Eastern Tamang Language Bible
यशै 21
बेबिलोन य्हुल्साला बिरोधरी अगमवाणी लबा
समुद्रला कुनीला तोङ्तोङ्बा ग्ला बेबिलोन य्हुल्साला बारेरी लबा अगमवाणी चुह्रङ्बा मुला, लोपट्टिला य्हुल्सारी घ्रेन मङगुलिङ खबा ह्रङ् लसी तोङ्तोङ्बा लोङ्बा खबा य्हुल्साग्याम नाश लबा शक्ति गिक खला। परमप्रभुसे ङादा लोङ्बा खबा ताम गिक उन्जी, “धोका पिन्बासे धोका पिन्ना, ओच्छे ब्यन्बागदेसे ब्यन्ना। एलामला सिपाहीगदे, छेबारी निउ। मादीला सिपाहीगदे, सहरदा घेरब लउ। बेबिलोनसे पिन्बा जम्मान दुखगदे ङाइ जिन्ना लला।”
थेतबासेलमा ङादा ल्हानान दुख तबा मुला। ङादा कोला न्हबा बेथा याङ्बा म्रिङ्म्हेमेदा तबा ह्रङ्बान दुख तबा मुला। ङाइ जुन ताम थेःबा मुला, थे तामसे ङादा ल्हानान दुख तना लबा मुला। ङाला तिङसे ग्ला ख्लाबा मुला, लोङ्सी ङा फितफित धर्बा मुला। ङ्यसे ङाइ म्हन्बा अन्छार ढुक्क तसी चिबारी आखम्नी। तर ङ्यसेला धुइ चा ङाला लागिरी लोङ्बा खबा धुइ तबा मुला।
थेनीगदेसे टेबुल ठीक लमुला, गलैँचा तीमुला, ओच्छे चबा थुङ्बा लमुला। थेनोन धुइरी खालैसे “हाकिमगदे रेःगो, ओच्छे ह्राङ ह्राङला ढाल थीगो” भिसी कुल्जी।
परमप्रभुसे ङादा चुह्रङ् भिसी सुङ्जी, “निउ, पाले गिक थान्गो। थेसे जुन ताम म्राङ्ला, थेनोन ताम पाङ्गै। तारी क्रेबा म्हिगदेला हुल, रथगदे, गधा ओच्छे ऊँटरी क्रेसी खबा म्हिगदे म्राङ्माहेन्से थे होशियार तसी चिगै।”
थे पालेसे चुह्रङ् भिसी क्रिङ्जी, “मालिक, ङा धिनहुँनोन पाले चिबा धरहरारी राप्सी चिमुला, ओच्छे म्हुनङ् सदन पाले चिबा ग्लारी चिमुला। स्य्हीगो, तारी क्रेबा म्हिला हुलदेन छ्याम रथरी म्हि गिक खबान मुला। ओच्छे थे म्हिसे चुह्रङ् भिसी पाङ्जी, ‘बेबिलोन य्हुल्सा नाश तजी, नाश तजी। ओच्छे बेबिलोनसे ठ्वाइसी स्होबा जम्मान ला लुला मूर्तिगदे छ्याकछिक लसी सरी भ्याङ्बा मुला।’”
ङाला म्हिगदे, दाइँ लबा खलारी दुख नाबागदे! जम्मान भन्दा घ्रेन परमप्रभु इस्राएलला परमेश्वरग्याम ङाइ जुन ताम थेःबा मुला, थेनोन ताम ङाइ एनीगदेदा पाङ्ला।
एदोम य्हुल्साला बिरोधरी अगमवाणी लबा
दुमा सहरला बारेरी लबा अगमवाणी चुह्रङ्बा मुला, “पाले, म्हुन गादे बाँकी मुला? ओ पाले, म्हुन निबारी गादे धुइ मुला?” भिसी खालैसे ङादा सेइर सहरग्याम ङ्योइबान मुला। पालेसे चुह्रङ् भिसी जोहाब पिन्जी, “य्हाल तबान मुला, ओच्छे म्हुनएनोन तबान मुला। एदा तिगै ङ्योइतोःबा मुसम दोःसी खसी ङ्योइगो।”
अरब य्हुल्साला बिरोधरी अगमवाणी लबा
अरब य्हुल्साला बारेरी लबा अगमवाणी चुह्रङ्बा मुला, अरब य्हुल्सारी झाङगदे मुबा ग्लारी चिबा ददानीगदेला व्यापार लसी भ्रबा समूह, क्युइ फुइबागदेला लागिरी क्युइ भउ। ओच्छे तेमा भिबा ग्लारी चिबा म्हिगदे, अर्गु य्हुल्साग्याम य्हार्सी खबा म्हिगदेला लागिरी चबा स्हे भउ। थेनीगदे ह्राङदा साइबाला लागिरी थीबा तरवारदेन तगब लबा म्यादली ओच्छे लडाइला आपत विपतग्याम जोगब तबाला लागिरी य्हार्बान मुला।
परमप्रभुसे ङादा चुह्रङ् भिसी सुङ्बा मुला, “तिदिङ् न्हङ्री ज्याला किन्सी गे लबा नोकरसे धिन झ्याबा ह्रङ् लसी ङाइएनोन दिङ् झ्याला। तिदिङ् न्हङ्री केदार वंशला जम्मान घमण्ड नाश तला। म्यादली थोबा केदार वंशला लडाइ लबा म्हिगदे न्हङ्ला कोइ कोइ म्हि जे सोला।” परमप्रभु इस्राएलला परमेश्वरसे चुह्रङ्नोन सुङ्बा मुला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.