Eastern Tamang Language Bible
इज 6
मूर्तिदा पूजा लबागदेदा सजाय पिन्बा
परमप्रभुसे ङादा चुह्रङ् भिसी सुङ्जी, “म्हिला कोला, एला ली इस्राएलला गङ्गदेपट्टि दोःसी थेनीगदेला बिरोधरी चु अगमवाणी पाङ्गो, ‘परमप्रभु परमेश्वरसे जजा घ्रेन जम्मान गङ्गदे, होपगदेदेन ब्याँसीगदेदा चुह्रङ् सुङ्बा मुला, च्यागो, ङाइनोन एनीगदेथोरी तरवार चलब लला, ओच्छे मूर्तिला पूजा लबा एनीगदेला नोबा नोबा ग्लागदेदा ङाइ नाश लला। ङाइ एनीगदेसे बलि लबाला लागिरी स्होबा ग्लागदेदेन धूप म्राबारी स्होबा ग्लागदेदा छ्याकछिक निना लला। ओच्छे ङाइ एनीगदेला म्हिगदेदा एनीगदेलान मूर्तिगदेला ङाच्छापट्टि साइला। ङाइ इस्राएलीगदेलान मूर्तिगदेला ङाच्छापट्टि इस्राएल य्हुल्ला लाशगदे थान्सी पिन्ना। ङाइ थेनीगदेला नख्रुगदे थेनीगदेसेन बलि लबाला लागिरी स्होबा ग्लाला क्युर्सीन छरपष्ट लसी पिन्ना। थेनीगदेसे बलि लबाला लागिरी स्होबा ग्लागदेदेन मूर्तिगदे फुप्सी छ्याकछिक लगै, ओच्छे थेनीगदेसे धूप म्राबाला लागिरी स्होबा ग्लागदेएनोन छ्याकछिक लगै। जमाहेन्से थेनीगदेसे लबा जम्मान गेगदे म्हसी निला। थेनीगदे खानङ्दामन चिसैनोन थेनीगदेला नोबा नोबा ग्लागदेदेन सहरगदे फुप्सी तोङ्तोङ्बा तना लला। थेनीगदेला म्हिगदेदा थेनीगदेलान ओन्छाङ्री साइला, ओच्छे जोगब तबागदेसे चा ङानोन परमप्रभु हिन्ना भिसी था याङ्ला।
“‘तर ङाइ थेनीगदे न्हङ्ला कोइ कोइदा जोगब लला। तिग्दा भिसम थेनीगदे य्हुल य्हुल्लादेन य्हुल्सा य्हुल्साला गुङ्री छरपष्ट तसी निमा थेनीगदे जोगब तला। जमाहेन्से जुन ग्लारी थेनीगदेदा चुङ्सी जबरजस्ती ह्राङला य्हुल्साग्याम भोर्सी य्हुल य्हुल्ला गुङ्री थान्बा मुबा, थे ग्लाग्याम स्योर्बागदेसे ङादा ढन्ना। थेनीगदेसे अर्गुदेन छ्याम ब्रेल्बा सेम थोसी ङाग्याम थारेङ् तबान मूर्तिगदेदा तेन्बासेलमा ङाला सेम स्हुखबा मुबा। थेनीगदेसे लबा नाइबा गेदेन जम्मान पेःबा खबा गेगदेसे लमा थेनीगदेसे ह्राङसे ह्राङदान गेआखेल्बा म्हि भिसी म्हन्ना। ङानोन परमप्रभु हिन्ना, ओच्छे ङाइ थेनीगदेथोरी चुह्रङ्बा दुखला आपत विपत भला भिसी होह्रङ्नोन धाक उन्बा आहिन भिसी थेनीगदेसे था याङ्ला।’”
परमप्रभु परमेश्वरसे चुह्रङ् भिसी सुङ्बा मुला, “इस्राएलला जम्मान वंशसे नाइबादेन पेःबा खबा गे लबासेलमा सरी या काङ भ्यासी क्रिङ्बान चुह्रङ् भिसी पाङ्गो, ‘आम्मै, गादे दुखला ताम!’ तिग्दा भिसम थेनीगदे लडाइ, अनिकालदेन देशानग्याम नाश तला। थारेङ् थारेङ् मुबागदे देशानग्याम नाश तला, ङाम्रीन मुबागदे चा लडाइरी सिला, ओच्छे स्योर्सी जोगब तबागदे चा अनिकालग्याम सिला। चुह्रङ् लसी ङाइ थेनीगदेथोरी ङाला बोमो ल्हूला! थेनीगदेला लाश चा मूर्तिगदेला गुङ्री, बलि लबा ग्लाला क्युर्सीन, नोबा नोबा जम्मान ग्लागदेरी, जम्मान गङ्गदेला जो जोरी, भुम्म तबा जम्मान दोङगदेला टारीदेन भानोन भा मुबा जम्मान सुल्सिङ दोङगदेला टारी थेनीगदेसे मूर्तिगदेला लागिरी धूप म्राबा जम्मान ग्लारी छरपष्ट तला। जमाहेन्से जम्मान म्हिगदेसे ङानोन परमप्रभु हिन्ना भिसी था याङ्ला। ङाइ थेनीगदेला बिरोधरी ङाला या थीसी थेनीगदेला य्हुल्सादा नाश लला। थेनीगदेला य्हुल्सादा ङाइ लोपट्टिला तोङ्तोङ्बा ग्लाहेन्से झ्याङ्पट्टिला दिब्ला सहरधोनान नाश लला। ङाइ थेनीगदे चिबा थेनीगदेला य्हुल्साला जम्मान ग्लादा तिगै आरेबादेन सुनसान तना लला। जमाहेन्से ङानोन परमप्रभु हिन्ना भिसी जम्मासेन था याङ्ला।”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.