Eastern Tamang Language Bible
यर्मि 4
परमप्रभुसे चुह्रङ् भिसी सुङ्बा मुला, “इस्राएल, चुदे एनीगदे दोःसी खबान हिन्सम ङा मुबा ग्लारी दोःसी खउ। चुदे एनीगदेसे ङाला ङाच्छाग्याम थे नाइबा खबा मूर्तिगदे तेःसी भ्याङ्जी भिसम ओच्छे एनीगदे आतोःबा ग्यामरी क्यार आभ्रनी भिसम ओच्छे एनीगदेसे सत्य, निसाफदेन परमेश्वरदा सेम निबा तामरी ‘छोन्बो परमप्रभुला मिन’ किन्सी घ्रान चजी भिसम य्हुल य्हुल्ला म्हिगदेसे परमप्रभुग्याम मोलम याङ्ला, ओच्छे थेनीगदेसे परमप्रभुला जयजयकार लला।”
यहूदादेन यरूशलेमला म्हिगदेदा परमप्रभुसे चुह्रङ् भिसी सुङ्बा मुला, “एनीगदेला बाँझो भु व्हारा मोइसी डल्लो थिउ, ओच्छे पुजुगदे न्हङ्री ब्लु आढ्वउ।1 यहूदादेन यरूशलेमला म्हिगदे, एनीगदेसे ह्राङला सेमला खतना लउ, ओच्छे एनीगदेसे ह्राङला सेमरी मुबा जम्मान नाइबा तामगदे तेःसी भ्याङ्गो। आहिन्सम, एनीगदेसे लबा नाइबा गेसे लमा ङाला बोमो मे लुङ्बा ह्रङ् लसी लुङ्ला, ओच्छे थेदा खालैसेन साइबारी आखम।”
यहूदाथोरी खबा आपत विपत
परमप्रभुसे चुह्रङ् भिसी सुङ्बा मुला, “यहूदादेन यरूशलेमरी घ्रेन काइ तेःसी चु ताम थेःना लउ, ‘य्हुल्सा नाङ्नोन बिगुल ह्राप्गो!’ ओच्छे घ्रेन काइ तेःसी चुह्रङ् भिसी पाङ्गो, ‘ग्ला गिकरी पोप तउ, ओच्छे य्हाङ क्युर्सीन पर्खाल लबा सहररी य्हार्सी निइ!’ सियोनपट्टि निबारी झण्डा थीगो, जोगब तबाला लागिरी घइना आलना तुरून्तन य्हार्सी निउ! तिग्दा भिसम ङाइ झ्याङ्ग्याम आपत विपतदेन पूरन नाश लबा शक्ति भबान मुला।”
ऊग्याम सिंह गिक थोन्सी खबा ह्रङ्नोन लसी य्हुल य्हुल्ला म्हिगदेदा नाश लबा शक्ति थोन्सी खबा मुला। एनीगदेला य्हुल्सादा नाश लबारी थे ह्राङ चिबा ग्लाग्याम थोन्सी खबा मुला। एनीगदेला सहरगदे पूरन नाश तला, थेरी म्हि गिकनोन बाँकी आत। थेतबासेलमा सेमहेन्से दुख म्हन्बान बोराला क्वान क्वान्सी क्राबा क्रिङ्बा लउ। तिग्दा भिसम परमप्रभु दन्देधोनाएनोन य्हाङदेन छ्याम बोमो खबान मुला।
परमप्रभुसे चुह्रङ् भिसी सुङ्बा मुला, “थे धिनकुनु ग्लेदेन य्हुल्साला मूल म्हिगदे जम्मालान तिङ् धर्ला, पूजाहारीगदे लोङ्सी फितफित धर्ला, ओच्छे अगमवक्तागदे लोङ्ला।”
जमाहेन्से ङाइ चुह्रङ् भिसी पाङ्जी, “परमप्रभु परमेश्वर, गादे दुखला ताम, ह्राङसे ‘एनीगदेदा शान्ति तला’ भिसी चु म्हिगदेदेन यरूशलेमला म्हिगदेदा धोका पिन्बा मुबा। तर दन्दे थेनीगदेला खारेरी तरवार थान्बा मुला।”
थे धुइरी चु म्हिगदेदेन यरूशलेमला म्हिगदेदा परमप्रभुसे चुह्रङ् भिसी सुङ्ला, “तोङ्तोङ्बा ग्लाला तोङ्तोङ्बा गङ्गदेग्याम क्रोबा लाबा ङाला म्हिगदे मुबा ग्लापट्टि खला। तर थे लाबासे तिगै स्हे य्हाप्बारीनोन आत, ओच्छे तिगै स्हे साइबारीनोन आत। थे भन्दाएनोन शक्तिशाली लाबा ङाग्याम खला। दाहेन्से थेनीगदेदा सजाय पिन्गो भिसी ङाइ कुल्ला।”
शत्रुगदे क्युर्सीनग्याम खसी यहूदादा गुङ्री झाङ्बा
च्यागो, परमप्रभु चा खसु ह्रङ् लसी ङाच्छा ङाच्छा फेप्ला, थेला रथगदे म्हङ्गुलिङ् ह्रङ् लसी खला, थेला तागदे क्वाक्लिङ्गदे भन्दा योना योना य्हार्मुला। आम्मै, य्हाङ गादे दुख याङ्बा म्हि, य्हाङ नाश तबा तजी! यरूशलेम, एला सेमहेन्सेन नाइबा तामगदे स्याल्सी भ्याङ्गो, जमाहेन्से ए सोला। खाइमाधोना एला सेम नाइबा तामगदेसे प्लिङ्ना लसी थान्बा? समाचार भोर्बा म्हिसे दान सहरदेन एफ्राइमला गङ्गदेग्याम नाश तबान मुला भिसी थेःना लबान मुला। थेसे यर्मियादा चुह्रङ् भिसी पाङ्जी, “य्हुल य्हुल्ला म्हिगदेदा चु ताम पाङ्गो, ओच्छे चु ताम यरूशलेमदाएनोन थेःना लउ, ‘ए मुबा ग्लारी थारेङ्ला य्हुल्साग्याम शत्रुगदे खबान मुला, थेनीगदेसे यहूदा य्हुल्साला सहरगदेदा बिरोध लबान लडाइ लबाला लागिरी घ्रेन काइ तेःसी क्रिङ्ला। व्हारा ख्रुङ्बा म्हिगदेसे ह्रङ्नोन लसी शत्रुगदे यरूशलेमला क्युर्नोन चिला। तिग्दा भिसम थेला म्हिगदे ङाला बिरोधरी रेःबा मुला। एला बानीबेहोरदेन गेगदेसे लमान एथोरी चु दुख खबा हिन्ना। एसे याङ्तोःबा सजाय चुनोन हिन्ना, चु सजाय नाबारी एदा ल्हानान गाह्रो तला! थेसे एला तिङ्नोन चाल्ला,’ चु ताम परमप्रभुसेन सुङ्बा हिन्ना।”
ह्राङला म्हिगदेला लागिरी यर्मियासे क्राबा क्रिङ्बा लबा
आम्मै! ङा गादे ल्हाना दुख याङ्बा म्हि, दुखसेलमा सेम क्रोसी ङा भोल्बाला भोल्बान मुला! आम्मै! ङा गादे ल्हाना दुख याङ्बा म्हि, ङाइ बिगुल ह्राप्बादेन लडाइ तबान लबा थेःबा मुला। चु दुखसेलमा ङाला तिङ्नोन धर्बा मुला। ङा कुटिसी चिबारीन आखम। नाशथोरी झन नाश तला, ओच्छे य्हुल्सान तोङ्तोङ् तला। ङाला पालगदे तुरून्तन छ्याकछिक निसी ङा चिबा ग्लानोन नाश तला। खाइमाधोना ङाइ लडाइ तबा च्यासी चिसे? ओच्छे बिगुलला काइ ङ्यन्सी चिसे?
परमप्रभुसे चुह्रङ् भिसी सुङ्बा मुला, “ङाला म्हिगदे मूर्ख मुला, थेनीगदेसे ङादा ङोआसेमुला। थेनीगदे चा बुद्धि आरेबा कोलागदे ह्रङ्बान हिन्ना, थेनीगदेदेन छ्याम घोखम्बा शक्तिन आरे। नाइबा गे लबाला लागिरी थेनीगदे सिपालु मुला, तर थेनीगदेसे ज्यबा गे लबारी आसेमुला।”
यर्मियासे नाश तबा म्हङ् म्राङ्बा
ङाइ जम्बुलिङदा च्यामा थेला तिगै रुप आरेमुबा, थेरी सुनसान मुबा। ओच्छे ङाइ मुदा च्यामा थेरी य्हालनोन आरेमुबा। ङाइ गङ्गदेदा च्यामा थे ल्हिकल्हिक तबा मुबा, जम्मान गङ्गदे य्हाङय्होङ तसी य्होङ्सी चिबा मुबा। ङाइ च्यामा थेरी म्हि गिकनोन आरेमुबा। जम्मान चरागदेएनोन फ्याङ्सी निसी जिन्बा मुबा। ङाइ च्यामा परमप्रभुला बोमोसे लमा ज्यना लसी बाली तबा भु व्हारागदे परमप्रभुलान ओन्छाङ्री तोङ्तोङ्बा तबा मुबा, ओच्छे जम्मान सहरगदे नाश तबा मुबा।
परमप्रभुसे चुह्रङ् भिसी सुङ्बा मुला, “इस्राएल य्हुल्सा पूरन तोङ्तोङ्बा तला, तसैनोन ङाइ थेदा पूरन नाश आल। थेतबासेलमा जम्बुलिङसे क्राबा क्रिङ्बा लला, ओच्छे मु धोपधोप तला। तिग्दा भिसम ङाइ तिग पाङ्बा मुला थेनोन लला, ङाला सेम आपो। ङाइ पक्का लसी जिन्बा चु ताम पोनोन आपो, ङाइ पक्का लसी जिन्बा मुला।”
ता क्रेःबागदेदेन म्यादली थोबागदेला काइ थेःसी जम्मान सहरला जम्मान म्हिगदे य्हार्ला। ओच्छे थेनीगदे न्हङ्ला कोइ कोइ चा घारी न्हङ्री वाङ्ला। ओच्छे कोइ कोइ चा पहरागदे क्रेसी निला। जम्मान सहरगदे तोङ्तोङ्बा तला, थेरी खालैनोन आचि। नाश तबारी छ्याइबा यरूशलेम, ए तिग लसी चिबा? वाला क्वान क्वान्सी, म्हार क्वान्सी एसे ह्राङसे ह्राङदान तिग्दा ज्योबा? एसे मीरी तिग्दा गाजल फोर्बा? बिथारीन एसे तिग्दा ह्राङसे ह्राङदान जेःना लबा? एदा माया लबागदेसे एदा हेला लमुला, थेनीगदेसे मि एला ज्यान किन्बारी म्हाइबा मुला। कोला न्हबा बेथासे थुर्बा म्रिङ्म्हेमेला काइ ह्रङ्बा ओच्छे ङाच्छारेमला कोला न्हबा म्रिङ्म्हेमेला काइ ह्रङ्बान ङाइ थेःबा मुला। सियोनना थे म्हिगदेसे या तन्गब लसी सानोन निला ह्रङ् लसी चुह्रङ् पाङ्बान लबा ङाइ थेःबा मुला, “आम्मै! ङनी गादे ल्हाना दुख याङ्बा म्हि, ङनी सिबातेबान तबा मुला! ङनी म्हि साइबा म्हिगदेला यारी परब तबा मुला!”
Source notes (1)
- Cross-reference होशे १०:१२
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.