Eastern Tamang Language Bible
थोन्बा 19
सीनै गङ्
इस्राएलीगदे मिश्र य्हुल्साग्याम थोन्सी खबा ल सोम तबाकुनु सीनै भिबा गङ्ला तोङ्तोङ्बा ग्लारी दोखजी। रपीदीम भिबा ग्लाग्याम भ्रसी सीनै गङ्ला तोङ्तोङ्बा ग्लारी दोखमाहेन्से थेनोन गङ्ला ङाच्छापट्टि इस्राएलीगदेसे ह्राङ चिबा ग्ला स्होजी।
जमाहेन्से मोशा परमेश्वर मुबा ग्लारी निजी, ओच्छे परमप्रभुसे सीनै गङ्ग्याम थेदा चुह्रङ् भिसी सुङ्जी, “याकूबला वंशदेन इस्राएलीगदेदा एसे चुह्रङ् भिसी पाङ्गो, ‘ङाइ मिश्रीगदेदा तिग लजी, ओच्छे एनीगदेदा क्वाक्लिङ्ला भ्यापसे पुइबा ह्रङ् लसी एनीगदेदा खाह्रङ् लसी ङाइ ङा मुबा ग्लारी भजी, थे एनीगदेसे म्राङ्बा मुला। चुदे एनीगदेसे ङाला ताम पक्कान ङ्यन्जी, ओच्छे ङाइ लबा कबुल अन्छार भ्रजी भिसम, जम्मान य्हुल्ला म्हिगदे न्हङ्री एनीगदे चा ग्लुसीन ग्लुआखम्बा ङालान सम्पत्ति दोला। जम्बुलिङ जम्मान ङालान हिन्सैनोन एनीगदे ङाला पूजाहारीगदेला समूह गिकदेन चोखो य्हुल गिक दोला।’ इस्राएलीगदेदा एसे पाङ्तोःबा ताम चुनोन हिन्ना।”
ओच्छे मोशा मार खसी म्हिगदेला गन्बागदेदा ङ्योइबारी पुइजी, ओच्छे परमप्रभुसे पाङ्गो भिसी थेदा कुल्बा चु जम्मान ताम थेनीगदेला ङाच्छा पाङ्जी। जम्मान म्हिगदेसे तिक्खुरीन चुह्रङ् भिसी पाङ्जी, “परमप्रभुसे कुल्बा जम्मान ताम अन्छार ङनी भ्रला।” जमाहेन्से मोशासे म्हिगदेसे पाङ्बा ताम परमप्रभुदा थेःना लजी।
परमप्रभुसे मोशादा चुह्रङ् भिसी सुङ्जी, “च्यागो, ङाइ एदेन छ्याम ताम लमा म्हिगदेसे ङ्यन्गै, ओच्छे एदा सदन विश्वासएनोन लगै भिसी ङा बाक्लो खसुरी ए मुबा ग्लारी खला।” जमाहेन्से मोशासे म्हिगदेसे पाङ्बा ताम परमप्रभुदा थेःना लजी। ओच्छे परमप्रभुसे मोशादा चुह्रङ् भिसी सुङ्जी, “म्हिगदे मुबा ग्लारी निसी तिनीदेन न्हाङ्गर थेनीगदेदा चोखो स्होउ। थेनीगदेसे ह्राङ ह्राङला क्वान ख्रुगै। ओच्छे रेनीकुनुला लागिरी थेनीगदे तयार तगै, तिग्दा भिसम रेनीकुनु सीनै गङ्री जम्मान म्हिगदेला ओन्छाङ्रीन परमप्रभु फेप्खला। एसे चा चुह्रङ् भिसी म्हिगदेला लागिरी क्युर्सीन गारा लउ, ‘होशियार तसी चिउ, एनीगदे गङ्थोरी आनिउ, ओच्छे थेला साँधएनोन आथुर्गो। जुन म्हिसे गङ् थुर्ला थेदा पक्कान साइला। खालैसेन थेदा आथुर्गो, तर युङ्बा अथवा म्यादलीसे छेक्सी साइगो। जन्तु तसै म्हि तसै थे सोसी आचि।’ बिगुलला काइ ह्रेङ्ना लसी ह्राप्मा थेनीगदे गङ्धोना खगै।”
मोशा गङ्ग्याम मार फाप्सी म्हिगदे मुबा ग्लारी खमाहेन्से मोशासे म्हिगदेदा चोखो स्होजी, ओच्छे थेनीगदेसे ह्राङ ह्राङला क्वान ख्रुजी। जमाहेन्से मोशासे म्हिगदेदा चुह्रङ् भिसी पाङ्जी, “रेनीकुनुला लागिरी तयार तसी चिउ। ओच्छे ह्राङ ह्राङला खुइदेन छ्यामएनोन आम्हेर्गो।”
सोमरेला धिनकुनु स्य्होरीन गङ्री गडङ्गुडुङ् तजी, ओच्छे मु ठेङ्सी तिप्लीङ् खजी, ओच्छे गङ्थोरी बाक्लो खसु खजी, ओच्छे बिगुलला घ्रेन काइ थेःजी। चु म्राङ्सी पालरी चिबा जम्मान म्हिगदे लोङ्सी फितफित धर्जी। जमाहेन्से मोशासे म्हिगदेदा पालग्याम परमेश्वरदेन छ्याम ह्रुप तना लबारी भजी। थेनीगदे गङ्ला टारी राप्सी चिजी। परमप्रभु मेग्याम थेरी फेप्खबासेलमा सीनै गङ्री म्युगुन म्युगु तजी। मेला खाराङ्ग्याम थोन्बा ह्रङ् लसी गङ्ग्याम म्युगु थोन्जी। ओच्छे गङ् ल्हानान ल्हिकल्हिक तजी। ओच्छे बिगुल झन घ्रेन ङ्यजी। जमाहेन्से मोशासे ताम पाङ्बारी छ्याइजी, ओच्छे परमेश्वरसे थेदा मु गुडुङ्बाग्याम जोहाब पिन्जी। ओच्छे परमप्रभु मार फाप्सी सीनै गङ्ला जोरी फेप्खजी। परमप्रभुसे मोशादा गङ्ला जोरी ङ्योइजी, ओच्छे मोशा तोर निजी। जमाहेन्से परमप्रभुसे मोशादा चुह्रङ् भिसी सुङ्जी, “मार निसी म्हिगदेदा होशियार तना लउ, आहिन्सम थेनीगदे परमप्रभुदा च्याबारी साँध वाइसी तोर खला, ओच्छे थेनीगदे न्हङ्ला ल्हानान नाश तला। परमप्रभुला ङाम्री खबाला लागिरी पूजाहारीगदेसेनोन ह्राङदा चोखो स्होगै, आहिन्सम परमप्रभुसे थेनीगदेदा तुरून्तन नाश लला।”
मोशासे परमप्रभुदा चुह्रङ् भिसी पाङ्जी, “म्हिगदे सीनै गङ्थोरी खबारी आखम, तिग्दा भिसम ह्राङसे ङन्दा ‘गङ्ला क्युर्सीन गारा लउ, ओच्छे चोखो भिसी फेउ,’ भिसी कुल्बा मुबा।” ओच्छे परमप्रभुसे थेदा चुह्रङ् भिसी सुङ्जी, “निउ, ए ह्राङनोन मार निउ, ओच्छे हारूनदेन छ्यामनोन तोर खउ। तर पूजाहारीगदेदेन स्य्हान्दो म्हिगदे चा परमप्रभु मुबा ग्लारी साँध वाइसी आखगै, आहिन्सम परमप्रभुसे थेनीगदेदा तुरून्तन नाश लला।”
थेतबासेलमा मोशा मार फाप्सी म्हिगदे मुबा ग्लारी निजी, ओच्छे थेनीगदेदा चु ताम पाङ्सी पिन्जी।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.