Eastern Tamang Language Bible
इज 8
परमेश्वरसे इजकिएलदा दोःसी अर्गु ताम उन्बा
इज ८:१-१०:२२
ङन्दा चुङ्सी जबरजस्ती लसी भोर्बा ढु दिङ्री वाङ्बा मुबा, थेनोन दिङ्ला ल ढुला ङ्हारेकुनु ङा ङालान दिमरी मुबा। ओच्छे ङाला ङाच्छापट्टि यहूदाला गन्बागदे मुबा। थेनोन धुइरी परमप्रभु परमेश्वरसे ह्राङला छ्या ङाथोरी थान्जी। जमाहेन्से ङाइ ओसो च्यामा, म्हि ह्रङ्बान म्राङ्जी। थेला क्रेप्सा भन्दा मारपट्टि चा मे लुङ्बा ह्रङ्बान मुबा, ओच्छे क्रेप्साहेन्से तोरपट्टि चा लुङ्सी चिबा काँस ह्रङ्बान म्राङ्मुबा।1 थेसे या ह्रङ्बान स्हे स्योङ्सी ङाला क्रारी चुङ्जी। जमाहेन्से परमेश्वरला आत्मासे ङादा थीसी यरूशलेम सहररी भोर्जी, ओच्छे ङादा परमेश्वरला मन्दिरला न्हङ्पट्टिला ख्राङ्गारी वाङ्बा झ्याङ्पट्टिला मूल म्राप ङाम्री भोर्सी परमेश्वरदा बोमो खना लबा मूर्ति गिक उन्जी। ओच्छे ङाइ कबार स्योङ्ला कुनीरी म्राङ्बा ह्रङ्बान ताम थेरीनोन म्राङ्जी, थेरी ङाला ङाच्छापट्टि इस्राएलला परमेश्वरला घ्रेन य्हाल मुबा।2
यरूशलेमरी मूर्तिदा तेन्बा
जमाहेन्से परमेश्वरसे ङादा चुह्रङ् भिसी सुङ्जी, “म्हिला कोला! दाहेन्से एसे झ्याङ्पट्टि च्यागो।” ङाइ ओसो च्यामा, बली फुल्बा ग्लाला झ्याङ्पट्टिला मूल म्रापरी परमेश्वरदा बोमो खना लबा थे मूर्ति म्राङ्जी।
ओच्छे परमेश्वरसे ङादा चुह्रङ् भिसी सुङ्जी, “म्हिला कोला, थेनीगदेसे तिग लबान मुला, तिग एसे म्राङ्जी? ङादा ङा चिबा चोखो ग्लाग्याम तेःबारी इस्राएल य्हुलसे चुरी नाइबा खबा गेगदे लबान मुला। तर एसे थे भन्दाएनोन झन ल्हानान नाइबा खबा गेगदे म्राङ्ला।”
जमाहेन्से परमेश्वरसे ङादा परमेश्वरला मन्दिरला मङ्ग्यारपट्टिला ख्राङ्गारी भजी, ओच्छे ओसो च्यामा थेरी भित्तारी ङाइ घाल गिक म्राङ्जी। परमेश्वरसे ङादा दोःसी चुह्रङ् भिसी सुङ्जी, “म्हिला कोला, चु भित्तारी ख्वउ।” ओच्छे भित्ता ख्वमा ङाइ थेरी म्राप गिक म्राङ्जी।
ओच्छे परमेश्वरसे ङादा चुह्रङ् भिसी सुङ्जी, “न्हङ्री निसी चुरी थेनीगदेसे लबान लबा ल्हानान आज्यबादेन नाइबा खबा गेगदे च्यागो!” थेतबासेलमा ङाइ न्हङ्री वाङ्सी च्याजी। थेरी क्युर्सीन भित्ता नाङ्नोन जम्मान खाल्ला सुल्सी भ्रबा जन्तुगदे, नाइबा खबा जन्तुगदेदेन इस्राएल य्हुल्ला म्हिगदेसे तेन्बा जम्मान मूर्तिगदेला चित्रगदे स्होसी थान्बा म्राङ्जी। थे चित्रगदेला ङाच्छापट्टि इस्राएल य्हुल्ला बोगल सोमसे च्युइ गन्बागदेदेन शापानना झा याजन्याह राप्सी चिबा मुबा। थेनीगदे जम्मालान या यारी पोइमो ताङ् मुबा, ओच्छे बास्ना खबा धूपला म्युगु तोरपट्टि निबान मुबा।
जमाहेन्से परमेश्वरसे ङादा चुह्रङ् भिसी सुङ्जी, “म्हिला कोला, एसे इस्राएल य्हुल्ला जम्मान गन्बागदेसे धोपधोपरी ह्राङ ह्राङला मूर्तिला पूजा लबा कोठारी तिग लबान लबा म्राङ्जी? थेनीगदेसे चुह्रङ् भिसी पाङ्मुला, ‘य्हाङदा परमप्रभुसे आम्राङ्मुला। चु य्हुल्सादा परमप्रभुसे ख्लाबा मुला।’” दोःसी परमेश्वरसे ङादा चुह्रङ् भिसी सुङ्जी, “थेनीगदेसे चु भन्दाएनोन झन ल्हानान नाइबा खबा गेगदे लबा एसे म्राङ्ला।”
जमाहेन्से परमेश्वरसे ङादा परमप्रभुला मन्दिरला झ्याङ्पट्टिला मूल म्रापला सुङ्री भजी, थेरी ङाइ तम्मूज लाला लागिरी क्रासी चिबा म्रिङ्म्हेमेगदेदा म्राङ्जी। परमेश्वरसे ङादा चुह्रङ् भिसी सुङ्जी, “म्हिला कोला, तिग एसे चु म्राङ्जी? एसे चु भन्दाएनोन ल्हानान नाइबा खबा तामगदे म्राङ्ला।”
जमाहेन्से परमेश्वरसे ङादा परमप्रभुला मन्दिरला न्हङ्पट्टिला ख्राङ्गारी भजी, ओच्छे थेरी बलि फुल्बा ग्लादेन दलानना गुङ्री मन्दिररी वाङ्बा मूल म्रापरी ओस्पन बोगल गिकसे ङ्हा म्हिगदे मुबा। थेनीगदेसे परमप्रभुला मन्दिरपट्टि ग्याप दोःसी ह्राङला ली चा स्यारपट्टि दोःसी धिनीदा फ्या लबान मुबा।
परमेश्वरसे ङादा चुह्रङ् भिसी सुङ्जी, “म्हिला कोला, तिग एसे चु म्राङ्जी? तिग चुरी थेनीगदेसे लबान लबा चु नाइबा खबा गेगदे यहूदा य्हुल्ला लागिरी जजाबा ताम हिन्ना? तिग थेनीगदेसे य्हुल्सादाएनोन आतोःबा तामसे प्लिङ्ना लसी सदन ङादा बोमो खना लबा? च्यागो, थेनीगदेसे तिग दामन लसैनोन ङाला बेइज्जत लबा मुला! थेतबासेलमा ङाइ थेनीगदेदा बोमोला झोकरी सजाय पिन्ना। ङाइ थेनीगदेदा दया आल। थेनीगदे घ्रेन काइ तेःसी ङाला नाब्यङ्रीन क्रिङ्सैनोन ङाइ थेनीगदेला तामदा वास्ता आल।”
Source notes (2)
- Cross-reference इज १:२७
- Cross-reference इज १:२८
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.