Eastern Tamang Language Bible
यर्मि 32
यर्मियासे भु ग्लुबा
यहूदाला ग्ले सिदकियाहसे शासन लबा च्युइ दिङ्री वाङ्मा नबूकदनेसरसे शासन लबा च्युक भ्रे दिङ्री वाङ्बा मुबा। थे धुइरी परमप्रभुसे यर्मियादा चु बचन सुङ्बा हिन्ना।1 थे धुइरी बेबिलोनना ग्लेला सिपाहीगदेसे यरूशलेमदा क्युर्सीन गुङ्री झाङ्बा मुबा, ओच्छे यर्मिया अगमवक्तादा चा यहूदाला ग्लेखाङ्ला सिपाहीगदे चिबा ख्राङ्गा2री च्युप्सी थान्बा मुबा।
यहूदाला ग्ले सिदकियाहसे यर्मियादा चुह्रङ् भिसी च्युप्बा मुबा, “एसे तिग्दा चुह्रङ् भिबान अगमवाणी लबा, ‘परमप्रभुसे चुह्रङ् भिसी सुङ्बा मुला, ङाइ चु सहर बेबिलोनना ग्लेला यारी जिम्मा पिन्बारी छ्याइबा मुला, थेसे चु य्हुल्सा किन्नोन किन्ना। यहूदाला ग्ले सिदकियाह बेबिलोनीगदेला याग्याम स्योरआम्याङ्। तर थेदा पक्कान बेबिलोनना ग्लेला यारी जिम्मा पिन्ना, ओच्छे थेसे ह्राङलान ङाच्छापट्टि थान्सी सिदकियाह ग्लेला सजाय तोगब लला। थेसे सिदकियाहदा बेबिलोनरी भोर्ला, ओच्छे ङाइ थेदा सजाय आपिन्देधोना थे थेरीन चिला। चुदे एसे बेबिलोनीगदेदा बिरोध लसी लडाइ लसैनोन एसे आढा, चु ताम ङा परमप्रभुसेन पाङ्बा मुला।’”
थे धुइरी परमप्रभुसे ङा यर्मियादा चुह्रङ् भिसी सुङ्जी, “एला अगु शल्लूमला झा हनमेल खसी एदा चुह्रङ् भिसी पाङ्ला, ‘अनातोतरी मुबा ङाला भु ग्लुउ। तिग्दा भिसम ए ङाला ह्राङलान म्हि तबासेलमा थे भु ग्लुबा हक ह्राङदा जे मुला।’”
जमाहेन्से परमप्रभुसे सुङ्बा अन्छार ङाला अगुला झा हनमेल ग्लेखाङ्ला सिपाहीगदे चिबा ख्राङ्गारी खसी ङादा चुह्रङ् भिसी पाङ्जी, “बेन्यामीनीगदेला ग्लारी परब तबा अनातोतरी मुबा ङाला भु ग्लुउ। थे भु ग्लुबा हक ह्राङलान हिन्ना। थेतबासेलमा थे भु ह्राङलान लागिरी ग्लुउ। जमाहेन्से चु परमप्रभुला बचन हिन्बा चिम भिसी ङाइ था याङ्जी। थेतबासेलमा ङाइ म्हुइला च्युक निस डबल क्योइसी थे भुला सय फाजी। ओच्छे ङाइ ङाला अगुला झाला याग्याम अनातोतरी मुबा थे भु ग्लुजी। साक्षीगदेदेन ङाइ तमसुकरी सही छाप लजी, ओच्छे म्हुइ क्योइसी ङाइ थे भुला सय फाजी। जमाहेन्से ग्लुबा चुङ्बा लबा धुइरी भ्रिबा सही छाप लबा तमसुकदेन सही छाप आलबा तमसुक न्हीलान नकल ङाइ किन्जी। ओच्छे तमसुकरी सही छाप लबा म्हिगदे, ग्लेखाङ्ला सिपाहीगदे चिबा ख्राङ्गारी मुबा जम्मान यहूदीगदेदेन हनमेलला ओन्छाङ्रीन ङाइ थे तमसुक नेरियाहला झा, महसेयाहला छाया बारूकदा जिम्मा पिन्जी।
“ङाइ बारूकदा थेरी मुबा जम्मान म्हिगदेला ओन्छाङ्रीन चुह्रङ् भिसी कुल्जी, ‘जम्मान भन्दा घ्रेन परमप्रभु इस्राएलला परमेश्वरसे चुह्रङ् भिसी सुङ्बा मुला, चु सही छाप लबादेन सही छाप आलबा तमसुक न्हीनोन साप्राला ताङ् गिकरी युसी थान्गो। तिग्दा भिसम थे ल्हानान दिङ्धोना चिगै। तिग्दा भिसम जम्मान भन्दा घ्रेन परमप्रभु इस्राएलला परमेश्वरसे चुह्रङ् भिसी सुङ्बा मुला, दोःसीन चु य्हुल्सारी दिमगदे, भुगदेदेन अङ्गुर व्हारागदे ग्लुबा चुङ्बा लला।’”
यर्मियासे लबा प्रार्थना
नेरियाहला झा बारूकदा थे भु ग्लुबाला तमसुक पिन्माहेन्से ङाइ परमप्रभुदेन छ्याम चुह्रङ् भिसी प्रार्थना लजी,
“परमप्रभु परमेश्वर, ह्राङसेन ह्राङला घ्रेन शक्तिदेन छ्यासे मुदेन जम्बुलिङ स्होबा हिन्ना। ह्राङसे लबारी आखम्बा गे तिगैनोन आरे। ह्राङसे हजारौं हजारदा माया उन्बा मुला। तर ह्राङसे आबा आमासे लबा पापला सजाय झा झामेगदेदा पिन्मुला। ह्राङ जम्मान भन्दा घ्रेनदेन शक्तिशाली परमेश्वर हिन्ना, ह्राङ जम्मान भन्दा घ्रेन परमप्रभु हिन्ना। ह्राङसे म्हन्बा तामदेन ह्राङसे लबा गेगदे चा घ्रेनदेन शक्तिशाली मुला। म्हिगदेसे लबा जम्मान गेदेन थेनीगदेला बानीबेहोर ह्राङदा प्रस्टन था मुला, ओच्छे थेनीगदेसे लबा गेदेन थेनीगदेला बानीबेहोर अन्छार ह्राङसे थेनीगदेदा इनाम पिन्मुला। ह्राङसे ल्हानान दिङ् ङाच्छा मिश्र य्हुल्सारी उदेकला चिनुगदेदेन उदेकला गेगदे लबा मुबा। थे उदेकला गेगदे ह्राङसे तिनीला धिनधोनाएनोन इस्राएलीगदेदेन जम्मान म्हि य्हुल्ला गुङ्री लबान मुला, दन्दे ह्राङदा जम्मासेन ङोसेबा मुला। ह्राङसेन उदेकला चिनुगदेदेन उदेकला गेगदे लबान शत्रुगदेदा लोङ्ना लजी। ओच्छे ह्राङसेन ह्राङला शक्तिशाली छ्यासे इस्राएलदा मिश्र य्हुल्साग्याम तेःसी भजी। ह्राङसे थेनीगदेला आखेम्हेमेगदेदा पिन्ना भिसी कबुल लबा अन्छार ह्राङसे थेनीगदेदा चु ङ्हेदेन सिङ्सुरला खुदु भ्योङ्बा य्हुल्सा पिन्जी। थेनीगदे चु य्हुल्सारी वाङ्सी शासन लजी। तर थेनीगदेसे ह्राङसे कुल्बा ताम आङ्यन्नी, ओच्छे ह्राङला ठिम अन्छारएनोन थेनीगदे आभ्रनी। ह्राङसे थेनीगदेदा लउ भिसी कुल्बा अन्छार गेएनोन आलनी। थेतबासेलमा चु नाश लबा शक्ति ह्राङसे थेनीगदेथोरी पुइखजी।
“स्य्हीगो, चु सहर यारी किन्बाला लागिरी बेबिलोनीगदे क्युर्सीनग्याम लडाइ लबारी खबा मुला। लडाइ, अनिकालदेन देशानसे लमा चु सहर बेबिलोनीगदेला यारी परब तला। परमप्रभु, ह्राङसे सुङ्बा ताम पूरा तबान मुला, थे ताम ह्राङसेनोन स्य्हीबान मुला। चु सहर बेबिलोनीगदेसे ह्राङला यारी किन्बारी छ्याइसैनोन ‘म्हुइ पिन्सी साक्षीगदे थान्सी भु ग्लुउ ओच्छे भु ग्लुबा चुङ्बाला तमसुक भ्रिसी थान्गो’ भिसी ह्राङसेन ङादा सुङ्बा मुबा।”
जमाहेन्से परमप्रभुसे यर्मियादा चु बचन सुङ्जी, “ङा जम्मान म्हि य्हुल्ला परमेश्वर हिन्ना। तिग ङाइ लबारीन आखम्बा खजिबै गे मुला? थेतबासेलमा ङाइ चु सहर बेबिलोनीगदेदेन बेबिलोनना ग्ले नबूकदनेसरला यारी जिम्मा पिन्बारीन छ्याइबा मुला, थेनीगदेसे चु सहरदा ह्राङला यारी किन्ना।3 बेबिलोनीगदेसे चु सहरदा मेसे ख्राङ्ला। म्हिगदेसे ह्राङ ह्राङला दिमला कौसीरी बाल लादा धूप म्राबान अर्गु लागदेदा अङ्गुरला निङ्गु छसी ङादा बोमो खना लबा मुबा। थेतबासेलमा थे दिमगदेदेन चु सहरदा बेबिलोनना सिपाहीगदेसे मे लगब लसी नाश लला।
“इस्राएलदेन यहूदाला म्हिगदेसे भ्योन मुबा धुइहेन्सेन नाइबा गे भन्दा अर्गु तिगै लबा आरे। ओच्छे थेनीगदेसे लबा गेग्याम ङादा बोमो खना लबा मुला। चु सहर स्होबा धिनकुनुहेन्से तिनीला धिनधोनान चु सहरसे ङादा बोमो खना लबा मुला, ओच्छे ङादा बोमोसे मे दोना लबा मुला। थेतबासेलमा ङाइ चु सहरदा नाश लनोन लला। तिग्दा भिसम इस्राएलला म्हिगदे, यहूदाला म्हिगदेदेन थेनीगदेला ग्लेगदे, य्हुल्साला मूल म्हिगदे, पूजाहारीगदे ओच्छे अगमवक्तागदेसे नाइबा गे लसी ङादा ल्हानान बोमो खना लबा मुला। थेनीगदेसे ङादा ग्याप दोःजी, ओच्छे ङाइ थेनीगदेदा घरीघरी लोप्सैनोन थेनीगदेसे ङाला तामदा ङ्यनएनोन आङ्यन्नी वास्ताएनोन आलनी। ङाला जयजयकार लबाला लागिरी स्होबा मन्दिररी थेनीगदेसे नाइबा खबा लागदेला मूर्ति स्होसी थान्जी, ओच्छे थेनीगदेसे ङाला मन्दिरदा अशुद्ध तना लजी।4 थेनीगदेसे बेन-हिन्नोमला ब्याँसीरी बाल लाला नोबा नोबा थानगदे स्होबा मुबा। थे थानगदे न्हङ्ला थान गिकरी चा थेनीगदेसे ह्राङला झा झामेगदेदा मोलेख लाला लागिरी मेरी ख्राङ्सी बलि लमुबा। थेनीगदेदा थेह्रङ् लउ भिसी ङाइ कुल्बा आरेमुबा। थेनीगदेसे थेह्रङ्बा नाइबा गे लला ओच्छे यहूदाला म्हिगदेदा पापरी फसब तना लला भिसी ङाइ खाइमै म्हन्बा आरेमुबा।”
आश लखम्बा कबुल
परमप्रभु इस्राएलला परमेश्वरसे ङादा चुह्रङ् भिसी सुङ्बा मुला, “चु सहरला म्हिगदेसे चुह्रङ् भिसी पाङ्बान मुला, ‘चु मि लडाइ, अनिकालदेन देशानसे लमा बेबिलोनना ग्लेला यारी परब तला।’ तर ङा परमप्रभु इस्राएलला परमेश्वरसे चु ताम पाङ्बान मुला, ङाइ बोमोला झोकरी थेनीगदेदा य्हुल्सा य्हुल्सारी छरपष्ट तना लबा मुबा। तर ङाइ थेनीगदेदा थे य्हुल्सागदेग्याम दोःसी चु य्हुल्सारी भला, ओच्छे ढुक्क तसी चिबारी पिन्ना। जमाहेन्से थेनीगदे ङाला म्हि दोला, ओच्छे ङा थेनीगदेला परमेश्वर दोला। थेनीगदेला बानीबेहोर गिकनोन तगै भिसी ङाइ थेनीगदेला सेम गिकनोन तना लला। जमाहेन्से थेनीगदेसे ह्राङदेन ह्राङला सन्तानदा ज्यबा तबाला लागिरी सदन ङादा मान लगै। थेनीगदेदेन छ्याम ङाइ सदनना लागिरी कबुल गिक लला। थेनीगदेदा ज्यबा तबा गे लबारी ङाइ खाइमै आख्ला, ओच्छे थेनीगदेदा ङाइ सदन ङाला तहरी चिसी सेमहेन्से ङादा मान लबा म्हि स्होला। थेनीगदे ङा मुबा ग्लाग्याम दोःसी खाइमै थारेङ् आनि। थेनीगदेला लागिरी ज्यबा तबा गे लमा ङा ताङ्मुला, ओच्छे सेमहेन्सेन ङाइ थेनीगदेदा सदनना लागिरी चु य्हुल्सारी थान्ना।
“परमप्रभुसे चुह्रङ् भिसी सुङ्बा मुला, ङाइ चु म्हिगदेदा ल्हानान आपत विपत तना लजी। थेह्रङ् लसीन ङाइ पिन्ना भिसी लबा कबुल अन्छार ङाइ थेनीगदेदा जम्मान स्हे पिन्सी फलिफाप तना लला। चु य्हुल्साला म्हिगदेसे चुह्रङ् भिसी पाङ्मुला, ‘चु मि म्हिदेन जन्तु तिगै आरेबा तोङ्तोङ्बा ग्ला हिन्ना। तिग्दा भिसम चु य्हुल्सा मि बेबिलोनीगदेला यारी जिम्मा पिन्बा मुबा।’ तर दोःसी चु य्हुल्सारी भु व्हारागदे चुङ्बा ग्लुबा लला, बेन्यामीनीगदेला ग्लारी, यरूशलेमला कानकुनीला नाम्सागदेरी, यहूदाला सहरगदेरी, गङ्पट्टिला य्हुल्साला सहरगदेरी, ब्याँसीदेन लोपट्टिला नेगेव भिबा ग्लाला सहरगदेरी म्हुइ पिन्सी भु व्हारा ग्लुला, ओच्छे साक्षी थान्सी तमसुकगदेरी सही छाप लला। तिग्दा भिसम ङाइ थेनीगदेदा दोःसी थेनीगदेलान य्हुल्सारी भला, चु ताम ङा परमप्रभुसेन पाङ्बा हिन्ना।”
Source notes (4)
- Cross-reference २ ग्ले २५:१-७
- Footnote सिपाहीगदे चिबा ख्राङ्गा चु ग्ला चा ग्लेखाङ्ला ख्राङ्गा हिन्ना। चुनोन ख्राङ्गारी सिपाहीगदे चिबा दिम मुबा। सिपाहीगदे चिबा दिमला ख्राङ्गारी चा झ्याल्खान मुबा। चुनोन झ्याल्खानरी यर्मियादा च्युप्सी थान्बा मुबा।
- Cross-reference २ ग्ले २५:१-११; २ काइ ३६:१७-२१
- Cross-reference २ ग्ले २३:१०; यर्मि ७:३०-३१; १९:१-६
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.