Eastern Tamang Language Bible
२ शमू 11
दाऊददेन बतशेबा
छेब्पा छाबा लरी ग्लेगदे लडाइ लबारी थोन्मुबा, दाऊदसे योआबदेन ह्राङला सिपाहीगदेला अर्गु हाकिमगदेदेन इस्राएलला जम्मान सिपाहीगदेदा लडाइ लबारी पुइजी, थेनीगदेसे अम्मोनीगदेदा नाश लजी, ओच्छे क्युर्नोनग्याम खसी रब्बा सहरदा गुङ्री झाङ्जी। तर दाऊद चा यरूशलेमरीन चिजी।1
दाऊद तिरेकुनु ङ्यसे खाटग्याम रेःसी ह्राङला दिमला कौसीग्याम क्यार मार च्यासी चिबा धुइरी थेसे म्रिङ्म्हेमे गिक नुहाब लबान लबा म्राङ्जी, थे म्रिङ्म्हेमे ल्हानान जेःबा मुबा। थे खाला हिन्ना भिसी गोबारी दाऊदसे म्हि पुइजी, ओच्छे थे म्हिसे चुह्रङ् भिसी पाङ्जी, “थे चा एलीआमला झामे हित्ती उरियाहला म्रिङ बतशेबा हिन्ना।” थेदा किन्बारी दाऊदसे म्हिगदे पुइजी, ओच्छे थे खजी, जमाहेन्से दाऊद थेदेन छ्याम म्हेर्जी। ओच्छे बतशेबा ह्राङला दिमरी निजी। महिनावारी तमाहेन्से बारन लतोःबा धुइ जिन्माहेन्से बतशेबासे ह्राङदा चोख्याब लबा मुबा। थे जीउ न्हीला तजी, जमाहेन्से थेसे “जीउ न्हीला तजी” भिसी दाऊददा समाचार पुइजी।
थे समाचार थेःमाहेन्से “हित्ती उरियाहदा ङा मुबा ग्लारी पुइखउ” भिसी दाऊदसे योआबदा कुल्जी। जमाहेन्से योआबसे थेदा दाऊद मुबा ग्लारी पुइजी। उरियाह दोखमाहेन्से दाऊदसे थेदा योआबदेन सिपाहीगदेला बारेरीदेन लडाइ खाह्रङ्बा तबान मुला भिसी ङ्योइजी। जमाहेन्से दाऊदसे उरियाहदा चुह्रङ् भिसी पाङ्जी, “दिमरी निसी एसे ह्राङला काङ ख्रुउ।” थे ग्लेखाङ्ग्याम थोन्माहेन्से ग्लेसे थेला लिच्छा लिच्छा उपहार पुइजी। तर उरियाह ह्राङला दिमरी आनिनी, थे ग्लेखाङ्ला पालेगदेदेन छ्यामनोन ग्लेखाङ्ला मूल म्रापरी म्हेर्जी।
“उरियाह ह्राङला दिमरी निबा आरे” भिबा ताम थेःमाहेन्से दाऊदसे थेदा चुह्रङ् भिसी पाङ्जी, “ए मि थारेङ्ग्याम खबा आहिन? ए तिग्दा ह्राङला दिमरी आनिबा?”
उरियाहसे चुह्रङ् भिसी जोहाब पिन्जी, “इस्राएलदेन यहूदाला सिपाहीगदे चा लडाइरी मुला। ओच्छे परमेश्वरला सन्दोसएनोन थेनीगदेदेन छ्यामनोन पालरी मुला, ओच्छे ङाला मालिक योआबदेन ह्राङला सिपाहीगदेला हाकिमगदेएनोन पाङ्री पाल फ्रेङ्सी चिबा मुला। ङा चा खाह्रङ् लसी चबा थुङ्बा लसी म्रिङ्देन छ्याम म्हेर्बारी निसे? ह्राङला मिनरी घ्रान चबान ङाइ पाङ्ला ङाइ थेह्रङ् लबारी आखम।”
जमाहेन्से दाऊदसे उरियाहदा चुह्रङ् भिसी पाङ्जी, “थेह्रङ् भिसम ए अर्गु तिरे चुरी चिउ, ङाइ एदा न्हाङ्गर निपुङ्ला।” थेतबासेलमा उरियाह थेकुनुदेन न्हङ्गरदाङएनोन यरूशलेमरीन चिजी। दाऊदसे थेदा चबा थुङ्बा लबारी ङ्योइजी, ओच्छे थेदा ङ्य्होइना लजी। तर थे ङ्यसे मङ्ग्यार निजी ओच्छे ग्लेखाङ्ला पालेगदेदेन छ्यामनोन थे ह्राङला तिरी म्हुन गिक म्हेर्जी। थे दिमरी आनिनी।
दाऊदसे योआबदा न्हङ्गरदाङ स्य्होरीन चिठी गिक भ्रिसी उरियाहला यारी पुइजी। थेसे चिठीरी चुह्रङ् भिसी भ्रिबा मुबा, “जुन ग्लारी ल्हानान लडाइ तबा मुला उरियाहदा थेरी शत्रुगदेला सुङ्रीन पुइगो, एनीगदे चा ङाच्छा आनिउ, तिग्दा भिसम थे सिगै।”
थेतबासेलमा योआबसे सहरदा गुङ्री झाङ्जी, ओच्छे जुन ग्लापट्टि शत्रुदेन छ्याम छेबारी ल्हानान गाह्रो मुला भिसी थेदा था मुबा, थेनोन ग्लापट्टि थेसे उरियाहदा पुइजी तिख्खुरीन सहरग्याम म्हिगदे थोन्सी योआबदेन छ्याम लडाइ लबारी छ्याइजी, ओच्छे थेरी दाऊदला कोइ कोइ सिपाहीगदेदा साइजी। हित्ती उरियाहदाएनोन थेरीन साइजी।
जमाहेन्से योआबसे लडाइला बारेला समाचार पिन्सी म्हि गिकदा दाऊद मुबा ग्लारी पुइजी। थे समाचार भोर्बा म्हिदा योआबसे चुह्रङ् भिसी कुल्जी, “लडाइला बारेरी एसे ग्लेदा जम्मान ताम पाङ्सी जिन्माहेन्से ग्लेसे बोमो खसी चुह्रङ् सुङ्जी भिसम ‘लडाइ लमा एनीगदे तिग्दा सहरला ङाम्रीन निबा? पर्खालग्याम म्यादलीसे छेक्ला भिसी एनीगदेसे घोतोःमुबा। यरूबबेसेतला झा अबीमेलेकदा खाल्से साइजी? थेदा तेबेसरी म्रिङ्म्हेमे गिकसे पर्खालग्याम रान्दासे रोप्सी साइबा आहिन? एनीगदे पर्खालला ङाम्रीन तिग्दा निजी?’ भिसी ग्लेसे ङ्योइजी भिसम ग्लेदा चुह्रङ् भिसी पाङ्गो, ‘ह्राङला गे लबा हित्ती उरियाहएनोन सिजी।’”2
समाचार भोर्बा थे म्हि थेग्याम निजी, ओच्छे योआबसे कुल्बा अन्छार दाऊद मुबा ग्लारी निसी जम्मान समाचार थेःना लजी। थेसे दाऊददा चुह्रङ् भिसी पाङ्जी, “तिगै आरेबा पाङ्री शत्रुगदे पोप तसी ङन्दा नाङ्बारीन छ्याइजी। तर ङन्सेनोन थेनीगदेदा सहरला मूल म्रापधोनान ताप्बान भोर्जी। थेरी म्यादली चलब लबागदेसे ह्राङला गे लबा म्हिगदेदा पर्खालग्याम म्यादलीसे रोप्जी, ओच्छे ह्राङला म्हिगदे गादे सिजी। ओच्छे ह्राङला गे लबा म्हि हित्ती उरियाहएनोन सिजी।”
दाऊदसे थे म्हिदा चुह्रङ् भिसी पाङ्जी, “योआबदा चु समाचार भोर्गो, ‘ए आलोङ्गो, खाह्रङ् लसी तरवारसे गिकदा साइमुला, थेह्रङ् लसीन अर्गुदाएनोन साइमुला। सहरदेन छ्याम लडाइ लबाला लबान लउ, ओच्छे थे सहरदा नाश लसी पिन्गो।’ योआबसे आँट याङ्गै भिसी चु ताम पाङ्सी पिन्गो।”
उरियाहला म्रिङ्से ह्राङला ह्रेम्बो सिजी भिबा समाचार थेःमाहेन्से ह्रेम्बो सिबासेलमा ल्हानान दुख म्हन्सी क्राबा क्रिङ्बा लजी। ओच्छे दुख म्हन्बा धुइ जिन्माहेन्से दाऊदसे म्हिगदे पुइसी थेदा ह्राङला दिमरी भजी। थे दाऊदला म्रिङ दोजी ओच्छे थेसे झा गिक न्हजी। तर जुन ताम दाऊदसे लबा मुबा, थे तामरी परमप्रभु आताङ्नी।
Source notes (2)
- Cross-reference १ काइ २०:१
- Cross-reference निसाफ ९:५३
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.