Eastern Tamang Language Bible
एज्रा 4
परमेश्वरला मन्दिर स्होबा गेदा बिरोध लबा
बेबिलोनीगदेसे चुङ्सी भोर्बा म्हिगदे दोःसी खसी परमप्रभु इस्राएलला परमेश्वरला मन्दिर स्होबान मुला भिबा ताम यहूदादेन बेन्यामीनना शत्रुगदेसे थेःजी। थेतबासेलमा थेनीगदे यरुबाबेलदेन म्हेमे म्हेमेला मूल म्हिगदे मुबा ग्लारी खसी चुह्रङ् भिसी पाङ्जी, “ङन्दाएनोन परमेश्वरला मन्दिर स्होबा गेरी ह्राङनीदा ह्रो लबारी पिन्गो। तिग्दा भिसम ङन्सेनोन ह्राङनीलान परमेश्वरदा तेन्बा मुला। ङन्दा अश्शूरला ग्ले एसरहदोनसे चुरी भबा धुइहेन्सेन ङन्से ह्राङनीलान परमेश्वरदा बलि फुल्बान मुला।”1
तर यरुबाबेल, येशूअदेन इस्राएलीगदेला म्हेमे म्हेमेला मूल म्हिगदेसे थेनीगदेदा चुह्रङ् भिसी पाङ्जी, “चु मन्दिर ङन्से ङन्ना परमेश्वरला लागिरी स्होबान मुला। परमेश्वरला चु मन्दिर स्होबारी ङन्दा एनीगदेसे ह्रो लआतोः। फारस य्हुल्साला कोरेस ग्लेसे कुल्बा अन्छार ङन्ना परमप्रभु इस्राएलला परमेश्वरला लागिरी ङन्सेन चु मन्दिर स्होला।”
जमाहेन्से थे म्हिगदेसे यहूदीगदेला सेम सिना लबारी म्हाइजी, ओच्छे यहूदीगदेदा लोङ्ना लसी परमेश्वरला मन्दिर स्होबा गे रोगब लबारी म्हाइजी। यहूदीगदेला बिरोधरी तिगै लगै भिसी थेनीगदेसे फारस य्हुल्साला ग्लेला म्हिगदेदा टाङ्गा पिन्जी। ओच्छे फारस य्हुल्साला कोरेस ग्लेसे शासन लबा धुइहेन्से दारा ग्लेसे शासन लबा धुइधोनान चुह्रङ्बा गे लसीन चिजी।
यरूशलेम सहर स्होबा गेरी बिरोध लबा
अहासूरस ग्लेसे शासन लबारी चूमा यहूदादेन यरूशलेमरी चिबा म्हिगदेला शत्रुगदेसे थेनीगदेदा दोष लसी चिठी गिक भ्रिसी पुइजी।2
फारस य्हुल्सारी अर्तासास्त ग्लेसे शासन लबा धुइरी विश्लाम, मित्रेता, ताबेलदेन थेला जम्मान ह्रोगदेसे ग्लेदा चिठी गिक भ्रिजी। थे चिठी चा अरामी ग्योइरी भ्रिबा मुबा। थेतबासेलमा थे चिठी ग्लेला लागिरी पढब लमा ग्लेसे घोबा ग्योइरी पाङ्सी पिन्तोःमुबा। सिपाहीगदेला हाकिम रेहूमदेन सचिव शिम्शैसेनोन यरूशलेमला बिरोधरी चुह्रङ् लसी अर्तासास्त ग्लेदा चिठी गिक भ्रिजी।
“सिपाहीगदेला हाकिम रेहूमदेन सचिव शिम्शैदेन छ्यामनोन ढिक्सी चिठी भ्रिबा म्हिगदे चा निसाफ लबा म्हिगदे, शासन लबा म्हि, अर्गु जम्मान सरकारी हाकिमगदे मुबा। सिपाहीगदेला हाकिम रेहूमदेन सचिव शिम्शैला चु ह्रोगदे चा ङाच्छा एरेक सहर, बेबिलोन य्हुल्सादेन एलाम य्हुल्साला शूशन सहरग्याम खबा मुबा। ओच्छे अर्गु य्हुल्ला म्हिगदेसेनोन ह्रो लबा मुबा। चु अर्गु य्हुल्ला म्हिगदेदा चा मिन चलब तबा अशूरवनिपलसे ह्राङला य्हुल्साग्याम तेःसी सामरियाला सहरदेन यूफ्रेटिस स्योङ्ला क्याम्सङ्पट्टि चिबारी पिन्मुबा।”
थेनीगदेसे पुइबा चिठीरी चुह्रङ् भिसी भ्रिबा मुबा,
“यूफ्रेटिस स्योङ्ला क्याम्सङ्पट्टि चिबा ह्राङला म्हिगदेग्याम अर्तासास्त ग्लेदा फ्याफुल्ला, ग्लेदा चु ताम था तगै भिबा ङन्ना सेम मुला, ह्राङला य्हुल्साला अर्गु ग्लाग्याम यरूशलेमरी यहूदीगदे खबा मुला। थेनीगदेसे नाइबा गे लबादेन ह्राङदा बिरोध लबा यरूशलेम सहरदा दोःसी स्होबान मुला। थेनीगदेसे दोःसी थे सहरला जग थान्सी थे सहरला पर्खाल स्होसी जिन्ना लबारीन छ्याइबा मुला। ग्लेदा चु तामएनोन था तगै भिबा ङन्ना सेम मुला, चुदे थेनीगदेसे चु सहर स्होसी सहरला पर्खालएनोन स्होसी जिन्ना लजी भिसम थेनीगदेसे तिरो आफा, ओच्छे ग्लेला सम्पत्तिएनोन ल्हाना आत। ङन्से ग्लेला चजा चबासेलमा ग्लेला बेइज्जत लबा ङन्से च्याबारी आखम। चुनोन ताम ग्लेदा पाङ्बाला लागिरी ङन्से चु समाचार पुइखबा हिन्ना। चु ताम ह्राङला आखेम्हेमेगदेसे भ्रिसी थान्बा किताबगदेरी म्हाइजी भिसम ह्राङसे ज्यना लसी घोला। चु यरूशलेम सहर चा ओन्माहेन्सेन बिरोध लबा सहर हिन्ना। ओच्छे ग्लेदेन अञ्चल अञ्चलरी शासन लबा म्हिगदेदा दुख पिन्बा सहर हिन्ना। चु सहरला म्हिगदेथोरी शासन लबारी सदन गाह्रो तबासेलमान चु सहरदा नाश लबा मुबा। चुदे चु सहरदेन चु सहरला पर्खाल स्होसी जिन्ना लजी भिसम यूफ्रेटिस स्योङ् क्याम्सङ्ला अञ्चलरी ह्राङसे तिगै अधिकार लआम्याङ् भिबा ताम जे ङन्से ह्राङदा पाङ्बारी म्हाइबा हिन्ना।”
ग्लेसेनोन चुह्रङ् भिसी चिठी भ्रिसी पुइजी,
“सिपाहीगदेला हाकिम रेहूम, सचिव शिम्शैदेन सामरिया ओच्छे यूफ्रेटिस स्योङ् क्याम्सङ् चिबा म्हिगदेदा ह्रो लबा जम्मान बाँकी म्हिगदेदा फ्याफुल्ला, एनीगदेसे ङादा पुइखबा चिठी पढब लसी ङाइ घोबा ग्योइरी पाङ्सी ङादा घोना लबा मुला। ङाइ आखेम्हेमेगदेसे भ्रिसी थान्बा किताबरी म्हाइगो भिसी म्हिगदेदा कुल्जी, ओच्छे थेनीगदेसे म्हाइमाहेन्से चु ताम था याङ्जी। थे सहरला म्हिगदेसे ओन्माहेन्सेन ग्लेसे लबा शासनना बारेरी बिरोध लबा चिम, ओच्छे थे सहर ग्लेसे लबा शासनना बारेरी बिरोध लबादेन कालकोल तना लबा तामसे प्लिङ्बा चिम। ओच्छे यूफ्रेटिस स्योङ् क्याम्सङ्पट्टिला यरूशलेमथोरी शक्तिशाली ग्लेगदेसे शासन लबा चिम। ओच्छे थेला म्हिगदेसे भु व्हारादेन जम्मान खाल्ला तिरो थे ग्लेगदेदा फाबा चिम। थेतबासेलमा ङाइ दोःसी अर्गु तिगै ताम आपाङ्देधोनाला लागिरी थे म्हिगदेदा सहर स्होबा गे आलउ भिसी कुल्गो। य्हुल्साला तिगै ताम न्होङ्सी आनिगै भिसी एनीगदेसे चु गे तुरून्तन लउ।”
ग्ले अर्तासास्तसे पुइखबा चिठी सिपाहीगदेला हाकिम रेहूम, सचिव शिम्शैदेन थेनीगदेला ह्रोगदेदा पढब लसी थेःना लमैछ्याम थेनीगदे योना योना लसी यरूशलेमरी निजी। ओच्छे यहूदीगदेदा जबरजस्ती लसी सहर स्होबा गे लआपुङ्नी। फारस य्हुल्साला दारा ग्लेसे शासन लबा न्ही दिङ्धोना यरूशलेमरी परमप्रभुला मन्दिर स्होबा गे रोकब तजी।3
Source notes (3)
- Cross-reference २ ग्ले १७:२४-४१
- Cross-reference एस्त १:१
- Cross-reference हाग्गै १:१; जक १:१
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.