Eastern Tamang Language Bible
यर्मि 15
यहूदाला म्हिगदे नाश तबा
जमाहेन्से परमप्रभुसे ङादा चुह्रङ् भिसी सुङ्जी, “मोशादेन शमूएल ङाला ङाच्छापट्टि खसी बिन्ती लसैनोन ङाइ चु य्हुल्ला म्हिगदेदा दया आल। थेनीगदेदा निबारी पिन्गो! थेनीगदेदा ङाला ङाच्छाग्याम तेःसी पुइगो।1 थेनीगदेसे एदा ‘ङनी खानङ् निसे?’ भिसी ङ्योइजी भिसम एसे थेनीगदेदा चुह्रङ् भिसी पाङ्गो, ‘परमप्रभुसे चुह्रङ् भिसी सुङ्बा मुला,
“‘देशानग्याम सितोःबागदे देशान खबा ग्लापट्टिन निगै,
लडाइग्याम सितोःबागदे लडाइ तबा ग्लापट्टिन निगै,
फोइथाननोन सितोःबागदे अनिकाल तबा ग्लापट्टि निगै,
ओच्छे चुङ्सी जबरजस्ति लसी अर्गु य्हुल्सारी भोर्तोःबागदे अर्गु य्हुल्साला म्हिगदेला तहरीन निगै।’
“ङाइ थेनीगदेदा नाश लबाला लागिरी थेनीगदेथोरी नाश लबा थरी ब्लिला तामगदे पुइला। थेनीगदेदा लडाइरी साइला, ओच्छे थेनीगदेला लाश नगीसे छ्याकछिक लसी चला, चरागदेदेन ह्रि जन्तुगदेसे चला। यहूदाला ग्ले हिजकियाला झा मनश्शेसे ह्राङ यहूदाला ग्ले दोबा धुइरी तिग लबा मुबा, थेनोन गेसे लमा ङाइ थेनीगदेदा जम्बुलिङ नाङ्लान य्हुल्सागदेरी नाइबा खबा स्हे स्होला।2
“यरूशलेमला म्हिगदे, एनीगदेदा खाल्से माया लला? एनीगदेला लागिरी खाल्से दुख म्हन्ना? थेन तसी एनीगदेदा खाह्रङ्बा मुला भिसी खाल्से ङ्योइला? एनीगदेसे ङादा ख्लाबा मुला, ओच्छे एनीगदे ङाग्याम थारेङ् तबाला तबान मुला। थेतबासेलमा एनीगदेदा नाश लबाला लागिरी ङाइ ङाला या थीबा मुला। दाहेन्से ङाइ चु भन्दा ल्हाना नाबारी आखम। ङाइ एनीगदेदा य्हुल्साला सहर सहरला मूल म्रापगदेरी नाख्लेसे य्हाप्बा ह्रङ् लसी य्हाप्ला। ङाइ एनीगदेला कोलागदेदा साइला, ङाइ ङाला म्हिगदेथोरी दुखदेन नाश लबा शक्ति पुइखला। तिग्दा भिसम एनीगदेसे ह्राङ ह्राङला नाइबा बानीबेहोर आख्लानी। ङाइ एनीगदेला य्हुल्सारी ह्रेम्बो सिबा म्रिङ्म्हेमेगदे समुद्रला बालुवा भन्दा ल्हानान तना लला। धिन गुङ्री ङाइ एनीगदेला भ्योन म्हिगदेदा नाश लबा शक्ति गिक पुइखला। थेनीगदेला आमागदेथोरी तिख्खुरीन दुखदेन लोङ्बा खबा ताम पुइखला। गोर निस झा झामेला आमा बिहोस तला। थेला लागिरी धिनी गुङ्रीन धोपधोप तला। थेदा बेइज्जत लसी पेःना लला। एनीगदे न्हङ्री छोन्बोन मुबागदेदा चा ङाइ एनीगदेलान शत्रुगदेदा साइपुङ्ला, चु ताम ङा परमप्रभुसेन पाङ्बा हिन्ना।”
यर्मियासे उजुर लबा
आम्मै! ङा गादे आज्यबा म्हि, ङाला आमा तिग्दा ह्राङसे ङा ह्रङ्बा म्हिदा केवा पिन्जी? ङादेन छ्याम जम्मान य्हुल्साला म्हिगदेसे लडाइदेन कचकच लमुला। ङाइ खालैदा छे पिन्बाएनोन आरे, ओच्छे खालैग्याम छे किन्बाएनोन आरे, तसैनोन ङादा जम्मासेन केःमुला।
परमप्रभुसे ङादा चुह्रङ् भिसी सुङ्जी, “ङाइ पक्कान एदा ज्यबा गेला लागिरी जोगब लसी थान्ना। ङाइ पक्कान दुखदेन आपत विपतला धुइरी एला शत्रुगदेदा एदेन छ्यामनोन बिन्ती लबा म्हि स्होला।
“यहूदाला म्हिगदे, झ्याङ्ग्याम खबा फाइदेन काँस ह्रङ्बान कोङ्बा एनीगदेला शत्रुगदेदा खाल्से ब्रेना लबारी खम्ला? एनीगदेसे य्हुल्सा नाङ्नोन पाप लबासेलमा ङाइ एनीगदेला धन सम्पत्तिदेन एनीगदेला ढुकुटीरी मुबा जम्मान स्हेगदे शत्रुगदेदा भोर्पुङ्ला। ङाइ एनीगदेसेन ङोआसेबा य्हुल्सारी एनीगदेदा एनीगदेलान शत्रुगदेला घ्याबा स्होला। तिग्दा भिसम ङाला बोमो मे ह्रङ् लसी लुङ्बा मुला, ङाला बोमो एनीगदेला बिरोधरी सदन मे ह्रङ् लसी लुङ्बाला लुङ्बान तला।”
जमाहेन्से ङाइ चुह्रङ् लसी प्रार्थना लजी, “परमप्रभु, ह्राङदा जम्मान ताम था मुला। ङादा ढन्गो, ओच्छे ङादा ह्रो लउ। ङादा दुख पिन्बागदेदा ह्राङसेन नाङ् फागो। ह्राङसे थेनीगदेदा तिगै आलना नाबासेलमा ङा सिआतोःगै। ह्राङला लागिरी ङाइ बेइज्जत नाबा ताम ह्राङसे ढन्गो। ह्राङसे ङादेन छ्याम बात लजी ओच्छे ङाइ ह्राङसे सुङ्बा जम्मान बचन ङ्यन्जी। परमप्रभु जम्मान भन्दा घ्रेन परमेश्वर, ङा ह्राङलान हिन्ना, ह्राङलान बचनसे लमा ङा सेमहेन्सेन ताङ्खम्बा मुला। ङाइ खाइमै अर्गु म्हिगदेदेन छ्याम चिसी मोजमजा लबान ताङ्सी आचिनी। ङादा ह्राङसे ह्राङला तहरी थान्बासेलमा ङा गिकनोन चिजी। तिग्दा भिसम ह्राङसे ङादा ह्राङला बोमोसे प्लिङ्ना लबा मुबा। ङाला दुख तिग्दा आजिन्बा? ङाला पोर तिग्दा स्हु खबा? तिग्दा ङाला पोर आफान्बा? ङार्सी निबा बर्खाला स्योङदेन ङार्सी निबा क्युइला मूलसे ह्रङ्नोन लसी ह्राङ ङादा धोका पिन्बा परमेश्वर हिन्ना?”
थेतबासेलमा परमप्रभुसे ङादा चुह्रङ् भिसी सुङ्जी, “चुदे ए ङापट्टि दोःसी खजी भिसम ङाइ एदा ङादेन छ्यामनोन थान्ना, ओच्छे ङाइ एदा दोःसी ङाला गे लबा म्हि स्होला। चुदे एसे तोःबा ताम जे पाङ्जी ओच्छे गेआखेल्बा ताम आपाङ्नी भिसम दोःसी ए ङाला अगमवक्ता दोला। चु म्हिगदे दोःसी ए मुबा ग्लारी खगै, तर ए चा थेनीगदे मुबा ग्लारी आनिउ। ङाइ एदा चु य्हुल्ला म्हिगदेला ओन्छाङ्री काँसला कोङ्बा पर्खाल ह्रङ्बान स्होला। थेनीगदे एला बिरोध लसी लडाइ लबारी खला, तर थेनीगदेसे एदा ढाबारी आखम। तिग्दा भिसम एदा जोगब लबारीदेन लोङ्बा खबा तामग्याम फेबाला लागिरी ङा एदेन छ्यामनोन तला। ङाइ एदा नाइबा गे लबा म्हिगदेला याग्याम जोगब लला, ओच्छे दया आरेबा म्हिगदेला याग्यामएनोन ङाइ एदा फेला, चु ताम ङा परमप्रभुसेन पाङ्बा हिन्ना।”
Source notes (2)
- Cross-reference थोन्बा ३२:११-१४; झ्याबा १४:१३-१९; १ शमू ७:५-९
- Cross-reference २ ग्ले २१:१-१६; २ काइ ३३:१-९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.