Eastern Tamang Language Bible
यशै 17
परमेश्वरसे अरामदेन इस्राएल य्हुल्सादा सजाय पिन्बा
दमस्कसला बारेरी चुह्रङ् लसी अगमवाणी लजी, “च्यागो, दाहेन्से दमस्कस सहर बाँकी आचि। थे जम्मान फुप्सी साप्रा युङ्बाला उम जे दोला। अरोएर य्हुल्साला सहरगदे सदनना लागिरी तोङ्तोङ्बा तला। थे ग्ला चा राग्यु छबा ग्ला तला, थेरी राग्युदा खालैसेन आतब। क्युर्सीन पर्खाल लबा एफ्राइमला सहरदेन दमस्कसला शक्ति म्हला। ओच्छे इस्राएलीगदेला बेइज्जत तबा ह्रङ्नोन अरामला सोबा म्हिगदेलाएनोन बेइज्जत तला” भिसी जम्मान भन्दा घ्रेन परमप्रभुसे सुङ्बा मुला।
परमप्रभुसे दोःसी चुह्रङ् भिसी सुङ्जी, “थे धिनकुनु याकूबला शक्ति म्हला, ओच्छे थेला ल्हुइला छि ङ्युसी निला। थे धिनकुनु इस्राएल चा बाली दुइसी जिन्बा भु ह्रङ्बान तला, ओच्छे रपाईगदेला ब्याँसीरी म्हिगदेसे सिलो दुइसी जिन्माहेन्से तोङ्तोङ् तबा भु ह्रङ्बान तला। जैतून तमाहेन्से उदिदी रोगदे बाँकी चिबा ह्रङ्नोन थेरीनोन तिगै सिलो चिला। जम्मान भन्दा नोबा हाँगाला जोरी गोर न्ही सोम रोगदेदेन रो रोबा हाँगागदेरी गोर ब्लि ङ्हा जैतूनना रो बाँकी चिबा ह्रङ्नोन इस्राएलीगदेएनोन तला” भिसी परमप्रभु इस्राएलला परमेश्वरसे सुङ्बा मुला।
थे धिनकुनु ह्रो याङ्बाला लागिरी म्हिगदेसे ह्राङदा स्होबा परमेश्वरदा च्याला, ओच्छे थेनीगदेला मी इस्राएलला तिगै दोष आरेबा परमेश्वरपट्टि तला। थेनीगदेसे ह्राङला यासे स्होबा बलि फुल्बा ग्लादा आच्या, थेनीगदेसे ह्राङला यासे स्होबा बलि फुल्बा ग्लागदेदेन अशेरा लुला मूर्तिगदेदाएनोन मान आल। थे धिनकुनु इस्राएलीगदेला ओन्छाङ्ग्याम हिव्वीदेन एमोरीगदे य्हार्मा सहरगदेदा तोङ्तोङ्बा तना लबा ह्रङ् लसी शक्तिशाली सहरगदे पुजु झाङ्देन पुजु दोङसे प्लिङ्सी तोङ्तोङ्बा तला। इस्राएल, एसे ह्राङदा पहरासे ह्रङ् लसी जोगब लबादेन थार्बा पिन्बा शक्तिशाली परमेश्वरदा म्लेःजी। एसे ज्यबा अङ्गुर व्हारा स्होसी ज्यबा अङ्गुरला दोङगदे सूजी? ओच्छे एसे सूबा धिनकुनुन थे अङ्गुर दोङ ल्हेसी निसैनोन ओच्छे स्य्होरी सूमैछ्याम थे अङ्गुर दोङरी म्हेन्दो सार्सैनोन थेरी तिगै रो आरो। ओच्छे खाइमै आम्लेःबा दुखदेन आपत बिपत जे तला।
शत्रुगदे ब्रेबा
ओहो! समुद्र ङ्याबा ह्रङ् लसीन य्हुल य्हुल्ला ल्हानान म्हिगदेसे हल्ली खल्ली लबान मुला। ओहो! समुद्ररी घ्रेन घ्रेन छाल रेःमा ङ्याबा ह्रङ् लसीन य्हुल य्हुल्ला म्हिगदे क्रिङ्बान मुला। तोडसे खबा भाल ङ्याबा ह्रङ् लसी य्हुल य्हुल्ला म्हिगदे क्रिङ्सैनोन परमेश्वरसे थेनीगदेदा बङ्मा थेनीगदे य्हार्सी थारेङ् निमुला। ओच्छे लाबासे भोर्बा गङ्ला पोलवादेन लाबालुङ्सरसे भोर्बा म्रा ह्रङ् लसी थेनीगदेदा ताप्ला। ङ्यसे थेनीगदेसे हुलदङ्ग लमुला। तर स्य्होधोनारी थेनीगदे निसी जिन्बा तमुला। य्हाङला य्हुल्सादा ब्यन्बा जम्मान म्हिला दशा चुह्रङ्बान तला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.