Eastern Tamang Language Bible
यशै 51
यरूशलेमदा आँट पिन्बा बचनगदे
परमप्रभुसे चुह्रङ् भिसी सुङ्बा मुला,
“ङाइ म्हन्बा अन्छार भ्रबादेन ङादा म्हाइबागदे,
ङाला ताम ङ्यन्गो।
जुन युङ्बाग्याम एनीगदेदा स्होबा मुला,
ओच्छे जुन खानीग्याम एनीगदेदा तेःबा मुला,
थेला बारेरी ढन्गो।
थे युङ्बादेन खानी ह्रङ्बान एनीगदेला म्हेमे अब्राहामदेन ममम्हेमे सारादा ढन्गो।
ङाइ अब्राहामदा ङ्योइमा थेला कोला आरेमुबा,
तर ङाइ थेदा मोलम पिन्जी,
ओच्छे थेला सन्तान ल्हानान तना लजी।
ङाइ सियोनदा दया लला,
ओच्छे थेला नाश तसी जिन्बा ग्लारी चिबा म्हिगदेदा ङाइ दया लला।
थे य्हुल्सा तोङ्तोङ्बा ग्ला दोसी जिन्बा मुसैनोन ङाइ थेदा अदनना बगैँचा ह्रङ्बान स्होला।
थेरी ताङ्सी ताङ्सी धन्यवाद पिन्बान व्हाइ गोला।
“ङाला म्हिगदे, ङाला ताम ङ्यन्गो,
ङाला य्हुल्ला म्हिगदे, ङाला ताम ज्यना लसी ङ्यन्गो।
ङाइ य्हुल य्हुल्ला म्हिगदेला लागिरी ङाला ठिम पिन्ना,
ङाइ लबा निसाफ चा य्हुल य्हुल्ला म्हिगदेला लागिरी नाङ्सल दोला।
ङा योनान खसी थेनीगदेदा जोगब लला,
ङाइ थार्ना लबा धुइ खसी जिन्बा मुला,
ङाइ य्हुल य्हुल्ला म्हिगदेला निसाफ लला,
समुद्र क्यारक्युरला थारेङ् थारेङ्ला य्हुल्सागदेला म्हिगदेसे ङाला ग्याम च्याबा मुला,
ङाइ थेनीगदेदा जोगब लला भिसी थेनीगदेसे ङाथोरी आश लबा मुला।
एनीगदेसे तोर मुपट्टि च्यागो,
ओच्छे जम्बुलिङदा च्यागो।
मु म्युगु ह्रङ् लसीन म्हसी निला,
ओच्छे जम्बुलिङ चा भोक्टो क्वान ह्रङ् लसीन ढेसी निला।
ओच्छे थेरी चिबा म्हिगदे जम्मान नाफ्राङ सिबा ह्रङ् लसीन सिला,
तर ङाइ एनीगदेदा जुकजुकधोनान चिबा थार्बा पिन्ना,
ओच्छे ङाइ एनीगदेदा दुखग्याम फेबा ताम चा खाइमै म्हासी आनी।
“एनीगदे जुन जुनदा परमेश्वरदा सेम निबा ताम था मुला,
ओच्छे जुन जुनसे सेमरी ङाला ठिम थान्बा मुला,
थेनीगदेसे ङाला ताम ङ्यन्गो,
म्हिगदेसे एनीगदेदा खिसीदेन बेइज्जत लमा एनीगदे आलोङ्गो।
तिग्दा भिसम बुलुङ्से चबा क्वानदेन ऊन ह्रङ् लसीन थेनीगदे म्हासी निला,
तर ङाइ एनीगदेदा जुकजुकधोनान चिबा थार्बा पिन्ना,
ओच्छे ङाइ एनीगदेदा दुखग्याम फेबा ताम चा खाइमै म्हासी आनी।”
फेप्खउ, परमप्रभु, ह्राङला शक्तिग्याम ङन्दा जोगब लउ,
ओन्माला धुइरी उन्बा ह्रङ्नोन लसी ह्राङला शक्ति उन्गो,
समुद्रला लोङ्बा खबा जन्तु1दा ह्राङसेन टोगोल टोगोल लबा आहिन?
ओच्छे थे अजिङ्गरदा ह्राङसेन भ्लोसी साइबा आहिन?
हिन्ना, थे परमप्रभु ह्राङनोन हिन्ना।
ह्राङसे दुखग्याम फेबारी छ्याइबा म्हिगदेदा क्याम्सङ् भोर्बाला लागिरी ह्राङसेन समुद्र ङार्ना लबा मुबा।
ओच्छे समुद्र न्हङ्री ग्याम स्होबाएनोन ह्राङनोन मुबा।
परमप्रभुसे सय फासी फेबागदे यरूशलेमरी दोःसी खला।
थेनीगदे व्हाइ गोबान सियोनरी वाङ्ला।
थेनीगदे थेरी सदन ताङ्सी ताङ्सी चिम्याङ्ला।
ओच्छे थेरी दुखदेन आपत विपत खाइमै आत।
“एनीगदेदा आँट पिन्बा ङानोन हिन्ना।
सिसी निबा म्हिदेन स्याङ्सी निबा छे ह्रङ्बा म्हिला सन्तानदेन छ्याम एनीगदे तिग्दा लोङ्बा?
तिग एसे मुदेन जम्बुलिङ छ्याना लबादेन एदा स्होबा ङा परमप्रभुदा म्लेःबा?
एदा नाश लबारी म्हाइबादेन एदा नाङ्बाझ्याक्बा लबागदेला बोमोसे लमा ए तिग्दा धिन धिननोन लोङ्सी चिबा?
अर्गुला तहरी परब तसी ब्लप्बागदे योनान दुखग्याम थोन्म्याङ्ला।
थेनीगदे झ्याल्खान न्हङ्री आसि,
ओच्छे थेनीगदेसे चबा थुङ्बाएनोन तोःदेधोना याङ्ला।
तिग्दा भिसम ङा परमप्रभु एला परमेश्वर हिन्ना,
ङाइ समुद्रदा चलब लमा छाल रेःमुला।
ङाला मिन जम्मान भन्दा घ्रेन परमप्रभु हिन्ना।
ङाइ ङाला बचन एला सुङ्री थान्सी पिन्बा मुला,
ओच्छे ङाइ ङाला यासे घप्सी एदा जोगब लबा मुबा।
ङाइ मुदा थेलान ग्लारी थान्बा मुला,
ओच्छे जम्बुलिङ छ्याना लबा मुला,
ओच्छे ङाइ सियोनदा ‘ए ङाला म्हि हिन्ना’ भिसी पाङ्बा मुला।”
यरूशलेमदा दुखग्याम फेबा
यरूशलेमला म्हिगदे, परमप्रभुला बोमोला झोकरी एनीगदेसे सजाय नातोःजी,
थेसे पिन्बा सजायग्याम एनीगदे य्हाङय्होङ तबा मुला।
दाहेन्से एनीगदे छोर्गो, ओच्छे रेःगो।
एनीगदेदा यारी चुङ्सी थोबाला लागिरी एनीगदेसे न्हबा झागदे न्हङ्ला गिकएनोन आरेमुबा।
एनीगदेदा यारी चुङ्सी भोर्बाला लागिरी एनीगदेसे सयार लबा झागदे न्हङ्ला गिकएनोन आरेमुबा।
एनीगदेथोरी दोब्बर आपत विपत खबा मुला,
लडाइसे लमा एनीगदेला य्हुल्सा नाश तबा मुला।
ओच्छे एनीगदे फोइथाननोन मुला।
एनीगदेदा दया लबा म्हि खालैनोन आरे।
एनीगदेला सन्तान कमजोर तसी ग्यामला कुनीरीक्यार ह्रिल्बा मुला,
थेनीगदे शिकारीसे झुबा वारी परब तबा तङ्गी ह्रङ्नोन तबा मुला।
थेनीगदे परमप्रभु एनीगदेला परमेश्वरला बोमोला झोकरी परब तबा मुला।
दुखसेलमा अङ्गुरला निङ्गु थुङ्सी ङ्य्होइबा ह्रङ्नोन तबा यरूशलेमला म्हिगदे, चु ताम ङ्यन्गो,
ह्राङला म्हिगदेदा जोगब लबा एनीगदेला परमप्रभु परमेश्वरसे चुह्रङ् भिसी सुङ्बा मुला,
“च्यागो, ङाइ एनीगदेला याग्याम ङ्य्होइना लबा स्हे मुबा खोरे किन्बा मुला,
थे चा ङाला बोमोला झोकला खोरे हिन्ना,
थे खोरेग्याम एनीगदेसे दोःसी खाइमै थुङ्आतोः।
ङाइ थे खोरे एनीगदेदा दुख पिन्बागदेला यारी पिन्ना,
थेनीगदेसे एनीगदेदा ‘ख्लुब तउ, ङनी एनीगदे थोग्याम भ्रइ’ भिसी पाङ्बा मुबा,
ओच्छे एनीगदेसे चा ह्राङला गो सदेन भ्रबा ग्याम ह्रङ्बान स्होसी पिन्बा मुबा।”
Source notes (1)
- Footnote समुद्रला लोङ्बा खबा जन्तु हिब्रू बाइबलरी चा राहाब भिसी पाङ्बा मुला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.