Eastern Tamang Language Bible
निसाफ 6
गिदोन
इस्राएलीगदेसे जुन ताम परमप्रभुला ङाच्छा नाइबा मुबा, दोःसी थेनोन लजी। ओच्छे परमप्रभुसे थेनीगदेदा निस दिङ्धोना मिद्यानीगदेला यारी जिम्मा पिन्जी। मिद्यानीगदे इस्राएलीगदे भन्दा शक्तिशाली मुबासेलमा मिद्यानीगदेसे इस्राएलीगदेदा ल्हानान नाङ्बाझ्याक्बा लजी। थेतबासेलमा इस्राएलीगदे गङ्रीक्यर मुबा ऊगदेदेन जोगब तखम्बा ग्लागदेरी निसी चिनोन तोःबा तजी। जुन जुन धुइरी इस्राएलीगदेसे ब्लु ढ्वमुबा, थे थे धुइरीन मिद्यानीगदे, अमालेकीगदे, ओच्छे स्यारपट्टि अर्गु य्हुल्ला म्हिगदे खसी इस्राएलीगदेदेन छ्याम लडाइ लमुबा। थेनीगदे इस्राएलीगदेला य्हुल्सारी खसी पाल फ्रेङ्सी चिमुबा। ओच्छे थेनीगदेसे गाजा ङामधोनाला बालीगदे जम्मान नाश लमुबा। थेनीगदेसे इस्राएलीगदेला लागिरी तिगै स्हे आख्लाना राग्यु, म्हेमुइदेन गधागदे जम्मान भोर्मुबा। थेनीगदे ह्राङला म्हेमुइला बथानदेन पालगदे भसी तिरीला हुल ह्रङ् लसी खमुबा। थेनीगदेला ऊँटगदेदेन म्हिगदे झ्यासीन झ्याबारी आखम्बाधोनाला मुबा। ओच्छे थेनीगदे खसी य्हुल्सा पूरन नाश लजी। चुह्रङ् लसी मिद्यानीगदेसे इस्राएलीगदेदा तिगै आरेबा प्राङ्बो स्होजी। ओच्छे इस्राएलीगदेसे घ्रेन काइ तेःसी परमप्रभुदेन छ्याम बिन्ती लजी।
जमाहेन्से मिद्यानीगदेला बिरोध लबाला लागिरी इस्राएलीगदेसे परमप्रभुदेन छ्याम बिन्ती लजी। परमप्रभुसे थेनीगदे मुबा ग्लारी अगमवक्ता गिक पुइखजी। थे अगमवक्तासे थेनीगदेदा परमप्रभु इस्राएलला परमेश्वरसे चुह्रङ् सुङ्बा मुला भिसी पाङ्जी, “एनीगदेदा घ्याबा स्होसी थान्बा मिश्र य्हुल्साग्याम ङाइ एनीगदेदा तेःसी भजी। ङाइ एनीगदेदा मिश्रीगदेला यादेन एनीगदेदा दुख पिन्बा जम्मान म्हिगदेला याग्याम फेजी। ओच्छे थेनीगदेदा ङाइ एनीगदेला ङाच्छाग्याम ताप्जी। ओच्छे थेनीगदेला य्हुल्सा ङाइ एनीगदेदा पिन्जी। ङाइ एनीगदेदा चुह्रङ् भिसी पाङ्बा मुबा, ‘ङा परमप्रभु एनीगदेला परमेश्वर हिन्ना। एनीगदे चिबान लबा एमोरीगदेला य्हुल्साला लागदेदा आतेन्गो।’ तर एनीगदेसे ङाला ताम आङ्यन्नी।”
दाहेन्से परमप्रभुला दूत ओप्रारी खसी अबीएजेरी वंशला योआश भिबा म्हिला सुल्सिङ दोङ टारी चिबा मुबा। योआशला झा गिदोनदा चा मिद्यानीगदेसे आम्राङ्गै भिसी अङ्गुर म्हार्बा कोलरी ग्वा तबान मुबा। जमाहेन्से परमप्रभुला दूत गिदोन मुबा ग्लारी खसी गिदोनदा चुह्रङ् भिसी पाङ्जी, “ए आँट मुबादेन भङ्बा म्हि हिन्ना, परमप्रभु एदेन छ्याम मुला।”
गिदोनसे परमप्रभुला दूतदा चुह्रङ् भिसी पाङ्जी, “लास्सो, चुदे परमप्रभु ङन्देन छ्याम मुला भिसम खाह्रङ् लसी चु जम्मान ताम ङनीथोरी खजी? परमप्रभुसे उदेकला गेगदे लसी मिश्र य्हुल्साग्याम तेःसी भजी भिसी ङन्दा ङन्ना आखेम्हेमेगदेसे सुङ्बा मुबा। तर परमप्रभुसे थे धुइरी लबा जम्मान उदेकला गेगदे चा तिग हिन्ना? दन्दे चा परमप्रभुसे ङन्दा ख्लाबा मुला। ओच्छे ङन्दा मिद्यानीगदेला यारी जिम्मा पिन्बा मुला।”
जमाहेन्से गिदोनपट्टि दोःसी परमप्रभुसे चुह्रङ् भिसी सुङ्जी, “निउ, एसे ह्राङला भङ्ग्याम मिद्यानीगदेला याग्याम इस्राएलदा फेसी भउ। एदा थेनीगदेला गुङ्री पुइबा ङानोन हिन्ना।”
गिदोनसे परमप्रभुदा चुह्रङ् भिसी जोहाब पिन्जी, “लास्सो, प्रभु, खाह्रङ् लसी ङाइ इस्राएलीगदेदा जोगब लखम्ला? ङाला वंशदा स्य्हीगो, मनश्शेला वंश न्हङ्री ङाला वंश चा जम्मान भन्दा कमजोर हिन्ना। ओच्छे ङाला आबाला सन्तान न्हङ्री ङा चा जम्मान भन्दा जजा हिन्ना।”
परमप्रभुसे चुह्रङ् भिसी पाङ्जी, “ङा एदेन छ्यामनोन तला, जमाहेन्से एसे चा यागर गिक म्हिदा साइबा ह्रङ् लसीन मिद्यानीगदेदा साइला।”
गिदोनसे चुह्रङ् भिसी पाङ्जी, “चुदे ङा ह्राङग्याम दया याङ्बा म्हि हिन्सम ओच्छे ङादेन छ्याम ताम पाङ्बा ह्राङनोन हिन्सम ङादा चिनु गिक उन्गो। ह्राङदा भेटी फुल्बाला लागिरी ङा भेटी भसी चुरी आदोखदेधोना ह्राङ चुग्याम आफेप्गो भिबा ङाला बिन्ती मुला।”
जमाहेन्से परमप्रभुसे “ए चुरी आदोखदेधोना ङा चुरीन चिला” भिसी सुङ्जी।
जमाहेन्से गिदोन दिम न्हङ्री निजी, ओच्छे बोको गिक साइजी, ओच्छे खमिर आयुना फाम ङ्हा भ्रा झ्योप्सी गेङ ख्राङ्जी। जमाहेन्से थेसे थे बोकोला स्या चा डालोरी गिकरी युजी। ओच्छे खुकु चा खोरे गिकरी युसी मङ्ग्यार सुल्सिङ दोङ टारी भसी परमप्रभुला दूतदा पिन्जी। परमेश्वरला दूतसे गिदोनदा चुह्रङ् भिसी पाङ्जी, “थे स्यादेन खमिर आयुना ख्राङ्बा गेङ चु युङ्बाथोरी थान्गो, ओच्छे खुकु चा थेथोरी ल्हूगो।” ओच्छे गिदोनसे थेह्रङ्नोन लजी। जमाहेन्से परमप्रभुला दूतसे ह्राङला यारी मुबा कडीला जोसे थे स्यादेन गेङ थुर्जी। जमाहेन्से युङ्बाग्याम मे थोन्सी थे स्यादेन गेङ क्रोसी मेफ्रा दोजी। जमाहेन्से गिदोनसे परमप्रभुला दूतदा थेरी आम्राङ्नी।
जमाहेन्से थे मि परमप्रभुला दूत गा चिम भिसी गिदोनसे था याङ्जी, ओच्छे गिदोनसे चुह्रङ् भिसी पाङ्जी, “आम्मै! परमप्रभु परमेश्वर, ङाइ मि ह्राङला दूतदा गा म्राङ्जीम।”
तर परमप्रभुसे गिदोनदा, “आलोङ्गो, ढुक्क तसी चिउ, ए आसि” भिसी सुङ्जी। थेरी गिदोनसे परमप्रभुला लागिरी बलि फुल्बा ग्ला गिक स्होजी, ओच्छे थे ग्लाला मिन “यहवे-शालोम” थान्जी। यहवे-शालोम भिबा चा परमप्रभु शान्ति पिन्बा परमेश्वर भिबा हिन्ना। थे ग्ला तिनीधोनाएनोन अबीएजेरीला नाम्सा ओप्रारी मुला।
थेकुनु म्हुनङ् परमप्रभुसे गिदोनदा चुह्रङ् भिसी सुङ्जी, “एसे ह्राङला आबाला म्हे बथानगदेग्याम बहर गिक भउ। ओच्छे निस दिङ् तबा अर्गु बहर गिकएनोन भउ। एला आबासे बाल लाला लागिरी स्होबा बलि लबा ग्ला फुप्गो। ओच्छे थेनोन बलि लबा ग्लाला ङाम्री मुबा अशेरा लुला मूर्तिएनोन फुप्सी छ्याकछिक लउ। जमाहेन्से परमप्रभु एला परमेश्वरला लागिरी चुनोन गङ्री बलि फुल्बा ग्ला गिक ज्यना लसी स्होउ। ओच्छे एसे फुप्बा अशेरा लुला मूर्तिला सिङ फार्सी थे निस दिङ् तबा अर्गु चा म्हे बहर भसी मेरी ख्राङ्सी फुल्बा बलि फुल्गो।” जमाहेन्से गिदोनसे ह्राङला नोकरगदे न्हङ्ला नोकर च्युइदा छ्यामनोन भोर्सी परमप्रभुसे थेदा सुङ्बा अन्छार लजी। तर थे ह्राङला वंशदेन सहरला म्हिगदे म्राङ्सी लोङ्मुबा। थेतबासेलमा थेसे चु गे धिनसे आलना म्हुनङ् लजी।
न्हङ्गरदाङ स्य्होरीन सहरला म्हिगदे रेःमाहेन्से थेनीगदेसे बाल लाला लागिरी बलि लबा ग्लादेन थेला ङाम्री मुबा अशेरा लुला मूर्तिएनोन फुप्सी छ्याकछिक निना लबा म्राङ्जी। ओच्छे परमप्रभुला लागिरी बलि फुल्बाला लागिरी गिदोनसे स्होबा बलि फुल्बा ग्लारी थे निस दिङ् तबा अर्गु म्हे बहरदा मेरी ख्राङ्सी बलि फुल्बा म्राङ्जी। थेनीगदेसे ह्राङ ह्राङ न्हङ्री “चु खाल्से लजी तला?” भिसी ङ्योइबा छार्बा लबारी छ्याइजी। ओच्छे ल्हानान ङ्योइबा छार्बा लमाहेन्से योआशला झा गिदोनसे लबा हिन्ना भिबा ताम था याङ्जी। जमाहेन्से सहरला म्हिगदेसे योआशदा चुह्रङ् भिसी पाङ्जी, “एला झादा मङ्ग्यार भउ, थेदा साइनोन तोःला। तिग्दा भिसम थेसे बाल लाला लागिरी बलि लबारी स्होबा ग्ला फुप्जीम, ओच्छे थेनोन बलि लबा ग्लाला ङाम्री मुबा अशेरा लुला मूर्तिएनोन फुप्सी छ्याकछिक लजीम।” तर योआशसे ह्राङला क्युर्नोन मुबा बिरोध लबा म्हिगदेदा चुह्रङ् भिसी पाङ्जी, “ह्राङनी तिग्दा बाल लाला लागिरी ना तासी क्रिङ्सी भ्रबा? चुदे ह्राङनीसे बाल लादा जोगब लबा गे य्हाङला गे हिन्ना भिसी म्हन्बा हिन्सम थेला लागिरी ना तासी क्रिङ्सी भ्रबा म्हिगदेदा चा न्हाङ्गर स्य्होरीन साइला। चुदे बालनोन ला हिन्सम थेला लागिरी बलि लबारी स्होबा ग्ला खाल्से फुप्बा हिन्ना थे म्हिला बारेरी बाल लासेन पाङ्गै।” थे धिनकुनु थेनीगदेसे चुह्रङ् भिसी पाङ्बान गिदोनना मिन यरूब-बाल थान्जी, यरूब-बाल भिबा चा “बाल ला ह्राङसेन लडाइ लगै।” तिग्दा भिसम चुनोन म्हिसे बाल लाला लागिरी बलि लबाला लागिरी स्होबा ग्ला फुप्बा मुला।
जमाहेन्से जम्मान मिद्यानी, अमालेकीदेन स्यारपट्टिला अर्गु य्हुल्ला म्हिगदे ह्राङ ह्राङ न्हङ्री ढिक्जी। ओच्छे थेनीगदे जम्मान यर्दन स्योङ् थासी यिजरेलला ब्याँसीरी खसी पाल स्होसी चिजी। तर परमप्रभुला आत्मा गिदोनथोरी फेप्खजी। जमाहेन्से गिदोनसे बिगुल ह्राप्बान अबीएजेरी वंशला म्हिगदे ह्राङदेन छ्यामनोन खउ भिसी ङ्योइजी। मनश्शेगदेदाएनोन ह्राङदेन छ्यामनोन भ्रउ भिसी पाङ्बाला लागिरी गिदोनसे मनश्शेला य्हुल्सा नाङ्नोन समाचार भोर्बा म्हिगदे पुइजी। ओच्छे आशेर, जबूलूनदेन नप्तालीगदेदाएनोन ह्राङदेन छ्याम भ्रउ भिसी पाङ्बाला लागिरी गिदोनसे समाचार भोर्बा म्हिगदेदान थेनीगदे मुबा ग्लारी पुइजी। ओच्छे थेनीगदेएनोन खसी गिदोनदेन छ्याम ढिक्जी।
गिदोनसे परमेश्वरदा चुह्रङ् भिसी पाङ्जी, “चुदे ह्राङसे कबुल लबा अन्छार इस्राएलीगदेदा ङाग्याम सोना लजी भिसम, स्य्हीगो, दाहेन्से ङाइ खलारी ग्युला ऊन थान्ना। न्हाङ्गर स्य्होरी च्यामा चुदे चु ऊनथोरी जे शीत ताइसी चु ऊन थान्बा ग्लाला क्यारक्युरला सरी चा शीत आताइना खार्बा स म्राङ्जी भिसम ह्राङसे कबुल लबा अन्छार पक्का ह्राङसे ङालान याग्याम इस्राएलीगदेदा फेनम भिसी ङाइ था याङ्ला।” न्हङ्गरदाङ स्य्होरी रेःसी च्यामा गिदोनसे पाङ्बा ह्रङ्नोन थे ऊन जे शीतसे बम्बा मुबा। ओच्छे गिदोनसे थे ऊन ज्योर्मा ऊनग्याम खोरे नाङ ते क्युइ थोन्जी। जमाहेन्से गिदोनसे परमेश्वरदा चुह्रङ् भिसी पाङ्जी, “ह्राङ ङादेन छ्याम बोमो आखउ। ङादा तिरेम अझै ताम गिक पाङ्पुङ्गो। ङाला चु बिन्ती मुला, ङादा दोःसी तिरेम चु ऊन थान्पुङ्गो। चु पाल्से स चा पूरन शीतसे बम्गै, ओच्छे ऊन चा खार्बान चिगै।” थेकुनु म्हुनङ्एनोन परमेश्वरसे गिदोनसे पाङ्बा ह्रङ्नोन लजी। न्हङ्गरदाङ स्य्होरी रेःसी च्याम ऊन पूरन खर्बा मुबा, तर ऊन थान्बा ग्लाला क्यारक्युरला स चा शीतसे बम्बा मुबा।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.