Eastern Tamang Language Bible
ठुङ् 50:20
Verse 20 is marked below, with the whole chapter around it. Read from the start
याकूबदा ल्हुबा
योसेफ ह्राङला आबाथोरी ख्लुप तसी क्राजी, ओच्छे आबादा च्योक लजी। जमाहेन्से योसेफसे ह्राङदा मन लबा म्हिगदेदा ह्राङला आबाला लाशरी ज्यबा बास्ना खबा लेप फोर्पुङ्जी। थेतबासेलमा थे मन लबा म्हिगदेसे इस्राएलला लाशरी ज्यबा बास्ना खबा लेप फोर्जी। चु लेप फोर्बाला लागिरी बोगल न्ही धिन लगब तबा मुबा, तिग्दा भिसम ज्यबा बास्ना खबा लेप फोर्बाला लागिरी चुदे धिननोन लगब तमुबा। इस्राएल सिमाहेन्से मिश्रीगदेसेनोन बोगल सोमसे च्युइ धिनधोना दुख म्हन्सी चिजी।
दुख म्हन्सी चिबा धिन जिन्माहेन्से योसेफसे फारो ग्लेला म्हिगदेदेन छ्याम चुह्रङ् लसी ताम लजी, “चुदे ह्राङनीसे ङादा दया लबा मुसम ङाला चु ताम फारो ग्लेदा पाङ्सी पिन्गो। ङाला आबासे चुह्रङ् भिसी घ्रान चपुङ्बा मुला, ‘ङा सिबारी छ्याइबा मुला। कनान य्हुल्सारी ङाइ ह्राङसेन स्होबा ङालान धुर्सारी ङादा ल्हुउ।’ थेतबासेलमा दया लसी ङाला आबाला लाश थे ग्लारीन ल्हुबारी निपुङ्गो, जमाहेन्से ङा दोःसी खला।”
फारो ग्लेसे चुह्रङ् भिसी जोहाब पिन्जी, “एदा थेसे घ्रान चपुङ्बा अन्छार निसी एला आबाला लाश ल्हुउ।”
योसेफ ह्राङला आबाला लाश ल्हुबारी निजी। ओच्छे थेदेन छ्याम फारो ग्लेला गे लबा म्हिगदे, ग्लेखाङ्ला मूल म्हिगदेदेन मिश्र य्हुल्साला मूल म्हिगदे जम्मान योसेफदेन छ्याम निजी। ओच्छे योसेफला जम्मान म्हेमेगदे, थेला ज्योज्यो आलेगदेदेन आबाला जम्मान म्हेमेगदेएनोन योसेफदेन छ्याम निजी। थेनीगदेला कोलागदेदेन राग्यु, म्हेमुइगदे जे गोशेन जिल्लारीन ख्लासी थान्जी। ओच्छे रथगदेदेन ताथोरी क्रेबागदेएनोन योसेफदेन छ्याम निजी। थे मलामी निबागदेला घ्रेन हुल मुबा।
थेनीगदे यर्दन स्योङ ङाम्ला आतादरी मुबा खलारी दोखजी, थेनीगदेसे थेरी ल्हानान दुख ङ्हम्सी क्राबा क्रिङ्बा लजी। ओच्छे आबादा ढन्सी निसरेधोना योसेफसे दुख म्हन्सी चिजी। थे ग्लारी चिबा कनानीगदेसे आतादरी मुबा खलारी क्राबा क्रिङ्बा लबा म्राङ्सी चुह्रङ् भिसी पाङ्जी, “चु क्राबा क्रिङ्बागदे मि मिश्रीगदे चिम।” थेतबासेलमा यर्दन स्योङ ङाम्ला थे ग्लाला मिन हाबिल-मिश्रइम थान्जी।
चुह्रङ् लसी याकूबला झागदेसे आबासे कुल्बा अन्छार लजी। थेनीगदेसे ह्राङला आबाला लाश कनान य्हुल्सारी भोर्जी। ओच्छे मम्रेला ङाम्री अब्राहामसे धुर्सा स्होबाला लागिरी हित्ती एप्रोनदेन छ्याम ग्लुबा व्हारारी मुबा मक्पेलाला ऊरी ल्हुजी। आबाला लाश ल्हुसी जिन्माहेन्से ह्राङला ज्योज्यो आलेगदे, थेदेन छ्याम निबा मलामीगदेदेन छ्यामनोन योसेफ मिश्र य्हुल्सारी दोःसी खजी।
योसेफसे ह्राङला ज्योज्यो आलेगदेदा आँट पिन्बा
ह्राङला आबा सिमाहेन्से योसेफला ज्योज्यो आलेगदेसे ह्राङ ह्राङ न्हङ्री चुह्रङ् भिसी पाङ्जी, “दाहेन्से योसेफसे य्हाङदेन छ्याम बोमो लला तला, ओच्छे य्हाङसे थेदेन छ्याम लबा आज्यबा गेला खी किन्ना तला।” थेतबासेलमा थेनीगदेसे योसेफदा चुह्रङ् भिसी खबर पुइजी, “य्हाङला आबासे ह्राङ सिबा भन्दा ङाच्छा चुह्रङ् भिसी सुङ्बा मुबा, ‘एला ज्योज्योगदेसे एदा लबा आज्यबा गेगदे म्लेःसी थेनीगदेदा माफ लसी पिन्गो।’ दाहेन्से ङन्ना बिन्ती मुला, ह्राङला आबाला परमेश्वरला गे लबा म्हि ङनीगदेदा माफ लसी पिन्गो।” चु समाचार थेःसी योसेफ क्राजी।
जमाहेन्से योसेफला ज्योज्यो आलेगदे खसी योसेफदा फ्या लबान चुह्रङ् भिसी पाङ्जी, “स्य्हीगो, ङनी ह्राङला गे लबा म्हि हिन्ना।”
तर योसेफसे थेनीगदेदा चुह्रङ् भिसी पाङ्जी, “आलोङ्गो, तिग ङा परमेश्वरला ग्लारी मुला? एनीगदेसे ङादा नाश लबारी म्हाइबा मुबा, तर परमेश्वरसे थेनोन गेग्याम ज्यबा गे लबा सेम लजी, जुन गेग्याम परमेश्वरसे ल्हानान म्हिदा सोना लजी, तिनीधोना थेनीगदे सोसी चिबा मुला। थेतबासेलमा आलोङ्गो, ङाइ एनीगदेदेन एनीगदेला कोलागदेदा चबा थुङ्बाहेन्से जम्मान तामरी च्याला।” योसेफसे चुह्रङ्बा ज्यबा ताम लसी थेनीगदेदा आँट पिन्जी।
योसेफ सिबा
योसेफदेन थेला आबाला जम्मान म्हेमेगदे मिश्र य्हुल्सारीन चिजी। योसेफ ११० दिङ्धोना सोजी। योसेफसे एफ्राइमला झा झामेदेन छाया छुयाधोना म्राङ्जी। मनश्शेला झा माकीरला झा झामेगदेएनोन न्हबा धुइधोना योसेफ सोजी। चुगदेदा योसेफसे ह्राङलान सन्तानरी झ्याजी। जमाहेन्से योसेफसे ह्राङला ज्योज्यो आलेगदेदा चुह्रङ् भिसी पाङ्जी, “ङा सिबा धुइ तसी जिन्बा मुला, तर परमेश्वरसे एनीगदेदा च्याला, ओच्छे परमेश्वरसे अब्राहाम, इसहाक, याकूबदेन छ्याम घ्रान चसी पिन्ना भिबा य्हुल्सारी एनीगदेदा भोर्ला।” ओच्छे योसेफसे इस्राएलला झागदेदा घ्रान चपुङ्सी चुह्रङ् भिसी पाङ्पुङ्जी, “परमेश्वरसे एनीगदेदा पक्कान च्याला, थे धुइरी एनीगदेसे ङाला ह्रुइगदे चुग्याम भोर्गो।” चुह्रङ् लसी योसेफ ११० दिङ् तमा सिजी। ओच्छे थेनीगदेसे योसेफला लाशरी ज्यबा बास्ना खबा लेप फोर्सी बाकसरी युसी मिश्र य्हुल्सारीन थान्जी।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.