Eastern Tamang Language Bible
२ ग्ले 2
एलियादा स्वर्गरी भोर्बा
लाबालुङ्सर पुइखसी परमप्रभुसे एलिया अगमवक्तादा स्वर्गरी थीसी भोर्बारीन छ्याइबा मुबा, थे धुइरी एलिया अगमवक्तादेन एलीशा गिलगालग्याम अर्गु ग्लापट्टि निबान मुबा। जमाहेन्से एलिया अगमवक्तासे एलीशादा चुह्रङ् भिसी पाङ्जी, “परमप्रभुसे ङादा बेथेलरी पुइबान मुला ए चा चुरीन चिउ।”
तर एलीशासे चुह्रङ् भिसी पाङ्जी, “परमप्रभुदेन ह्राङला मिन किन्सी ङाइ घ्रान चबान चु ताम पाङ्ला, ङाइ ह्राङदा ख्लानोन आख्ला।” जमाहेन्से थे न्हीनोन बेथेलरी निजी।
बेथेलरी मुबा अगमवक्तागदेला समूह गिक खसी एलीशादा चुह्रङ् भिसी ङ्योइजी, “ह्राङला मालिकदा तिनी परमप्रभुसे ह्राङग्याम भोर्बान मुला भिबा ताम ह्राङदा था मुला?”
ओच्छे एलीशासे थेनीगदेदा चुह्रङ् भिसी पाङ्जी, “हिन्ना, चु ताम ङादा था मुला, तर चु तामला बारेरी तिगैनोन आपाङ्गो।”
जमाहेन्से एलिया अगमवक्तासे एलीशादा चुह्रङ् भिसी पाङ्जी,
“परमप्रभुसे ङादा बेथेलरी पुइबान मुला, एलीशा ए चा चुरीन चिउ।”
ओच्छे एलीशासे चुह्रङ् भिसी जोहाब पिन्जी, “परमप्रभुदेन ह्राङला मिन किन्सी ङाइ घ्रान चबान चु ताम पाङ्ला, ङाइ ह्राङदा ख्लानोन आख्ला।” जमाहेन्से थे न्हीनोन यरीहोरी निजी।
यरीहोरी मुबा अगमवक्तागदेला समूह गिक खसी एलीशादा चुह्रङ् भिसी ङ्योइजी, “ह्राङला मालिकदा तिनी परमप्रभुसे ह्राङग्याम भोर्बान मुला भिबा ताम ह्राङदा था मुला?”
ओच्छे एलीशासे थेनीगदेदा चुह्रङ् भिसी पाङ्जी, “हिन्ना, चु ताम ङादा था मुला, तर चु तामला बारेरी तिगैनोन आपाङ्गो।”
जमाहेन्से एलिया अगमवक्तासे एलीशादा चुह्रङ् भिसी पाङ्जी,
“परमप्रभुसे ङादा यर्दन स्योङ्री पुइबान मुला, ए चुरीन चिउ।”
ओच्छे एलीशासे चुह्रङ् भिसी जोहाब पिन्जी, “परमप्रभुदेन ह्राङला मिन किन्सी ङाइ घ्रान चबान चु ताम पाङ्ला, ङाइ ह्राङदा ख्लानोन आख्ला।” जमाहेन्से थे न्हीनोन यर्दन स्योङपट्टि निजी। बोगल न्हीसे च्युइ अगमवक्तागदे थेनीगदेला लिच्छा लिच्छा खजी, ओच्छे एलिया अगमवक्तादेन एलीशा चा यर्दन स्योङ्ला कुनीरी राप्सी चिजी। तर थे बोगल न्हीसे च्युइ अगमवक्तागदे चा थारेङ्नोन राप्सी च्यासी चिजी। एलियासे ह्राङला ग तेःसी कुम्जी, ओच्छे थे गसे यर्दन स्योङ्ला क्युइदा छेक्जी। जमाहेन्से यर्दन स्योङ् भो न्ही तसी थेनीगदेला दाहिनेपट्टिदेन देब्रेपट्टि चिजी, ओच्छे थे न्ही चा सोङ्सोङ् खार्बा सग्यामनोन भ्रसी यर्दन स्योङ्ला क्याम्सङ्पट्टि निजी। यर्दन स्योङ् क्याम्सङ् निसी जिन्माहेन्से एलिया अगमवक्तासे एलीशादा चुह्रङ् भिसी ङ्योइजी, “ङादा थीसी एग्याम फेसी भोर्बा भन्दा ङाच्छा ङाइ एला लागिरी तिग लगै भिबा सेम मुला?”1
जमाहेन्से एलीशासे चुह्रङ् भिसी जोहाब पिन्जी, “ङादा ह्राङला आत्माला दोब्बर भो याङ्बा हक पिन्गो।”
जमाहेन्से एलिया अगमवक्तासे एलीशादा चुह्रङ् भिसी पाङ्जी, “एसे मि गाह्रो ताम गा ह्रीजी, तसैनोन ङादा थीसी एग्याम भोर्बा धुइरी एसे ङादा म्राङ्जी भिसम थे एलान तला, आहिन्सम एसे आयाङ्।”
थे न्ही ताम लसी भ्रबान मुबा, थेनोन धुइरी थे न्हीला गुङ्री मेला तागदेदेन रथ खजी, ओच्छे एलियादा लाबासे थीसी तोर स्वर्गरी भोर्जी। चु ताम म्राङ्सी एलीशासे घ्रेन काइ तेःसी चुह्रङ् भिसी पाङ्जी, “ङाला आबा! ङाला आबा! ह्राङ चा लडाइ लखम्बा इस्राएलला शक्तिशाली म्हि हिन्ना!” जमाहेन्से एलीशासे एलियादा दोःसी खाइमै आम्राङ्नी। एलीशासे ह्राङला क्वान फ्याक न्ही तना लसी ढेजी।2
जमाहेन्से एलीशासे एलियाला ताइबा ग दुइजी। ओच्छे यर्दन स्योङ्ला कुनीरी निसी राप्जी। जमाहेन्से एलियाला गसे यर्दन स्योङ्ला क्युइरी छेक्जी, ओच्छे एलीशासे चुह्रङ् भिसी पाङ्जी, “परमप्रभु एलियाला परमेश्वर, ह्राङ खानङ् मुला?” थेसे छेक्मैछ्याम यर्दन स्योङ् भो न्ही तसी थेला दाहिनेपट्टिदेन देब्रेपट्टि चिजी। जमाहेन्से थे क्याम्सङ् निजी।
थे ताम च्यासी चिबा यरीहोग्याम खबा अगमवक्तागदेला समूहसे “एलियाला आत्मा एलीशाथोरी खजीम” भिसी पाङ्जी। जमाहेन्से थेनीगदे एलीशादा स्याप्बारी खजी, ओच्छे थेनीगदेसे एलीशादा फ्या लजी। थेनीगदेसे एलीशादा चुह्रङ् भिसी पाङ्जी, “स्हीगो, चुरी ङनी ह्राङला गे लबा बोगल न्हीसे च्युइ भङ्बा भङ्बा म्हिगदे मुला। ह्राङला मालिकदा म्हाइबारी ङन्दा निपुङ्गो, थेदा परमप्रभुला आत्मासे थीसी खजिबै गङ्री अथवा खजिबै ब्याँसीरी भोर्सी थान्जी तला।”
तर एलीशासे थेनीगदेदा “अँह, एनीगदे निआतोः” भिसी पाङ्जी।
थेनीगदेसे ढिपी लबाला लबान लसी एलीशादा पेःनान लजी। थेतबासेलमा एलीशासे थेनीगदेदा निपुङ्जी। जमाहेन्से थे बोगल न्हीसे च्युइ म्हिगदे निजी। थेनीगदेसे एलियादा सोमरेधोना म्हाइबाला म्हाइबान लजी। तसैनोन थेनीगदेसे एलियादा खानङ्एनोन आस्याप्नी। एलीशा यरीहोरीन मुबा धुइरी थे म्हिगदे एलीशा मुबा ग्लारी दोःसी खजी। जमाहेन्से एलीशासे थेनीगदेदा चुह्रङ् भिसी पाङ्जी, “ङाइ एनीगदेदा निआतोः भिसी पाङ्बा आहिन?”
एलीशासे लबा उदेकला गे
यरीहो सहरला म्हिगदेसे एलीशादा चुह्रङ् भिसी पाङ्जी, “मालिक, स्हीगो, चु सहर ज्यबा ग्लारी स्होबा मुला। तर चु सहरला क्युइ चा आज्यबा मुला। थेतबासेलमा चुरी तिगै बालीनाली आतमुला।”
जमाहेन्से एलीशासे थेनीगदेदा चुह्रङ् भिसी पाङ्जी, “छार खोरे गिक ङा मुबा ग्लारी भउ, ओच्छे थे खोरेरी चजा युगो।” थेतबासेलमा थेनीगदेसे खोरे भसी एलीशादा पिन्जी। जमाहेन्से क्युइला मूलरी निसी थे चजा स्वाबान एलीशासे चुह्रङ् भिसी पाङ्जी, “परमप्रभुसे चुह्रङ् भिसी सुङ्बा मुला, ‘चु क्युइदा ङाइ शुद्ध तना लबा मुला। दाहेन्से चु क्युइसे खालैदान सिना आल। ओच्छे बालीनालीएनोन न्होङ्ना आल।’” एलीशासे पाङ्बा अन्छार थे क्युइ तिनीधोनाएनोन शुद्ध मुला।
जमाहेन्से एलीशा यरीहोग्याम तोर बेथलेहेमरी निजी। ग्यामरी निबान लबा धुइरी कोइ कोइ भ्योनगदे सहरग्याम खसी एलीशादा चुह्रङ् भिसी ङोबारी छ्याइजी, “खुइले, ओ खुइले, चुग्याम निउ।” एलीशासे थेनीगदेदा फ्लिक दोःसी च्याजी, ओच्छे परमप्रभुला मिन किन्सी थेनीगदेदा केःजी। जमाहेन्से ह्रि न्हङ्ग्याम तहुम न्ही खसी बोगल न्हीसे गोर न्ही भ्योनदा साइजी। जमाहेन्से एलीशा थे ग्लाग्याम तोर कर्मेल गङ्री निजी। ओच्छे थे सामरियारी दोःसी निजी।
Source notes (2)
- Cross-reference ठिम २१:१७
- Cross-reference २ ग्ले १३:१४
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.