Eastern Tamang Language Bible
अय्यू 29
अय्यूबसे पाङ्बा थुम्ला ताम
अय्यूबसे दोःसी चुह्रङ् भिसी पाङ्जी,
“ङाच्छा परमेश्वरसे ङादा खाह्रङ् लसी जोगब लसी थान्बा मुबा,
थेह्रङ् लसीन दन्देनोन ङादा वास्ता लबा हिन्सम गादे ज्यबा तसेला मुबा!
थे धुइरी ङादेन छ्याम परमेश्वरला य्हाल मुबा,
ओच्छे धोपधोपरी भ्रमा थेनोन य्हालसे ङादा ग्याम उन्मुबा।
थे धुइरी ङादा फलिफाप तबा मुबा,
ओच्छे परमेश्वर ङाला ह्रो दोबासेलमा ङाला दिम जोगब तबा मुबा।
थे धुइरी जम्मान भन्दा घ्रेन परमेश्वर ङादेन छ्यामनोन धन्छ्यामुबा,
ओच्छे ङाला झा झामेगदेएनोन ङाला क्युर्सीन चिमुबा।
थे धुइरी ङाला म्हेमुइसे ल्हानान ङ्हे पिन्मुबा,
ओच्छे युङ्बान युङ्बा मुबा सरीनोन ङाइ जैतून खेती लमा ल्हेसी निमुबा।
थे धुइरी सहरला मूल म्रापरी गन्बागदे ह्रुप तमुबा,
ओच्छे ङाएनोन निसी थेनीगदेन छ्याम चिमुबा।
थे धुइरी ङादा म्राङ्मा भ्योनगदेसे ग्याम ख्लामुबा,
ओच्छे खेप्बा दोबा म्हिगदेएनोन ङादा मान लबान रेःमुबा।
ङादा म्राङ्सी गन्बादेएनोन कुटिसी चिमुबा,
ओच्छे स्य्हान्दोदाएनोन कुटिसी चिउ भिसी यासे चाल लमुबा।
ओच्छे य्हुल्साला घ्रेन घ्रेन म्हिगदेसेनोन तिगै आपाङ्मुबा,
थेनीगदे कुटिसी चिमुबा।
“ङाला ताम थेःबा म्हिगदेसे ङादा ज्यबा म्हि भिसी पाङ्मुबा,
ओच्छे ङादा म्राङ्बा म्हिगदेसे ङाला बारेरी ज्यबा ज्यबा ताम पाङ्मुबा।
तिग्दा भिसम प्राङ्बोगदेसे ह्रो ह्रीमा ङाइ थेनीगदेदा ह्रो लमुबा,
ओच्छे जम्मानग्याम दुख याङ्बा टुहुरा टुहुरीगदेदा ङाइ ह्रो लमुबा।
सेम सिसी जिन्बा म्हिगदेदा ह्रो लमा थेनीगदेसे ङादा मोलम पिन्मुबा।
ओच्छे ङाइ ह्रेम्बो सिबा म्रिङ्म्हेमेगदेदा ताङ्सी ताङ्सी व्हाइ गोखम्बा तना लमुबा।
परमेश्वरदा सेम निबा बानीबेहोरदा ङाइ क्वान क्वान्बा ह्रङ् लसी क्वान्सी भ्रमुबा,
ओच्छे ठीक निसाफ लबा तामदा चा ङाइ फेटा थोइबा ह्रङ् लसी थोइसी भ्रमुबा।
मी आम्राङ्बा म्हिला लागिरी ङा थेनीगदेला मी दोमुबा,
ओच्छे कुज्या म्हिगदेला लागिरी ङा थेनीगदेला काङ दोमुबा।
तिगै आरेबा म्हिगदेला लागिरी ङा थेनीगदेला आबा दोमुबा,
ओच्छे विदेशीगदेला मुद्दा च्यामा ङाइ थेनीगदेला पक्षरी तसी च्यामुबा।
नाइबा गे लबा म्हिगदेला शक्तिदा ङाइ नाश लमुबा,
ओच्छे थेनीगदेसे ह्राङला तहरी थान्बा म्हिगदेदा ङाइ थेनीगदेला तहग्याम फेमुबा।
“ङाइ चुह्रङ् भिसी म्हन्मुबा, ‘ङा ल्हानान धिनधोन सोला,
ओच्छे ज्यना लसी ङा ङालान दिमरी सिला।
ङा टागदेसे क्युइ स्याप्बा दोङ ह्रङ्बान मुबा,
ओच्छे म्हुन गिकला शितसे बम्बा दोङला हाँगागदे ह्रङ्बान मुबा।
ङादा जम्मासेन हाइ हाइ लमुबा,
ङाला आँट खाइमै आम्हनी।’
घ्रेन आश थोसी म्हिगदेसे ङाला ताम ङ्यन्मुबा,
ङाग्याम सल्लाह किन्मा कुटिसी चिसी ङ्यन्मुबा।
ङाइ जम्मान ताम पाङ्सी जिन्माहेन्से थेनीगदेसे पाङ्तोःबा ताम तिगैनोन आतमुबा।
ङाइ पाङ्बा ताम थेनीगदेसे ज्यना लसी घोमुबा।
बर्खरी नाम खमा खेती लबा म्हिगदे ताङ्बा ह्रङ्नोन लसी ङाइ पाङ्बा ताम थेःसी थेनीगदे ताङ्मुबा।
ङा मुसुक्क नेमा थेनीगदेसे भङ् याङ्मुबा,
ओच्छे ङाला य्हाल य्हाल्बा लि म्राङ्मा थेनीगदेदा आँट खमुबा।
खजिबा ग्यामरी भ्रतोःला भिसी ङाइ थेनीगदेदा ग्याम उन्मुबा,
ओच्छे ग्लेसे ह्राङला सिपाहीगदेदा थोबा ह्रङ्नोन लसी ङाइ थेनीगदेदा थोमुबा।
होह्रङ् लसीन थेनीगदेला सेम सिबा धुइरी ङाइ थेनीगदेदा आँट पिन्मुबा।”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.