Eastern Tamang Language Bible
यशै 29
यरूशलेम सहरसे सजाय याङ्बा
दाऊद चिबा सहर अरीएल1, एसे परमेश्वरग्याम सजाय याङ्ला। दिङ्थोरी दिङ् कप्बान निगै, ओच्छे चाडगदे खबा निबा तगै। तसैनोन ङाइ अरीएलथोरी आपत विपत पुइखला, ओच्छे थेसे क्राबा क्रिङ्बा लला, थे सहर चा कानोन कासे प्लिङ्बा बलि लबा ग्ला ह्रङ्बान दोला। ङाइ एला सहर क्युर्सीन नोबा नोबा ग्लादेन धरहरा स्होसी एला सहरदेन छ्याम लडाइ लला। एदा मार भ्याङ्ला, एसे सग्याम ताम पाङ्ला, धुलु न्हङ्ग्याम ज्यना लसी घोबारी आखम्बा एला काइ थोन्ना, एला काइ म्हङ्ला ह्रङ्बा काइ जम्बुलिङग्याम थोन्ना, ओच्छे एसे पाङ्बा तामसे धुलु न्हङ्ग्याम सा ताम लला।
तर एला ल्हानान शत्रुगदे चा मसिनो धुलु ह्रङ्बान तला, ओच्छे दया आरेबागदेला हुल चा छिन्नङ्रीन लाबासे भोर्बा भुस ह्रङ्बान तला। एनीगदेसे आम्हन्बा धुइरी तिख्खुरीन जम्मान भन्दा घ्रेन परमप्रभु चा गडङ्गुडुङ् मु ठेङ्बा, साङ्गुलदेन घ्रेन घ्रेन काइ, म्हङ्गुलिङदेन लाबालुङ्सर, ओच्छे नाश लबा मे ल्हामदेन छ्याम फेप्खला। अरीएलदा बिरोध लसी लडाइ लबारी जम्मान य्हुल य्हुल्ला म्हिगदे खला। लडाइ लबाला लागिरी थेला क्युर्नोनग्याम खबा म्हिगदेसे थेला नोबा नोबा ग्लागदे नाश लला, तर थे ताम चा म्हङ् ह्रङ्बान तला। फोख्रेन्बा म्हिसे म्हङ्री चबा म्राङ्मुला, तर छोर्बा धुइरी फोइथाननोन तमुला, क्युइ फुइबा म्हिसे म्हङ्री क्युइ थुङ्बा म्राङ्मुला, तर छोर्बा धुइरी क्युइ फुइसी ओल्गङ् खार्बा तमुला। सियोन गङ्ला बिरोध लसी लडाइ लबा य्हुल य्हुल्ला म्हिगदेला दशाएनोन थेह्रङ्बान तला।
होशियार तना लसै वास्ता आलबागदेदा होशियार तना लबा
उदेक तउ, काना तसी तिगै आम्राङ्बा म्हि दोगो। ङ्य्होइबा म्हि मि दोगो, तर अङ्गुरला निङ्गुसे आहिन, य्हाङय्होङ तउ, तर ङ्य्होइबा स्हेसे आहिन। परमप्रभुसे एनीगदेदा ल्हानान म्हेर्बा खना लबा मुला। अगमवक्तागदे चा एनीगदेला मी हिन्ना। तर परमप्रभुसे एनीगदेला मी खीसी बन्दा लसी पिन्बा मुला। एनीगदेला लागिरी चु जम्मान ताम चा छाप लसी बन्द लबा किताबला मुठारी भ्रिबा छिकगदे जे हिन्ना। चुदे एनीगदेसे पढब लबारी खम्बा म्हिदा किताबला मुठा पिन्सी “दया लसी चु पढब लसी पिन्गो” भिसी पाङ्जी भिसम, थेसे चुह्रङ् भिसी जोहाब पिन्ना, “अँहँ, ङाइ पढब लबारी आखम, थे छाप लसी बन्द लबा किताब हिन्ना।” ओच्छे चुदे पढब लबारी आखम्बा म्हिदा थे किताबला मुठा पिन्सी “दया लसी चु पढब लसी पिन्गो,” भिसी पाङ्जी भिसम, थेसे “ङाइ पढब लबारी आसेमुला भिसी पाङ्ला।”
परमप्रभुसे चुह्रङ् भिसी सुङ्बा मुला, “चु म्हिगदे ली उन्बारी ङाला ङाम्री खमुला, ओच्छे सुङ्से जे ङादा मान लमुला। तर थेनीगदेला सेम चा ङाग्याम थारेङ् तबा मुला। थेनीगदेसे ङाला जयजयकार लबा चा म्हिगदेसे लोप्बा ठिमगदे जे हिन्ना। थेतबासेलमा ङाइ दोःसी तिरेम चु म्हिगदेला गुङ्री उदेक तबाथोरी उदेकला गे लसी उदेक तना लला, ओच्छे बुद्धि मुबा म्हिगदेला बुद्धि नाश तला। ओच्छे थेनीगदे न्हङ्ला जम्मान भन्दा चलाख दोबा स्होबा म्हिगदेला चलाख तामगदे म्हसी निला।”
लिच्छाला लागिरी आश याङ्बा ताम
जुन म्हि परमप्रभुग्याम लासी ह्राङला जुक्ति लबारी म्हाइमुला, जुन म्हिसे धोपधोपरी ह्राङला गे लमुला, थेनीगदेसे परमेश्वरग्याम सजाय याङ्ला। ओच्छे थेनीगदेसे चुह्रङ् भिसी म्हन्मुला, “य्हाङदा खाल्से म्राङ्ला? य्हाङसे लबा गे खाल्से था याङ्ला?” एनीगदेसे जम्मान ताम उल्टो पाङ्मुला। साप्राला ताङ् स्होबा म्हिदेन साप्रारी खजिबा चा घ्रेन हिन्ना? तिग ताङ्से थेदा स्होबा म्हिला बारेरी “थेसे ङादा स्होबा आहिन” भिसी पाङ्खम्ला? तिग ताङ्से थेदा स्होबा म्हिला बारेरी “थेसे तिगैनोन आसेमुला” भिसी पाङ्खम्ला?2
तिग लेबनान य्हुल्सा योनान ज्यबा स दोबारी आखम? ओच्छे ज्यबा स चा ह्रि ह्रङ्बान म्राङ्आखम? थे धिनकुनु नाब्यङ् आथेःबा म्हिसे किताबला मुठारी भ्रिबा बचन थेःला, ओच्छे धोपधोप्बा ग्लारी चिबा मी आम्राङ्बा म्हिसेनोन म्राङ्ला। सोझो म्हिगदे दोःसी परमप्रभुदेन छ्याम गिक तसी ताङ्ला, ओच्छे खाँचो तबा म्हिगदे इस्राएलला तिगै दोष आरेबा परमेश्वरदेन छ्याम गिक तसी ताङ्ला। दया आरेबा म्हिगदेला मिननोन म्हला। बिरोध लबागदे म्हसी निला, ओच्छे नाइबा गेरी सेम लबागदेदा नाश लला। जुन म्हिसे अर्गु म्हिदा तामरी फसब लसी दोष लला, ओच्छे निसाफ लबा ग्लारी ह्राङदेन छ्याम मुद्दा लबा म्हिदा तिगै ताम पाङ्बारी आखम्बा तना लला, ओच्छे निसाफ लबा धुइरी फट्टा साक्षी पिन्सी तिगै दोष आरेबा म्हिला ठीक निसाफ लआपुङ्बागदेदा परमप्रभुसे सजाय पिन्ना।
थेतबासेलमा अब्राहामदा थार्ना लबा परमप्रभुसे याकूबला सन्तानदा चुह्रङ् भिसी सुङ्बा मुला, “याकूब दाहेन्से पेआतोः, ओच्छे एसे बेइज्जत नाआतोः। थेनीगदेसे ह्राङलान गुङ्री ङाइ पिन्बा झा झामेगदे म्राङ्माहेन्से ङादा मान लला, थेनीगदेसे याकूबला परमेश्वरदा तिगै दोष आरेबा परमेश्वर हिन्ना भिसी सेमहेन्सेन पाङ्ला, ओच्छे इस्राएलला परमेश्वरदा मान लला। सेम कोल्बागदेसेनोन घोखम्ला, ओच्छे तामगान लबागदेसे ज्यबा ताम सेमरी किन्ना।”
Source notes (2)
- Footnote अरीएल चुला अर्थ चा परमेश्वरला सिंह अथवा बलि फुल्बा ग्ला हिन्ना। चुरी चा यरूशलेमदा पाङ्बा हिन्ना।
- Cross-reference यशै ४५:९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.