Eastern Tamang Language Bible
२ काइ 28
आहाज यहूदाला ग्ले दोबा
२ ग्ले १६:१-५
आहाज ग्ले दोमा बोगल गिक दिङ् तबा मुबा। थेसे यरूशलेमरी च्युक ढु दिङ्धोना शासन लजी। थेसे ह्राङला म्हेमे दाऊदसे लबा ह्रङ् लसी परमप्रभुला ओन्छाङ्री जुन ताम ज्यबा मुबा थेनोन ताम आलनी। थे इस्राएलला ग्लेगदेला सिउरी भ्रजी, ओच्छे बाल लाला मूर्तिगदेएनोन स्होपुङ्जी। थेसे बेन-हिन्नोमला ब्याँसीरी बलिएनोन लजी। जुन य्हुल्ला म्हिगदेदा परमप्रभुसे इस्राएलीगदेला ङाच्छाग्याम तेःसी ताप्बा मुबा। थेनोन य्हुल्ला म्हिगदेला नाइबा बानीबेहोर अन्छार भ्रसी आहाज ग्लेसे ह्राङलान झादाएनोन मेरी ख्राङ्सी बलि लजी। थेसे नोबा नोबा ग्लागदेदेन गङ्गदेला जो जोरी ओच्छे भुम्मा तबा जम्मान दोङटारी बलि लबान धूप म्रजी।
अरामदेन इस्राएल ढिक्सी आहाजदेन छ्याम लडाइ लबा
थेतबासेलमा परमप्रभु थेला परमेश्वरसे थेदा अरामला ग्लेदेन छ्याम ब्रेना लजी। ओच्छे अरामला म्हिगदेसे ब्रेना लसी थेला म्हिगदे न्हङ्ला ल्हानान म्हिगदेदा चुङ्सी दमस्कसरी भोर्जी।1
इस्राएलला ग्लेदेन छ्यामएनोन थेला लडाइ तजी। ओच्छे इस्राएलला ग्लेसेनोन थेदा ब्रेना लजी। तीरेरीन रमल्याहला झा पेकहसे यहूदाला १,२०,००० सिपाहीगदेदा साइजी। तिग्दा भिसम यहूदाला म्हिगदेसे परमप्रभु ह्राङला आखेम्हेमेगदेला परमेश्वरदा ख्लाबा मुबा। जिक्री मिन लबा एफ्राइमी सिपाही गिकसे ग्लेला झा मासेयाहदेन ग्लेखाङ् च्याबा मूल म्हि अज्रीकामदा साइजी। ओच्छे ग्लेला मूल मन्त्री एल्कानादाएनोन साइजी। यहूदाला म्हिगदे ह्राङलान य्हुल्ला म्हिगदे तसैनोन इस्राएलीगदेसे यहूदाला म्रिङ्म्हेमेदेन कोलागदे लसी लाख न्हीदा चुङ्सी भोर्जी। ओच्छे थेनीगदेसे ल्हानान माल सामानगदेएनोन ब्यन्सी सामरियारी भोर्जी।
ओदेद अगमवक्ता
तर सामरियारी ओदेद मिन लबा परमप्रभुला अगमवक्ता गिक मुबा। सिपाहीगदे सामरियारी दोःसी खबान लबा धुइरी थे अगमवक्ता सिपाहीगदेदा स्याप्बारी निजी। ओच्छे अगमवक्तासे थे सिपाहीगदेदा चुह्रङ् भिसी पाङ्जी, “यहूदाला म्हिगदे म्राङ्सी परमप्रभु एनीगदेला आखेम्हेमेला परमेश्वर बोमो खबा मुबा। थेतबासेलमा परमप्रभुसे थेनीगदेदा एनीगदेला यारी जिम्मा पिन्बा हिन्ना। तर एनीगदेसे चा बोमोला झोकरी थेनीगदेदा नाश लजी। एनीगदेसे यहूदादेन यरूशलेमला ह्रेम्फेबेदेन म्रिङ्म्हेमे न्हीदान घ्याबादेन घ्याबास्या स्होबारी छ्याइबा मुला। थेह्रङ् लमाहेन्से एनीगदेएनोन परमप्रभु परमेश्वरला ओन्छाङ्री पाप लबा म्हि आदोनी? थेतबासेलमा दाहेन्से एनीगदेसे ङाला ताम ङ्यन्गो। एनीगदेसे चुङ्सी भबा ह्राङला ज्योज्यो आले, नाना आङागदेदा दोःसी पुइगो, आहिन्सम बोमोला झोकरी परमप्रभुसे एनीगदेदाएनोन सजाय पिन्ना।”
जमाहेन्से एफ्राइमला कोइ कोइ मूल म्हिगदेसे लडाइग्याम दोःसी खबान लबागदेदा स्याप्जी। थे मूल म्हिगदे चा येहोहानानना झा अजर्याह, मशिल्लेमोतला झा बेरेक्याह, शल्लूमला झा येहिजक्याहदेन हद्लैला झा अमासा मुबा। थे मूल म्हिगदेसे चुह्रङ् भिसी पाङ्जी, “एनीगदेसे चुङ्सी भबा थे म्हिगदेदा चुरी आभउ, एनीगदेसे तिग गे लबान मुला, थे गेसे लमा परमप्रभुसे य्हाङदा सजाय पिन्ना। तिग एनीगदेदा अझै य्हाङथोरी पापदेन सजाय काप्बा सेम मुला? तिग्दा भिसम य्हाङसे पाप लसी जिन्बा मुला, ओच्छे इस्राएलीगदेदा म्राङ्सी परमप्रभु ल्हानान बोमो खबा मुला।”
थेतबासेलमा इस्राएलला सिपाहीगदेसे चुङ्सी भबा म्हिगदेदा मूल म्हिगदेदेन य्हुल्साला जम्मान म्हिगदेला ओन्छाङ्रीन ख्लासी पिन्जी। ओच्छे ब्यन्सी भबा जम्मान मालसामानएनोन दोःसी पिन्जी। थेनीगदेसे चुङ्सी भबा म्हिगदेदा थेनोन मूल म्हि ब्लिला जिम्मारी पुइजी। ओच्छे थेरी लिगन्डीन मुबा म्हिगदेदा थेनीगदेसे ब्यन्सी भबा क्वानगदेन क्वान्बारी पिन्जी। थेह्रङ् लसी चुङ्सी भबा म्हिगदेदा थेनीगदेसे क्वानदेन लक्खम क्वान्सी पिन्जी। ओच्छे चबा थुङ्बा पिन्सी थेनीगदेदा छ्युगुएनोन फोर्सी पिन्जी। ओच्छे ल्हानान ब्लप्सी भ्रबारीन आखम्बागदेदा गधारी क्रेपुङ्जी, ओच्छे थेनीगदेला ज्योज्यो आलेगदे मुबा खजूरला दोङगदेला सहर यरीहोधोनान सबरी निजी। जमाहेन्से थेनीगदे ब्लि चा सामरियारीन दोःसी खजी।
आहाज ग्लेसे अश्शूरला ग्लेदेन छ्याम ह्रो म्हाइबा
२ ग्ले १६:७-९
थेनोन धुइरी आहाज ग्लेसे ह्रो याङ्बाला लागिरी अश्शूरला ग्ले मुबा ग्लारी म्हि पुइजी। तिग्दा भिसम एदोमीगदे दोःसीनोन यहूदादेन छ्याम लडाइ लबारी खबा मुबा। ओच्छे यहूदादा ढासी यहूदाला म्हिगदेदा चुङ्सी भोर्बा मुबा। ओच्छे पलिश्तीगदेसेनोन यहूदाला लोपट्टिला सहरगदेदेन न्हुपपट्टिला चेरी मुबा सहरगदे ह्राङला यारी किन्बा मुबा। पलिश्तीगदेसे यहूदाला बेथ-शेमेश, अय्यालोन, गदेरोत, सोखो, तिम्ना, गिम्जोदेन क्यारक्युरला नाम्सागदेएनोन ह्राङला यारी किन्बा मुबा। यहूदाला ग्ले आहाजसे लमान परमप्रभुसे यहूदादा जजा स्होबा मुबा। तिग्दा भिसम थेसे परमप्रभुदा म्लेःसी यहूदारी ल्हानान नाइबा गेगदे लबा मुबा। जमाहेन्से अश्शूरला ग्ले तिग्लत-पिलेसेर यहूदारी खजी। तर थेसे यहूदाला ग्ले आहाजदा ह्रो लतोःबा ग्लारी झन दुख चा पिन्जी। आहाज ग्लेसे परमप्रभुला मन्दिर, ग्लेखाङ्देन ह्राङला सिपाहीगदेग्याम तिगै स्हेगदे किन्सी अश्शूरला ग्लेदा पिन्जी। तर थेह्रङ् लसी पिन्बाएनोन तिगै गेआखेल्बा तजी।
आहाज ग्लेसे लबा पाप
चुनोन आहाज ग्लेसे ह्राङदा दुख तबा धुइरी परमप्रभुला बिरोध लसी पापथोरी झन पाप लजी। ओच्छे आहाज ग्लेसे ह्राङदा ब्रेना लबा दमस्कसला लागदेला लागिरी बलि लजी। तिग्दा भिसम थेसे चुह्रङ् भिसी खेन्बा मुबा, “अरामला ग्लेगदेदा थेनीगदेलान लागदेसे ह्रो लबा मुला। थेतबासेलमा ङादाएनोन थे लागदेसे ह्रो लगै भिसी ङाइ थेनीगदेला लागिरी बलि लला।” तर पाङ्नोन तोःमा, थेनोन लागदेसे थेदेन जम्मान इस्राएलीगदेदा नाश तना लबा मुबा।
आहाज ग्लेसे परमेश्वरला मन्दिरला जम्मान ताङ्गदे तेःसी भोर्जी। ओच्छे परमप्रभुला मन्दिरला म्रापगदेएनोन ढुङ्सी पिन्जी। थेसे यरूशलेमला ग्याम ग्यामरी बलि फुल्बा ग्लागदे स्होजी। थेसे यहूदाला सहर सहररी अर्गु लागदेला लागिरी बलि फुल्बारी नोबा नोबा ग्लारी मुबा ह्रङ्बान लाथानगदे स्होजी। चुह्रङ् लसी थेसे परमप्रभु ह्राङला आखेम्हेमेगदेला परमप्रभु परमेश्वरदा ल्हानान बोमो खना लजी।
थेसे शासन लबा धुइरी तबा तामगदे शुरूहेन्से थुम्बाधोनाला जम्मान तामगदे यहूदादेन इस्राएलला ग्लेगदेला काइरन भ्रिबा किताबरी भ्रिबा मुला। आहाज ग्ले सिजी, जमाहेन्से थेदा यरूशलेम सहररी ल्हुजी। तर थेदा म्हिगदेसे इस्राएलला ग्लेगदेला धुर्सारी आल्हुनी। जमाहेन्से थेला साटोरी थेलान झा हिजकिया ग्ले दोजी।2
Source notes (2)
- Cross-reference यशै ७:१; २ ग्ले १६:५
- Cross-reference यशै १४:२८
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.