Eastern Tamang Language Bible
हब 2
पाले चिबा धरहरारी ङा राप्सी चिला, ओच्छे परमप्रभुसे म्हिगदेदा तिग पाङ्गो भिसी ङादा कुल्बा चिम ङाइ ङ्यन्सी चिला। होह्रङ् लसीन ङाइ ङ्योइबा तामला जोहाब परमप्रभुसे तिग सुङ्बा चिम भिसीएनोन भ्रान्सी चिला।
दोःसी परमप्रभुसे जोहाब पिन्बा
जमाहेन्से परमप्रभुसे ङादा चुह्रङ् भिसी सुङ्जी, “ङाइ एदा उन्बा चु ताम युङ्बाला पाटीरी ज्यना लसी भ्रिउ। तिग्दा भिसम चु ताम च्यामैछ्याम म्हिगदेसे सजिलोसेन पढब लबारी खम्गै। चु ताम भ्रिसी थान्गो, तिग्दा भिसम चु ताम दन्देन पूरा आत। तर चु ताम पूरा तबा धुइ योनान खला। जमाहेन्से ङाइ एदा उन्बा चु ताम पूरा तनोन तला। चु ताम पूरा तबारी घइसैनोन भ्रान्सी चिउ। थे धुइ खबारी आघइ, धुइ खनोन खला।
“च्यागो, नाइबा गे लबा म्हिगदे चा आसो। तर ङाइ म्हन्बा अन्छार भ्रबा म्हिगदे चा थेनीगदेसे ङाथोरी भर लबा तामग्यामनोन सोला।
नाइबा गे लबा म्हिगदे नाश तबा
“धन सम्पत्तिसे म्हिगदेदा धोका पिन्मुला। लोभीगदे चा घमण्डीदेन ढुक्क तसी चिआखम्बा तमुला। थेनीगदे खाइमै आम्रेन्बा काल ह्रङ्बान हिन्ना। थेतबासेलमा थेनीगदेसे य्हुल य्हुल्ला म्हिगदेदा ब्रेना लमुला, ओच्छे ल्हानान म्हिगदेदा चुङ्सी जबरजस्ती अर्गु य्हुल्सारी भोर्मुला। दाहेन्से थेनीगदेदा जम्मासेन हेला लबान खिसी लसी चुह्रङ् भिसी पाङ्ला, ‘एनीगदेदा परमप्रभुसे सजाय पिन्ना, फ्युक्पो दोबाला लागिरी एनीगदेसे अर्गुला धन सम्पत्ति ब्यन्मुला, ओच्छे य्हो लसी सामानगदे पोप लमुला। चुह्रङ्बा गे लसी एनीगदेदा खाइमाधोना ज्यबा तला?’
“एनीगदेग्याम छे किन्बा म्हिगदे तिख्खुरीन एनीगदेला बिरोधरी रेःसी आख? थेनीगदे खसी एनीगदेदा लोङ्ना लला। जमाहेन्से एनीगदेदेन छ्याम मुबा जम्मान स्हे थेनीगदेसे ब्यन्सी भोर्ला। एनीगदेसे य्हुल य्हुल्ला म्हिगदेला धन सम्पत्ति ब्यन्बा मुला। तर दाहेन्से सोसी चिबा म्हिगदेसे एनीगदेला धन सम्पत्ति ब्यन्ना। तिग्दा भिसम एनीगदेसे य्हुल्सा य्हुल्सादेन सहर सहरला बिरोधरी रेःसी ल्हानान म्हिगदेदा साइबा मुला।
“एनीगदेसे सजाय याङ्ला! तिग्दा भिसम एनीगदेसे अर्गुदा साइबा ब्यन्बा लसी ह्राङला दिम स्होबा मुला। ओच्छे एनीगदेसे ह्राङ ह्राङला दिम नाश आतगै भिसी जोगब लबारी म्हाइबा मुला। तर एनीगदेला जुक्तिसे लमा एनीगदेला म्हिगदे ल्हानान पेःतोःबा तबा मुला। एनीगदेसे य्हुल य्हुल्ला ल्हानान म्हिगदेदा नाश लसी ह्राङसे ह्राङदान नाश तना लबा मुला। दिमला भित्ताला युङ्बागदेसेनोन गुहार ह्रीला, ओच्छे थे युङ्बागदेसे गुहार ह्रीबान पाङ्बा ताम दलिनगदेसेनोन पाङ्बाला पाङ्बान लला।
“एनीगदेसे सजाय याङ्ला! तिग्दा भिसम एनीगदेसे नाइबा गेग्याम सहरला जग थान्बा मुला, ओच्छे म्हिगदे साइबा ह्रङ्बा तामसे सहर स्होबा मुला। एनीगदेसे ह्राङला तहरी थान्बा य्हुल्ला म्हिगदेसे दुख लसी बिथालान गे लबासेलमा थेनीगदे ब्लप्बा मुला। थेनीगदेसे दुख लसी स्होबा जम्मान स्हे मेसे क्रोसी नाश तला। चु चा ङा जम्मान भन्दा घ्रेन परमप्रभुसेन लबा हिन्ना। तिग्दा भिसम समुद्र क्युइसे प्लिङ्बा ह्रङ्नोन जम्बुलिङ ङा परमप्रभुला ज्ञानसे प्लिङ्ला।1
“एनीगदेसे सजाय याङ्ला! बोमोला झोकरी एनीगदेसे ह्राङलान खिम्जेमगदेला बेइज्जत तना लजी। ओच्छे एनीगदेसे थेनीगदेदा अङ्गुरला निङ्गुसे ङ्य्होइबा म्हिगदे ह्रङ्बान कालकोल तबाधोना तना लजी। दाहेन्से एनीगदेला पालो खसी जिन्बा मुला, एनीगदेसेनोन मान याङ्तोःबा ग्लारी बेइज्जत नातोःला। ङाइ एनीगदेदा सजायला खोरेग्याम थुङ्पुङ्ला। जमाहेन्से एनीगदेएनोन ङ्य्होइला। ओच्छे एनीगदेसे मान आहिन, बेइज्जत नातोःला। एनीगदेसे लेबनान य्हुल्सारी म्हिगदेदा साइबासेलमा एनीगदेदा शान्ति आत। एनीगदेसे थे य्हुल्साला जन्तुगदेदा साइबासेलमा दाहेन्से एनीगदेदाएनोन जन्तुगदेसे लोङ्ना लला। एनीगदेसे म्हिगदे साइबा मुला, ओच्छे य्हुल्सा य्हुल्सादेन सहर सहरला बिरोधरी रेःसी नाइबा गेगदे लबा मुला। थेतबासेलमा चु ताम पूरा तनोन तला।
“म्हिसे ह्राङलान यासे ठ्वाइसी स्होबा मूर्ति खाह्रङ् लसी घ्रेन तला? थे चा सिप मुबा म्हिसे स्होबा स्हे जे हिन्ना, थेसे फट्टा ताम जे लोप्मुला। थे मूर्ति स्होबा म्हिसे ह्राङलान यासे स्होबा स्हेथोरी भर लमुला। थे मूर्ति चा ताम पाङ्बारी आखम्बा स्हे जे हिन्ना!
“एनीगदेसे सजाय याङ्ला! एनीगदेसे सिङला टोगलदा ‘रेःगो’ भिसी पाङ्मुला, ओच्छे युङ्बाला टोगलदा ‘राप्गो’ भिसी पाङ्मुला। मूर्तिसेनोन एनीगदेदा तिगै ताम लोप्बारी खाम्ला? थे मूर्तिदा म्हारदेन म्हुइसे मोरब लबा मुदला, तर थे मूर्तिला सानोन आरे।”
तर परमप्रभु चा ह्राङलान चोखो मन्दिररी धन्छ्याबा मुला। थेतबासेलमा जम्बुलिङला जम्मान म्हिगदे परमप्रभुला ओन्छाङ्री कुटिसी चिगै।
Source notes (1)
- Cross-reference यशै ११:९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.