Eastern Tamang Language Bible
यर्मि 6
शत्रुगदे क्युर्सीनग्याम खसी यरूशलेमदा गुङ्री झाङ्बा
परमप्रभुसे चुह्रङ् भिसी सुङ्बा मुला, “बेन्यामीनीगदे, जोगब तबाला लागिरी यरूशलेमग्याम थोन्सी य्हार्गो! तकोरी बिगुल ह्राप्गो ओच्छे बेथ-हक्केरेमरी मे फुइसी म्युगुसे चाल पिन्गो! तिग्दा भिसम झ्याङ्ग्याम घ्रेन नाश लबा शक्ति खबान मुला। जेःबा सियोन सहर ङाइ एदा नाश लला। गोठालोगदेदेन ग्युगदेसे गङ्नोन प्लिङ्बा ह्रङ् लसी ग्लेगदे ह्राङला सिपाहीगदेदा छ्यामनोन भसी सहरला क्युर्सीन पाल फ्रेङ्सी चिला। ओच्छे थेनीगदेसे ह्राङ ह्राङसे किन्तोःबा ग्ला च्यासी चिला।”1
ग्लेगदेसे चुह्रङ् भिसी पाङ्ला, “यरूशलेमदेन छ्याम लडाइ लबारी जम्मान स्हे तयार लउ। य्हाङसे थेनीगदेदेन छ्याम धिनी गुङ्रीन लडाइ लइ। तर घाइसी जिन्जी, धुइ निसी जिन्जी, धिनी घल्बारीन छ्याइबा मुला। थेतबासेलमा रेःगो, य्हाङसे म्हुनङ्नोन थेनीगदेदेन छ्याम लडाइ लइ। ओच्छे थेनीगदेसे लडाइ लबाला लागिरी स्होबा ग्लागदे नाश लइ।”
जम्मान भन्दा घ्रेन परमप्रभुसे थे ग्लेगदेदा चुह्रङ् भिसी सुङ्जी, “दोङगदे थासी गुर्ना लउ, ओच्छे यरूशलेमला बिरोधरी लडाइ लबाला लागिरी नोबा ग्लागदे2 स्होउ। ङाइ चु सहरदा सजाय पिन्नोन पिन्ना। तिग्दा भिसम चु सहर अर्गुदा नाङ्बाझ्याक्बा लबा तामसे प्लिङ्बा मुला। खाह्रङ् लसी इनाररी क्युइ थोन्मुला, थेह्रङ् लसीन यरूशलेमसे नाइबा ताम जे तेःमुला। थे न्हङ्री नाइबा खबा गेदेन नाश लबा ताम जे थेःमुला। ङाइ थेरी सदन चोटनोन चोट तबादेन रोग जे म्राङ्बा मुला।”
परमप्रभुसे चुह्रङ् भिसी सुङ्बा मुला, “यरूशलेमला म्हिगदे, चु ताम होस लसी ङ्यन्गो, आहिन्सम ङा एनीगदेग्याम थारेङ्नोन चिला। ङाइ एनीगदेला य्हुल्सादा तोङ्तोङ्बा तना लला, थेरी खालैनोन आचि।”
बिरोध लबा इस्राएल
जम्मान भन्दा घ्रेन परमप्रभुसे ङादा चुह्रङ् भिसी सुङ्जी, “अङ्गुरला दोङरी अङ्गुर गिकनोन आख्लाना थुबा ह्रङ् लसी इस्राएलला सोबा म्हिगदेदाएनोन गिकनोन आख्लाना जम्मानदान नाश लला। थेतबासेलमा धुइ मुमन एसे स्याप्तेबा जम्मान म्हिगदेदा जोगब लसी थान्गो।”
जमाहेन्से ङाइ परमप्रभुदा चुह्रङ् भिसी जोहाब पिन्जी, “ङाइ खाल्दा पाङ्से ओच्छे होशियार तना लसे? ङाला ताम खाल्से ङ्यन्ना? थेनीगदेला नाब्यङ् बन्द तबा मुला। थेनीगदेसे थेःबारी आखम्मुला। परमप्रभुला बचन थेनीगदेला लागिरी सेम आनिबा ताम तबा मुला। थेनीगदेसे बचन ङ्यन्बा सेमनोन आलमुला। तर परमप्रभुला बोमोसे ङा प्लिङ्बा मुला। दाहेन्से ङाइ थे बोमो नाबारी आखम।”
जमाहेन्से परमप्रभुसे ङादा चुह्रङ् भिसी सुङ्जी, “ङाला थे बोमो ग्याम ग्यामरी मुबा कोलागदेदेन ह्रापह्रुप तसी चिबा भ्योन म्हिगदेथोरी ल्हुगो। थे बोमोसे म्रिङ्देन ह्रेम्बो न्हीदान ओच्छे खेप्बा खुइदेन दिङ् निसी जिन्बागदे खालैदान आख्ला। चु य्हुल्साला म्हिगदेदा सजाय पिन्बारी ङाइ ङाला या थीमा थेनीगदेला दिम, भु व्हारादेन म्रिङएनोन अर्गुदा पिन्ना।3 प्राङ्बो फ्युक्पो जम्मान म्हिगदेसे अर्गुदा ठगब लसी धन सम्पत्ति स्होबारी म्हाइमुला। अगमवक्तादेन पूजाहारीगदे जम्मासेन फट्टा ताम जे लमुला। ङाला म्हिगदेदा ल्हानान चोट तसैनोन उदि उदि जे चोट तबा ह्रङ् लसी थेनीगदेसे मलम जे फोर्सी खिमुला। ओच्छे सुख शान्ति आरेसैनोन थेनीगदेसे ‘सुख शान्ति मुला, सुख शान्ति मुला’ भिसी पाङ्मुला। तिग थेनीगदे ह्राङला नाइबा बानीबेहोर म्राङ्सी पेःबा मुला? अँहँ, थेनीगदे उदिदिएनोन पेःबा आरे। पेःसी लीनोन वाप्वाप तबा भिबा तिग हिन्ना, थेनीगदेदा थानोन आरे। थेतबासेलमा नाश तबागदेदेन छ्यामनोन थेनीगदेएनोन नाश तला। ङाइ थेनीगदेदा सजाय पिन्मा थेनीगदे नाश तला।” चु ताम ङा परमप्रभुसेन पाङ्बा हिन्ना।
इस्राएलीगदे परमप्रभुसे कुल्बा अन्छार आभ्रबा
परमप्रभुसे ह्राङला म्हिगदेदा चुह्रङ् भिसी सुङ्जी, “ग्याम दोबाटोरी राप्सी च्यागो, ओन्माला ग्यामगदेदेन जम्मान भन्दा ज्यबा ग्याम म्हाइगो। ओच्छे थेनोन ग्यामरी भ्रउ, ओच्छे एनीगदेला ब्लप्बा साल्ला। तर एनीगदेसे ‘ङनी थे ग्यामरी आभ्र’ भिसी पाङ्जी। ङाइ एनीगदेला लागिरी पालेगदे धम्सी थेनीगदेदा ‘बिगुलला काइ ज्यना लसी ङ्यन्गो’ भिसी पाङ्जी। तर थेनीगदेसे ‘ङन्से आङ्यन’ भिसी पाङ्जी।
“थेतबासेलमा य्हुल य्हुल्ला म्हिगदे, ङ्यन्गो। दाहेन्से ङाला म्हि इस्राएलीगदेदा तिग तला, थे ताम च्यागो। जम्बुलिङला म्हिगदे, ङ्यन्गो! चुगदेला जम्मान नाइबा गेसे लमा ङाइ चु म्हिगदेदा नाश लबान मुला। तिग्दा भिसम चुगदेसे ङाला बचनदा वास्ता आलनी, ओच्छे ङाला ठिम अन्छार आभ्रनी। चुगदेसे तिग्दा ङा मुबा ग्लारी शेबा य्हुल्साग्याम ज्यबा बास्ना खबा धूपदेन थारेङ् थारेङ्ला य्हुल्साग्याम चन्दन भबा? चुगदेसे भबा भेटीदेन चुगदेसे फुल्बा बलि म्राङ्सी ङा आताङ्। ङाइ चु म्हिगदेला ङाच्छापट्टि तोइबा स्हेगदे थान्सी पिन्ना। आबादेन झागदे ओच्छे खिम्जेमदेन थेनीगदेला ह्राङलान म्हिगदे थेरी तोइसी नाश तला, चु ताम ङा परमप्रभुसेन पाङ्बा हिन्ना।”
झ्याङ्ग्याम लडाइ लबारी खबा
परमप्रभुसे चुह्रङ् भिसी सुङ्बा मुला, “च्यागो, झ्याङ्पट्टिला य्हुल्साग्याम सिपाहीगदेला हुल गिक खबान मुला। थे थारेङ् मुबा य्हुल्साला शक्तिशाली य्हुल गिकला म्हिगदे लडाइ लबाला लागिरी तयार तबान मुला। थेनीगदे म्यादलीदेन भाला थोसी तयार तबा मुला। थेनीगदे दया आरेबादेन सेम कोङ्बा म्हिगदे हिन्ना। थेनीगदे तारी क्रेसी खमा समुद्र ङ्याबा ह्रङ्बान थेःला। थेनीगदे यरूशलेमदेन छ्याम लडाइ लबाला लागिरी खबान मुला।”
यरूशलेमला म्हिगदेसे चुह्रङ् भिसी पाङ्जी, “ङन्से थेनीगदेला बारेरी जम्मान ताम थेःजी, ओच्छे ङन्ना या काङनोन गेसी लर्कलुरूक तजी। कोला न्हबा बेथासे स्याप्बा म्रिङ्म्हेमेदा ह्रङ्नोन ङन्दाएनोन ल्हानान दुख तजी। भु व्हारारी आनिउ, ग्यामरीएनोन आनिउ। तिग्दा भिसम शत्रुला यारी तरवार मुला, ओच्छे खानङ्दामन लोङ्बा खबा ताम जे मुला।”
परमप्रभुसे चुह्रङ् भिसी सुङ्बा मुला, “ङाला म्हिगदे, बोराला क्वान क्वान्गो, ओच्छे मेफ्राथोरी लुडुबुडु लउ। गिक जे मुबा झा सिमा क्राबा क्रिङ्बा लबा म्हि ह्रङ् लसी एनीगदेएनोन क्राबा क्रिङ्बा लउ। तिग्दा भिसम एनीगदेदा नाश लबारी खबागदेसे तिख्खुरीन एनीगदेदा व्हाला।”
परमप्रभुसे ङादा चुह्रङ् भिसी सुङ्बा मुला, “यर्मिया, ङाला म्हिगदेला बानीबेहोर च्याबाला लागिरीदेन था याङ्बाला लागिरी ङाइ एदा म्हार म्हुइ ख्राङ्सी नम्बरी हिन्ना की आहिन भिसी च्याबा म्हि ह्रङ्बान स्होबा मुला, ओच्छे थेनीगदेदा चा आख्राङ्बा म्हार म्हुइ ह्रङ्बान स्होजी। थेनीगदे चा तामगन लबान स्य्हान्दोला बिरोध लसी क्यारमार भ्रबा काँसदेन फाइ ह्रङ्बान कोङ्बा सेम मुबा म्हिगदे हिन्ना। थेनीगदे जम्मासेन नाइबा बानीबेहोर अन्छार गे लमुला। मेसे चा म्हुइदा नम्बरी स्होखम्मुला। तर ङाला म्हिगदेदा शुद्ध तना लबा गे चा खेरोरीन निबा मुला। तिग्दा भिसम थेनीगदे न्हङ्री मुबा नाइबा खबा तामगदेदा थेनीगदेसे तेःसी भ्याङ्बा आरे। थेनीगदेदा चा गेआखेल्बा म्हुइ भिसी पाङ्ला, तिग्दा भिसम ङा परमप्रभुसे थेनीगदेदा भ्याङ्बा मुला।”
Source notes (3)
- Cross-reference २ ग्ले २५:१-४
- Footnote नोबा ग्लागदे थे धुइरी शत्रुगदेग्याम जोगब तबाला लागिरी सहरला क्युर्सीन पर्खाल लमुबा। थेतबासेलमा लडाइ लबा धुइरी शत्रुगदेसे सहरला पर्खालदेन छ्यामनोन टाँसब लसी पर्खाल तेनोन नोबा ग्लागदे स्होमुबा।
- Cross-reference यर्मि ८:१०-१२
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.