Eastern Tamang Language Bible
मूल 16
पावलदेन सिलास तिमोथीदेन छ्याम ह्रुप तबा
पावल डर्बीदेन लुस्त्रा सहररीएनोन दोजी। थेरी तिमोथी भिबा चेला गिक मुबा। थेला आमा यहूदी विश्वासी मुबा, तर आबा चा ग्रीक मुबा। लुस्त्रादेन आइकोनियन सहरला ज्योज्यो आले नाना आङागदेसे तिमोथीदा ज्यबा म्हि भिसी पाङ्मुबा। पावलसे तिमोथीदाएनोन छ्यामनोन भोर्बा सेम लजी। ओच्छे थेरी चिबा यहूदीगदेसे लमा पावलसे थेदा भोर्सी खतना लसी पिन्जी। तिग्दा भिसम थेला आबा ग्रीक हिन्ना भिसी थेनीगदेदा था मुबा। जमाहेन्से थेनीगदे सहर सहररी निबान यरूशलेमरी मुबा मूल चेलागदेदेन एल्डरगदेसे पक्का लबा ताम ङ्यन्गो भिसी पाङ्बान भ्रजी। थेतबासेलमा मण्डलीगदे विश्वासरी कोङ्बान धिन धिननोन प्रभुदा विश्वास लबा म्हिगदे बढब तबान निजी।
पावलदा परमेश्वरसे माकेडोनियाला म्हि उन्बा
पवित्र आत्मासे पावल, सिलासदेन तिमोथीदा एशियारी बचन थेःना लआपुङ्बासेलमा थेनीगदे फ्रिगियादेन गलातीयाला ग्लागदे तबान निजी। माइसिया भिबा ग्लाला साँधरी दोखमाहेन्से थेनीगदे बिथिनिया भिबा ग्लापट्टि निबारी म्हाइजी। तर येशूला आत्मासे थेनीगदेदा थेपट्टि निआपुङ्नी। थेतबासेलमा माइसिया तबान थेनीगदे त्रोआस भिबा ग्लारी निजी। थेकुनु म्हुनङ् पावलसे माकेडोनियाला म्हि गिक राप्सी थेदा “माकेडोनियारी फेप्खउ ओच्छे ङन्दा ह्रो लसी पिन्गो” भिसी बिन्ती लसी चिबा ताम परमेश्वरसे उन्जी। थेसे चु ताम म्राङ्माहेन्से ङनी1 माकेडोनियारी निबारी तयार तजी। तिग्दा भिसम थे ग्लाला म्हिगदेदा थार्बा पिन्बा समाचार थेःना लबारी परमेश्वरसे ङन्दा ङ्योइजीम भिबा ताम ङन्से था याङ्जी।
लिडियासे विश्वास लबा
जमाहेन्से ङनी त्रोआसग्याम पानी जहाजरी क्रेःसी सोझोन सामोथ्रेस भिबा ग्लारी दोखजी, ओच्छे न्हङ्गरदाङ नियापोलिस भिबा ग्लारी दोखजी। थेग्याम माकेडोनियाला घ्रेन सहर फिलिप्पीरी निजी। थे सहररी चा रोमीगदेसे शासन लमुबा। थेरीन ङनी तिगै रेधोना चिजी। ब्लप्बा न्हबा धिनकुनु ङनी सहरग्याम थोन्सी स्योङ्ला कुनीरी निजी। तिग्दा भिसम थेरी प्रार्थना लबा ग्ला मुला तला भिसी ङन्से म्हन्बा मुबा, थेरी कोइ कोइ म्रिङ्म्हेमेगदे ह्रुप तसी चिबा स्याप्जी। थेतबासेलमा ङनीएनोन थेनीगदेदेन छ्याम चिसी ताम लजी। थेरी ङन्ना ताम ङ्यन्बागदे न्हङ्री थिआटीरा सहरला वालावाला पिङ्गै छोनना क्वान चूङ्बा परमेश्वरदा तेन्बा लिडिया भिबा म्रिङ्म्हेमे गिक मुबा। पावलसे पाङ्मा ज्यना लसी ङ्यन्सी घोखम्गै भिबा सेम प्रभुसे थेदा पिन्बा मुबा। थेदेन थेला दिमला जम्मान म्हेमेगदेसे बप्तिस्मा किन्माहेन्से थेसे ङन्दा कर लबान चुह्रङ् भिसी ङ्योइजी, “चुदे ह्राङनीसे ङादा प्रभुदा विश्वास लबा म्हि म्हन्सम ङाला दिमरी फेप्खसी धन्छ्यागो।”
पावलदेन सिलासदा झ्याल्खानरी झाङ्बा
ङनी प्रार्थना लबा ग्लारी निबान मुबा, थेरी ङन्से म्हाङ्से स्याप्बा घ्याबास्या गिकदा स्याप्जी, थेसे थे म्हाङ्ला शक्तिग्याम म्हुदु च्यासी स्होबा ल्हानान टाङ्गा ह्राङला मालिकगदेदा पिन्मुबा। ओच्छे थे घ्याबास्या पावलदेन ङन्ना लिच्छा लिच्छा चुह्रङ् भिसी क्रिङ्बान भ्रजी, “चु म्हिगदे शक्तिशाली परमेश्वरला गे लबा म्हिगदे हिन्ना। चुगदेसे एनीगदेदा थार्बा याङ्बा ग्यामला बारेरी पाङ्बान मुला।” थे घ्याबास्यासे ल्हानान धिनधोना चुह्रङ् पाङ्बाला पाङ्बान लबासेलमा पावल छेर्सी थेपट्टि फ्लिक दोःसी थे घ्याबास्याला ल्हुइरी मुबा म्हाङ्दा चुह्रङ् भिसी पाङ्जी, “ङाइ येशू ख्रीष्टला मिनरी कुल्बा मुला, ए थेला ल्हुइग्याम थोन्सी निउ।” पावलसे थेह्रङ् पाङ्मैछ्याम थे म्हाङ् थोन्सी निजी।
थे घ्याबास्याला मालिकगदेसे दाहेन्से चुला कमाइ चआम्याङ्नम भिबा म्राङ्सी पावलदेन सिलासदा चुङ्सी बजारला गुङ्री मुबा नेतागदे मुबा ग्लारी डुइबा छेङ्बा लबान भोर्जी। ओच्छे थेनीगदेदा थे सहरला हाकिमगदे मुबा ग्लारी भसी चुह्रङ् भिसी पाङ्जी, “चु म्हिगदे यहूदी हिन्ना, चुगदेसे य्हाङला सहररी आतोःबा ताम लोप्सी ङन्दा कोल्ना लजी। ओच्छे थेनीगदेसे य्हाङला ठिमसे लोप्बारी आतबा ताम लोप्बा मुला, य्हाङ रोमी म्हिगदे तबासेलमा थेनीगदेसे लोप्बा ताम य्हाङसे विश्वास लसी ङ्यन्बारी आत।”
जमाहेन्से थेरी मुबा म्हिगदे पावलदेन सिलासला बिरोधरी रेःजी। थे सहरला हाकिमगदेसे थेनीगदेला क्वान ढेसी भ्याङ्जी, ओच्छे थेनीगदेदा तोउ भिसी कुल्जी। थेनीगदेदा ल्हानान तोमाहेन्से झ्याल्खानरी झाङ्सी झ्याल्खानना हाकिमदा चुगदेदा य्हार्बारी आखम्ना लसी थान्गो भिसी कुल्जी। चुह्रङ् भिसी कुल्माहेन्से थे झ्याल्खानना हाकिमसे पावलदेन सिलासदा झ्याल्खानना न्हङ्ला कोठारी भोर्सी काङ्री ठिँगुरो लगब लसी थान्जी। तर म्हुन गङ्सलरीक्यार पावलदेन सिलास प्रार्थना लबान परमेश्वरला व्हाइ गोबान मुबा, ओच्छे झ्याल्खानरी च्युप्सी थान्बा स्य्हान्दोगदेसे चा ङ्यन्बान मुबा। जमाहेन्से थेरी तिक्खुरीन घ्रेन सङ्गुल खसी झ्याल्खानना जग य्हाङ्य्होङ् तसी तुरुन्तन झ्याल्खानना म्रापगदे ठोङ्जी। ओच्छे थेनीगदे जम्मादान खीबा स्हेगदेएनोन ह्रङ्नोन ब्लजी। थे झ्याल्खानना हाकिम फातछोर्मा झ्याल्खानना जम्मान म्राप ठोङ्बा म्राङ्सी थेसे च्युप्सी थान्बा जम्मान म्हिगदे य्हार्जी भिसी म्हन्सी ह्राङसे ह्राङदान साइबारी तरवार स्याजी।2 तर पावलसे थेदा “ह्राङसे ह्राङदान तिगै आलउ, तिग्दा भिसम ङनी जम्मान चुरीन मुला” भिसी घ्रेन काइ तेःसी क्रिङ्जी।
जमाहेन्से थेसे नाङ्सल ह्रीसी छ्योङ्बान न्हङ्री खजी, थे लोङ्सी फितफित धर्बान पावलदेन सिलासला ङाच्छापट्टि ख्लुप तजी। ओच्छे थेसे थेनीगदेदा मङ्ग्यार भसी “दाहेन्से ङाइ थार्बा याङ्बारी तिग लतोःला?” भिसी ङ्योइजी।
पावलदेन सिलाससे थेदा चुह्रङ् भिसी पाङ्जी, “प्रभु येशू ख्रीष्टदा विश्वास लउ, ओच्छे ह्राङदेन ह्राङला जम्मान म्हेमेगदेसे थार्बा याङ्ला।” जमाहेन्से थेनीगदेसे थेदेन थेला दिमरी मुबा जम्मादान प्रभुला बचन थेःना लजी। जमाकुनु म्हुनङ् थेनोन धुइरी थेसे थेनीगदेदा भोर्सी थेनीगदेला पोर ख्रुसी पिन्जी। ओच्छे थेदेन थेला दिमरी मुबा जम्मासेन तुरुन्तन बप्तिस्मा किन्जी। जमाहेन्से थे झ्याल्खानना हाकिमसे पावलदेन सिलासदा ह्राङला दिमरी भसी सोल पिन्जी। ओच्छे थेसे परमेश्वरदा विश्वास लबासेलमा थेला दिमरी मुबा जम्मान म्हिगदे विश्वास लसी थेदेन छ्याम ल्हानान ताङ्जी।
य्हाल तमाहेन्से सहरला हाकिमगदेसे सिपाहीगदेदा “थे म्हिगदेदा पुइसी पिन्गो” भिसी कुल्जी। जमाहेन्से झ्याल्खानना हाकिमसे पावलदा चुह्रङ् भिसी पाङ्जी, “सहररी मुबा हाकिमगदेसे ह्राङनीदा पुइसी पिन्गो भिसी पाङ्बा मुला। थेतबासेलमा दाहेन्से ह्राङनी थोन्सी ढुक्क तसी फेप्गो।”
तर पावलसे थे खबर भसी खबा सिपाहीगदेदा चुह्रङ् भिसी पाङ्जी, “ङनी रोमी म्हि तना तनान थेनीगदेसे रोमी ठिम अन्छार ङन्दा तिगै ङ्योइबा छार्बा आलना तोसी झ्याल्खानरी झाङ्जी। दन्दे चा ङन्दा सुटुक्क तेःबारी म्हाइबा? ङनी निनोन आनि। थेह्रङ् भिसी कुल्बा हाकिमगदे खसी ङन्दा तेःतोःला।”
जमाहेन्से सिपाहीगदे हाकिमगदे मुबा ग्लारी निसी पावलसे पाङ्बा ताम पाङ्जी। पावलदेन सिलास रोमी म्हि चिम भिबा थेःसी थेनीगदे लोङ्जी। जमाहेन्से थेनीगदे खसी पावलदेन सिलासदा माफ ह्रीजी, ओच्छे पावलदेन सिलासदा झ्याल्खानग्याम मङ्ग्यार भोर्सी, “ङन्ना सहर ख्लासी फेप्गो” भिसी बिन्ती लजी। झ्याल्खानग्याम थोन्माहेन्से पावलदेन सिलास लिडिया भिबा म्रिङ्म्हेमेला दिमरी निजी। थेरी प्रभुदा विश्वास लबा ज्योज्यो आले नाना आङागदेदेन छ्याम ह्रुप तसी थेनीगदेदा प्रभुरी कोङ्सी चिउ भिसी आँट पिन्सी पावलदेन सिलास थेग्याम निजी।
Source notes (2)
- Footnote चु धुइरी लूकाएनोन पावल, तिमोथी, सिलासदेन छ्याम निबा मुबा।
- Footnote थे धुइरी चा झ्याल्खानरी च्युप्सी थान्बा म्हिगदे य्हार्जी भिसम झ्याल्खानना हाकिमदा सरकारसे साइमुबा।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.