Eastern Tamang Language Bible
थोन्बा 10
तिरीगदे पुइखबा
दोःसी परमप्रभुसे मोशादा चुह्रङ् भिसी सुङ्जी, “फारो ग्ले मुबा ग्लारी निउ, तिग्दा भिसम थेनीगदेला गुङ्री ङाला चु उदेकला चिनुगदे उन्गे भिसीन ङाइ थेदेन थेला सिपाहीगदेला सेम कोङ्ना लबा हिन्ना। तिग्दा भिसम ङाइ मिश्रीगदेदा मूर्ख स्होजी, ओच्छे थेनीगदेला गुङ्री खाह्रङ्बा खाह्रङ्बा चिनुगदे उन्जी थे ताम एसे ह्राङला झादेन छायागदेदा पाङ्गो, ओच्छे ङानोन परमप्रभु हिन्ना भिबा ताम एदा था तगै।” जमाहेन्से मोशादेन हारून फारो ग्ले मुबा ग्लारी निसी फारोदा चुह्रङ् भिसी पाङ्जी, “परमप्रभु हिब्रूगदेला परमेश्वरसे सुङ्बा मुला, ‘खाइमाधोना ए ङाला ङाच्छा सोझो तबारी आम्हाइबा? ङाला म्हिगदेदा निबारी पिन्गो, ओच्छे थेनीगदेसे ङाला जयजयकार लगै। एसे ङाला म्हिगदेदा पुइबारी आङ्यन्नी भिसम, न्हाङ्गर ङाइ एला य्हुल्सारी तिरीगदे पुइखला। थेनीगदेसे स पूरन घप्बासेलमा सनोन आम्राङ्। सेर्बाग्याम जोगब तबा जम्मान स्हे थेनीगदेसे चला। एनीगदेला ह्रिरी फुइबा जम्मान दोङला भागदे थेनीगदेसे चला। एला दिमदेन एला जम्मान सिपाहीगदेला दिम ओच्छे जम्मान मिश्रीगदेला दिम तिरीसे प्लिङ्ला। होत्ते ल्हाना तिरी मि एला आखेम्हेमे चु य्हुल्सारी खमाहेन्से दन्देधोना खाइमै म्राङ्बा आरे।’” जमाहेन्से मोशा फारो मुबा ग्लाग्याम थोन्सी निजी।
फारो ग्लेला सिपाहीगदेसे फारोदा चुह्रङ् भिसी पाङ्जी, “चु म्हिसे य्हाङदा खाइमाधोना दुख पिन्सीन चिबा? थे म्हिगदेदा थेनीगदेला परमप्रभुला जयजयकार लबाला लागिरी निपुङ्गो। तिग मिश्र य्हुल्सा नाश तसी जिन्जी भिबा ताम ह्राङदा था आरे?”
ओच्छे मोशादेन हारूनदा फारो मुबा ग्लारी भजी। फारो ग्लेसे थेनीगदेदा चुह्रङ् भिसी पाङ्जी, “निउ, परमप्रभु एनीगदेला परमेश्वरला जयजयकार लउ। तर निबागदे चा खाला खाला हिन्ना?”
मोशासे चुह्रङ् भिसी पाङ्जी, “ङनी, ङन्ना कोलागदे, खेप्पा खुइ, झा झामेगदे, राग्युदेन म्हेमुइगदे भोर्सी निला, तिग्दा भिसम ङन्से परमप्रभुला लागिरी चाड धङ्तोःबा मुला।”
फारो ग्लेसे चुह्रङ् भिसी पाङ्जी, “एनीगदेला परमप्रभु एनीगदेदेन छ्यामनोन तगै। तिग ङाइ एनीगदेला म्रिङ्म्हेमेदेन कोलागदेदाएनोन निपुङ्से? एनीगदेला सेमरी तिगै आज्यबा ताम मुला। अँहँ थेह्रङ् आत। एनी ह्रेम्फेबेगदे जे निसी परमप्रभुला जयजयकार लउ, तिग्दा भिसम एनीगदेसे थेह्रङ्नोन पाङ्मुला।” ओच्छे मोशादेन हारूनदा फारो ग्ले मुबा ग्लाग्याम ताप्जी।
जमाहेन्से परमप्रभुसे मोशादा चुह्रङ् भिसी सुङ्जी, “मिश्र य्हुल्सारी तिरीगदे खगै भिसी ह्राङला या थीगो, ओच्छे तिरीगदे मिश्र य्हुल्सारी खसी सेर्बाग्याम जोगब तबा व्हाराला जम्मान ढापढुप चगै।” ओच्छे मोशासे ह्राङला कडी मिश्र य्हुल्साथोरी पेरो लजी। ओच्छे परमप्रभुसे थेकुनु य्हुल्सा नाङ्नोन धिन म्हुननोन स्यारग्याम लाबा पुइखजी। स्य्हो तमा स्यारग्याम खबा लाबासे तिरीगदेएनोन भबा मुबा। ओच्छे तिरीगदे मिश्र य्हुल्सारी खजी, य्हुल्सा नाङ्नोन तिरीगदेला हुलनोन हुल चिजी, होत्तेला तिरीगदे न्हा ङाच्छा खबा मुबा, न्हा दोःसी खला। थे तिरीगदेसे स पूरन घप्जी। ओच्छे सनोन म्लाङ्म्लाङ् म्राङ्जी। ओच्छे थेनीगदेसे सेर्बाग्याम जोगब तबा य्हुल्साला जम्मान ढापढुपदेन दोङला जम्मान रोगदे चजी। य्हुल्सारी पाङ्पिङ् भिबा तिगैनोन बाँकी आचिनी।
जमाहेन्से फारो ग्लेसे मोशादेन हारूनदा तुरून्तन ङ्योइबारी पुइजी, ओच्छे चुह्रङ् भिसी पाङ्जी, “ङाइ परमप्रभु एनीगदेला परमेश्वरदेन एनीगदेला बिरोध लसी पाप लजी। थेतबासेलमा ङाला चु बिन्ती मुला, दोःसी ङाला पाप माफ लसी पिन्गो, ओच्छे परमप्रभु ह्राङला परमेश्वरदेन छ्याम बिन्ती लउ। ओच्छे ङाथोरी खबा चु आपत विपतग्याम परमेश्वरसे ङादा फेगै।” जमाहेन्से मोशा फारो ग्ले मुबा ग्लाग्याम थोन्सी निजी, ओच्छे परमप्रभुदा बिन्ती लजी। ओच्छे परमप्रभुसे न्हुपपट्टिग्याम घ्रेन लाबा पुइखजी, थे लाबासे तिरीगदेदा वाला समुद्रपट्टि भोर्जी, ओच्छे मिश्र य्हुल्सारी तिरी गिकनोन बाँकी आचिनी। तर परमप्रभुसे फारो ग्लेला सेम कोङ्ना लजी, ओच्छे फारो ग्लेसे इस्राएलीगदेदा निबारी आपिन्नी।
धोपधोप तना लबा
दोःसी परमप्रभुसे मोशादा चुह्रङ् भिसी सुङ्जी, “एला या मुपट्टि थीगो, मिश्र य्हुल्सारी धोपधोप तगै। साम्मा जे था याङ्बा खाल्ला धोपधोप तगै।” ओच्छे मोशासे ह्राङला या मुपट्टि थीजी। जमाहेन्से सोमरेधोना धिन म्हुननोन धोपधोप तजी। सोमरेधोना खालैसे खालैदा म्राङ्बारी आखम्नी, ओच्छे ह्राङ चिबा ग्लाग्याम खालैनोन रेःबारी आखम्नी। तर इस्राएलीगदे चिबा जम्मान ग्लारी चा य्हाल तजी।
जमाहेन्से फारो ग्लेसे मोशादा ङ्योइबारी पुइजी, ओच्छे चुह्रङ् भिसी पाङ्जी, “निउ, एनीगदेला परमप्रभुदा जयजयकार लउ। एनीगदेला राग्युदेन म्हेमुइ चा चुरीन ख्लाथान्गो। ओच्छे एनीगदेला म्रिङ्म्हेमेदेन कोलागदेएनोन छ्यामनोन भोर्गो।” तर मोशासे चुह्रङ् भिसी पाङ्जी, “परमप्रभु ङन्ना परमेश्वरला लागिरी बलि फुल्बारी ह्राङसे ङन्दा बलि फुल्बा स्हेदेन मेरी ख्राङ्सी फुल्बा बलि भोर्बारी पिन्तोःला। ङन्ना म्हेमुइगदेएनोन ङन्देन छ्यामनोन भोर्तोःला ओच्छे चुरी खुर गिकएनोन ख्लाबारी आत। ङन्ना परमप्रभु परमेश्वरला लागिरी थेनीगदे न्हङ्ला कोइ कोइदा बलि लतोःला। ङन्ना परमप्रभुदा तिग तिग बलि फुल्तोःला भिबा ताम थेरी दोमाहेन्से जे ङन्से था याङ्ला।”
तर परमप्रभुसे फारो ग्लेला सेम कोङ्ना लसी पिन्जी, ओच्छे फारो ग्लेदा थेनीगदेदा निबारी पिन्बा सेम आरेमुबा। जमाहेन्से फारो ग्लेसे मोशादा चुह्रङ् भिसी पाङ्जी, “ङाला ङाच्छाग्याम निउ, होशियार तसी चिउ, दोःसी ङाला ङाच्छा आखउ। तिग्दा भिसम जुन धिनकुनु एसे ङाला ली च्याला थे धिनकुनु ए सिला।”
मोशासे फारो ग्लेदा चुह्रङ् भिसी पाङ्जी, “ह्राङसे सुङ्बा ह्रङ्नोन तगै, ङाइ दोःसी खाइमै ह्राङला ली आच्या।”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.