Eastern Tamang Language Bible
यशै 64
मु थिसी ह्राङ मार फेप्खबा हिन्सम तसेला मुबा, ओच्छे ह्राङदा म्राङ्सी गङ्गदेन ल्हीगल्हीग तबा हिन्सम तसेला मुबा! मेसे क्युइ फ्योना लबा ह्रङ्नोन थेनीगदेएनोन लोङ्सी ल्हीगल्हीग तसेला मुबा। परमप्रभु, फेप्खउ ओच्छे शत्रुगदेदा ह्राङला शक्ति उन्गो। ह्राङ फेप्खमा य्हुल य्हुल्ला म्हिगदे लोङ्सी फितफित धर्गै! ह्राङ मार फेप्खसी ङन्से म्हन्नोन आम्हन्बा घ्रेन घ्रेन गेगदे लबा मुला, थे धुइरी ह्राङदा म्राङ्सी लोङ्सी गङ्गदे ल्हीगल्हीग तबा मुबा। ह्राङ ह्रङ्बा अर्गु परमेश्वरदा ओन्माहेन्सेन खाइमै खालैसेन म्राङ्बा आरे, ओच्छे अर्गु परमेश्वरला बारेरी थेःबाएनोन आरे। ह्राङला ग्याम च्यासी चिबा म्हिगदेला लागिरी घ्रेन घ्रेन गे लबा परमेश्वर ह्राङ जे हिन्ना। ताङ्सी ताङ्सी ठीक गे लबा म्हिगदेदेन ह्राङसे उन्बा ग्यामरी भ्रबा म्हिगदेदा ह्रो लबाला लागिरी ह्राङ फेप्खमुला। तर ङन्से चा ह्राङसे लोप्बा तामदा वास्तान आलना पाप लबाला लबान लजी। जमाहेन्से ह्राङ बोमो खजी। ह्राङ बोमो खना खनान ङन्से ल्हानान ङाच्छाहेन्से पाप लबाला लबान लजी। जमाहेन्से ङनी खाह्रङ् लसी जोगब तखम्ला? ङनी जम्मान अशुद्ध म्हि ह्रङ्बान तबा मुला, ओच्छे ङन्से लबा जम्मान भन्दा ज्यबा गेगदेएनोन फोहोरनोन फोहोर मुबा भोक्टो क्वान ह्रङ्बान तबा मुला। पापसे लमा ङनी ह्रेसी निबा लाबासे भोर्बा भा ह्रङ्बान तबा मुला। ह्राङला मिन किन्बा म्हि खालैनोन आरे, ह्रो म्हाइबाला लागिरी ह्राङ मुबा ग्लारी खबा म्हि खालैनोन आरे। ङन्ना पापसे लमा ङन्दा ख्लासी ह्राङ ङनीग्याम थारेङ् तबा मुला।
तर परमप्रभु, ह्राङ ङन्ना आबा हिन्ना। ङनी साप्रा हिन्ना, ह्राङ चा कुमाले हिन्ना। ह्राङसेन ङन्दा स्होबा हिन्ना। परमप्रभु, ङन्से लबा पाप सदन आढन्गो, ओच्छे ङन्देन छ्याम ल्हानान बोमो आखउ। परमप्रभु, ङन्ना बिन्ती मुला, ङन्दा दया लउ। तिग्दा भिसम ङनी जम्मान ह्राङलान म्हि हिन्ना। ह्राङसे धम्बा सहर चा तोङ्तोङ्बा ग्ला ह्रङ्बान तबा मुला, यरूशलेम सहर पूरन नाश तसी तोङ्तोङ्बा ग्ला दोबा मुला। ङन्ना आखेम्हेमेसे ह्राङला जयजयकार लबाला लागिरी स्होबा चोखोदेन जेःबा मन्दिर मेसे क्रोसी नाश तबा मुला, ओच्छे ङन्से ल्हानान महङ्गो भिसी म्हन्बा स्हेगदे पूरन नाश तबा मुला। परमप्रभु, चु जम्मान तसी जिन्सीनोन तिग ह्राङ अझै कुटिसी धन्छ्याबा? तिग ह्राङ कुटिसी धन्छ्यासी ङन्से नातोःबा भन्दा अझै ल्हानान सजाय नापुङ्बा?
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.