Eastern Tamang Language Bible
यहो 24
यहोशूसे शेकेमरी इस्राएलीगदेदेन छ्याम ताम लबा
जमाहेन्से यहोशूसे इस्राएलीगदेला जम्मान वंशदा शकेमरी ह्रुप लजी। थेसे इस्राएलला गन्बागदे, वंश वंशला मूल म्हिगदे, निसाफ लबा म्हिगदेदेन हाकिमगदेदाएनोन ङ्योइजी, ओच्छे थेनीगदे ह्राङ ह्राङनोन परमेश्वरला ङाच्छा खजी। यहोशूसे जम्मान म्हिगदेदा चुह्रङ् भिसी पाङ्जी, “परमप्रभु इस्राएलला परमेश्वरसे चुह्रङ् भिसी सुङ्बा मुला, ‘ओन्मा एनीगदेला आखेम्हेमेगदे अब्राहामदेन नाहोरला आबा तेरह यूफ्रेटिस स्योङ् क्याम्सङ् चिमुबा, थेरी थेनीगदेसे अर्गु लागदेदा तेन्मुबा।1 तर ङाइ एनीगदेला म्हेमे अब्राहामदा यूफ्रेटिस स्योङ् क्याम्सङ्ग्याम भजी, ओच्छे थेदा कनान य्हुल्साला जम्मान ग्लारी थोजी, ओच्छे थेला सन्तानदा बढब तना लजी। ङाइ थेदा इसहाक पिन्जी।2 दोःसी ङाइ इसहाकदा याकूबदेन एसाव पिन्जी। ओच्छे ङाइ एसावदा चिबाला लागिरी सेइरला गङ्पट्टिला य्हुल्सा पिन्जी। तर याकूबदेन थेला झागदे चा मिश्र य्हुल्सारीक्यार निजी।3
“‘जमाहेन्से मोशादेन हारूनदा पुइसी थेरी ङाइ लबा गेग्याम मिश्र य्हुल्सारी आपत विपत पुइखजी, ओच्छे लिच्छा ङाइ एनीगदेदा थेग्याम तेःसी भजी।4 ङाइ एनीगदेला आखेम्हेमेगदेदा मिश्र य्हुल्साग्याम तेःसी भजी, ओच्छे एनीगदे समुद्रधोना दोखजी, ओच्छे एनीगदेला आखेम्हेमेगदेदा मिश्रीगदेसे रथदेन तागदेरी क्रेसी वाला समुद्रधोना ताप्सी खजी।5 तर थेनीगदेसे परमप्रभुदा बिन्ती लजी, ओच्छे परमप्रभुसे एनीगदेदेन मिश्रीगदेला गुङ्री धोपधोप तना लसी समुद्र थेनीगदेपट्टि दोःसी थेनीगदेदा डुबब तना लजी। ङाइ मिश्र य्हुल्सारी तिग लजी, थे एनीगदे ह्राङलान मीसे म्राङ्बा मुला। जमाहेन्से एनीगदे ल्हानान धिनधोना तोङ्तोङ्बा ग्लारी तजी।
“‘ङाइ एनीगदेदा यर्दन स्योङ्ला स्यारपट्टि चिबा एमोरीगदेला य्हुल्सारी भजी। थेनीगदेसे एनीगदेदेन छ्याम लडाइ लजी, ओच्छे ङाइ थेनीगदेदा एनीगदेला यारी जिम्मा पिन्जी, ओच्छे एनीगदेसे थेनीगदेला य्हुल्सा ह्राङला यारी किन्जी। ङाइ थेनीगदेदा एनीगदेलान ओन्छाङ्री नाश लजी।6 जमाहेन्से मोआबला ग्ले सिप्पोरला झा बालाकसे इस्राएलीगदेदेन छ्याम लडाइ लजी। ओच्छे एनीगदेदा केःबाला लागिरी थेसे बओरला झा बालामदा ङ्योइबारी पुइजी।7 तर ङाइ बालामला प्रार्थना आङ्यन्नी। थेतबासेलमा थेसे बरू एनीगदेदा मोलम पिन्बाला पिन्बान लजी। चुह्रङ् लसी ङाइ एनीगदेदा थेला याग्याम जोगब लजी। जमाहेन्से एनीगदे यर्दन स्योङ् थासी यरीहोरी खजी। ओच्छे यरीहोला म्हिगदे, एमोरी, परिज्जी, कनानी, हित्ती, गिर्गाशी, हिव्वीदेन यबूसीगदेसे एनीगदेदेन छ्याम लडाइ लजी। तर ङाइ थेनीगदेदा एनीगदेला यारी जिम्मा पिन्जी।8 ङाइ एनीगदेला ङाच्छा ङाच्छा प्वाँहार गिक पुइजी, थे प्वाँहारसे थेनीगदेदेन एमोरीगदेला ग्ले न्हीदाएनोन एनीगदेला ओन्छाङ्ग्याम ताप्जी। थे गे एनीगदेसे ह्राङला तरवारदेन म्यादलीग्याम लबा आहिन।9 चुह्रङ् लसी एनीगदेसे दुखन आलबा य्हुल्सादेन एनीगदेसे स्होनोन आस्होबा सहरगदे ङाइ एनीगदेदा पिन्जी। एनीगदे थेनोन ग्लारी चिबान मुला, ओच्छे ह्राङसे सूनोन आसूबा अङ्गुरदेन जैतून एनीगदेसे चबान मुला।’10
“थेतबासेलमा दाहेन्से परमप्रभुदा मान लउ, ओच्छे जम्मान तामरी विश्वास लखम्बा म्हि दोसी परमप्रभुला गे लउ। एनीगदेला आखेम्हेमेगदेसे यूफ्रेटिस स्योङ् क्याम्सङ्देन मिश्र य्हुल्सारी तेन्बा लागदेदा भ्याङ्गो, ओच्छे परमप्रभुला गे लउ। तर चुदे एनीगदेदा परमप्रभुला गे लबा सेम आरेसम एनीगदेसे खाल्ला गे लबा, तिनीन एनीगदेसे धम्गो। एनीगदेला आखेम्हेमेगदेसे यूफ्रेटिस स्योङ् क्याम्सङ् तेन्बा लागदेदा तेन्बा की एनीगदे दन्दे चिबा य्हुल्साला एमोरीगदेला लागदे तेन्बा। तर ङादेन ङाला म्हेमेसे चा परमप्रभुलान गे लला।”
जमाहेन्से म्हिगदेसे चुह्रङ् भिसी पाङ्जी, “ङन्से परमप्रभुदा ख्लासी अर्गु लागदेला पूजा लआतोःगै। तिग्दा भिसम परमप्रभु ङन्ना परमेश्वरसेन ङन्देन ङन्ना आखेम्हेमेगदेदा घ्याबा स्होसी थान्बा दिम मिश्र य्हुल्साग्याम तेःसी भबा हिन्ना, ओच्छे ङन्नान मीला ङाच्छा थेह्रङ्बा उदेकला घ्रेन गेगदे लजी। ओच्छे ङनी खानङ्दम्मान निसैनोन, जुन य्हुल्ला म्हिगदेला गुङ्ग्याम खसैनोन परमप्रभुसे ङन्दा जोगब लजी। परमप्रभुसे ङन्ना ङाच्छापट्टिग्याम जम्मान य्हुल्ला म्हिगदेदेन चु य्हुल्सारी चिबा एमोरीगदेदाएनोन ताप्जी। थेतबासेलमा ङन्सेनोन परमप्रभुला गे लला। तिग्दा भिसम थेनोन ङन्ना परमेश्वर हिन्ना।”
यहोशूसे म्हिगदेदा चुह्रङ् भिसी पाङ्जी, “एनीगदेसे परमप्रभुला गे लबारी आखम, तिग्दा भिसम थे तिगै दोष आरेबा परमेश्वर हिन्ना। थे डाह लबा परमेश्वर हिन्ना। थेसे एनीगदेसे लबा नाइबा गेदेन एनीगदेला पाप माफ आल। एनीगदेसे परमप्रभुदा ख्लासी अर्गु लागदे तेन्जी भिसम दन्देधोना थेसे एनीगदेदा ज्यबा लसैनोन थे एनीगदेला बिरोधरी रेःला, ओच्छे एनीगदेदा नाश लला।”
तर म्हिगदेसे यहोशूदा चुह्रङ् भिसी पाङ्जी, “आहिन, ङनी परमप्रभुलान गे लला।”
जमाहेन्से यहोशूसे थेनीगदेदा चुह्रङ् भिसी पाङ्जी, “एनीगदे ह्राङसेन परमप्रभुला गे लबारी पक्का लसी एनीगदे ह्राङनोन ह्राङला लागिरी साक्षी दोबा मुला।” ओच्छे थेनीगदेसे “ङनी ह्राङनोन साक्षी मुला” भिसी पाङ्जी।
यहोशूसे चुह्रङ् भिसी पाङ्जी, “थेतबासेलमा दाहेन्से एनीगदेसे ह्राङदेन छ्याम मुबा अर्गु लागदेदा भ्याङ्गो, ओच्छे एनीगदेला सेम परमप्रभु इस्राएलला परमेश्वरपट्टि दोःगो।”
ओच्छे म्हिगदेसे यहोशूदा चुह्रङ् भिसी पाङ्जी, “ङन्से परमप्रभु ङन्ना परमेश्वरलान गे लला, ओच्छे ङनी थेलान बचन अन्छार भ्रला।”
थेनोन धिनकुनु यहोशूसे म्हिगदेदेन छ्याम कबुल गिक लजी, ओच्छे थेसे शकेमरी थेनीगदेला लागिरी ठिम स्होसी पिन्जी। चु जम्मान तामगदे यहोशूसे परमेश्वरला ठिमला किताबरी भ्रिजी। ओच्छे थेसे घ्रेन युङ्बा गिक भसी परमप्रभु धन्छ्याबा पाल ङाम्ला सुल्सिङ दोङ टारी ठाडो लसी क्यासी थान्जी। यहोशूसे जम्मान म्हिगदेदा चुह्रङ् भिसी पाङ्जी, “च्यागो, चु युङ्बा य्हाङला बिरोधरी साक्षी दोबा मुला, तिग्दा भिसम चुसे परमप्रभुसे य्हाङदा सुङ्बा जम्मान ताम थेःबा मुला। एनीगदे ह्राङला परमेश्वरदा विश्वास आलबा म्हि दोजी भिसम थे युङ्बा एनीगदेला बिरोधरी साक्षी मुला।” चुह्रङ् लसी यहोशूसे थेनीगदेदा थेनीगदे ह्राङ ह्राङसे याङ्बा ग्लारी पुइजी।
यहोशूदेन एलाजार सिबा
जमाहेन्से परमप्रभुला गे लबा म्हि नूनना झा यहोशू सिजी, थे ग्यार्जा गिकसे च्युइ दिङ् तबा मुला। ओच्छे थेनीगदेसे थेदा गाश गङ्ला झ्याङ्पट्टि एफ्राइमला गङ्पट्टिला य्हुल्सारी थेलान स तिम्नथ-सेरहला साँध भन्दा न्हङ्पट्टिन ल्हुजी।11
यहोशू सोदेधोना इस्राएलीगदेसे परमप्रभुलान गे लजी, ओच्छे थे सिसी जिन्माहेन्सेएनोन थेनीगदेसे परमप्रभुलान गे लजी। ओच्छे अर्गु सोसी चिबा म्हिगदेदेन परमप्रभुसे इस्राएलला लागिरी लबा जम्मान गेला बारेरी था मुबा गन्बागदे सोदेधोनाएनोन इस्राएलीगदेसे परमप्रभुलान गे लजी।
इस्राएलीगदेसे मिश्र य्हुल्साग्याम भबा योसेफला ह्रुइदा शकेमरी ल्हुजी। थे स चा शकेमला आबा हमोरला झागदेदेन छ्याम याकूबसे म्हुइला ग्यार्जा गिक टोगलरी ग्लुबा मुबा। थे ग्ला योसेफला सन्तानना भोरी परब तजी।12
ओच्छे हारूनना झा एलाजारएनोन सिजी, ओच्छे थेदा एफ्राइमला गङ्पट्टिला य्हुल्साला गिबारी ल्हुजी। थे सहर थेला झा पीनहासदा पिन्बा मुबा।
Source notes (12)
- Cross-reference ठुङ् ११:२७
- Cross-reference ठुङ् १२:१-९; २१:१-३
- Cross-reference ठुङ् २५:२४-२६; ३६:८; ४६:१-७; ठिम २:५
- Cross-reference थोन्बा ३:१-१२:४२
- Cross-reference थोन्बा १४:१-३१
- Cross-reference झ्याबा २१:२१-३५
- Cross-reference झ्याबा २२:१-२४:२५
- Cross-reference यहो ३:१४-१७; ६:१-२१
- Cross-reference थोन्बा २३:२८; ठिम ७:२०
- Cross-reference ठिम ६:१०-११
- Cross-reference यहो १९:४९-५०
- Cross-reference ठुङ् ३३:१९; ५०:२४-२५; थोन्बा १३:१९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.