Eastern Tamang Language Bible
थोन्बा 4
मोशादा उन्बा उदेकला चिनुगदे
जमाहेन्से मोशासे परमप्रभुदा चुह्रङ् भिसी पाङ्जी, “चुदे थेनीगदेसे ङाला ताम पत्याब आचनी ओच्छे ङाला ताम आङ्यन्ना ‘एसे परमप्रभुदा म्राङ्बान आहिन’ भिसी जोहाब पिन्जी भिसम ङाइ तिग लबा?”
जमाहेन्से परमप्रभुसे थेदा “एला यारी तिग मुला?” भिसी ङ्योइजी। ओच्छे थेसे “कडी” भिसी पाङ्जी। परमप्रभुसे थेदा “थे सरी भ्याङ्गो।” भिसी सुङ्जी, जमाहेन्से मोशासे थे कडी सरी भ्याङ्जी, ओच्छे थे कडी पुख्री दोजी, चु म्राङ्सी मोशा लोङ्सी य्हार्जी। जमाहेन्से परमप्रभुसे मोशादा, “एला यासे थेला मेःरी चुङ्गो” भिसी सुङ्जी। ओच्छे मोशासे थेला मेःरी चुङ्मा थेला यारी दोःसी कडीन दोजी। परमप्रभुसे चुह्रङ् भिसी सुङ्जी, “थेनीगदेला आखेम्हेमेला परमेश्वर, अब्राहामला परमेश्वर, इसहाकला परमेश्वरदेन याकूबला परमेश्वर ए मुबा ग्लारी फेप्खबा हिन्बान चिम भिसी चु गे म्राङ्सीन थेनीगदेसे विश्वास लगै।”
परमप्रभुसे थेदा अझन चुह्रङ् भिसी सुङ्जी, “एला या गा न्हङ्री झाङ्गो।” थेसे ह्राङला या गा न्हङ्री झाङ्जी, ओच्छे गग्याम तेःसी च्यामा कोरसे स्याप्सी थेला या घ्लिङ् ह्रङ्बान तार तार तबा मुबा। परमेश्वरसे थेदा चुह्रङ् भिसी सुङ्जी, “एला या दोःसी गा न्हङ्री झाङ्गो।” थेसे दोःसी ह्राङला या गा न्हङ्री झाङ्जी, ओच्छे दोःसी तेःसी च्यामा थेला या ङाच्छाला ह्रङ्नोन ज्यबा तजी।
जमाहेन्से परमप्रभुसे चुह्रङ् भिसी सुङ्जी, “थेनीगदेसे एला ताम विश्वास आलनी, ओच्छे ङाच्छाला चिनुदा वास्ता आलनी भिसम थेनीगदेसे लिच्छाला चिनुदा विश्वास लला। तर थेनीगदेसे चु चिनु न्हीदान विश्वास आलनी ओच्छे एला ताम आङ्यन्नी भिसम नील स्योङ्ग्याम जजाकी क्युइ भसी खार्बा सरी ल्हूगो। एसे नील स्योङ्ग्याम भबा थे क्युइ सरी का दोला।”
जमाहेन्से मोशासे परमप्रभुदा चुह्रङ् भिसी पाङ्जी, “प्रभु, ङाइ ज्यना लसी ताम पाङ्बारी आसेमुला, ङाइ न्हा ङाच्छा सेमुबा, न्हा दन्दे ह्राङदेन छ्याम ताम पाङ्मा ज्यना लसी पाङ्बारी सेजी। तिग्दा भिसम ङा ले चलब लबारीदेन ताम पाङ्बारी घाइमुला।” परमप्रभुसे मोशादा चुह्रङ् भिसी सुङ्जी, “म्हिला सुङ् खाल्से स्होजी? म्हिदा ताइ अथवा भाहिरा ओच्छे म्राङ्खम्बा अथवा म्राङ्आखम्बा खाल्से स्होजी? तिग ङा परमप्रभुसेन स्होबा आहिन? दाहेन्से निउ, एदा ताम पाङ्बारी ङाइ ह्रो लला, ओच्छे एसे तिग तिग पाङ्तोःबा ङाइ लोप्सी पिन्ना।”
तर मोशासे चुह्रङ् भिसी पाङ्जी, “प्रभु, ङाला चु बिन्ती मुला, स्य्हान्दो खालैदान पुइगो।”
जमाहेन्से परमप्रभु मोशा म्राङ्सी बोमो खजी, ओच्छे चुह्रङ् भिसी सुङ्जी, “तिग एला ज्योज्यो लेवी हारून आरे? थेसे ज्यना लसी ताम पाङ्खम्मुला भिबा ताम ङादा था मुला। थे एदा ह्रुप तबारी खबान मुला, थे एदा म्राङ्सी ताङ्ला। थेदेन छ्यामनोन ताम लउ ओच्छे थेसे पाङ्तोःबा ताम एसे थेदा पाङ्सी पिन्गो, ङा ए न्हीदेन छ्यामनोन तला ओच्छे ए न्हीसे तिग लतोःबा ङाइ थे पाङ्सी पिन्ना। थेसे चा एला लागिरी म्हिगदेदेन छ्याम ताम लसी पिन्ना, थे एला सुङ् ह्रङ्नोन तला, ओच्छे ए चा थेला लागिरी परमेश्वर ह्रङ्बान तला। तर चु कडी एदेन छ्यामनोन भोर्सी निउ। चु कडीग्याम एसे चु उदेकला गेगदे लला।”
मोशा मिश्र य्हुल्सारी दोःसी निबा
जमाहेन्से मोशा ह्राङला केन यित्रो मुबा ग्लारी खसी चुह्रङ् भिसी पाङ्जी, “ङाला बिन्ती मुला, मिश्र य्हुल्सारी मुबा ङाला ज्योज्यो आलेगदे सोबान मुला कि आरे ङादा निसी च्याबारी पिन्गो।” यित्रोसे मोशादा “तला, ज्यना लसी निउ” भिसी पाङ्जी। परमप्रभुसे मिद्यान य्हुल्सारी मुबा धुइरीन मोशादा चुह्रङ् भिसी सुङ्मुबा, “मिश्ररी दोःसी निउ, तिग्दा भिसम एदा साइबारी म्हाइबागदे जम्मान सिसी जिन्जी।” थेतबासेलमा मोशासे ह्राङला म्रिङ्देन कोलागदेदा गधा गिकरी थान्सी मिश्र य्हुल्सारी निजी। ओच्छे थेसे परमेश्वरला कडी यारीन थोसी मिश्ररी निजी। जमाहेन्से परमप्रभुसे मोशादा चुह्रङ् भिसी सुङ्जी, “दाहेन्से ए मिश्ररी दोमाहेन्से ङाइ एदा जुन जुन गे लबाला लागिरी शक्ति पिन्बा मुला, थे जम्मान उदेकला गेगदे फारो ग्लेला ङाच्छा लउ। तर ङाइ थेला सेम कोङ्ना लला, ओच्छे थेसे म्हिगदेदा निबारी आपिन। जमाहेन्से एसे फारोदा चुह्रङ् भिसी पाङ्गो, ‘परमप्रभुसे चुह्रङ् भिसी सुङ्बा मुला, इस्राएल ङाला थेबा झा हिन्ना। ङाइ एदा “ङाला झादा निबारी पिन्गो, थेसे ङादा मान लगै” भिसी पाङ्जी। तर एसे चा थेदा पुइबारी आम्हाइनी। थेतबासेलमा ङाइ एला थेबा झादा साइला।’”
ओच्छे ग्यामरी बास चिबा ग्लारी परमप्रभुसे मोशादा स्याप्जी ओच्छे थेदा साइबा सेम लजी। तर मोशाला म्रिङ् सिप्पोरासे छ्यार्बा युङ्बा गिक दुइसी ह्राङला झाला खतना लसी थे ढिसे मोशाला काङ्री थुर्सी पिन्जी। ओच्छे सिप्पोरासे “ह्राङ ङाला लागिरी काला ह्रेम्बो हिन्ना” भिसी पाङ्जी। थेतबासेलमा परमप्रभुसे मोशादा तिगै आलना ख्लाजी। खतना लबासेलमा सिप्पोरासे “ह्राङ काला ह्रेम्बो हिन्ना” भिसी पाङ्बा मुबा।
परमप्रभुसे हारूनदा “तोङ्तोङ्बा ग्लारी मोशादा ह्रुप तबारी निउ” भिसी सुङ्जी। जमाहेन्से हारून मोशादा ह्रुप तबाला लागिरी परमेश्वरला गङ्री निजी, ओच्छे मोशादा स्याप्सी च्योक लजी। ओच्छे परमप्रभुसे थेदा पाङ्गो भिसी पुइबा जम्मान तामगदेदेन उन्गो भिसी कुल्बा जम्मान उदेकला चिनुगदेला बारेरी मोशासे हारूनदा पाङ्जी।
जमाहेन्से मोशादेन हारून मिश्ररी निजी, ओच्छे इस्राएलीगदेला जम्मान गन्बागदेदा ग्ला गिकरी पोप लजी। ओच्छे परमप्रभुसे मोशादा सुङ्बा जम्मान तामगदे हारूनसे थेनीगदेदा पाङ्जी। ओच्छे मोशासे म्हिगदेला ओन्छाङ्री थे चिनुगदे उन्जी। थे म्राङ्सी म्हिगदेसे विश्वास लजी। परमप्रभु ह्राङला म्हिगदे मुबा ग्लारी फेप्खजी, ओच्छे य्हाङला दुख स्य्हीबा मुला भिबा ताम थेनीगदेसे थेःजी। जमाहेन्से थेनीगदेसे परमप्रभुदा फ्या लबान जयजयकार लजी।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.