Eastern Tamang Language Bible
यर्मि 11
कबुल अन्छार इस्राएलीगदे आभ्रबा
परमप्रभुसे ङा यर्मियादा चुह्रङ् भिसी सुङ्जी, “चु कबुलरी मुबा तामगदे सेमहेन्सेन ङ्यन्गो, ओच्छे यहूदाला म्हिगदेदेन यरूशलेमरी चिबा म्हिगदेदा पाङ्गो। परमप्रभु इस्राएलला परमेश्वरसे चुह्रङ् भिसी सुङ्बा मुला, ‘चु कबुलरी मुबा तामगदे अन्छार आभ्रबा म्हिगदेथोरी सराप खला। ङाइ एनीगदेला आखेम्हेमेगदेदा मे लुङ्सी चिबा घ्रेन मे खारङ् ह्रङ्बा मिश्र य्हुल्साग्याम तेःसी भबा धुइरी ङाइ चु कबुल एनीगदेला आखेम्हेमेगदेदेन छ्याम लबा मुबा। थेनीगदेदा ङाइ कुल्बा अन्छार भ्रउ, ओच्छे ङाइ कुल्बा ताम अन्छार जम्मान गे लउ भिसी पाङ्बा मुबा। ङाइ कुल्बा ताम अन्छार भ्रजी भिसम एनीगदे ङाला म्हि हिन्ना, ओच्छे ङा एनीगदेला परमेश्वर हिन्ना। जमाहेन्से ङ्हेदेन सिङ्सुरला खुदु भ्योङ्बा य्हुल्सा गिक पिन्ना भिसी ङाइ एनीगदेला आखेम्हेमेगदेदेन छ्याम लबा कबुल पूरा लला भिसी ङाइ पाङ्बा मुबा।’ दन्दे थेनोन य्हुल्सारी एनीगदे चिबा मुला।”
जमाहेन्से ङाइ “परमप्रभु, आमेन” भिसी पाङ्जी।
परमप्रभुसे ङादा चुह्रङ् भिसी सुङ्जी, “यहूदाला जम्मान सहरगदेदेन यरूशलेमला ग्याम ग्यामरी निसी चुह्रङ् भिसी चु जम्मान ताम थेःना लउ, ‘चु कबुलरी मुबा तामगदे ज्यना लसी ङ्यन्गो, ओच्छे थे अन्छार भ्रउ। जुन धुइरी ङाइ एनीगदेला आखेम्हेमेगदेदा मिश्र य्हुल्साग्याम तेःसी भजी, थेनोन धुइहेन्से तिनीधोनाएनोन ङाइ एनीगदेदा होशियार तना लबान “ङाइ कुल्बा अन्छार भ्रउ” भिसी पाङ्बाला पाङ्बान मुला। तर थेनीगदेसे सेमहेन्से आङ्यन्नी, ओच्छे वास्तान आलनी। बरू थेनीगदे अटेरी तसी ह्राङ ह्राङला नाइबा सेम अन्छार भ्रबाला भ्रबान लजी। कबुलरी मुबा जम्मान ताम अन्छार भ्रउ भिसी ङाइ कुल्बा मुबा, तर थेनीगदे कबुल अन्छार भ्रबारी आङ्यन्नी। थेतबासेलमा कबुलरी मुबा जम्मान सरापगदे ङाइ थेनीगदेथोरी ल्हूजी।’”
जमाहेन्से परमप्रभुसे ङादा चुह्रङ् भिसी सुङ्जी, “यहूदाला म्हिगदेदेन यरूशलेमरी चिबा म्हिगदेसे जाल लबा मुला। थेनीगदेसे ङाला बचन ङ्यन्बारी आम्हाइनी, थेनीगदेसे ह्राङला आखेम्हेमेगदेसे ह्रङ्नोन लसी पाप लबा मुला। थेनीगदेसे अर्गु लागदेदा तेन्बान थेनीगदेला लिच्छा भ्रबा मुला। ङाइ थेनीगदेला आखेम्हेमेगदेदेन छ्याम लबा कबुल अन्छार इस्राएलला म्हिगदेदेन यहूदाला म्हिगदे न्हीनोन भ्रबा आरे। थेतबासेलमा ङा परमप्रभुसे चुह्रङ् भिसी पाङ्ला, ‘ङाइ थेनीगदेदा आपत विपत तना लला, थेग्याम थेनीगदे स्योर्बारी आखम। थेनीगदेसे ङादेन छ्याम बिन्ती लसैनोन ङाइ वास्ता आल। जमाहेन्से यहूदादेन यरूशलेमरी चिबा म्हिगदे ह्राङ ह्राङसे धूप म्राबान पूजा लबा लागदेदेन छ्याम क्राबा क्रिङ्बा लबान बिन्ती लला। तर आपत विपतला धुइरी थे लागदेसे थेनीगदेदा तिगै ह्रो आल। यहूदा एनीगदेला सहरगदे गादे मुला, होत्तेन एनीगदेला लागदे मुला। यरूशलेम एनीगदेला ग्याम गादे मुला, होत्तेन नाइबा खबा थे बाल लादा धूप म्राबा ग्लागदे स्होबा मुला।’
“यर्मिया, एसे चु य्हुल्ला लागिरी ङादेन छ्याम प्रार्थना आलउ, थेनीगदेला लागिरी बिन्ती आलउ, तिग्दा भिसम थेनीगदेला दुखला धुइरी थेनीगदेसे लबा बिन्ती ङाइ आङ्यन।
“ङाइ माया लबा म्हिगदेसे नाइबा गे लसी चिबा मुला। थेनीगदेदा ङाला मन्दिररी खबा अधिकार आरे। तिग थेनीगदेसे भाकलदेन बलि फुल्सी आपत विपतग्याम स्योर्म्याङ्ला भिसी म्हन्बा? तिग नाइबा गे लसी एनीगदे ताङ्खम्ला? ङा परमप्रभुसे ज्यबा रो रोबा पिङ्गै जेःबा जैतूनना दोङ भिसी एनीगदेला मिन थान्बा मुबा। तर ङा परमप्रभुसे लोङ्बा खबा लाबालुङ्सर पुइखसी थे जैतूनना दोङरी मे सल्गब लसी पिन्ना, ओच्छे थेला हाँगागदे क्युइला। ङा जम्मान भन्दा घ्रेन परमप्रभुसे एनीगदेदा सूबा मुबा, ङाइ एनीगदेथोरी आपत विपत पुइखबारी पक्का लबा मुला। तिग्दा भिसम एनी इस्राएलला म्हिगदेदेन यहूदाला म्हिगदेसे नाइबा गे लबा मुला, ओच्छे बाल लाला लागिरी धूप म्रासी ङादा बोमो खना लबा मुला।”
यर्मियादा साइबारी जाल लबा
ङाला शत्रुगदेसे ङादा बिरोध लसी जाल लबा ताम परमप्रभुसे ङादा उन्सी पिन्बासेलमा ङाइ था याङ्खम्जी। ङा मि साइबाला लागिरी भोर्बारी छ्याइबा सोझो ग्यु बोको गिक ह्रङ्बान मुबा। थेनीगदेसे ङाला बिरोधरी जाल लबा ताम ङादा थानोन आरेमुबा। थेनीगदेसे चुह्रङ् भिसी पाङ्बान मुबा, “चु दोङदा थेला रोदेन छ्यामनोन नाश लइ, चुदा छोन्बो म्हिगदे चिबा य्हुल्साग्याम थासी भ्याङ्गे, ओच्छे थेला मिन खाइमै खालैसेन आढन्गै।”
जमाहेन्से ङाइ चुह्रङ् भिसी प्रार्थना लजी, “जम्मान भन्दा घ्रेन परमप्रभु, ह्राङ ठीक निसाफ लबा परमेश्वर हिन्ना। ह्राङसे म्हिगदेला सेमला तामदेन खेन्बा तामदा ज्यना लसी च्यामुला। ङाइ ङाला मुद्दा ह्राङदा जिम्मा पिन्बा मुला। ह्राङसे थेनीगदेदा सजाय पिन्बा ङाइ म्राङ्म्याङ्गै।”
अनातोतला म्हिगदेसे ङादा चुह्रङ् भिसी पाङ्बा मुबा, “एसे परमप्रभुला मिन किन्सी अगमवाणी आपाङ्गो, आहिन्सम ए ङन्ना याग्याम सिला।” थेतबासेलमा जम्मान भन्दा घ्रेन परमप्रभुसे ङादा चुह्रङ् भिसी सुङ्जी, “च्यागो, ङाइ थेनीगदेदा सजाय पिन्ना। थेनीगदेला भ्योन म्हिगदेदा लडाइरी साइला, ओच्छे थेनीगदेला झा झामेगदे चा अनिकाल तसी चआम्याङ्ना सिला। अनातोतला जम्मान म्हिगदेदा नाश लबा धुइ ङाइ तोगब लसी जिन्बा मुला, थे धुइरी थेनीगदे खालैनोन आसो।”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.