Eastern Tamang Language Bible
यशै 33
ह्रो याङ्बाला लागिरी प्रार्थना लबा
नाश लबागदे, एनीगदे ह्राङनोन चा नाश तबा आरे। एनीगदेदा परमेश्वरसे सजाय पिन्ना! अर्गुदा धोका पिन्बागदे, एनीगदेदा खालैसेन धोका पिन्बा आरे, एनीगदेदा परमेश्वरसे सजाय पिन्ना।
परमप्रभु, ङन्दा दयामाया लउ। ङन्से ह्राङग्याम ह्रो याङ्ला भिसी आश लबा मुला। धिनहुनोन ह्राङ ङन्ना शक्ति दोगो, ओच्छे ङन्दा दुखग्याम फेउ। ङन्ना लागिरी ह्राङसे लडाइ लमा ह्राङला घ्रेन काइ थेःसी य्हुल य्हुल्ला म्हिगदे छरपष्ट तमुला। य्हुल य्हुल्ला म्हिगदे, एनीगदेसे ब्यन्सी भबा स्हेगदे जजाबा जजाबा तिरीगदेसे चबा ह्रङ्नोन तला। ओच्छे थे स्हेगदे भोर्बाला लागिरी म्हिगदे तिरीगदे ह्रङ् लसीन पोप तला।
परमप्रभु जम्मान भन्दा घ्रेन परमप्रभु हिन्ना, तिग्दा भिसम थे जम्मान भन्दा घ्रेन ग्लारी धन्छ्याबा मुला। परमप्रभुसे सियोनदा ठीक निसाफ लबादेन ह्राङदा सेम निबा तामसे प्लिङ्ना लला। दुखला धुइरी एनीगदेदा जोगब लबा मूल चा परमप्रभु हिन्ना। थेनोन परमप्रभुसे एनीगदेदा म्हाइसीन आयाङ्बा ज्ञान बुद्धि पिन्बा मुला। परमप्रभुदा मान लबा ताम चा एनीगदेला जम्मान भन्दा घ्रेन धन सम्पत्ति हिन्ना।
च्यागो, य्हुल य्हुल्ला भङ्बा म्हिगदे ह्रो याङ्बाला लागिरी ग्यामरी घ्रेन काइ तेःसी क्राबान मुला। ढिक्ना लबा थेनीगदेला ग्लेब्लोनगदे घ्वाँघ्वाँ क्राबान मुला। मूल ग्यामगदे सुनसान तबा मुला, थे ग्यामरी भ्रबा म्हि गिकनोन आरे। कबुल लबा अन्छार खालैनोन भ्रबा आरे, साक्षी पिन्बागदेदा हेला लबा मुला। ओच्छे खालैसे खालैदान मान आलमुला। य्हुल्सा चा सोङ्सोङ् खार्बादेन बाझोँ तबा मुला। ओच्छे लेबनान य्हुल्साला ह्रि खार्सी निबा मुला। शारोन भिबा ग्लाला ज्यबा सगदे तोङ्तोङ् तबा मुला। ओच्छे बाशानदेन कर्मेल गङ्ला दोङगदेला भागदे जम्मान ताइबा मुला।
शत्रुगदेदा परमप्रभुसे होशियार तना लबा
परमप्रभुसे चुह्रङ् भिसी सुङ्बा मुला, “दाहेन्से ङा रेःला। दाहेन्से ङा गादे शक्तिशाली मुला थे ङाइ उन्ना। एनीगदेसे आतोःबा जुक्तिगदे तेःबा मुला। एनीगदेसे लबा जम्मान गे चा गेआखेल्बा गे हिन्ना। एनीगदेदा नाश लबा मे चा एनीगदेलान सा हिन्ना। चून क्रोबा ह्रङ् लसी म्हिगदे क्रोला। थाबा पुजुघारी मेरी ख्राङ्बा ह्रङ् लसी एनीगदेदा ख्राङ्ला। थारेङ् चिबा म्हिगदे, ङाइ तिग लबान मुला ङ्यन्गो। ओच्छे ङाम्री चिबागदे, सेमहेन्से ङाला शक्तिला बारेरी घोउ!”
सियोनरी मुबा पापीगदे लोङ्बा मुला। परमेश्वरदा आतेन्बागदे लोङ्सी फितफित धर्बान चुह्रङ् भिसी पाङ्मुला, “य्हाङ न्हङ्ला खाला म्हि नाश लबा मेरी चिखम्ला? य्हाङ न्हङ्ला खाला म्हि जुकजुकधोना क्रोबा ग्लारी चिखम्ला?” खालैनोन चिआखम। जुन म्हि परमेश्वरसे म्हन्बा अन्छारला ग्यामरी भ्रमुला, ओच्छे ठीक ताम जे लमुला, खालै म्हिसे करकाप लसी किन्बा नाफा आकिन्मुला। ओच्छे जुन म्हिसे घूस आकिन्मुला, जुन म्हिसे म्हि साइबाला लागिरी जाल लबा म्हिला ताम आङ्यन्मुला, ओच्छे नाइबा गे लबा म्हिदेन छ्याम आभ्रमुला। थे म्हि चा ज्यना लसी चिम्याङ्ला, ओच्छे क्युर्सीन पर्खाल लबा ग्लारी चिबा ह्रङ्नोन लसी जोगब तसी चिम्याङ्ला। थेसे चबारी चबा स्हेदेन थुङ्बारी क्युइ याङ्ला।
लिच्छाला ज्यबा धिन
एनी यहूदाला म्हिगदेसे ग्लेला शक्ति म्राङ्ला, ओच्छे य्हुल्साला साँध घ्रेन घ्रेन तसी निबा म्राङ्ला। एनीगदेसे ङाच्छा लोङ्ना लबा तामदा ढन्ना। “थे मूल हाकिम खाइ? तिरो दुइबा म्हि खानङ् निजी? धरहराला जिम्मा किन्बा हाकिम खानङ् मुला?” एनीगदेसे थे घमण्डीदेन तामनोन आघोबा उदेकला ग्योइगदे पाङ्बा म्हिगदेदा दोःसी आम्राङ्।
तोगब लबा य्हाङला चाडगदे धङ्बा सहर सियोनदा च्यागो, एनीगदेला मीसे यरूशलेमदा म्राङ्ला, थे शान्तिला ग्ला तला। थेला पाल खाइमै आतेः, ओच्छे थेला पाल खीबा किलो खाइमै आप्योक ओच्छे छो खाइमै आटाङ्। थेरी परमप्रभु य्हाङला शक्तिशाली परमेश्वर धन्छ्याला। थे ग्ला चा घ्रेन घ्रेन स्योङ्गदे भ्योङ्बा ग्ला तला। तर थे स्योङ्री शत्रुला दोँगादेन पानी जहाज आभ्र। थेनीगदेला पानी जहाजला छोगदे खुकुलो तबा मुला। थेनीगदेसे पानी जहाजला गुङ्री पाल फ्रेङ्बारी थान्बा थाम कोङ्ना लसी खिबारी आखम। थेनीगदेसे थेला पाल फ्रेङ्बारी आखम। जमाहेन्से य्हाङसे ब्यन्बा थेनीगदेला सामानगदे कुज्या म्हिगदेला लागिरीनोन भो लबारी छ्योला। तिग्दा भिसम परमप्रभु निसाफ लबा य्हाङला परमेश्वर हिन्ना। य्हाङदा ठिम पिन्बा परमप्रभु हिन्ना, परमप्रभु य्हाङला ग्ले हिन्ना, थेसेन य्हाङदा जोगब लला। सियोनरी चिबा खालैसेन “ङा आखम्बा मुला” भिसी आपाङ्। ओच्छे थेरी चिबा म्हिगदेला पाप माफ लला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.