुम्बी पापबलिला कारी ब्लुम्सी मेरी ख्राङ्सी बलि फुल्बा ग्लाला रूगदेरी फोर्गै। ओच्छे लेङ्बा का चा बलि फुल्बा ग्लाला धिरी ल्हूगै। थे पापबलिला जम्मान छि ढिक्ना लबा बलिला छि ह्रङ्नोन लसी तेःगै। ओच्छे परमप्रभुदा सेम निबा बास्ना खगै भिसी पूजाहारीसे थेदा बलि फुल्बा ग्लारी ख्राङ्गै। पूजाहारीसे चुह्रङ् लसी थे म्हिदा परमप्रभुदेन छ्याम ढिक्ना लबाला लागिरी बलि फुल्माहेन्से थेला पाप माफ तला। चुदे थेसे पापबलिला लागिरी भेटी ग्युला कोला भजी भिसम तिगै दाग आरेबा ग्यु योमो भगै। थेसे थे ग्यु योमोला थोबोरी ह्राङला या थान्गै। ओच्छे मेरी ख्राङ्सी बलि फुल्बा ग्लारी थेसे थे ग्यु योमोदा साइसी पापबलि फुल्गै। जमाहेन्से पूजाहारीसे ह्राङला या जुम्बी पापबलिला कारी ब्लुम्सी मेरी ख्राङ्सी बलि फुल्बा ग्लाला रूगदेरी फोर्गै। ओच्छे लेङ्बा का चा बलि फुल्बा ग्लाला धिरी ल्हूगै। थे पापबलिला जम्मान छि ढिक्ना लबा बलिला छि ह्रङ्नोन लसी तेःगै। ओच्छे पूजाहारीसे थे जम्मान छि परमप्रभुला लागिरी फेसी थान्बा बलिथोरी थान्सी परमप्रभुला ओन्छाङ्री मेरी ख्राङ्सी बलि फुल्बा ग्लारी ख्राङ्गै। पूजाहारीसे चुह्रङ् लसी थे म्हिदा परमप्रभुदेन छ्याम ढिक्ना लबाला लागिरी बलि फुल्माहेन्से थेला पाप माफ तला।’”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.