Eastern Tamang Language Bible
यहो 16
मनश्शेला भोरी परब तबा स
योसेफला सन्तानना भो चुनोन हिन्ना, थेला साँध यरीहो सहरला स्यारपट्टि मुबा क्युइला मूल, अथवा यरीहोला ङाम्ला यर्दन स्योङ्हेन्से खानपट्टि निबा ग्यामला तोङ्तोङ्बा ग्ला तबान बेथेलला गङ्पट्टिला य्हुल्साधोना दोबा मुबा। ओच्छे बेथेलहेन्से लूज चाल्सी अरकीला साँधला अतारोतधोनान दोबा मुबा। जमाहेन्से थे साँध न्हुपपट्टिग्याम मार यल्पेतीला साँध तबान मारपट्टिला बेथ-होरोनना कुनी तबान गेजेरधोनान दोबा मुबा ओच्छे समुद्ररी दोसी थुम्बा मुला। चुह्रङ् लसी योसेफला सन्तान न्ही मनश्शेदेन एफ्राइमसे ह्राङला यारी किन्जी।
एफ्राइमला भो
एफ्राइमला सन्तानना साँध थेनीगदेला वंश वंश अन्छार चुनोन हिन्ना। थेनीगदेसे याङ्बा भोला स्यारपट्टिला साँध चा अतारोत-अद्दारहेन्से क्यारपट्टिला बेथ-होरोन तसी समुद्रधोना मुबा। थे साँध झ्याङ्पट्टिला मिक्मतात तसी स्यारपट्टि दोःसी तानत-शीलो दोसी चुला कुनीकुनी तबान यानोहधोनान चाल्बा मुला। ओच्छे थे यानोहहेन्से अतारोतदेन नाराधोना दोसी मारपट्टि यरीहो तबान यर्दनधोना दोबा मुबा। थे साँध तप्पूहग्याम न्हुपपट्टि तसी कना स्योङ्धोना दोसी समुद्ररी थुम्बा मुबा। एफ्राइमला वंशसे याङ्बा स चा थेनीगदेला वंश वंश अन्छार चुनोन हिन्ना। चु बाहेक मनश्शेला सन्तानना सम्पत्ति न्हङ्ग्याम जम्मान सहरगदेदेन थेला नाम्सागदेनोन एफ्राइमला सन्तानना लागिरी फेसी थान्बा मुबा। तर थेनीगदेसे गेजेररी मुबा कनानीगदेदा आताप्नी। तिनीला धिनधोना कनानीगदे एफ्राइमीगदेला गुङ्री मुला। तर थेनीगदे तिगै आयाङ्बा घ्याबादेन घ्याबास्या दोबा मुला।1
Source notes (1)
- Cross-reference निसाफ १:२९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.