Eastern Tamang Language Bible
ठुङ् 29
याकूब लाबानना दिमरी दोबा
जमाहेन्से याकूब थेग्याम निजी, ओच्छे स्यारपट्टिला य्हुल्सारी दोजी। थेरी याकूबसे पाङ्री इनार गिक म्राङ्जी। ओच्छे थे इनारला ङाम्री ग्युला बथान सोम चिबा मुबा। थेनोन इनारग्याम म्हिगदेसे ग्युला बथानगदेदा क्युइ ख्वामुबा। थे इनारला सुङ् घ्रेन युङ्बा गिकसे घप्बा मुबा। थेरी ग्युला जम्मान बथानगदे खमाहेन्से गोठालोगदे खसी इनारला सुङ्री थान्बा युङ्बा ब्लिङ्सी ग्युगदेदा क्युइ ख्वामुबा। जमाहेन्से थेनीगदेसे दोःसी थे युङ्बासे इनारला सुङ् घप्मुबा।
याकूबसे थेनीगदेदा “ङाला आलेगदे, एनीगदे खानङ्ला हिन्ना?” भिसी ङ्योइमा थेनीगदेसे “ङनी हारानना हिन्ना” भिसी पाङ्जी।
याकूबसे थेनीगदेदा “एनीगदेसे नाहोरला छाया लाबानदा ङोसेमुला?” भिसी ङ्योइमा, थेनीगदेसे “ङोसेमुला” भिसी पाङ्जी।
याकूबसे थेनीगदेदा चुह्रङ् भिसी ङ्योइजी, “थेदा खम्बान मुला?” थेनीगदेसे थेदा चुह्रङ् भिसी पाङ्जी, “थे खम्बान मुला। स्हीगो, थेला झामे राहेल ग्युगदे भसी खबान मुला।” याकूबसे थेनीगदेदा चुह्रङ् भिसी पाङ्जी, “च्यागो, ङ्यसे तबा आरे। रादेन ग्युगदे पोप लबा धुइ तबा आरे। थेतबासेलमा ग्युगदेदा क्युइ ख्वसी दोःसी छबारी भोर्गो।”
थेनीगदेसे याकूबदा चुह्रङ् भिसी पाङ्जी, “ङन्से थेह्रङ् लबारी आखम। तिग्दा भिसम ग्युला जम्मान बथानगदे खमाहेन्से जे इनारला सुङ्री मुबा युङ्बा ल्हेमुला ओच्छे ङन्से थेनीगदेदा क्युइ पिन्मुला।”
याकूब थेनीगदेदेन छ्याम चुह्रङ् लसी ताम लबान लबा धुइरी राहेल ह्राङला आबाला ग्युगदे भसी थेरी दोखजी। तिग्दा भिसम ग्युगदे थेसेन छमुबा। याकूबसे ह्राङला आस्याङ्ला झामे राहेलदेन आस्याङ्ला ग्युगदे म्राङ्माहेन्से इनारला ङाम्री खसी इनारला सुङ्री थान्बा युङ्बा ब्लिङ्जी। ओच्छे आस्याङ लाबानना ग्युगदेदा क्युइ ख्वाजी। जमाहेन्से याकूबसे राहेलदा च्योक लजी, ओच्छे घ्रेन काइ तेःसी क्राजी। याकूबसे राहेलदा “ङा एला आबाला ह्राङलान म्हि हिन्ना, रिबेकाला झा हिन्ना” भिसी पाङ्जी।
जमाहेन्से राहेल य्हार्बान निसी ह्राङला आबादा चु ताम पाङ्जी। ह्राङला कोन खजी भिबा ताम थेःमैछ्याम लाबान याकूबदा ह्रुप तबारी खजी, ओच्छे याकूबदा हापख्वाइसी च्योक लजी, ओच्छे थेदा ह्राङला दिमरी भजी, ओच्छे याकूबसे लाबानदा जम्मान ताम पाङ्जी। जमाहेन्से लाबानसे थेदा, “पाङ्नोन तोःमा ए ङाला नख्रुला नख्रुन स्याला स्यानोन हिन्ना” भिसी पाङ्जी। याकूब थेदेन छ्याम ल गिक चिजी।
राहेलदेन लेआ याङ्बाला लागिरी याकूबसे गे लबा
लाबानसे याकूबदा चुह्रङ् भिसी पाङ्जी, “ङाला ह्राङलान म्हि तजी भिदेमा एसे होह्रङ्नोन ङाला गे लबारी आत। ङादा पाङ्गो, ज्याला गादे किन्बा?” लाबानना झामे न्ही मुबा। घ्रेन झामेला मिन लेआ ओच्छे झामे कान्छीला मिन राहेल मुबा। लेआला मी कमजोर मुबा, तर राहेल चा जीउ डाल ढिक्बा ल्हानान जेःबा मुबा।
याकूबसे राहेलदा माया लजी। थेतबासेलमा याकूबसे चुह्रङ् भिसी पाङ्जी, “ङाइ ह्राङला झामे कान्छी राहेलला लागिरी निस दिङ्धोना ह्राङला गे लला।”
जमाहेन्से लाबानसे चुह्रङ् भिसी पाङ्जी, “थेदा स्य्हान्दोदेन छ्याम ब्याह लसी पिन्बा भन्दा मि एदेन छ्यामनोन ब्याह लसी पिन्बा ज्यबा हिन्ना। तला, ए ङादेन छ्यामनोन चिउ।” थेतबासेलमा याकूबसे राहेलला लागिरी निस दिङ्धोना गे लजी। थेसे राहेलदा ल्हानान माया लबासेलमा थेदा निस दिङ्एनोन ल्हाना धिन ह्रङ्बा आछोर्नी।
जमाहेन्से याकूबसे लाबानदा चुह्रङ् भिसी पाङ्जी, “ङाइ ह्राङला गे लतोःबा धुइ जिन्जी। दाहेन्से ङादा ह्राङला झामे राहेलदेन छ्याम ब्याह लसी पिन्गो।” जमाहेन्से लाबानसे थे ग्लाला जम्मान म्हिगदेदा ङ्योइसी ब्याहला भोज लजी। तर ङ्यसे तमाहेन्से लाबानसे ह्राङला झामे लेआदा चा याकूब मुबा ग्लारी भसी पिन्जी ओच्छे याकूब थेदेन छ्याम म्हेर्जी। लाबानसे ह्राङला घ्याबास्या जिल्पा ह्राङला झामे लेआला घ्याबा दोबारी पिन्जी। याकूबसे स्य्होरी रेःसी च्यामा मि लेआ चा चिम। जमाहेन्से याकूबसे लाबानदा चुह्रङ् भिसी पाङ्जी, “ह्राङसे तिग्दा ङादा चुह्रङ् लबा? ङाइ राहेलला लागिरी गे लबा आहिन? तिग्दा ह्राङसे ङादा चुह्रङ् लसी जाल लबा?”
ओच्छे लाबानसे थेदा चुह्रङ् भिसी पाङ्जी, “ङन्ना य्हुल्सारी घ्रेन झामेला भन्दा झामे कान्छीला ब्याह ङाच्छा लबा ठिम आरे। साता गिकधोना तबा ब्याहला भोज आजिन्देधोना भ्रान्गो, ओच्छे अर्गु निस दिङ्धोना ङाला गे लउ। जमाहेन्से ङाइ ङाला झामे कान्छीएनोन एदान पिन्ना।”
याकूबसे लाबानसे पाङ्बा ह्रङ्नोन लजी। साता गिकला ब्याहला भोज जिन्माहेन्से लाबानसे ह्राङला झामे राहेलदाएनोन याकूबला म्रिङ् दोबारी पिन्जी। ओच्छे लाबानसे ह्राङला घ्याबास्या बिल्हा ह्राङला झामे राहेलला घ्याबा दोबारी पिन्जी। याकूब राहेलदेन छ्यामएनोन म्हेर्जी। याकूबसे लेआदा भन्दा राहेलदा ल्हानान माया लबासेलमा अर्गु निस दिङ्धोना लाबानना गे लजी।
याकूबला झा झामेगदे
लेआदा हेला लबा म्राङ्सी परमप्रभुसे लेआला कोख ठोङ्सी पिन्जी, तर राहेलला चा कोख बन्दला बन्दन तजी। लेआ जीउ न्हीला तसी झा गिक न्हजी। ओच्छे थेसे चुह्रङ् भिसी पाङ्जी, “परमप्रभुसे ङाला दुख म्राङ्बा मुला, दाहेन्से ङादा ङाला ह्रेम्बोसे माया लला।” थेसे झाला मिन रूबेन थान्जी। लेआ दोःसीनोन जीउ न्हीला तजी ओच्छे अर्गु झा गिक न्हजी। थेसे चुह्रङ् भिसी पाङ्जी, “ङादा हेला लबा मुला भिबा ताम परमप्रभुसे था याङ्सी ङादा चु झाएनोन पिन्बा मुला।” ओच्छे थे झाला मिन शिमियोन थान्जी। थे दोःसी जीउ न्हीला तजी ओच्छे झा गिक न्हजी। जमाहेन्से थेसे चुह्रङ् भिसी पाङ्जी, “चु पाल्से मि ङाला ह्रेम्बो ङापट्टि तला, तिग्दा भिसम ङाइ थेला लागिरी झा सोम न्हसी जिन्जी।” थेतबासेलमा थेसे थे झाला मिन लेवी थान्जी। लेआ दोःसीनोन जीउ न्हीला तजी ओच्छे अर्गु झा गिक न्हजी। जमाहेन्से थेसे चुह्रङ् भिसी पाङ्जी, “चु पाल्से मि ङाइ परमप्रभुला जयजयकार लला।” थेतबासेलमा थेसे थे झाला मिन यहूदा थान्जी। जमाहेन्से थेसे कोला न्हबा ख्लाजी।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.