Eastern Tamang Language Bible
एस्त 3
हामानसे यहूदीगदेदा साइबारी जाल लबा
उदि दिङ् लिच्छा अहासूरस ग्लेसे अगागी हम्मदाताला झा हामानना पद बढब लसी थेदेन छ्यामनोन गे लबा जम्मान ह्रोदा भन्दा थेदा घ्रेन स्होसी घ्रेन पदरी थान्जी। थेतबासेलमा ग्लेखाङ्ला म्रापरी चिबा पालेगदे जम्मासेन ग्लेसे कुल्बा अन्छार हामानदा फ्या लमुबा। तर मोर्दकैसे चा हामानदा फ्या आलमुबा।
तिरेम मोर्दकैदा ग्लेखाङ्ला म्रापरी पाले चिबागदेसे “ह्राङसे ग्लेसे कुल्बा ताम तिग्दा आङ्यन्बा?” भिसी ङ्योइजी। थेनीगदेसे मोर्दकैदा धिनना धिननोन चु ताम जे ङ्योइमुबा। तर थेसे थेनीगदेला तामदा वास्तान आलमुबा। मोर्दकैसे थेनीगदेदा “ङा यहूदी हिन्ना” भिसी पाङ्बासेलमा थेनीगदेसे मोर्दकैला चु ताम हामानसे नाखम्बा चिम कि आखम्बा चिम भिसी हामानदा पाङ्जी।
मोर्दकैसे ह्राङदा फ्या लसी मान आलबा म्राङ्सी हामान बोमोसे मे दोजी। हामानसे मोर्दकै खजिबा य्हुल्ला चिम भिसी था याङ्माहेन्से थेसे मोर्दकैदा जे या झाङ्बा सेम आलनी। ओच्छे अहासूरस ग्लेसे शासन लबा य्हुल्सा नाङ्लान जम्मान यहूदीगदेदेन मोर्दकै ओच्छे थेला जम्मान य्हुल्दा नाश लबा ग्याम म्हाइजी।
अहासूरस ग्लेसे शासन लबा च्युक न्ही दिङ्री वाङ्मा थेनोन दिङ्ला शुरूला ल अथवा नीसान भिबा लरी हामाननान ओन्छाङ्री धिनदेन ल तोगब लबाला लागिरी थेनीगदेसे चिट्ठा युजी। थेनीगदेसे थे चिट्ठादा “पूर” भिमुबा। थेनीगदेसे युबा चिट्ठा च्युक न्ही ल अथवा अदार भिबा लरी थोन्जी।
जमाहेन्से हामानसे अहासूरस ग्लेदा चुह्रङ् भिसी पाङ्जी, “ह्राङला य्हुल्साला जम्मान अञ्चलरी ल्हानान म्हिगदेला गुङ्री ल्हेबान निबा य्हुल गिक मुला। थे म्हिगदे छुट्टोन चिमुला। ओच्छे थेनीगदेला रिमठिमएनोन अर्गु जम्मान य्हुल्ला भन्दा बेग्लै मुला। थेनीगदे ह्राङसे स्होबा ठिम अन्छारएनोन आभ्रमुला। थेतबासेलमा ह्राङसे थेह्रङ्बा म्हिगदेदा दया लबा चा ठीक आहिन। चुदे ह्राङदा थेनीगदेदा नाश लबा सेम मुसम थेनीगदेदा नाश लबाला लागिरी ह्राङसे कुल्बा ताम भ्रिसीन तेःगो। चु गे लबा म्हिगदेला लागिरी ङाइ ग्लेला ढुकुटीरी लाख सोम किलो म्हुइ थान्ना।”
जमाहेन्से ग्लेसे ह्राङला छाप मुबा च्याप स्युसी यहूदीगदेला शत्रु अगागी हम्मदाताला झा हामानदा पिन्जी। ग्लेसे थेदा चुह्रङ् भिसी सुङ्जी, “थे म्हुइ एदेन छ्यामनोन थान्गो। ओच्छे थे म्हिगदेदा तिग लइ म्हन्बा एसे थेनोन लउ।”
जमाहेन्से शुरूला लला च्युक सोम धिनकुनु ग्लेला सचिवगदेदा ङ्योइजी। ओच्छे हामानसे कुल्बा अन्छार अहासूरस ग्लेसे शासन लबा अञ्चलला मूल म्हिगदेदेन अर्गु अर्गु अञ्चलरी शासन लबा म्हिगदेदा ओच्छे ग्लेखाङ्री गे लबा य्हुल य्हुल्ला म्हिगदेदा ग्लेसे कुल्बा ताम भ्रिसी पुइजी। थे ताम जम्मान अञ्चलरी थेनीगदेलान हिगीदेन जम्मान य्हुल्दा थेनीगदेलान ग्योइरी भ्रिसी पुइजी। थे ताम अहासूरस ग्लेला मिनरी तेःसी ग्लेलान छाप ठोक्बा मुबा। चुह्रङ् लसी अदार भिबा लला च्युक सोम धिनकुनु खेप्बा खुइ, भ्योन, म्रिङ्म्हेमेदेन कोलागदे जम्मान यहूदीगदेदा साइसी थेनीगदेला मिननोन म्हाना लबा ओच्छे थेनीगदेला धन सम्पत्ति ब्यन्गो भिसी कुल्बा समाचार ग्लेला दूतगदेदा पिन्सी य्हुल्साला अञ्चल अञ्चलरी पुइजी। थे धिनकुनुला लागिरी जम्मादान तयार तउ भिसी भ्रिसी कुल्बा थे समाचारला नकल तेःसी अञ्चल अञ्चलला जम्मान म्हिगदेदा थेःना लतोःबा मुबा।
ग्लेसे कुल्माहेन्से ग्लेला थे दूतगदेदा योना भन्दा योना पुइजी। चु समाचार शूशन सहररीनोन थेःजी। जमाहेन्से ग्लेदेन हामान चा अङ्गुरला निङ्गु थुङ्बारी छ्याइजी। तर शूशन सहररी चा हल्ली खल्ली तजी।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.