Eastern Tamang Language Bible
यर्मि 29
बेबिलोनरी मुबा यहूदीगदेदा यर्मियासे चिठी पुइबा
नबूकदनेसर ग्लेसे चुङ्सी जबरजस्ती लसी यरूशलेमग्याम बेबिलोनरी भोर्बा पूजाहारीगदे, अगमवक्तागदे, गन्बागदेदेन अर्गु जम्मान म्हिगदेदा यर्मिया अगमवक्तासे पुइबा चिठीरी भ्रिबा ताम चुनोन हिन्ना।1 यहोयाकीन ग्ले, ग्लेला आमा, ग्लेखाङ्ला मूल म्हिगदे, यहूदादेन यरूशलेमला मूल म्हिगदे, गे लबारी सेबादेन थरीथरीला बुट्टा तेःबारी सेबा म्हिगदेदा चुङ्सी जबरजस्ति लसी यरूशलेमग्याम बेबिलोनरी भोर्माहेन्से यर्मियासे चु चिठी भ्रिबा हिन्ना। यर्मियासे थे चिठी शापानना झा एलासादेन हिल्कियाहला झा गमर्याहदा जिम्मा पिन्सी पुइजी। तिग्दा भिसम यहूदाला ग्ले सिदकियाहसे थेनीगदेदा नबूकदनेसर ग्ले मुबा ग्ला बेबिलोनरी पुइबान मुबा। थे चिठीरी भ्रिबा ताम चुनोन हिन्ना,
“चुङ्सी जबरजस्ति लसी यरूशलेमग्याम जम्मान भन्दा घ्रेन परमप्रभु इस्राएलला परमेश्वरसे बेबिलोनरी भोर्पुङ्बा जम्मान म्हिगदेदा थेनोन परमप्रभुसे चुह्रङ् भिसी सुङ्बा मुला, ‘एनीगदे थेरी दिम स्होसी चिउ, खेती लउ ओच्छे थेरी रोबा जम्मान स्हे चउ। एनीगदेसे ब्याह लसी झा झामे न्हउ। ओच्छे एनीगदेसे ह्राङला झा झामेगदेला ब्याह लसी पिन्गो, थेनीगदेसेनोन झा झामे न्हगै। थेरी एनीगदेला सन्तान घटब आतना बढब तबान निगै। ङाइ एनीगदेदा पुइबा सहरला बारेरी ज्यबा तगै भिसी म्हन्गो, ओच्छे थे सहरला फलिफाप तगै भिसी ङा परमप्रभुदेन छ्याम प्रार्थना लउ। तिग्दा भिसम थे सहरदा फलिफाप तजी भिसम एनीगदेदाएनोन फलिफाप तला।’
“जम्मान भन्दा घ्रेन परमप्रभु इस्राएलला परमेश्वरसे चुह्रङ् भिसी सुङ्बा मुला, ‘एनीगदेला गुङ्री मुबा एनीगदेला अगमवक्तागदेदेन म्हुदु च्याबा म्हिगदेसे एनीगदेदा धोका आपिन्गै। थेनीगदेला ताम थेःसी एनीगदेसे ह्राङला सेमरी म्हन्बा तामदाएनोन वास्ता आलउ। थेनीगदेसे ङाला मिन किन्सी एनीगदेदा फट्टा अगमवाणी पाङ्मुला। ङाइ थेनीगदेदा पुइबा आहिन।’
“परमप्रभुसे चुह्रङ् भिसी सुङ्बा मुला, ‘एनीगदेदा चुङ्सी जबरजस्ति लसी बेबिलोनरी भोर्बा बोगल सोमसे च्युइ दिङ तमाहेन्से ङा एनीगदे मुबा ग्लारी खला। जमाहेन्से ङाइ एनीगदेदा चु ग्लाग्याम दोःसी एनीगदेलान य्हुल्सारी भोर्ला। चुह्रङ् लसी ङाइ एनीगदेदेन छ्याम लबा कबुल पूरा लला।2 तिग्दा भिसम ङाइ एनीगदेला लागिरी म्हन्बा तामगदे ङादा था मुला। थे ताम चा एनीगदेदा नोक्सान तना लबारी आहिन, एनीगदेदा फलिफाप तना लबारी हिन्ना। ओच्छे एनीगदेसे लबा आशदेन लिच्छाला ताम ज्यबा तना लबारी हिन्ना। जमाहेन्से ङा मुबा ग्लारी खसी एनीगदेसे ङादेन छ्याम प्रार्थना लला, ओच्छे ङाइ एनीगदेसे लबा प्रार्थना ज्यना लसी ङ्यन्ना। एनीगदेसे ङादा सेमहेन्से म्हाइमा एनीगदेसे ङादा स्याप्ला।3 हिन्ना, एनीगदेसे ङादा स्याप्ला, ओच्छे ङाइ एनीगदेदा एनीगदेलान य्हुल्सारी दोःसी भला। ङाइ एनीगदेदा पुइबा य्हुल्सादेन ग्लाग्याम ङाइ एनीगदेदा ग्ला गिकरी पोप लला। ओच्छे जुन य्हुल्साग्याम ङाइ एनीगदेदा चुङ्सी जबरजस्ति लसी भोर्पुङ्मुबा थेनोन य्हुल्सारी ङाइ एनीगदेदा दोःसी भला, चु ताम ङा परमप्रभुसेन पाङ्बा हिन्ना।’
“एनीगदेसे ‘ङन्ना लागिरी परमप्रभुसे बेबिलोनरीन अगमवक्तागदे पुइखबा मुला’ भिसी पाङ्ला तला। तर चुङ्सी जबरजस्ति लसी एनीगदेदेन छ्यामनोन अर्गु य्हुल्सारी आभोर्बा चु सहररीन चिबा एनीगदेला जम्मान म्हिगदेदेन दाऊद ग्लेला ठिरी चिबा ग्लेला बारेरी जम्मान भन्दा घ्रेन परमप्रभुसे चुह्रङ् भिसी सुङ्बा मुला। हिन्ना, जम्मान भन्दा घ्रेन परमप्रभुसे चुह्रङ् भिसी सुङ्बा मुला, ‘ङाइ थेनीगदेथोरी लडाइ, अनिकालदेन देशान पुइखला, ओच्छे ङाइ थेनीगदेदा चबारीन आतबा नाइबा अञ्जीरगदे ह्रङ्बान तना तला। ङाइ थेनीगदेदा लडाइ, अनिकालदेन देशान पुइखसी ताप्ला। ओच्छे थेनीगदेदा ङाइ जम्बुलिङ नाङ्नोन छरपष्ट तना लला। थेनीगदेदा ङाइ जुन जुन य्हुल्ला म्हिगदेला गुङ्री पुइला, थे थेरी सराप याङ्बा, लोङ्बा खबा, खिसीदेन बेइज्जत नातोःबा म्हि स्होला। तिग्दा भिसम ङाइ ङाला गे लबा म्हि अगमवक्तागदेग्याम घरीघरी पाङ्बा बचनदा थेनीगदेसे वास्ता आलनी। ओच्छे एनीगदेसेनोन ङाला बचनदा वास्तान आलनी।’
“थेतबासेलमा ङाइ चुङ्पुङ्सी जबरजस्ति लसी यरूशलेमग्याम बेबिलोनरी पुइबा म्हिगदे, एनीगदेसे ङा परमप्रभुला बचन ङ्यन्गो। कोलायाहला झा आहाबदेन मासेयाहला झा सिदकियाहसे ङाला मिन किन्सी फट्टा अगमवाणी लबान मुला, थेनीगदेला बारेरी ङा जम्मान भन्दा घ्रेन परमप्रभु इस्राएलला परमेश्वरसेन चु ताम पाङ्बान मुला, ‘ङाइ थेनीगदेदा बेबिलोनना ग्ले नबूकदनेसरला यारी जिम्मा पिन्ना, ओच्छे थेसे थेनीगदेदा एनीगदेलान ओन्छाङ्री साइला। थेनीगदेसे लमान चुङ्सी जबरजस्ति लसी यहूदाग्याम बेबिलोनरी भोर्बा म्हिगदेसे खालैदा केःतोःसम चुह्रङ् भिसी केःमुला, “बेबिलोनना ग्लेसे सिदकियाहदेन आहाबदा छोन्बोन मेरी ख्राङ्बा ह्रङ्नोन एदाएनोन परमप्रभुसे लगै।” तिग्दा भिसम थेनीगदेसे इस्राएलरी ल्हानान नाइबा खबा गे लबा मुला। थेनीगदे ह्राङलान खिम्जेमला म्रिङ्देन छ्याम ब्रेल्बा मुला, ओच्छे ङाइ थेनीगदेदा पाङ्गो भिसी आपाङ्सैनोन थेनीगदेसे फट्टा ताम पाङ्बा मुला। चु ताम ङादा था मुला, ओच्छे ङा चु तामला साक्षी हिन्ना’, चु ताम ङा परमप्रभुसेन पाङ्बा हिन्ना।”
शमायाहसे चिठी भ्रिबा
नेहेलामरी चिबा शमायाहसे यरूशलेमला जम्मान म्हिगदेदेन मासेयाहला झा मूल पूजाहारी सपन्याह ओच्छे पूजाहारी अर्गु जम्मान म्हिगदे मुबा ग्लारी चिठी गिक भ्रिसी पुइबा मुबा। थेनोन शमायाहला बारेरी जम्मान भन्दा घ्रेन परमप्रभु इस्राएलला परमेश्वरसे ङादा चु बचन सुङ्बा मुबा। थे चिठीरी शमायाहसे सपन्याहदा चुह्रङ् भिसी भ्रिबा मुबा, “परमप्रभुसे पूजाहारी यहोयादाला साटोरी एदा परमप्रभुसे ह्राङला मन्दिरला पूजाहारी स्होबा हिन्ना। थेरी अगमवाणी लसी भ्रबा खजिबै म्योबा म्हिदा ठिँगुरोरी झाङ्सी थेला खारेरी फाइला च्याल्दासे च्युन्बा गे एला हिन्ना। एनीगदेला गुङ्री अगमवक्ता दोबा स्होसी भ्रबा अनातोतला यर्मियादा एसे तिग्दा तिगै आलबा? थेसे ङन्दा बेबिलोनरी चुह्रङ्बा समाचार पुइबा मुला, ‘एनीगदे बेबिलोन य्हुल्साला तहरी ल्हानान धुइधोना चितोःला। थेतबासेलमा एनीगदे दिमनाम स्होसी चिउ, खेती लउ ओच्छे थेरी रोबा स्हेगदे चउ।’”
तसैनोन पूजाहारी सपन्याहसे चु चिठी पढब लसी यर्मियादा थेःना लजी। जमाहेन्से परमप्रभुसे यर्मियादा चुह्रङ् भिसी सुङ्जी, “चुङ्सी जबरजस्ति लसी यहूदाग्याम भोर्बा जम्मान म्हिगदेदा चु समाचार पुइगो, ‘नेहेलामरी चिबा शमायाहला बारेरी परमप्रभुसे चुह्रङ् भिसी सुङ्बा मुला, थेदा ङाइ पुइबा आहिन, तसैनोन थेसे अगमवाणी लसी एनीगदेदा फट्टा तामथोरी विश्वास लपुङ्बा मुला। ङा परमप्रभुसे नेहेलामरी चिबा शमायाहदेन थेला जम्मान सन्तानगदेदा सजाय पिन्ना। एनीगदेला गुङ्री थेला खजिबै सन्तानगदे छोन्बो आचि। ओच्छे ङाइ ङाला म्हिगदेला लागिरी लबा ज्यबा गे थेसे च्याआम्याङ्। तिग्दा भिसम थेसे ङाला म्हिगदेदा ङाला बिरोध लपुङ्बा मुला’, चु ताम ङा परमप्रभुसेन पाङ्बा हिन्ना।”
Source notes (3)
- Cross-reference २ ग्ले २४:१२-१६; २ काइ ३६:१०
- Cross-reference २ काइ ३६:२१; यर्मि २५:११; दानि ९:२
- Cross-reference ठिम ४:२९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.