Eastern Tamang Language Bible
मूल 9
शाऊलसे येशूदा विश्वास लबा
मूल २२:६-१६; २६:१२-१८
थेनोन धुइरी शाऊलसे अझ धाक उन्बान प्रभुला चेलागदेदा साइबारी जम्मान भन्दा घ्रेन पूजाहारी मुबा ग्लारी निसी, प्रभुदा विश्वास लबा ह्रेम्फेबेदेन म्रिङ्म्हेमे न्हङ्ला जुन म्हि स्याप्सै खीसी यरूशलेमरी भम्याङ्गै भिसी दमस्कस सहरला यहूदीगदे ह्रुप तबा दिमला नेतागदेला लागिरी चिठी भ्रिसी पिन्गो भिसी चिठी ह्रीजी। जमाहेन्से शाऊल निबानलमा थे दमस्कस सहरला ङाम्री दोजी। थेरी दोमा स्वर्गग्याम तिक्खुरीन थेला क्युर्नोन य्हाल तजी। थे सरी ह्रिल्जी, ओच्छे थेसे चुह्रङ् भिबा काइ थेःजी, “शाऊल, शाऊल, एसे ङादा तिग्दा ल्हानान दुख पिन्बा?”
ओच्छे थेसे “प्रभु, ह्राङ खाला हिन्ना?” भिसी पाङ्मा चुह्रङ् भिबा काइ थेःजी, “ङा एसे ल्हानान दुख पिन्बा येशू हिन्ना। दाहेन्से ए रेःसी सहररी निउ, ओच्छे एसे तिग लतोःबा थे ताम ङाइ एदा उन्ना।”
थेदेन छ्याम निबा म्हिगदेसे थे काइ चा थेःजी, तर क्यारमार च्यामा खालैदा आम्राङ्बासेलमा थेनीगदे थोम तसी चिजी। जमाहेन्से शाऊल रेःसी मी ठोङ्सी च्यामा थेसे तिगै आम्राङ्नी, ओच्छे थेदेन छ्याम मुबागदेसे थेला यारी चुङ्सी दमस्कस सहररी भोर्जी। थेसे सोमरेधोना तिगै आम्राङ्नी, ओच्छे चबा थुङ्बाएनोन आलनी।
दमस्कस सहररी हननिया भिबा प्रभुला चेला गिक मुबा। थेदा म्हङ्री प्रभुसे “हननिया” भिसी ङ्योइमा, थेसे “लास्सो प्रभु” भिसी पाङ्जी।
जमाहेन्से प्रभुसे थेदा चुह्रङ् भिसी सुङ्जी, “ए ‘सोझो’ भिबा ग्यामपट्टि निउ, थेरी यहूदाला दिमरी शाऊल भिबा टार्सस सहररी चिबा म्हिदा म्हाइगो, च्यागो, थेसे दन्दे प्रार्थना लबान मुला। थेसे म्हङ्री हननिया भिबा म्हि गिक खसी म्राङ्खम्गै भिसी ह्राङथोरी या थान्बा म्राङ्बा मुला।”
तर हननियासे चुह्रङ् भिसी पाङ्जी, “प्रभु, चु म्हिसे मि यरूशलेमरी मुबा ह्राङला म्हिगदेदा गादे नाइबा गे लसी दुख पिन्जी भिबा ताम ङाइ ल्हानान म्हिगदेग्याम थेःबा मुला। चुरीनोन ह्राङला मिन किन्बागदेदा खीबारी मूल पूजाहारीगदेग्याम अधिकार याङ्बा मुला।”
तर प्रभुसे थेदा चुह्रङ् भिसी सुङ्जी, “ए निउ, तिग्दा भिसम ङाइ थेदा अर्गु य्हुल्ला म्हिगदे, ग्लेगदेदेन इस्राएलीगदेदा ङाला मिन थेःना लबाला लागिरी धम्बा मुला। दाहेन्से थेसे ङाला लागिरी गादे दुख नातोःला भिबा ताम ङाइ थेदा उन्ना।”
जमाहेन्से हननिया निसी थे दिमरी वाङ्जी। ओच्छे शाऊलथोरी ह्राङला या थान्सी चुह्रङ् भिसी पाङ्जी, “शाऊल आले, ए ग्यामरी खबान लबा धुइरी ए मुबा ग्लारी फेप्खबा प्रभु येशूसेन ङादा पुइखबा हिन्ना। एसे म्राङ्बारी खम्गै ओच्छे पवित्र आत्मासे प्लिङ्गै भिसी ए मुबा ग्लारी ङादा पुइखबा हिन्ना।” हननियासे थेह्रङ् भिसी पाङ्मैछ्याम थेला मीग्याम जजाबा पाप्रा ह्रङ्बा ताइजी ओच्छे थेला मीसे म्राङ्खम्जी। जमाहेन्से रेःसी थेसे बप्तिस्मा किन्जी। ओच्छे थेसे चबा स्हे चसी भङ् याङ्जी।
शाऊलसे दमस्कसदेन यरूशलेमरी परमेश्वरला य्हुल्साला समाचार थेःना लबा
शाऊल तिगै रेधोना येशूदा विश्वास लबागदेदेन छ्याम दमस्कसरी चिजी। ओच्छे तुरुन्तन शाऊल यहूदीगदे ह्रुप तबा दिमरी निसी, “येशू परमेश्वरला झा हिन्ना” भिसी पाङ्बारी छ्याइजी। चुह्रङ् पाङ्बा थेःबा म्हिगदे जम्मान उदेक म्हन्सी चुह्रङ् भिसी पाङ्जी, “येशूला मिन किन्बा यरूशलेमरी मुबा म्हिगदेदा नाश लबादेन चुरीनोन येशूला मिन किन्बा म्हिगदेदा खीसी मूल पूजाहारीगदे मुबा ग्लारी भोर्बा सेमसे खबा चुनोन म्हि आहिन?” तर शाऊलसे थेःना लबा ताम झन झन शक्तिशाली तबान निजी ओच्छे येशून पक्का थार्बा पिन्बा ख्रीष्ट हिन्ना भिसी दमस्कसरी मुबा यहूदीगदेदा अलमल तना लजी।
ल्हानान रे तमाहेन्से शाऊलदा साइबारी यहूदीगदे ढिक्सी सल्लाह लजी। तर थेनीगदेसे ह्राङदा साइबारी म्हाइबा ताम शाऊलसे था याङ्जी। शाऊलदा साइबारी थेनीगदेसे दमस्कस सहरला म्राप म्रापरी धिन म्हुननोन ख्रुङ्सी चिमुबा। तर शाऊलदा स्य्हान्दो विश्वासीगदेसे म्हुनङ्नोन छाङ्री युसी थे सहरला पर्खालग्याम मार पुइजी।1
शाऊल यरूशलेम सहररी
शाऊल यरूशलेमरी खमाहेन्से थेरी मुबा येशूला चेलागदेदेन छ्याम ढिक्बारी म्हाइजी। तर थेनीगदेसे थे येशूला चेला हिन्ना भिसी विश्वास आतबासेलमा शाऊल म्राङ्सी जम्मान लोङ्जी। तर बारनाबाससे मूल चेलागदे मुबा ग्लारी शाऊलदा ह्राङदेन छ्यामनोन भोर्जी। ओच्छे शाऊलसे प्रभुदा ग्यामरी म्राङ्बादेन प्रभुसे सुङ्बा तामला बारेरी पाङ्जी। थेह्रङ् लसीन दमस्कसरी आलोङ्नान येशूला बारेरी थेःना लजी भिबा ताम बारनाबाससे थेनीगदेदा पाङ्सी पिन्जी। जमाहेन्से शाऊल यरूशलेमला जम्मान ग्लारी थेनीगदेदेन छ्याम छ्याम भ्रजी, ओच्छे शाऊल आलोङ्नान प्रभुला बारेरी थेःना लबान भ्रजी। ओच्छे शाऊलदेन ग्रीक ग्योइ पाङ्बा यहूदीगदेसे ह्राङ ह्राङ न्हङ्री आढिक्बा ताम लमुबा, तर थे ग्रीक ग्योइ पाङ्बा यहूदीगदेसे चा शाऊलदा साइबारी म्हाइबान मुबा। चु ताम था याङ्सी प्रभुदा विश्वास लबागदेसे शाऊलदा कैसरिया सहररी भोर्जी, ओच्छे थेग्याम टार्सस सहरपट्टि पुइजी।
जमाहेन्से यहूदियादेन गालील ओच्छे सामरिया भिबा ग्लारी मुबा जम्मान मण्डलीदा शान्ति तजी। ओच्छे प्रभुला चेलागदेसे पवित्र आत्माग्याम आँट याङ्जी ओच्छे मण्डलीएनोन बढब तजी। चेलागदे परमेश्वरसे कुल्बा अन्छार भ्रमुबा ओच्छे प्रभुदा विश्वास लबा म्हिगदेएनोन ल्हानान तबान निजी।
एनियास खम्बा
पत्रुस क्यारमारला नाम्सागदेरी कोर्बान निबा धुइरी लुड्डा भिबा ग्लारी मुबा परमेश्वरला म्हिगदे मुबा ग्लारी दोखजी। पत्रुससे थेरी एनियास भिबा कुज्या म्हि गिक म्हेर्सी चिबा स्याप्जी, थे म्हि कुज्या तबा भ्रे दिङ् तबा मुबा। जमाहेन्से पत्रुससे थे कुज्या म्हिदा चुह्रङ् भिसी पाङ्जी, “एनियास, एदा येशू ख्रीष्टसे खम्ना लला। थेतबासेलमा ए रेःसी ह्राङला तीबा नान्बा दुइगो।” जमाहेन्से तुरून्तन थे कुज्या म्हि ढोङ रेःजी। थे कुज्या म्हि खम्बा म्राङ्सी लुड्डादेन शारोन भिबा ग्लारी चिबा जम्मान म्हिगदेसे प्रभुदा विश्वास लजी।
पत्रुससे प्रार्थना लमाहेन्से डोरकास दोःसी सोबा
योप्पा सहररी तबीता भिबा चेला गिक मुबा, थेदा ग्रीक ग्योइरी डोरकास भिमुबा।2 थेसे सदन प्राङ्बोगदेदा ह्रो लबादेन ज्यबा गे लमुबा। पत्रुस लुड्डा भिबा ग्लारी मुबा धुइरी थे तबीता आखम्ना सिजी, ओच्छे म्हिगदेसे थेला लाश ख्रुसी तलाथोला कोठा गिकरी भोर्सी थान्जी। लुड्डा भिबा ग्ला योप्पा सहरला ङाम्रीन तबासेलमा चेलागदेसे पत्रुस थेरी मुला भिबा ताम थेःसी, “ङनी मुबा ग्लारी योना फेप्खउ भिउ” भिसी म्हि न्हीदा थे मुबा ग्लारी पुइजी।
जमाहेन्से पत्रुस थेनीगदेदेन छ्याम निजी। थेरी दोखमाहेन्से थेनीगदेसे पत्रुसदा तलाथोला कोठारी भोर्जी। जमाहेन्से थेरी मुबा ह्रेम्बो सिबा म्रिङ्म्हेमेगदे पत्रुसला ङाम्री राप्सी क्राबान मुबा, ओच्छे डोरकास भिबा तबीतासे थेनीगदेदेन छ्याम मुबा धुइरी राबा क्वान उन्जी।
जमाहेन्से पत्रुससे थेनीगदे जम्मादान मङ्ग्यार पुइसी पुइ जूसी प्रार्थना लजी, ओच्छे थे लाशपट्टि च्यासी, “तबीता रेःगो” भिसी पाङ्मा, तबीतासे मी ठोङ्जी ओच्छे थेसे पत्रुसदा म्राङ्सी रेःसी चिजी। पत्रुससे तबीताला यारी चुङ्सी थीजी ओच्छे परमेश्वरला म्हिगदेदेन ह्रेम्बो सिबा म्रिङ्म्हेमेगदेदा ङ्योइसी तबीता सोजी भिसी उन्जी।
जमाहेन्से चु ताम योप्पा सहर नाङ्नोन थेःजी, ओच्छे ल्हानान म्हिगदेसे प्रभुदा विश्वास लजी। ओच्छे पत्रुस ल्हानान धिनधोना ढिला गे लबा सिमोन भिबा म्हिदेन छ्याम योप्पा सहररीन चिजी।
Source notes (2)
- Cross-reference २ कोरि ११:३२-३३
- Footnote हिब्रू ग्योइरी “तबीता” ओच्छे ग्रीक ग्योइरी “डोरकास” भ्रिबा मुला। चुला अर्थ चा “तङ्गी” हिन्ना।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.