Eastern Tamang Language Bible
२ तिमो 3:16
Verse 16 is marked below, with the whole chapter around it. Read from the start
लिच्छाला धुइरी परमेश्वरदा ख्लाबा म्हिगदे
लिच्छाला धुइ चा ल्हानान दुखला धुइ तला भिबा ताम एसे था याङ्गो। तिग्दा भिसम जमा धुइरी म्हिगदे ह्राङदा जे माया लबा, ओच्छे टाङ्गाला लिच्छा जे भ्रबा, ङा ह्रङ्बा खालै आरे भिसी भ्रबा, ङा जे चसे ङा जे जम्मान भन्दा घ्रेन म्हि, स्य्हान्दोदा बिरोध लबा, आबा आमासे पाङ्बा ताम आङ्यन्बा, गुण आम्राङ्बादेन परमेश्वरदा आतेन्बा, ओच्छे माया आरेबा, ढिक्ना लबारी आखम्बा, तामगन लसी भ्रबा, ह्राङसे ह्राङदान तहरी आथान्बा, च्यामान लोङ्बा खबा, ज्यबा ताम सेम आनिबा, धोका पिन्बा, तिगै वास्ता आलना मूर्ख गे लसी भ्रबा, ङा ह्रङ्बा खालै आरे भिसी भ्रबा, परमेश्वरदा ताङ्ना आलना मोजमजा लसी भ्रबा सेम लबा, परमेश्वरदा तेन्बा स्होबा, तर परमेश्वरला शक्तिग्याम लबा गे चा आहिन भिबा चुह्रङ्बा म्हिगदेग्याम थारेङ् तसी चिउ।
तिग्दा भिसम थेह्रङ्बा म्हिगदे न्हङ्ला कोइ कोइ चा दिम दिमरी निसी पाप सेम थोबादेन पापसे नाङ्बा कमजोर म्रिङ्म्हेमेगदेदा ह्राङला तहरी थान्मुला। थे म्रिङ्म्हेमेगदेसे सदन लोप्बारी मि म्हाइमुला, तर सत्य ताम तिग हिन्ना भिसी खाइमै आसेमुला। यान्नेसदेन याम्ब्रेससे मोशादा बिरोध लबा ह्रङ्नोन चु म्हिगदेसे सत्य तामला बिरोध लमुला। चुह्रङ्बा म्हिगदेला बुद्धि न्होङ्बा मुला, ओच्छे विश्वास लबा स्होसी भ्रमुला।1 तर दाहेन्से थेनीगदे ल्हानान आटु, तिग्दा भिसम थेनीगदे गादे मूर्ख चिम भिबा ताम जम्मासेन म्राङ्ला। ओच्छे यान्नेसदेन याम्ब्रेसदा खाह्रङ् तमुबा थेनीगदेदाएनोन थेह्रङ्नोन तला।
पावलसे तिमोथीदा कुल्बा ताम
तर ङाइ लोप्बा ताम, ङाला बानीबेहोर, ङाइ लबारी छ्याइबा गे, ङाला विश्वास, ङाइ नाखम्बा, ङाला मायादेन ङा विश्वासरी गादे कोङ्सी चिबा मुला भिबा ताम एसेन म्राङ्बा मुला। ओच्छे ङादा म्हिगदेसे पिन्बा दुखदेन ङाइ नाबा दुख एसे म्राङ्बा मुला। एन्टिओखिया, आइकोनियनदेन लुस्त्रा भिबा ग्लारी ङाइ गादे ल्हाना दुख नाजी। तसैनोन थे जम्मान दुखग्याम प्रभुसे ङादा जोगब लजी।2 पाङ्नोन तोःमा ख्रीष्ट येशूदा सेमहेन्सेन तेन्सी थेदेन छ्याम भ्रबागदे जम्मादान म्हिगदेसे दुख मि पिन्नोन पिन्ना। तर पाप सेम थोबा म्हिगदे स्य्हान्दोदा ठगब लबारी म्हाइमा थेनीगदे ह्राङनोन झन झन न्होङ्सी निला। ओच्छे स्य्हान्दोदा धोका पिन्बागदे ह्राङसेन धोका याङ्ला। तसैनोन ए चा ह्राङसे लोप्बा चु तामरी विश्वास लसी कोङ्सी चिउ। तिग्दा भिसम चु ताम खाला खालाग्याम लोप्जी भिबा एदा थानोन मुला। एदा जजाहेन्सेन परमेश्वरला बचन था मुला। थे बचनसे ख्रीष्ट येशूदा लबा विश्वासग्याम थार्बा याङ्बाला लागिरी एदा ज्ञान बुद्धि पिन्खम्ला। चु बचनरी भ्रिबा जम्मान ताम चा परमेश्वरला आत्माग्यामनोन खबा हिन्ना। तिग्दा भिसम सत्य ताम लोप्बारी, आतोःबा तामला दोष उन्बारी, गल्ती तामगदेदा सोज्यब लबारी ओच्छे परमेश्वरसे म्हन्बा अन्छार भ्रबारी खम्गै भिसी लोप्बाला लागिरी हिन्ना। थेह्रङ् लसीन परमेश्वरला म्हिगदेसे जम्मान ज्यबा गेगदे लबारी खम्गै भिसीन परमेश्वरला बचन पिन्बा हिन्ना।
Source notes (2)
- Cross-reference थोन्बा ७:११
- Cross-reference मूल १३:१४-५२; १४:१-२०
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.