Eastern Tamang Language Bible
होशे 8
इस्राएलदा मूर्ति पूजा लबाला दोष लगब तबा
“बिकुल ह्राप्गो! शत्रुगदे परमप्रभुला म्हिगदेथोरी क्वाक्लिङ् फ्याङ्बा ह्रङ् लसी खबान मुला। तिग्दा भिसम ङाला म्हिगदेसे ङाला कबुल अन्छार भ्रबारी ख्लाबा मुला, ओच्छे थेनीगदेसे ङाला ठिमदा बिरोध लबा मुला। इस्राएलीगदेसे ङादा ‘ङन्ना परमेश्वर, ङन्से ह्राङदा ङोसेखम्गै’ भिसी बिन्ती चा लमुला। तर जुन ताम ठीक मुला थेनोन तामदा चा इस्राएलीगदेसे वास्ता आलमुला। थेतबासेलमा थेनीगदेदा शत्रुगदेसे ताप्मुला। थेनीगदेसे ङादा तिगै ताम आङ्योइना ग्लेगदे स्होमुला। थेनीगदेसे ह्राङलान म्हारदेन म्हुइसे ह्राङला लागिरी मूर्ति स्होसी ह्राङसे ह्राङदान नाश तना लबा मुला। सामरियाला म्हिगदे, एनीगदेसे स्होबा म्हे बहरला मूर्ति भ्याङ्गो। एनीगदे म्राङ्सी ङादा ल्हानान भोमो रेःबा मुला। एनीगदेसे खाइमा मूर्ति पूजा लबारी ख्लाबा? चु चा मूर्ति स्होबारी सेबा इस्राएली गिकसे स्होबा म्हे बहरला मूर्ति जे हिन्ना। थे मूर्ति परमेश्वर आहिन। सामरियारी मुबा थे म्हे बहरला मूर्तिदा नाश लला।
“इस्राएलला म्हिगदेसे लबा मूर्ख गे चा लाबादा सूबारी म्हाइबा ह्रङ्बान हिन्ना। तर थेनीगदेसे याङ्बा सजाय चा घ्रेन लाबालुङ्सर ह्रङ्बान तला। थेनीगदेसे खेती लसैनोन अन्न आरो। चुदे रोनोन रोसैनोन विदेशीगदे खसी चला। इस्राएलीगदे न्होङ्सी जिन्बा मुला। ओच्छे थेनीगदे य्हुल य्हुल्ला म्हिगदेला गुङ्री गेनोन आखेल्बा स्हे ह्रङ्बान तबा मुला। ह्रि गधा ह्राङ गिकनोन तोरमार भ्रबा ह्रङ् लसी थेनीगदे खालैलान तहरी आचिना अश्शूररी निजी। थेनीगदे अश्शूरदेन छ्याम ह्रो ह्रीबारी निबा मुला, ओच्छे ह्राङदा जोगब लबाला लागिरी थेनीगदेसे अर्गु य्हुल्ला म्हिगदेदा टाङ्गा पिन्बा मुला। थेनीगदेसे ह्राङदा जोगब लबाला लागिरी य्हुल य्हुल्ला म्हिगदेदा टाङ्गा पिन्सैनोन ङाइ थेनीगदेदा ग्ला गिकरी पोप लला। शक्तिशाली ग्लेसे नाङ्बाझ्याक्बा लबासेलमा थेनीगदे कमजोर तला।
“एफ्राइमला म्हिगदेसे पापबलि लबाला लागिरी बलि लबा ग्लागदे ल्हानान स्होबा मुला। तर थे जम्मान ग्लागदे थेनीगदेला लागिरी झन ल्हानान पाप लबा ग्लागदे दोबा मुला। थेनीगदेला लागिरी ङाइ ङाला ठिमरी ल्हानान तामगदे भ्रिबा मुबा। तर थेनीगदेसे थे ठिमदा उदेकलादेन विदेशी ठिम ह्रङ्बान म्हन्सी वास्तान आलनी। थेनीगदेसे ङाला लागिरी बलि फुल्मुला, ओच्छे थेनीगदेसेन स्या चमुला। तर थेनीगदेसे फुल्बा बलि म्राङ्सी ङा परमप्रभु थेनीगदेदेन छ्याम ताङ्बा आरे। दाहेन्से थेनीगदेसे लबा पाप ढन्सी ङाइ थेनीगदेदा सजाय पिन्ना। ओच्छे ङाइ थेनीगदेदा दोःसी मिश्र य्हुल्सारीन दोना लला1। इस्राएलला म्हिगदेसे घ्रेन घ्रेन दिमगदे स्होबा मुला, तर थेनीगदेसे ह्राङदा स्होबा परमेश्वरदा चा म्लेःबा मुला। ओच्छे यहूदासे सहरदा जोगब लबाला लागिरी ल्हानान सहरगदेरी पर्खाल स्होबा मुला। तर ङाइ थेनीगदेला सहरगदेरी मे लगब लला, ओच्छे थेनीगदेला सहरगदेदेन पर्खालगदेदा मेसे नाश लला।”
Source notes (1)
- Footnote मिश्र य्हुल्सारीन दोना लला चुरी मिश्र य्हुल्सारी दोना लला भिबा चा इस्राएलीगदेदा दोःसी थेरी भोर्ला भिसी पाङ्बा आहिन। चुला अर्थ चा इस्राएलीगदे मिश्र य्हुल्सारी ह्रङ्नोन लसी अर्गु य्हुल्साला घ्याबा दोला भिबा हिन्ना।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.