Eastern Tamang Language Bible
मूल 23
पावलसे घ्रेन सभारी मुबागदे जम्मादान च्यासी चुह्रङ् भिसी पाङ्जी, “ज्योज्यो आलेगदे, तिनीला धिनधोना ङा परमेश्वरला ङाच्छा ज्यबा सेमसे भ्रबा मुला।” चु ताम थेःसी जम्मान भन्दा घ्रेन पूजाहारी हननियासे पावलला ङाम्री राप्सी चिबागदेदा थेला सुङ्री तोउ भिसी कुल्जी। जमाहेन्से पावलसे थेदा चुह्रङ् भिसी पाङ्जी, “ह्राङसे ह्राङदान ज्यबा म्हन्बा म्हि! च्यागो, एदाएनोन परमेश्वरसे सजाय पिन्ना। ए मोशासे पिन्बा ठिम अन्छार ङाला निसाफ लबारी चिसीनोन मोशाला ठिमदा ख्लासी एसे ङादा तोउ भिसी कुल्बा?”
पावलला ङाम्री राप्सी चिबागदेसे पावलदा चुह्रङ् भिसी पाङ्जी, “तिग एसे परमेश्वला जम्मान भन्दा घ्रेन पूजाहारीला बेइज्जत लबा?”
पावलसे थेनीगदेदा चुह्रङ् भिसी पाङ्जी, “ङाला ज्योज्यो आलेगदे, थे जम्मान भन्दा घ्रेन पूजाहारी हिन्ना भिबा ङादा था आरे मुबा। तिग्दा भिसम परमेश्वरला बचनरी चुह्रङ् भिसी भ्रिबा मुला, ‘एसे ह्राङला य्हुल्ला नेताला बारेरी नाइबा ताम आपाङ्गो।’”1
तर घ्रेन सभारी सदुकीगदेला समूहदेन फरिसीगदेला समूह चिम भिबा था याङ्सी पावलसे चुह्रङ् भिसी पाङ्जी, “ज्योज्यो आलेगदे, ङा फरिसीला कोला फरिसीन हिन्ना। ङाइ सिबागदे दोःसी सोला भिसी आश लबासेलमा ङादा चु मुद्दा तबा हिन्ना।”
पावलसे थेह्रङ् पाङ्माहेन्से फरिसीगदेदेन सदुकीगदेला ताम आढिक्ना थेनीगदे फेजी। तिग्दा भिसम सदुकीगदेसे म्हि सिबाग्याम दोःसी आसो भिबादेन स्वर्गदूत ओच्छे आत्मा भिबा तिगै आरे भिसी पाङ्मुबा। तर फरिसीगदेसे चा चु जम्मान मुला भिसी विश्वास लमुबा।
जमाहेन्से थेरी ल्हानान हल्ली खल्ली तजी। थेतबासेलमा फरिसी समूहला कोइ कोइ धर्मगुरुगदे राप्सी सदुकीगदेला बिरोध लबान चुह्रङ् भिसी पाङ्जी, “ङन्से चु म्हिला तिगै दोष आस्याप्नी। तर आत्मा अथवा स्वर्गदूतसेन चु म्हिदा चुह्रङ् पाङ्बा हिन्सम तिग तजी?” थेरी थेनीगदेला ताम आढिक्ना छेबा बङ्बा तबासेलमा पावलदा थेनीगदेसे तोबा ग्याङ्बा लसी साइला भिसी सिपाहीगदेला हाकिम लोङ्सी पावलदा थेग्याम भसी ब्यारेक न्हङ्री भोर्गो भिसी सिपाहीगदेदा कुल्जी।
जमाकुनु म्हुनङ् प्रभु पावलला ङाम्री राप्सी चुह्रङ् भिसी सुङ्जी, “पावल, एसे आँट लउ, तिग्दा भिसम यरूशलेम सहररी एसे ङाला बारेरी पाङ्बा ह्रङ् लसी रोमरीनोन ङाला बारेरी पाङ्तोःला।”
पावलदा साइबारी जाल लबा
जमाहेन्से न्हङ्गरदाङ स्य्होरी यहूदीगदे ह्रुप तसी पावलदा जाल लसी साइबारी सल्लाह लजी। ओच्छे पावलदा आसाइदेधोना तिगै चबा थुङ्बा आल भिसी घ्रान चजी। चुह्रङ् लसी जाल लबा म्हिगदे बोगल न्ही भन्दा ल्हानान मुबा। थेनीगदे मूल पूजाहारीगदेदेन यहूदी गन्बागदे मुबा ग्लारी निसी चुह्रङ् भिसी पाङ्जी, “ङन्से पावलदा आसाइदेधोना तिगै आच भिसी घ्रान चबा मुला। थेतबासेलमा ह्राङनीदेन घ्रेन सभा ढिक्सी सिपाहीगदेला हाकिमदा चुह्रङ् भिसी पाङ्गो, ‘चुला मुद्दाला बारेरी अझ ज्यना लसी छिनब लतोःला’ भिबा स्होसी थेदा तेःसी भउ। ओच्छे थे चुरी खना खनान ङन्से थेदा ग्यामरीन साइला।”
तर पावलला कोनसे चुह्रङ्बा जाल लबा था याङ्सी ब्यारेक न्हङ्री निसी पावलदा पाङ्सी पिन्जी। जमाहेन्से पावलसे कप्तानगदे न्हङ्ला गिकदा ङ्योइसी चुह्रङ् भिसी पाङ्जी, “चु भ्योन म्हिदा सिपाहीगदेला हाकिम मुबा ग्लारी ससी पिन्गो। तिग्दा भिसम चुसे थेदा पाङ्तोःबा ताम मुला।” थेतबासेलमा कप्तानसे थेदा सिपाहीगदेला हाकिम मुबा ग्लारी भोर्सी चुह्रङ् भिसी पाङ्जी, “झ्याल्खानरी मुबा पावलसे ङादा ङ्योइसी ‘चु भ्योन म्हिदा ह्राङ मुबा ग्लारी भोर्गो’ भिसी पाङ्जी। तिग्दा भिसम चुसे ह्राङदेन छ्याम तिगै ताम पाङ्बा सेम मुला रो।”
जमाहेन्से सिपाहीगदेला हाकिमसे थे भ्योन म्हिदा यारी चुङ्सी कुनी गिकरी भोर्सी चुह्रङ् भिसी ङ्योइजी, “एसे ङादा तिग ताम पाङ्बारी म्हाइबा?” ओच्छे थे भ्योन म्हिसे हाकिमदा चुह्रङ् भिसी पाङ्जी, “यहूदीगदेसे पावलला बारेरी अझ ज्यना लसी ङ्योइबा छार्बा लतोःला भिबा निहुँ लसी न्हङ्गर ‘थेदा घ्रेन सभारी भसी पिन्गो’ भिसी ह्राङदा बिन्ती लतोःला भिसी सल्लाह लबा मुला। तर ह्राङसे थेनीगदेला ताम आङ्यन्गो। तिग्दा भिसम बोगल न्ही भन्दा ल्हानान म्हिगदेसे थेदा आसाइदेधोना तिगै चबा थुङ्बा आल भिसी घ्रान चसी थेदा साइबारी ख्रुङ्सी चिबा मुला। दन्दे थेनीगदेसे ह्राङसे तिग सुङ्बा चिम थे ताम जे भ्रान्सी चिबा मुला।”
जमाहेन्से सिपाहीगदेला हाकिमसे थे भ्योन म्हिदा चुह्रङ् भिसी पुइजी, “एसे ङादा पाङ्बा चु ताम स्य्हान्दो खालैदा आपाङ्गो।”
पावलदा कैसरियारी पुइबा
जमाहेन्से सिपाहीगदेला हाकिमसे कप्तानगदे न्हङ्ला न्हीदा ङ्योइसी चुह्रङ् भिसी पाङ्जी, “तिनी म्हुनङ् नौ बजेरीक्यार ग्यार्जा न्ही सिपाहीगदेदेन बोगल सोमसे च्युइ ताथोरी क्रेःबा सिपाहीगदे ओच्छे ग्यार्जा न्ही भाला थोबा सिपाहीगदेदा कैसरिया भिबा ग्लाधोना निबारी ठीक लसी थान्गो। ओच्छे पावलला लागिरीनोन ता गिक ठीक लसी थेदा बिरोध लबा म्हिगदेग्याम जोगब लसी यहूदियारी शासन लबा फेलिक्स मुबा ग्लारी भोर्गो।” थेसे शासन लबा फेलिक्सदा चुह्रङ् भिसी चिठी भ्रिजी,
“माननीय शासन लबा फेलिक्सदा क्लौडियस लुसियसग्याम फ्याफुल्ला!
“चु म्हिदा यहूदीगदेसे चुङ्सी साइबारी छ्याइबा मुबा। तर चु रोमी म्हि चिम भिसी ङाइ था याङ्सी सिपाहीगदेदेन छ्याम निसी चुदा जोगब लबारी थेनीगदेला याग्याम फेसी भजी।2 तिग तामरी चुदा थेनीगदेसे दोष लजीम भिसी घोबाला लागिरी ङाइ चुदा थेनीगदेला घ्रेन सभारीनोन भोर्जी। थेनीगदेसे ह्राङलान ठिमला ङ्योइबा तामला बारेरी चुदा दोष लजीम। तर ङाइ चुदा साइतोःबा अथवा झ्याल्खानरी झाङ्तोःबा ह्रङ्बा तिगै दोष आस्याप्नी। चु म्हिदा जाल लसी साइबारी छ्याइबा ताम था याङ्सी ङाइ चु म्हिदा तुरुन्तन ह्राङ मुबा ग्लारी पुइखबा हिन्ना। ओच्छे चुदा बिरोध लबागदेदाएनोन ह्राङला ङाच्छापट्टि बयान पिन्गो भिसी ङाइ पाङ्बा मुला।”
जमाहेन्से सिपाहीगदेला हाकिमसे कुल्बा अन्छार पावलदा सिपाहीगदेसे म्हुनङ्नोन एन्टिपाट्रिस सहररी भोर्जी। न्हङ्गरदाङ ताथोरी क्रेःबा सिपाहीगदेदा पावलदेन छ्यामनोन निउ भिसी पाङ्जी। ओच्छे भाला थोबा सिपाहीगदे चा ब्यारेकरी दोःसी खजी। कैसरियारी दोमाहेन्से थेनीगदेसे कैसरियारी शासन लबा म्हिदा चिठी पिन्जी। ओच्छे पावलदाएनोन थेला ङाच्छापट्टि भजी। थेसे थे चिठी पढब लसी जिन्माहेन्से पावलदा “ए खजिबा अञ्चलला हिन्ना” भिसी ङ्योइमा, पावल किलिकिया अञ्चलला चिम भिबा था याङ्जी। थेसे “एदा दोष लबागदे खमाहेन्से ङाइ एला मुद्दा च्याला” भिसी पाङ्जी। ओच्छे पावलदा हेरोद3 ग्लेसे स्होबा ग्लेखाङ्री थान्गो भिसी कुल्जी।
Source notes (3)
- Cross-reference थोन्बा २२:२८
- Cross-reference मूल २२:२४-२९
- Footnote चु हेरोद चा घ्रेन हेरोद हिन्ना। चु हेरोद येशू न्हमाहेन्से सिजी। मत्ती २ अध्यायरी स्हीगो।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.