Eastern Tamang Language Bible
इज 19
सुर्दाला व्हाइ
परमप्रभुसे ङादा चुह्रङ् भिसी सुङ्जी, “इस्राएलला ग्लेला झागदेला लागिरी सुर्दाला चु व्हाइ गोबान चुह्रङ् भिसी पाङ्गो,
“एला आमा सिंहगदेला गुङ्री सिंह मामा ह्रङ्बान मुबा!
ह्राङला कोलागदेदा छार्ना लबान थे भङ्बा सिंहगदेला गुङ्री स्योन तसी चिमुबा।
थेसे ह्राङला कोलागदे न्हङ्ला गिकदा सयार लसी छार्ना लजी,
ओच्छे थे कोला भङ्बा सिंह गिक दोजी।
थेसे शिकार लबारी लोप्जी
ओच्छे म्हिगदेदा चबारी छ्याइजी।
य्हुल य्हुल्ला म्हिगदेसे थेला बारेरी थेःजी,
ओच्छे थेनीगदेसे घ्रेन व्हाङ् ख्वाजी,
थे थेनोन व्हाङ्री परब तजी।
थेनीगदेसे थेदा अङ्कुसेसे चुङ्जी
ओच्छे थेदा मिश्र य्हुल्सारी भोर्जी।
“थेला आमासे ह्राङसे लबा आश पूरा आतबा म्राङ्जी,
ओच्छे ह्राङसे म्हन्बा ताम नाश तबा म्राङ्जी,
जमाहेन्से थेसे ह्राङला कोलागदे न्हङ्ला अर्गु गिकदा किन्जी,
ओच्छे थेदा भङ्बा सिंह गिक स्होजी।
सिंहगदे न्हङ्री थे चा क्यारमार भ्रबारी छ्याइजी,
तिग्दा भिसम थे भङ्बा सिंह गिक दोबा मुबा।
थेसे शिकार लबारी लोप्जी
ओच्छे म्हिगदेदा चबारी छ्याइजी।
थेसे थेनीगदे जोगब तबारी स्होबा ग्लागदे फुप्सी पिन्जी,
ओच्छे थेनीगदेला सहरगदे तोङ्तोङ्बा ग्ला दोना लजी।
थे ङ्हार्मा थोन्बा काइसे य्हुल्सादेन य्हुल्सारी मुबा जम्मान म्हिगदे लोङ्जी।
जमाहेन्से थेला क्युर्सीन मुबा य्हुल्सागदेग्याम य्हुल य्हुल्ला म्हिगदे खजी,
ओच्छे थेनीगदेसे थेदा चुङ्बाला लागिरी वा झुजी,
ओच्छे थेनीगदेसे थेदा व्हाङ्री परब तना लजी।
थेनीगदेसे थेदा अङ्कुसेसे चुङ्सी खोर गिकरी झाङ्जी,
ओच्छे थेदा बेबिलोनना ग्ले मुबा ग्लारी भजी।
थेला काइ दोःसी खाइमै इस्राएलला गङ्गदेरी क्यार आथेःगै भिसी थेनीगदेसे थेदा च्युप्सी थान्जी।
“एला आमा क्युइला ङाम्री मुबा अङ्गुर व्हारारी सूबा अङ्गुरला दोङ ह्रङ्बान मुबा।
क्युइनोन क्युइ मुबासेलमा थे रोनोन रोदेन
हाँगान हाँगासे भुम्म तबा मुबा।
थेला हाँगागदे कोङ्बा मुबा,
ओच्छे शासन लबा म्हिला लागिरी कडी स्होबारी तबा खाल्ला मुबा।
थेला हाँगागदे ल्हानान मुबा,
ओच्छे थे जम्मान भन्दा नोबा मुबा।
तर थेदा बोमोला झोकरी प्योक्जी,
ओच्छे थेदा सरी भ्याङ्जी।
थेदा स्यारपट्टिग्याम खबा लेप्बा लाबासे खार्ना लजी,
ओच्छे थेला जम्मान रोगदे ताइना लजी।
थेला कोङ्बा हाँगागदे खार्जी,
ओच्छे थेदा मेसे नाश लजी।
थेदा दन्दे सोङ्सोङ् खार्बा क्युइनोन आरेबा तोङ्तोङ्बा ग्लारी सूजी।
थेला मूल हाँगागदे न्हङ्ला हाँगा गिकग्याम मे थोन्जी,
ओच्छे थेला रोगदे नाश तजी।
शासन लबा म्हिला लागिरी कडी स्होबारी तबा हाँगा गिकएनोन बाँकी आचिनी।
चु सुर्दाला व्हाइ गिक हिन्ना, चु सुर्दाला व्हाइ ह्रङ् लसीन गोतोःला।”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.