Eastern Tamang Language Bible
ठुङ् 27
इसहाकसे याकूबदा मोलम पिन्बा
इसहाक खेप्पा दोसी मी आम्राङ्बा तसी जिन्बा मुबा। इसहाकसे ह्राङला थेबा झादा “ङाला झा” भिसी ङ्योइजी। थेसे “लास्सो आबा” भिसी जोहाब पिन्जी। इसहाकसे झादा चुह्रङ् भिसी पाङ्जी, “च्यागो, ङा खेप्पा दोसी जिन्बा मुला। ङा खाइमा सिला थे ङाइ पाङ्आखम। दाहेन्से एला म्यादली भोर्सी ह्रिरी ङाला लागिरी शिकार लसी भउ, ब्रोइ खना लसी स्या धाइसी ङादा भउ, थे चसी ङा सिबा भन्दा ङाच्छा ङाइ एदा मोलम पिन्ना।”
चुह्रङ् लसी इसहाकसे एसावदेन छ्याम ताम लबान लबा रिबेकासे थेःबा मुबा। एसाव शिकार लसी भबाला लागिरी मङ्ग्यार निबा धुइरी रिबेकासे झा याकूबदा चुह्रङ् भिसी पाङ्जी, “च्यागो, एला आबासे एला ज्योज्योदेन छ्याम चुह्रङ् भिसी ताम लबान लबा ङाइ थेःजी। ‘शिकार भसी, ब्रोइ खना लसी स्या धाइसी ङादा भउ, थे चसी ङा सिबा भन्दा ङाच्छा ङाइ एदा परमप्रभुला ङाच्छा मोलम पिन्ना।’ थेतबासेलमा ङाला झा, ङाइ पाङ्बा अन्छार एसे लउ। राला बथान मुबा ग्लारी निसी गोर न्ही छोबा छोबा बोको भसी खउ। ओच्छे ङाइ एला आबादा सेम निबा स्या धाइसी पिन्ना। जमाहेन्से ए चा थे स्या आबादा भोर्सी पिन्गो। थेसे चु स्या चसी ह्राङ सिबा भन्दा ङाच्छा एदान मोलम पिन्गै।”
याकूबसे ह्राङला आमा रिबेकादा चुह्रङ् भिसी पाङ्जी, “स्हीगो, ङाला ज्योज्यो एसाव चा जीउ नाङ्नोन क्रानोन क्रा मुबा म्हि हिन्ना, तर ङाला चा क्रा आरे। आबासे ङादा साम्ला तला, ओच्छे आबाला ङाच्छा ङा फट्टा म्हि जे दोला। जमाहेन्से ङाइ मोलम चा आहिन, सराप चा याङ्ला।”
जमाहेन्से आमासे थेदा चुह्रङ् भिसी पाङ्जी, “ङाला झा, एदा यूबा सराप ङाथोरीन परब तगै। एसे ङाला ताम जे ङ्यन्गो, ए निसी बोकोगदे ङा मुबा ग्लारी भउ।” जमाहेन्से थे निसी बोकोगदे भसी आमादा पिन्जी, ओच्छे रिबेकासे याकूबला आबादा सेम निबा स्या ब्रोइ खना लसी धाइजी। ओच्छे रिबेकासे दिमरी थान्बा ह्राङला थेबा झा एसावला ज्यबा ज्यबा क्वानगदे तेःसी भजी। ओच्छे च्याङ्बा झा याकूबदा क्वान्सी पिन्जी। ओच्छे याकूबला क्रा आरेबा ग्ला खारेरीदेन यारी बोकोगदेला ढि क्वान्सी पिन्जी। जमाहेन्से ह्राङसे ठीक लबा ब्रोइ खबा स्यादेन गेङ ह्राङला झा याकूबदा पिन्जी।
जमाहेन्से याकूबसे ह्राङला आबादा “आबा” भिसी पाङ्जी। इसहाकसे थेदा “ए खला हिन्ना?” भिसी ङ्योइजी।
याकूबसे आबादा “ङा ह्राङला थेबा झा एसाव हिन्ना। ङाइ ह्राङसे कुल्बा अन्छार लबा मुला। दाहेन्से रेःसी धन्छ्यागो ओच्छे ङाइ शिकार लसी भबा स्या सोल्सी ङादा मोलम पिन्गो।”
इसहाकसे ह्राङला झादा “झा, एसे चुदे योना खाह्रङ् लसी शिकार स्याप्जी?” भिसी पाङ्मा, थेसे चुह्रङ् भिसी जोहाब पिन्जी, “परमप्रभु ह्राङला परमेश्वरसेन चुदे योनान स्याप्ना लजी।”
जमाहेन्से इसहाकसे याकूबदा चुह्रङ् भिसी पाङ्जी, “झा, ङाला ङाम्रीन खउ, ए ङाला झा एसाव हिन्ना कि आहिन ङाइ साम्सी च्याला।” याकूब ह्राङला आबाला ङाम्रीन निजी, जमाहेन्से इसहाकसे थेदा साम्सी चुह्रङ् भिसी पाङ्जी, “काइ चा याकूबला हिन्ना, तर या चा एसावलान हिन्ना।” थेला या थेला ज्योज्यो एसावला ह्रङ्बान क्रानोन क्रा मुबासेलमा इसहाकसे थेदा ङोआसेनी। जमाहेन्से इसहाकसे याकूबदा मोलम पिन्बारी छ्याइजी। दोःसी इसहाकसे थेदा चुह्रङ् भिसी ङ्योइजी, “तिग ए पक्कान ङाला झा एसावनोन हिन्ना?” याकूबसे “ङा ह्राङला झा एसावनोन हिन्ना” भिसी जोहाब पिन्जी।
जमाहेन्से इसहाकसे थेदा चुह्रङ् भिसी पाङ्जी, “एसे शिकार लसी भबा स्या चुरी भउ, ङाइ चसी एदा मोलम पिन्ना।” जमाहेन्से याकूबसे थे स्या भसी आबादा पिन्जी। ओच्छे इसहाकसे चजी। याकूबसे अङ्गुरला निङ्गुएनोन भसी पिन्जी इसहाकसे थेएनोन थुङ्जी। जमाहेन्से थेला आबा इसहाकसे थेदा चुह्रङ् भिसी पाङ्जी, “ङाला झा, ङाला ङाम्री खसी ङादा च्योक लउ।” याकूब ङाम्री खसी ह्राङला आबादा च्योक लजी। ओच्छे इसहाकसे थेला क्वानगदेला बास्ना थाङ्नासी चुह्रङ् भिसी मोलम पिन्जी, “च्यागो, ङाला झाला बास्ना परमप्रभुसे मोलम पिन्बा भुला बास्ना ह्रङ्बान मुला। परमेश्वरसे मुग्याम शीत ताइना लसी एला भुदेन व्हारा ङ्यम्ना लगै। ओच्छे परमेश्वरसे एदा ल्हानान अन्नदेन अङ्गुरला निङ्गु पिन्गै। य्हुल य्हुल्ला म्हिगदेसे एला गे लगै। ओच्छे म्हिगदेसे एदा फ्या लगै। एसे एला ज्योज्यो आलेगदेथोरी शासन लगै। ओच्छे एला आमाला सन्तानगदेसे एदा फ्या लगै। एदा सराप यूबागदे जम्मासेन सराप याङ्गै, ओच्छे एदा मोलम पिन्बागदे जम्मासेन मोलम याङ्गै।”
एसावसे आबादेन छ्याम मोलम ह्रीबा
इसहाकसे मोलम पिन्सी जिन्माहेन्से याकूब ह्राङला आबा मुबा ग्लाग्याम थोन्मैछ्याम याकूबला ज्योज्यो एसाव शिकार लसी दोखजी। थेसेनोन ब्रोइ खबा स्या धाइसी आबा मुबा ग्लारी भजी। ओच्छे थेसे ह्राङला आबादा चुह्रङ् भिसी पाङ्जी, “आबा, रेःसी ह्राङला झासे शिकार लसी भबा स्या सोल्गो, ओच्छे ङादा मोलम पिन्गो।”
थेला आबा इसहाकसे थेदा “ए चा खला हिन्ना?” भिसी ङ्योइमा थेसे “ङा ह्राङलान थेबा झा एसाव हिन्ना” भिसी जोहाब पिन्जी।
इसहाक फितफित धर्बान चुह्रङ् भिसी पाङ्जी, “थेह्रङ् भिसम शिकार लसी ङा मुबा ग्लारी भबा थे खला मुबा? ए खबा भन्दा ङाच्छान थे जम्मान चसी ङाइ थेदा मोलम पिन्सी जिन्जी। मोलम याङ्बा चा थेनोन हिन्ना।”
एसावसे ह्राङला आबाग्याम चुह्रङ्बा ताम थेःमाहेन्से ल्हानान दुख ङ्हम्सी घ्रेन काइ तेःसी क्राबान ह्राङला आबादा “आबा, ङादाएनोन मोलम पिन्गो” भिसी पाङ्जी।
तर इसहाकसे थेदा चुह्रङ् भिसी पाङ्जी, “एला आले जाल लसी खजी, ओच्छे एसे याङ्बा मोलम थेसे भोर्जी।”
एसावसे चुह्रङ् भिसी पाङ्जी, “थेला मिन याकूब थान्बा ठीकनोन हिन्ना। तिग्दा भिसम थेसे ङादा न्हीरेम ठगब लजी। थेसे थेबा झासे याङ्बा ङाला अधिकारएनोन भोर्जी, ओच्छे दन्दे ङाइ याङ्तोःबा मोलमएनोन भोर्जी।” थेसे दोःसी चुह्रङ् भिसीएनोन पाङ्जी, “तिग ह्राङसे ङाला लागिरी मोलम गिकएनोन बाँकी आथान्नी?”
इसहाकसे एसावदा चुह्रङ् भिसी पाङ्जी, “च्यागो, ङाइ थेदा एला मालिक स्होसी जिन्जी। ओच्छे थेला जम्मान ज्योज्यो आलेगदेदा ङाइ थेला घ्याबा स्होसी जिन्जी। ङाइ थेदा अन्नदेन अङ्गुरला निङ्गुसे प्लिङ्ना लसी जिन्जी। झा, दाहेन्से ङाइ एला लागिरी तिगै लबारी आखम।”
एसावसे ह्राङला आबादा चुह्रङ् भिसी पाङ्जी, “आबा, ह्राङदेन छ्याम मोलम गिक मि मुदला? ङादाएनोन मोलम पिन्गो।” एसाव घ्वाँ घ्वाँ क्राजी।
जमाहेन्से एसावला आबा इसहाकसे चुह्रङ् भिसी पाङ्जी,
“च्यागो, ए जम्बुलिङला ज्यबा भु व्हाराग्याम थारीङ् तला,
ओच्छे मुग्याम ताइबा शितग्यामएनोन थारीङ् तला।
ए ह्राङला तरवारला भङ्से सोला
ओच्छे एला आलेला घ्याबा दोला।
ए थेला अधिकारग्याम थोन्बारी म्हाइमा,
एसे ह्राङला बमग्याम थेला जुवा भ्याङ्ला।”
ह्राङला आबासे याकूबदा मोलम पिन्बासेलमा एसावसे याकूबदा हेला लजी। ओच्छे एसावसे सेम सेमरी चुह्रङ् भिसी पाङ्जी, “ङाला आबा सिबा धुइ तसी जिन्बा मुला। आबा सिमाहेन्से ङाइ ङाला आले याकूबदाएनोन साइला।”
तर थेबा झा एसावला चु ताम रिबेकासे था याङ्जी। थेतबासेलमा रिबेकासे ह्राङला झा च्याङ्बादा ङ्योइसी चुह्रङ् भिसी पाङ्जी, “च्यागो, एला ज्योज्यो एसावसे एदा साइबा सेम थोसी ह्राङला सेम सन्तोक लबा मुला। थेतबासेलमा ङाला झा, ङाला ताम ङ्यन्गो। ए हारानरी ङाला ज्योज्यो लाबान मुबा ग्लारी निउ। एला ज्योज्योला बोमो आम्हदेधोना तिगै धिनधोना ए थेदेन छ्यामनोन चिउ। एसे लबा गे म्लेःसी थेला बोमो म्हमाहेन्से ङाइ एदा किन्बारी पुइला। तिरेरीन ङाइ खाह्रङ् लसी झा न्हीनोन सिबा नासे?”
जमाहेन्से रिबेकासे इसहाकदा चुह्रङ् भिसी पाङ्जी, “एसावला हित्ती म्रिङ्गदे म्राङ्सी ङादा ल्हानान दिक्क तबा मुला। दाहेन्से याकूबसेनोन चु ग्लाला हित्ती म्रिङ्कोलादेन छ्याम ब्याह लजी भिसम ङा सिसै तला।”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.