Eastern Tamang Language Bible
होशे 6
ह्राङला पाप ख्लासी परमेश्वरपट्टि दोःगो भिसी पाङ्बा
“खउ, य्हाङ परमप्रभुपट्टि दोगे। थेसे य्हाङदा छ्याकछिक निना लबा मुला, थेसेन य्हाङदा खाम्ना लला। थेसे य्हाङदा पोर तना लबा मुला, थेसेन य्हाङला पोरगदेरी मलम फोर्सी खीसी पिन्ना। उदि धिन लिच्छा य्हाङदा थेसेन दोःसी खाम्ना लला, ओच्छे य्हाङदा थेसेन भ्रबारी खम्बा तना लला। जमाहेन्से य्हाङ थेलान ङाच्छापट्टि चिम्याङ्ला। खउ, य्हाङ परमप्रभुला बारेरी घोइ, य्हाङसे अझै परमप्रभुला बारेरी घोबा सेम थोगे। धिनी फेबा ह्रङ्नोन परमप्रभु दोःसी फेप्खबा तामएनोन पक्का हिन्ना। परमप्रभु य्हाङ मुबा ग्लारी स भम्ना लबा बर्खाला नाम ह्रङ्नोन लसी फेप्खला।”
“एफ्राइम, ङाइ एदा तिग लसे? यहूदा, ङाइ एदा तिग लसे? एला माया मि स्य्होला खसुदेन स्य्होरीन म्हसी निबा शीत ह्रङ्बान मुला। थेतबासेलमा ङाइ निसाफ लबादेन नाश लबा ताम पाङ्बाला लागिरी ङाला अगमवक्तागदे एनीगदे मुबा ग्लारी पुइखबा मुला। ओच्छे ङाला सुङग्याम थोन्बा बचनग्याम ङाइ एनीगदेदा साइबा मुला। ङाइ लबा निसाफ चा एनीगदेथोरी तिप्लीङ् खबा ह्रङ् लसी खबा मुला। तिग्दा भिसम ङाइ म्हाइबा चा बलि आहिन, तर एनीगदेसे ह्राङ ह्राङ न्हङ्री दया लबा ताम म्हाइबा हिन्ना। ओच्छे मेरी ख्राङ्सी ङाला लागिरी बलि लबा भन्दा बरू थेनीगदेसे ङादा ज्यना लसी ङोसेगै भिसी ङाइ म्हन्बा मुला। तर परमेश्वरसे कुल्बा ताम अन्छार आदम आभ्रबा ह्रङ्नोन लसी थेनीगदेसेनोन परमेश्वरला कबुल अन्छार भ्रबारी ख्लाबा मुला। ओच्छे थेनीगदेसे थेरी ङादा विश्वास आलना ह्राङलान ग्यामरी भ्रबा मुला। गिलाद चा म्हिगदेदा साइबादेन नाइबा गे लबा म्हिगदे चिबा सहर हिन्ना। थे सहर नाङ्नोन काला ज्योइनोन ज्योइ जे मुला। पूजाहारीगदेएनोन ग्यामरी भ्रबा म्हिगदेला सामान ब्यन्बाला लागिरी ग्याम ग्यामरी लासी चिबा य्होगदेला समूह ह्रङ्बान तबा मुला। पूजाहारी थे म्हिगदेसे शकेमरी निबा ग्यामरीनोन म्हिगदेदा साइमुला। थेनीगदेसे चुह्रङ्बा नाइबा गे लमुला। इस्राएलला सन्तान न्हङ्री ङाइ नाइबा खबा ताम गिक म्राङ्बा मुला। एफ्राइमसे चा वेश्या गे लमुला ओच्छे इस्राएल चा ह्राङनोन अशुद्ध तबा मुला।
“यहूदा, एदाएनोन एसे लबा गे अन्छारला सजाय पिन्बाला लागिरी ङाइ धुइ तोगब लसी जिन्बा मुला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.