Eastern Tamang Language Bible
थोन्बा 38
मेरी ख्राङ्सी पिन्बा बलि
थोन्बा २७:१-८
थेसे मेरी ख्राङ्सी बलि पिन्बा ताङ् बबुल सिङला स्होजी। थे ताङ् क्रु ङ्हा ह्रेङ्बा, क्रु ङ्हा ब्लाक्बा, पट्टि ब्लिनोन च्योच्योबा मुबा, ओच्छे थे क्रु सोम नोबा मुबा। थे बलि फुल्बा ताङ्ला कुनी ब्लिरीन रूगदे स्होजी। थे रूगदेदेन बलि फुल्बा ताङ् सिङला टोगल गिकग्यामनोन स्होबा मुबा। ओच्छे थेसे बलि फुल्बा ताङ्दा काँससे मोरब लजी। थेसे बलि फुल्बा ताङ्ला जम्मान सामानगदे, साबेलगदे, मेफ्रा ताबा बाटागदे, स्या दुइबा काँटागदे, ओच्छे मे थान्बा ताङ्गदे स्होजी। चु जम्मान ताङ्गदे काँसग्याम स्होबा मुबा। थेसे काँसला जाली गिक स्होजी। ओच्छे थे जाली मेरी ख्राङ्सी बलि फुल्बा ताङ्ला ग्वारला धिहेन्से गुङधोना थान्जी। थे काँसला जालीला कुनी ब्लिरी नोल कार्बाला लागिरी थेसे गोर ब्लि नत्था स्होजी। नोलगदे बबुल सिङला स्होसी काँससे मोरब लजी। थे बलि फुल्बा ताङ् पुइबाला लागिरी थे नोलगदे बलि फुल्बा ताङ्ला कुनी कुनीला नत्थागदेरी कार्जी। थे बलि फुल्बा ताङ् फल्याकसे स्होबा मुबा, ओच्छे गुङ्री चा घाल मुबा।
क्युइ युबा काँसला ताङ्
थोन्बा ३०:१८
थेसे ह्रुप तबा पालला म्रापरी गे लबा म्रिङ्म्हेमेगदेला ऐनागदे किन्जी, ओच्छे काङ् या ख्रुबा काँसला बाटा स्होजी, ओच्छे थे बाटाला काङगदे स्होजी।
ख्राङ्गा
थोन्बा २७:९-१९
जमाहेन्से थेसे परमप्रभु धन्छ्याबा चोखो पालला ख्राङ्गा स्होजी। थे ख्राङ्गा लोपट्टि ग्यार्जा गिक क्रु ह्रेङ्बा मुबा, ओच्छे थे ख्राङ्गाला लागिरी मसिनो कसे राबा सूतीला पर्दागदे मुबा। थे पर्दागदे च्योबाला लागिरी बोगल गिक थामगदे स्होबा मुबा, ओच्छे थामला बैठकएनोन काँसला बोगल गिकनोन स्होबा मुबा। ओच्छे थामरी थान्बा अङ्कुसीदेन डन्डीगदे चा म्हुइला स्होबा मुबा। झ्याङ्पट्टिला लागिरीनोन ग्यार्जा गिक क्रु ह्रेङ्बा पर्दागदे स्होबा मुबा, थे पर्दा च्योबाला लागिरीनोन बोगल गिक थाम स्होबा मुबा। ओच्छे थे थामला बैठकएनोन काँसला बोगल गिकनोन स्होबा मुबा। तर थामरी थान्बा अङ्कुसीदेन डन्डीगदे चा म्हुइला मुबा। न्हुपपट्टिला लागिरी बोगल न्हीसे क्रु च्युइ ह्रेङ्बा पर्दागदे मुबा। थे पर्दागदे च्योबाला लागिरी गोर च्युइ थामगदे मुबा, ओच्छे थामला बैठकएनोन च्युइनोन मुबा। ओच्छे थामगदेला अङ्कुसीदेन डन्डीगदे म्हुइला मुबा। स्यारपट्टिला पर्दा चा बोगल न्हीसे क्रु च्युइ ब्लाक्बा मुबा। मूल म्रापपट्टिला लागिरी च्युक ङ्हा क्रु ह्रेङ्बा पर्दागदे मुबा। थेला थामगदे गोर सोम मुबा, ओच्छे थामला बैठकएनोन गोर सोम मुबा। मूल म्रापला अर्गुपट्टिला लागिरीनोन होत्तेन ह्रेङ्बा पर्दा मुबा। ख्राङ्गाला मूल म्रापलापट्टि न्हीलान लागिरी च्युक ङ्हा क्रु च्युक ङ्हा क्रु ह्रेङ्बा पर्दागदे मुबा। थेला लागिरी गोर सोम सोम थाम मुबा, ओच्छे थामला बैठकएनोन गोर सोम सोमनोन मुबा। ख्राङ्गाला क्युर्सीन थान्बा जम्मान पर्दागदे मसिनो लसी राबा सूतीला मुबा। थामला बैठकगदे चा काँसला मुबा। तर थामला अङ्कुसीदेन डन्डीगदे चा म्हुइला मुबा। थामला जोगदे म्हुइसे मोरब लबा मुबा। ख्राङ्गाला जम्मान थामगदेला डन्डीगदे म्हुइला मुबा। ख्राङ्गाला मूल म्रापला पर्दा चा हापिङ, वालावाला पिङ्गै, वाला कदेन मसिनो लसी रासी बुट्टा युसी स्होबा सूतीला क्वान मुबा। थे पर्दा बोगल गिक क्रु ह्रेङ्बादेन क्रु ङ्हा ब्लाक्बा मुबा, चु पर्दा ख्राङ्गाला पर्दादेन च्योच्योबा मुबा। थे पर्दाला लागिरी गोर ब्लि थाम मुबा, ओच्छे थामला बैठकएनोन काँसला गोर ब्लिनोन मुबा। थामला अङ्कुसीदेन डन्डी चा म्हुइला मुबा। ओच्छे थामला जोगदेएनोन म्हुइसे मोरब लबा मुबा। चोखो ग्लादेन थेला क्युर्सीन मुबा ख्राङ्गाला जम्मान खिलगदे काँसला मुबा।
चोखो ग्ला स्होबा सामानगदे
चोखो ग्ला अथवा, परमेश्वरला सन्दोस थान्बा ग्लारी चलब लबा सामानगदे मोशासे कुल्बा अन्छार पूजाहारी हारूनना झा ईतामारग्याम लेवीगदेसे झ्यामुबा। थेला बारेरी पाङ्बा ताम चुनोन हिन्ना। परमप्रभुसे मोशादा कुल्बा अन्छार यहूदा वंशला हूरला छाया ऊरीला झा बजलेलसे जम्मान स्हे स्होजी। थेदेन छ्याम दान वंशला अहीसामाकला झा ओहोलीआब मुबा, ओहोलीआब चा जम्मान गे लबारी सेबा, बुट्टा तेःबारी सेबा, हापिङ, वालावाला पिङ्गै, वाला कदेन ज्यबा सूतीला क्वानरी बुट्टा युबारी सेबा मुबा। परमप्रभु धन्छ्याबा चोखो पालला लागिरी यारी थीबान थीबान परमप्रभुदा फुल्बा जम्मान म्हार हजार गिक किलो मुबा। थे म्हारगदे चोखो ग्लारी क्योइबा अन्छार क्योइबा मुबा।
इस्राएलीगदे गादे मुला भिसी झ्याबा धुइरी ह्रुप लबा म्हुइ चा ३,४३० किलो मुबा। थे जम्मान चोखो ग्लारी क्योइबा अन्छार क्योइबा मुबा। जुन जुन म्हिदा झ्याबा मुबा, थेनीगदेसे फाबा म्हुइ चा ह्राङ ह्राङला भु व्हाराला तिरो फाबा ह्रङ्बान मुबा। बोगल गिक दिङ् अथवा थे भन्दा ल्हाना दिङ्ला म्हिगदे झ्यामा ह्रेम्फेबेगदे जे ६,०३,५५० मुबा। थेनीगदेग्याम किन्बा म्हुइ न्हङ्ग्याम ३,४०० किलो म्हुइला चा चोखो ग्लादेन पर्दागदेला लागिरी ग्यार्जा गिक बैठकगदे स्होजी। बैठक गिकला लागिरी बोगल गिकसे च्युक ब्लि किलो म्हुइ युजी। बोगल गिकसे किलो च्युइ लेङ्बा म्हुइग्याम बजलेलसे थामला अङ्कुसीगदेदेन डन्डीगदे स्होजी। ओच्छे थामला जोगदे मोरब लजी।
परमप्रभुदा फुल्बा काँस चा २,४२५ किलो मुबा। थे काँसग्याम थेसे ह्रुप तबा पालला मूल म्राप थान्बा बैठकगदे, ओच्छे काँसलान बलि फुल्बा ताङ्देन जाली ओच्छे बलि फुल्बा ताङ्ला जम्मान सामानगदे, होह्रङ् लसीन ख्राङ्गा क्युर्लान बैठकगदेदेन ख्राङ्गाला मूल म्रापला बैठकगदे, ओच्छे परमप्रभु धन्छ्याबा चोखो पालला जम्मान खिलगदेदेन ख्राङ्गा क्युर्लान खिलगदे स्होजी।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.