Eastern Tamang Language Bible
हिब्रू 10:23
Verse 23 is marked below, with the whole chapter around it. Read from the start
ख्रीष्ट सदनना लागिरी बलि तजी
परमेश्वरसे मोशादा पिन्बा ठिम चा लिच्छा खबा ज्यबा तामला चिनु जे हिन्ना। तर ख्रीष्टसे लबा ज्यबा तामनोन चा आहिन। तिग्दा भिसम ङाच्छाला ठिम अन्छार दिङ्एदाङ्सेन खाल गिकलान बलि फुल्मुबा। तर थे बलिसे चा परमेश्वर मुबा ग्लारी खबा म्हिगदेदा पूरन शुद्ध स्होबारी आखम्मुबा। बलि फुल्सी म्हिगदे पूरन शुद्ध तबा हिन्सम बलि फुल्बारी ख्लासेला मुबा। तिग्दा भिसम परमेश्वरदा तेन्बा म्हिगदे सदनना लागिरी पूरन शुद्ध तसेला मुबा। ओच्छे थेनीगदेसे पापी भिसी म्हन्आतोःसेला मुबा। बरू थे दिङ्एदाङ्सेन लबा बलिसे म्हिगदेदा ह्राङला पाप सदन ढन्ना जे लला। तिग्दा भिसम बहरदेन रा बोकोगदेला कासे खाइमै पाप माफ लबारी आखम।
थेतबासेलमा जम्बुलिङरी फेप्खबा धुइरी ख्रीष्टसे परमेश्वरदा चुह्रङ् भिसी सुङ्जी,
“ह्राङसे भेटीदेन बलि आम्हाइनी,
तर ङा बलि तबाला लागिरी ह्राङसे ङादा ल्हुइ पिन्जी।
ह्राङ मेरी ख्राङ्सी फुल्बा बलिदेन पाप माफ लबाला लागिरी फुल्बा बलिगदेरीनोन आताङ्नी।1
जमाहेन्से ङाइ चुह्रङ् भिसी पाङ्जी,
‘स्हीगो परमेश्वर, ङाला बारेरी बचनरी भ्रिबा ह्रङ्नोन
ह्राङसे म्हन्बा अन्छार पूरा लबारी ङा खबा मुला।’”
ख्रीष्टसे ङाच्छा चुह्रङ् भिसी सुङ्जी, “बलिदेन भेटी, ओच्छे मेरी ख्राङ्सी फुल्बा बलिदेन पापबलि किन्बारी ह्राङ आताङ्नी।” चु जम्मान बलिगदे चा मोशादा पिन्बा ठिम अन्छार मुबा। जमाहेन्से ख्रीष्टसे चुह्रङ् भिसी सुङ्जी, “स्हीगो, ह्राङसे म्हन्बा ताम पूरा लबाला लागिरी ङा खबा मुला।” लिच्छाला ठिमदा सदनना लागिरी थान्बारी ख्रीष्टसे ङाच्छाला ठिमदा भ्याङ्जी। परमेश्वरसे म्हन्बा ताम पूरा लबारी येशू ख्रीष्टसे ह्राङलान ल्हुइ बलि फुल्जी। चुनोन बलिग्याम य्हाङदा सदनना लागिरी शुद्ध स्होबा मुला।
जम्मान पूजाहारीसे ङाच्छाला ठिम अन्छार सदन परमेश्वरला ङाच्छा निसी घरिघरि खाल गिकलान बलि फुल्बा गे लमुला। तर थेह्रङ्बा बलिसे खाइमै पाप माफ आतमुला।2 तर ख्रीष्टसे मि सदनना लागिरी पापगदे माफ लबारी ह्राङलान ल्हुइदा बलि गिक स्होसी फुल्जी। ओच्छे थे परमेश्वरला दाहिने छ्यापट्टि मूल ठिरी धन्छ्याजी।3 परमेश्वरसे थेला शत्रुगदेदा थेला काङ धिरी आथान्देधोना थे थेरीन भ्रान्सी धन्छ्याला। तिग्दा भिसम बलि गिकग्यामसेन थेसे चोखो स्होबा म्हिगदेदा सदनना लागिरी थेसे तिगै दोष आरेबा स्होबा मुला।
ओच्छे पवित्र आत्मासेनोन चुला बारेरी य्हाङदा चुह्रङ् लसी उन्बा मुला, थेसे ङाच्छा सुङ्बा मुला,
“लिच्छाला धिनरी थेनीगदेदेन छ्याम लबा छार कबुल चुनोन हिन्ना।
ङाइ थेनीगदेला सेमरी ङाला ठिम भ्रिसी थान्ना।
चु ताम परमप्रभुसेन सुङ्बा हिन्ना।”4
जमाहेन्से परमप्रभुसे चुह्रङ् भिसी सुङ्बा मुला,
“दाहेन्से ङाइ थेनीगदेसे लबा पापदेन आज्यबा गेगदे खाइमै आढन।”5
दाहेन्से थेनीगदेला जम्मान पाप माफ तबासेलमा दोःसी थेनीगदेला पापला लागिरी तिगै बलि फुल्आतोः।
परमेश्वरला ङाच्छापट्टि निउ
थेतबासेलमा ज्योज्यो आले नाना आङागदे, येशूला कासे लमा य्हाङसे जम्मान भन्दा चोखो ग्लारी निबा आँट याङ्बा मुला। येशूसे ह्राङला ल्हुइ य्हाङला लागिरी बलि पिन्जी। ओच्छे पर्दाग्याम जम्मान भन्दा चोखो ग्लारी निबारी जुनी पिन्बा छार ग्याम ठोङ्सी पिन्बा मुला। परमेश्वरला दिमरी जम्मान अधिकार याङ्बा जम्मान भन्दा घ्रेन पूजाहारी गिक य्हाङदेन छ्याम मुला। दाहेन्से य्हाङ आज्यबा म्हन्बा तामग्याम शद्ध तबादेन चोखो क्युइसे ख्रुसी धाक्बा ल्हुइ थोसी ज्यबा सेमदेन पूरा विश्वास लसी परमेश्वरला ङाम्री निइ।6 य्हाङसे लबा आशरी य्हाङ य्हाङ्य्होङ् आतना कोङ्सी चिइ। तिग्दा भिसम ह्राङसे पिन्ना भिसी कबुल लबा परमेश्वर चा विश्वास लखम्बा परमेश्वर हिन्ना। य्हाङसे गिकसेम गिकदा माया लबादेन ज्यबा गे लबाला लागिरी आँट खबा खाल्ला ताम जे लइ। कोइ कोइ म्हिला संगतीरी आनिबा बानी मुला। तर य्हाङ चा संगतीरी निबा आख्लागे। बरू प्रभु दोःसी फेप्खबा धिन खबारी छ्याइबा मुला भिबा ताम घोसी गिकसेम गिकदा झन आँट पिन्गे।
तिग्दा भिसम सत्य ताम था याङ्सीनोन चुदे दोःसी पाप लबाला लबान लजी भिसम य्हाङसे लबा पाप माफ लबारी अर्गु खजिबै बलि आरे। तर थेह्रङ्बा पाप लबागदे चा परमेश्वरला शत्रुगदेदा नाश लबा ल्हानान घ्रेन मेदेन परमेश्वरसे पिन्बा लोङ्बा खबा सजाय भ्रान्सी चितोःबा जे मुला।7 चुदे खालै म्हिसे परमेश्वरसे मोशादा पिन्बा ठिम आङ्यन्ना भ्रबा ताम म्हि न्ही सोमसे म्राङ्सी पाङ्जी भिसम थे ठिम आङ्यन्बा म्हिदा तिगै दया आउन्ना साइतोःबा मुबा।8 थेह्रङ् भिसम परमेश्वरला झादा बिरोध लबा म्हिसे झन गादे ल्हाना सजाय याङ्ला। तिग्दा भिसम थेसे ह्राङदा पापग्याम फेसी शुद्ध तना लबादेन परमेश्वरसे लबा कबुलदा पूरा लबा ख्रीष्टला कादा गेआखेल्बा स्हे स्होबा मुला, ओच्छे दयामाया पिन्बा परमेश्वरला आत्मादा बिरोध लबा मुला।9 तर चुह्रङ् भिसी सुङ्बा परमेश्वरदा य्हाङसे ङोसेबा मुला, “नाङ् फाबा गे ङाला हिन्ना, ङाइ थेनीगदेसे लबा गे अन्छारला सजाय पिन्ना।” ओच्छे दोःसी चुह्रङ् भिसीएनोन सुङ्बा मुला, “परमप्रभुसे ह्राङला म्हिगदेला ठीक निसाफ लला।”10 पाप गे लबागदे छोन्बो परमेश्वरला छ्यारी परब तबा चा लोङ्बा खबा ताम हिन्ना।
एनीगदेसे येशू ख्रीष्टला बारेरी लोप्बा ङाच्छाला धिनगदेदा आम्लेःगो। जमा धुइरी एनीगदेसे ल्हानान दुख नातोःसै विश्वासरी कोङ्सी चिबा मुबा। खाइमाम एनीगदेसे जम्मान म्हिला ओन्छाङ्री दुखदेन हेला नाजी। ओच्छे खाइमाम एनीगदेसे दुखरी परब तबागदेदा ह्रो लजी। एनीगदेसे झ्याल्खानरी परब तबागदेदा ह्रो लजी। ओच्छे ह्राङदेन छ्याम मुबा जम्मान धन सम्पत्ति ब्यन्माएनोन एनीगदेसे ताङ्सी ताङ्सी नाजी। तिग्दा भिसम जुकजुकधोना चिबा अझ घ्रेन सम्पत्ति ह्राङदेन छ्याम मुला भिबा ताम एनीगदेदा था मुबा।
थेतबासेलमा एनीगदेसे विश्वासग्याम जुन आँट याङ्बा मुला थे आख्लागो। चुग्यामसेन एनीगदेसे घ्रेन इनाम याङ्ला। परमेश्वरदा सेम निबा गे लबारीदेन परमेश्वरसे पिन्ना भिसी कबुल लबा तामगदे याङ्बाला लागिरी भ्रान्सी चितोःबा मुला। तिग्दा भिसम बचनरी चुह्रङ् भिसी भ्रिबा मुला,
“दाहेन्से फेप्खबा चा फेप्खनोन फेप्खला,
थेसे घइना आल।11
तर ङाइ म्हन्बा अन्छार भ्रबा ङाला म्हिगदे चा विश्वासग्याम सोला,
ओच्छे चुदे थेनीगदे न्हङ्ला खालैसे विश्वास लबा ख्लाजी भिसम
थे म्राङ्सी ङा आताङ्।”
य्हाङ चा विश्वास लबा ख्लासी नाश तबा म्हिगदे न्हङ्ला आहिन, तर विश्वास लसी थार्बा याङ्बा म्हिगदे न्हङ्ला हिन्ना।
Source notes (11)
- Cross-reference व्हाइ ४०:६-८
- Cross-reference थोन्बा २९:३८
- Cross-reference व्हाइ ११०:१
- Cross-reference यर्मि ३१:३३
- Cross-reference यर्मि ३१:३४
- Cross-reference लेवी ८:३०; इज ३६:२५
- Cross-reference यशै २६:११
- Cross-reference ठिम १७:६; १९:१५
- Cross-reference थोन्बा २४:८
- Cross-reference ठिम ३२:३५-३६
- Cross-reference हब २:३-४
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.