Eastern Tamang Language Bible
२ शमू 1
दाऊदसे शाऊल सिबा समाचार याङ्बा
शाऊल सिमाहेन्से अमालेकीगदेदा ब्रेना लसी दाऊद सिक्लगरी दोःसी खजी, ओच्छे थेरी न्हीरेधोना चिजी। शाऊल सिबा सोमरेलाकुनु शाऊलला पालग्याम म्हि गिक ह्राङला क्वान ढेसी थोबो नाङ्नोन धुलु युसी दुख उन्बान खजी। दाऊदला ङाच्छापट्टि दोखमाहेन्से थे म्हिसे दाऊददा फ्या लजी। दाऊदसे थेदा “ए खानङ्ग्याम खबा हिन्ना?” भिसी ङ्योइजी। थेसे “ङा इस्राएलला पालग्याम य्हार्सी खबा हिन्ना” भिसी पाङ्जी।
दाऊदसे थेदा दोःसी चुह्रङ् भिसी ङ्योइजी, “तिग समाचार भबा मुला? ङादा पाङ्गो।”
थेसे चुह्रङ् भिसी पाङ्जी, “सिपाहीगदेदा लडाइ लबा ग्लाग्याम ताप्जी, ओच्छे ल्हानान म्हिदा साइजी। शाऊलदेन थेला झा जोनाथनदाएनोन साइजी।”
थे समाचार भबा भ्योन म्हिदा दाऊदसे चुह्रङ् भिसी ङ्योइजी, “शाऊलदेन जोनाथनदा साइजी भिसी एसे खाह्रङ् लसी था याङ्जी?”
थे म्हिसे चुह्रङ् भिसी पाङ्जी, “ङा गिल्बो गङ्री मुबा, ओच्छे शाऊल ह्राङलान भालाथोरी कू तसी चिबा ङाइ म्राङ्जी। रथगदेदेन तारी क्रेबा शत्रुगदे थेदा ताप्बान थेला ङाम्रीन दोखबारी छ्याइबा मुबा।1 थेसे ग्यापपट्टि च्यामा ङादा म्राङ्जी, ओच्छे थेसे ङादा ङ्योइजी। ङाइ ‘लास्सो, तिग सुङ्बा?’ भिसी ङ्योइमा, थेसे ङादा ‘ए खाला हिन्ना’ भिसी ङ्योइजी। ङाइ थेदा ‘ङा अमालेकी हिन्ना’ भिसी पाङ्जी। जमाहेन्से थेसे चुह्रङ् भिसी पाङ्जी, ‘ङाला ङाम्री खसी ङादा साइगो। ङाइ चु स्हु स्हेर नाबारी आखम्नी।’ थेतबासेलमा ङा थेला ङाम्री निजी, ओच्छे ङाइ थेदा साइजी। तिग्दा भिसम थे ल्हानान कमजोर तसी जिन्बा मुबा, दाहेन्से थे आसो भिबा ताम ङादा था मुबा। जमाहेन्से ङाइ थेला थोबोला मुकुटदेन पाखुराला बाजू तेःजी, ओच्छे चुरी ह्राङ मुबा ग्लारी भबा मुला।”
चु ताम थेःसी ल्हानान दुख म्हन्सी दाऊदसे ह्राङला क्वान ढेजी। ओच्छे थेदेन छ्याम मुबा जम्मान म्हिगदेसेनोन ह्राङ ह्राङला क्वान ढेजी। शाऊलदेन थेला झा जोनाथन, ओच्छे परमप्रभुला सिपाहीदेन इस्राएलला वंशदा लडाइरी साइबासेलमा कुरी छेक्सी छेक्सी थेनीगदे क्राजी, ओच्छे ङ्यसेधोना तिगै आचना फोइथाननोन चिजी।
जमाहेन्से दाऊदसे थे समाचार भबा भ्योन म्हिदा चुह्रङ् भिसी पाङ्जी, “ए खानङ्ग्याम खबा हिन्ना?” थेसे चुह्रङ् भिसी जोहाब पिन्जी, “ङा विदेशी गिकला झा अमालेकी हिन्ना।”
दाऊदसे थेदा चुह्रङ् भिसी पाङ्जी, “परमप्रभुसे धम्बा म्हिदा साइबारी या थीमा एदा लोङ्बा आखनी?”
जमाहेन्से थेदा साइगो भिसी दाऊदसे ह्राङला म्हिगदे न्हङ्ला गिकदा कुल्जी। थेतबासेलमा थे म्हिसे थेदा तरवारसे ताम्सी साइजी। तिग्दा भिसम दाऊदसे थेदा चुह्रङ् भिसी पाङ्बा मुबा, “एला काला दोष एलान थोबोरी परब तगै। ‘ङाइ परमप्रभुसे धम्बा म्हिदा साइजी’ भिसी एसेन पाङ्बासेलमा ह्राङलान सुङ्से एसे ह्राङसे ह्राङदान दोष लबा मुला।”
शाऊलदेन जोनाथनदा ढन्सी दाऊदसे गोबा दुखला व्हाइ
जमाहेन्से शाऊलदेन थेला झा जोनाथनदा ढन्सी दाऊदसे चुह्रङ् लसी दुखला व्हाइ गोजी। ओच्छे चु दुखला व्हाइ यहूदाला म्हिगदेदा लोप्गो भिसी कुल्जी। चु व्हाइदा म्यादलीला व्हाइ भिसी पाङ्मुबा। चु व्हाइ याशारला किताबरी भ्रिबा मुला,2
“इस्राएल, एला मूल म्हिगदे गङ्गदेरी क्यार सिसी ह्रिल्बा मुला।
ओच्छे शक्तिशाली म्हिगदे ह्रिल्बा मुला!
चु ताम गातरी आथेःगै,
चु ताम अश्कलोनना ग्यामगदेरी क्यार थेःना लसी आभ्रउ,
आहिन्सम पलिश्तीगदेला झामेगदे ताङ्ला,
आहिन्सम खतना आलबागदेला झामेगदे ल्हानान ताङ्ला।
“गिल्बोला गङ्गदे, एनीगदेथोरी शीतदेन नाम आताइगै,
एनीगदेला ग्लारी अन्न रोबा भुएनोन आतगै।
तिग्दा भिसम थेरी लडाइ लबागदेला ढाल अशुद्ध तबा मुला,
छ्युगु आफोर्बासेलमा शाऊलला ढाल टल्कब तबा आरे।
शत्रुला कुग्यामदेन साइबागदेला काग्याम
जोनाथनना म्यादली खाइमै ओह्रङ्नोन दोःसी आखमुबा।
शाऊलला तरवार तिगै आलना खाइमै स्युपरी आवाङ्मुबा।
“शाऊलदेन जोनाथन गादे सेम निबा खाल्लादेन माया खबा खाल्ला मुबा,
थेनीगदे सोबा धुइरीनोन छ्यामनोन मुबा
सिबा धुइरीएनोन छ्यामनोन मुबा।
थेनीगदे भ्रबारी क्वाक्लिङ् भन्दाएनोन योना तमुबा।
थेनीगदे सिंहगदे भन्दाएनोन भङ्बा मुबा।
इस्राएलला झामेगदे, शाऊलला लागिरी क्रागो।
थेसे एनीगदेदा ज्यबा बुट्टा मुबा वाला वाला क्वान क्वान्सी पिन्मुबा,
थेसे एनीगदेला क्वान म्हारला गहनासे जेःना लमुबा।
“शक्तिशाली म्हिगदे लडाइ तबा ग्लारी ह्रिल्जी!
जोनाथन एनीगदेला गङ्री सिसी ह्रिल्बा मुला।
ङाला ज्योज्यो जोनाथन, एला लागिरी ङाइ क्राबा क्रिङ्बा लबा मुला।
ङाला लागिरी ए ढिक्बादेन सेम निबा म्हि मुबा।
एसे ङादा लबा माया उदेकला मुबा,
एला माया चा म्रिङ्म्हेमेसे लबा मायादाएनोन ढाबा माया मुबा।
“शक्तिशाली म्हिगदे ह्रिल्जी!
लडाइ लबा जम्मान हतियारगदे तिगै गेआखेल्बा तसी छरपष्ट तजी।”
Source notes (2)
- Cross-reference १ शमू ३१:१-६; १ काइ १०:१-६
- Cross-reference यहो १०:१३
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.