Eastern Tamang Language Bible
२ कोरि 11
पावलदेन लुसीला ताम पाङ्बा मूल चेला
ङाइ मूर्ख ताम लसैनोन एनीगदेसे नाला भिबा ङाइ आश लबा मुला। एनीगदेसे ङादा नासी पिन्गो, य्हा। परमेश्वरसे एनीगदेदा लबा ह्रङ्बान वास्ता ङाइएनोन लबा मुला। तिग्दा भिसम आबासे झामेदा म्हाछारला यारी जिम्मा पिन्बारी कबुल लबा ह्रङ् लसी ङाइ एनीगदेदाएनोन चोखो म्रिङ्कोलादा ह्रङ् लसी ख्रीष्टला छ्यारी जिम्मा पिन्बा सेम लसी कबुल लबा मुला। तर शैतानसे पुख्रीला रुप किन्सी हव्वादा फसब लबा ह्रङ् लसी खालैसे एनीगदेला ख्रीष्टदा तेन्बा चोखो सेम न्होङ्ना लला वा भिसी ङा लोङ्बा मुला।1 तिग्दा भिसम चुदे खालै म्हि खसी एनीगदेदा ङन्से पाङ्बा येशूला बारेरी भन्दा स्य्हान्दो येशूला बारेरी पाङ्जी भिसम एनीगदेसे सेम लसी ङ्यन्बा चिम। ओच्छे एनीगदेदा ङाच्छा पाङ्बा परमेश्वरला आत्मादेन थार्बा पिन्बा समाचारला बारेरी भन्दा स्य्हान्दो आत्मादेन समाचारला बारेरी पाङ्जी भिसम थे ताम एनीगदेसे तुरुन्तन विश्वास लबा चिम। थे जम्मान भन्दा घ्रेन मूल चेला दोबा स्होबा म्हिगदे भन्दा ङा तिगै तामरी जजा मुला भिसी ङाइ म्हन्बा आरे। ङा ज्यना लसी ताम पाङ्बारी आसेबा म्हि तसैनोन ङादेन छ्याम ज्ञान बुद्धि चा मुला। चु जम्मान ताम ङन्से ङाच्छान एनीगदेदा ज्यना लसी घोना लसी उन्बा मुला।
एनीगदेदा घ्रेन स्होबाला लागिरी ङा जजा दोःसी एनीगदेग्याम तिगै आकिन्ना परमेश्वरला समाचार थेःना लमा तिग ङाइ पाप लबा हिन्ना? ङाइ एनीगदेदा ह्रो लबाला लागिरी अर्गु मण्डलीगदेग्याम टाङ्गा किन्मा अर्गु मण्डलीगदेदा ङाइ ठगब लबा ह्रङ्बान तजी। एनीगदेदेन छ्याम चिमा ङादा खाँचो तबा धुइरी ङाइ एनीगदेदा दुख आपिन्नी। ङादा खाँचो तबा धुइरी जम्मान स्हेगदे माकेडोनियाग्यामसेन आलेगदेसे भसी पिन्मुबा। दन्देनोन एनीगदेदा दुख पिन्बा सेम आरे। चु तामला लागिरी ङाइ एनीगदेदा ङाच्छाएनोन दुख आपिन्नी, दाहेन्सेनोन ङाइ एनीगदेदा दुख आपिन।2 अखैया अञ्चलरी ङाइ ताङ्सी पाङ्बा चु तामदा आपाङ्गो भिसी खालैसेन पाङ्बारी आखम। तिग्दा भिसम ङाला सेमरी ख्रीष्टला सत्य बचन मुला। ङाइ तिग्दा चुह्रङ् लबा हिन्ना? तिग ङाइ एनीगदेदा माया आलबासेलमा हिन्ना? ङाइ एनीगदेदा माया लमुला भिबा ताम परमेश्वरदान था मुला।
तर ङन्से लबा ह्रङ्बान गे3 लबा मुला भिसी ताङ्बारी म्हाइबा थे जम्मान भन्दा घ्रेन मूल चेला दोबा स्होबा म्हिगदेदा ताङ्सी भ्रबा मौका आपिन्बाला लागिरी ङाइ दन्दे जुन गे लबान मुला थे गे सदन लला। तिग्दा भिसम थेह्रङ्बा म्हिगदे ख्रीष्टला मूल चेला दोबा स्होसी स्य्हान्दोदा छल लसी भ्रबा फट्टा चेलागदे हिन्ना। चु तिगै उदेक म्हन्तोःबा ताम आहिन। तिग्दा भिसम शैतानसेनोन म्हिदा फसब लबाला लागिरी य्हाल य्हाल्बा स्वर्गदूत ह्रङ्बान दोःसी खमुला। थेतबासेलमा शैतानना नोकरगदेएनोन परमेश्वरदा सेम निबागदे ह्रङ्बान दोःसी भ्रजी भिदेमा तिगै उदेक म्हन्तोःबा ताम आरे। परमेश्वरसे निसाफ लबा धुइरी थेनीगदेसे ह्राङसे लबा आज्यबा गेला सजाय नातोःला।
पावलसे नाबा दुखगदे
ङाइ दोःसीनोन पाङ्ला, ङादा खालैसेन मूर्ख आम्हन्गो। चुदे एनीगदेसे ङादा मूर्ख म्हन्बा मुसम मूर्खन म्हन्गो। जमाहेन्से ङाइएनोन तिगै तामरी जजाकर भिसै ताङ्म्याङ्ला। हिन्ना, ताङ्बा तामला बारेरी ङाइ मूर्खसे ह्रङ् लसीन ताम लबान मुला। चु ताम चा ङादा प्रभुसे कुल्बासेलमा पाङ्बा आहिन। ल्हानान म्हिगदे जम्बुलिङला तामगदेथोरी घमण्ड लबासे लमा ङाइनोन घमण्ड लला। एनीगदे मि ल्हानान ज्ञान बुद्धि मुबा म्हि दोजीम। ओच्छे मूर्ख म्हिगदेसे पाङ्माएनोन ताङ्सी ताङ्सी नाबा चिम। चुदे खालै म्हिसे एनीगदेदा घ्याबा स्होसैनोन, ठगब लसैनोन, ब्यन्सैनोन, एनीगदेदा धाक उन्सैनोन ओच्छे ग्रम्बारीन तोसैनोन एनीगदेसे थे जम्मान नाबा चिम। एनीगदेदा स्य्हान्दोगदेसे लबा ह्रङ्बान ङन्से लआखम्नी भिसी ङा पेःबा मुला।
तर खालै म्हिसे तिगै तामरी घमण्ड लबा मुसम ङाइएनोन थे तामरी घमण्ड लला। हिन्ना, ङाइ मूर्ख म्हिसे ह्रङ् लसीन ताम लबान मुला। तिग थेनीगदे हिब्रू हिन्ना? ङाएनोन हिब्रू हिन्ना। तिग थेनीगदे इस्राएली हिन्ना? ङाएनोन इस्राएली हिन्ना। तिग थेनीगदे अब्राहामला सन्तान हिन्ना? ङाएनोन अब्राहामला सन्तान हिन्ना। तिग थेनीगदे ख्रीष्टला गे लबा म्हिगदे हिन्ना? म्योबा म्हिसे ह्रङ् लसीन ङाइ चु तामगदे पाङ्बान मुला। थेनीगदे भन्दा मि ङा झन ज्यना लसी ख्रीष्टला गे लबा म्हि हिन्ना। थेनीगदेसे भन्दा ङाइ ल्हानान दुख लसी गे लजी। ओच्छे थेनीगदे भन्दा ङा ल्हानान रेम झ्याल्खानरी परब तजी। थेनीगदेदा भन्दा ङादा कोर्रासेनोन ल्हानान तोजी। ओच्छे गादे रेम मि ङा सिला ह्रङ्नोन तजी।4 ङादा यहूदीगदेसे ङ्हारेमधोना चुङ्सी तोजी। थेनीगदेसे ङादा ङ्हारेमधोनान बोगल गिकसे च्युक कुरेमधोना कोर्रासे तोजी।5 सोमरेमधोना ङादा कडीसे तोजी। तिरेम युङ्बासेनोन तोजी। सोमरेमधोना ङा क्रेःबा पानी जहाजएनोन न्होङ्जी। ओच्छे धिन गिक म्हुन गिक ङा समुद्ररीन चिजी।6
ख्रीष्टला समाचार थेःना लसी भ्रमा ङा स्योङ्री परब तजी, ओच्छे य्होगदेग्याम, ह्राङलान म्हि यहूदीगदेग्याम, अर्गु य्हुल्ला म्हिगदेग्याम, सहररीनोन, तोङ्तोङ्बा ग्लारीक्यार निमाएनोन, समुद्रग्याम भ्रमाएनोन, लुसीला ताम पाङ्सी भ्रबा आलेगदेग्याम दुख नातोःजी।7 ङा गादे रेम मि म्हेर्बारी आम्याङ्नी, तसैनोन आब्लेना दुख लसी गे लजी, गादे रेम चबा थुङ्बा आयाङ्ना फोइथाननोन चितोःजी ओच्छे क्वान आरेबासेलमा खाङ्बा नासीनोन चितोःजी। होत्ते जे आहिन, मण्डलीगदेला बारेरीनोन ङादा धिन धिननोन सुर्दा तमुबा। खालै म्हि विश्वासरी कमजोर तबा म्राङ्जी भिसम ङाएनोन कमजोर तबा ह्रङ्नोन छोर्मुला, ओच्छे खालै म्हि पापरी फसब तबा म्राङ्जी भिसम ङादा सेमरी ल्हानान दुख तमुला।
चुदे ङा ताङ्नोन तोःजी भिसम ङाला कमजोर तामगदे उन्मा ताङ्ला। ङाइ पाङ्बा तामगदे लुसीला ताम आहिन भिबा प्रभु येशूला आबा य्हाङला परमेश्वरदान था मुला। थेदा य्हाङसे सदन जयजयकार लतोःला। दमस्कस सहररी मुबा धुइरी अरितस ग्लेला हाकिमसे ङादा चुङ्बाला लागिरी ग्ला ग्लारी सिपाहीगदे थान्मुबा।8 तर ङादा सदुनरी झाङ्सी पर्खालला झ्यालग्याम मार पुइबासेलमा ङा थे ग्लेला यारी परब आतनी।
Source notes (8)
- Cross-reference ठुङ् ३:१-१३
- Cross-reference फिलि ४:१५-१८
- Footnote “ङन्से लबा ह्रङ्बान गे” भिबा चा पावलसे तिगै टाङ्गा आकिन्ना लबा गे हिन्ना ( २ कोरि ११:७-९ स्हीगो), तर घ्रेन मूल चेला दोबा स्होबागदेसे चा टाङ्गा किन्सी गे लमुबा।
- Cross-reference मूल १६:२३
- Cross-reference ठिम २५:३
- Cross-reference मूल १६:२२; १४:१९
- Cross-reference मूल ९:२३; १४:५
- Cross-reference मूल ९:२३-२५
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.