Eastern Tamang Language Bible
ठुङ् 37
योसेफदेन थेला ज्योज्योगदे
याकूब ह्राङला आबा इसहाक स्य्हुबा कनान य्हुल्सारी चिमुबा। याकूबला सन्तानना बारेला ताम चुनोन हिन्ना। योसेफ १७ दिङ्ला तमा ज्योज्योगदेदेन छ्याम राग्यु छसी भ्रमुबा। योसेफसे ह्राङला आबाला म्रिङ्गदे बिल्हादेन जिल्पाला झागदेसे लबा नाइबा गेगदे आबादा पाङ्मुबा।
ह्राङ खेप्बा दोबा धुइरी न्हबा झा तबासेलमा इस्राएलसे अर्गु झागदेदा भन्दा योसेफदा ल्हानान माया लमुबा। ओच्छे थेसे योसेफदा ल्हानान ज्यबा बुट्टा मुबा लबिदा पिन्जी। योसेफला आबासे अर्गु ज्योज्योगदेदा भन्दा योसेफदा माया लबा म्राङ्सी थेला ज्योज्योगदेसे थेदा हेला लमुबा ओच्छे ज्यना लसी ताम आपाङ्मुबा।
तिरेकुनु म्हुनङ् योसेफसे म्हङ् गिक म्राङ्जी। थेसे ह्राङला ज्योज्योगदेदा थे म्हङ् पाङ्माहेन्से थेनीगदेसे झन हेला लबारी छ्याइजी। योसेफसे थेनीगदेदा चुह्रङ् भिसी पाङ्जी, “ङाइ म्राङ्बा म्हङ् ङ्यन्गो, य्हाङ भुरी ग्वाला मुठा खीबान मुबा। ङाला मुठा चा ठाडो तजी। ओच्छे ह्राङनीला मुठा चा ङाला मुठाला क्युर्नोन तसी ङाला मुठादा फ्या लजी।”
चु ताम थेःसी थेला ज्योज्योगदेसे थेदा चुह्रङ् भिसी पाङ्जी, “तिग एसे ङन्दा शासन लबा तजी? तिग ए ङन्ना ग्ले दोबा तजी?” योसेफला म्हङ्ला ताम थेःसी थेला ज्योज्योगदेसे झन ल्हाना हेला लबारी छ्याइजी।
जमाहेन्से योसेफसे अर्गु म्हङ्एनोन म्राङ्जी। ओच्छे थेसे ह्राङला ज्योज्योगदेदा चुह्रङ् भिसी पाङ्जी। “ङ्यन्गो, ङाइ अर्गु म्हङ्एनोन म्राङ्जी। ङादा धिनी, लनीदेन च्युक गिक सारसे फ्या लसी चिबा मुबा।”
ओच्छे थेसे ह्राङला आबादा थे म्हङ्ला ताम पाङ्मा थेला आबासे क्रिङ्बान चुह्रङ् भिसी पाङ्जी, “एसे म्राङ्बा चु म्हङ् तिग हिन्ना? तिग ङादेन एला आमा, एला ज्योज्योगदेसे सधोनान कू तसी एदा फ्या लतोःबा?” जमाहेन्से थेला ज्योज्योगदेसे झन डाह लबारी छ्याइजी। तर थेला आबासे चा चु ताम सेमरीन थान्जी।
योसेफदा मिश्र य्हुल्सारी चूङ्सी पुइबा
तिरेकुनु योसेफला ज्योज्योगदे ह्राङला आबाला राग्यु छबारी शकेमरी निबा मुबा। इस्राएलसे योसेफदा चुह्रङ् भिसी पाङ्जी, “एला ज्योज्योगदे शकेमरी राग्यु छसी चिबा मुला। ङाइ एदा थेनीगदे मुबा ग्लारी पुइला।” योसेफसे “तला आबा, ङा निला” भिसी पाङ्जी।
“एला ज्योज्योगदेदेन राग्युगदे ज्यबान मुला कि आरे च्यासी ङादा समाचार भसी खउ” भिसी याकूबसे थेदा हेब्रोनना ब्याँसीग्याम शकेमरी पुइजी।
योसेफ थेरी दोखमाहेन्से म्हि गिकसे योसेफदा भुरी क्यार कोर्सी भ्रबा म्राङ्जी, ओच्छे थे म्हिसे योसेफदा ङ्योइजी, “एसे खाल्दा म्हाइबान मुला?” योसेफसे थेदा चुह्रङ् भिसी पाङ्जी, “ङाइ ङाला ज्योज्योगदेदा म्हाइबान मुला। थेनीगदेसे राग्यु छबा ग्ला ह्राङदा था मुला?”
थे म्हिसे “थेनीगदे मि चु ग्यामसे निजी। थेनीगदेसे ‘य्हाङ दोतानरी क्यार निइ’ भिसी पाङ्बान लबा ङाइ थेःमुबा” भिसी पाङ्जी। ओच्छे योसेफ ह्राङला ज्योज्योगदेदा म्हाइबान निमा दोतानरी स्याप्जी।
थेनीगदेसे योसेफदा थारेङ्ग्याम खबान लबा म्राङ्जी। ओच्छे थेनीगदेसे योसेफ थेरी दोखबा भन्दा ङाच्छान योसेफदा साइबारी सल्लाह लजी। थेनीगदेसे ह्राङ ह्राङ न्हङ्रीन चुह्रङ् भिसी पाङ्जी, “उ, थे म्हङ् म्राङ्बा म्हि खबान मुला। लु, दाहेन्से थेदा साइसी व्हाङ् गिकरी भ्याङ्गे। ओच्छे योसेफदा ह्रि जन्तुसे चजी तला भिसी पाङ्गे, ओच्छे थेला म्हङ् तिग तबा चिम च्यागे।”
चुह्रङ् भिबा थेःसी रूबेनसे थेनीगदेग्याम जोगब लबारी म्हाइजी, ओच्छे “य्हाङसे थेला ज्याननोन किन्बारी चा आत” भिसी पाङ्जी। रूबेनसे थेनीगदेदा चुह्रङ् भिसी पाङ्जी, “साइबारी चा आत, बरू थेदा चु तोङ्तोङ्बा ग्लाला व्हाङ्री भ्याङ्गे। तर थेदा या चा आझाङ्गे।” रूबेनसे थेनीगदेला याग्याम जोगब लसी योसेफदा ह्राङला आबा मुबा ग्लारी दोना लबा सेम लसी चुह्रङ् भिसी पाङ्बा मुबा। योसेफ ह्राङला ज्योज्योगदे मुबा ग्लारी दोमाहेन्से थेसे क्वान्बा ज्यबा बुट्टा मुबा लबिदा थेनीगदेसे ब्यन्सी ढेजी। ओच्छे थेनीगदेसे योसेफदा चुङ्सी व्हाङ्री भ्याङ्जी। थे चा क्युइ आरेबा खार्बा व्हाङ् मुबा।
जमाहेन्से थेनीगदे चबारी चिजी, ओच्छे थेनीगदेसे ओसो क्यारमार च्यामा गिलादग्याम मिश्र य्हुल्सारी क्यार निबान लबा इश्माएली य्हुल्ला हुल गिक म्हिदा म्राङ्जी। थेनीगदेसे ज्यबा बास्ना खबा मसला, लेपदेन मूर्र ऊँटरी थान्सी भोर्बान मुबा। ओच्छे यहूदासे ह्राङला ज्योज्यो आलेदा चुह्रङ् भिसी पाङ्जी, “य्हाङसे ह्राङला आलेदा साइसी थेदा साइबा ताम छुम्सी य्हाङदा तिग फाइदा तला? दाहेन्से थेदा इश्माएलीगदेला यारी चूङ्गे। थेदा य्हाङसे या झाङ्बारी चा आत। तिग्दा भिसम थे य्हाङलान आले हिन्ना, थेदेन य्हाङला स्या का गिकनोन हिन्ना।” चु ताम थेःसी यहूदाला ज्योज्यो आलेगदेसे थेला ताम ङ्यन्जी। ओच्छे मिद्यानी व्यापारीगदे थेनीगदे मुबा ग्लाग्यामसेन खजी। जमाहेन्से योसेफला ज्योज्योगदेसे योसेफदा व्हाङ्ग्याम छेङ्सी तेःजी, ओच्छे थे इश्माएलीगदेदा म्हुइला बोगल गिक डबलरी चूङ्जी। ओच्छे थे इश्माएलीगदेसे योसेफदा मिश्र य्हुल्सारी भोर्जी।
रूबेन योसेफ मुबा व्हाङ्री च्याबारी निमा थेरी योसेफदा आम्राङ्मा थेदा दुख म्हन्जी, ओच्छे थेसे ह्राङला क्वान ढेजी। ओच्छे रूबेन आलेगदे मुबा ग्लारी निसी चुह्रङ् पाङ्जी, ठिटा मि थेरी आरेम। दाहेन्से ङाइ तिग लतोःबा?
थेनीगदेसे बोको गिक साइसी योसेफला ज्यबा बुट्टा मुबा लबिदा बोकोला कारी ब्लुम्जी। ओच्छे योसेफला ज्योज्योगदेसे थे क्वान ह्राङला आबा मुबा ग्लारी भोर्सी उन्जी, ओच्छे चुह्रङ् भिसी पाङ्जी, “चु ङन्से स्याप्सी भबा चु ह्राङला झाला हिन्ना कि आहिन? स्हीगो, आबा।”
थे क्वान ङोसेसी याकूबसे चुह्रङ् भिसी पाङ्जी, “चु मि ङाला झालान हिन्ना। योसेफदा ह्रि जन्तुसे चजीम नम! थेला जीउनोन आथान्ना चोक्टा चोक्टा लसी चजीम।” ओच्छे याकूबसे सेमरी ल्हानान दुख तसी ह्राङला क्वान ढेजी। ओच्छे थेसे बोरा क्वान्सी ह्राङला झाला लागिरी ल्हानान धिनधोना क्रासी चिजी। थेला जम्मान झा झामेगदेसे थेदा सम्झब लबारी म्हाइजी, तर याकूबसे थेनीगदेला ताम आङ्यन्नी। “अँहँ, ङा आसिदेधोना ङाला झाला लागिरी चुह्रङ् लसीन क्रासी चिला” भिसी थेसे दुख म्हन्सी चिजी।
थेनोन धुइरी मिद्यानीगदेसे योसेफदा मिश्र य्हुल्साला ग्ले फारो ग्लेला सिपाहीगदेला कप्तान पोतीफरला यारी चूङ्जी।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.