Eastern Tamang Language Bible
२ काइ 25
अमस्याह यहूदाला ग्ले दोबा
२ ग्ले १४:२-६
अमस्याह ग्ले दोबा धुइरी बोगल गिकसे ङ्हा दिङ् तबा मुबा। थेसे बोगल गिकसे कू दिङ्धोना यरूशलेमग्याम यहूदाथोरी शासन लजी। थेला आमाला मिन यहोअदीन मुबा। थे यरूशलेमलान मुबा। थेसे परमप्रभुला ओन्छाङ्री जुन ताम ज्यबा मुबा थेनोन लजी। तर थेसे सेमहेन्सेन चा आलनी। पूरन य्हुल्सा ह्राङला यारी किन्सी जिन्माहेन्से ह्राङला आबादा साइबा ग्लेखाङ्ला मूल म्हिगदेदा अमस्याहसे साइजी। तर अमस्याह ग्लेसे ह्राङला आबादा साइबा म्हिगदेला कोलागदेदा चा आसाइनी। थेसे मोशाला ठिमरी भ्रिबा परमप्रभुसे कुल्बा ताम अन्छार लजी। मोशाला ठिमरी चुह्रङ् भिसी भ्रिबा मुबा, “आबा आमासे लबा आज्यबा गेला लागिरी झा झामेदा आसाइगो, ओच्छे झा झामेसे लबा आज्यबा गेला लागिरी आबा आमादा आसाइगो। जुन म्हिसे आज्यबा गे लबा मुला, थेदान साइगै।”1
एदोमला बिरोध लसी लडाइ लबा
२ ग्ले १४:७
अमस्याह ग्लेसे यहूदादेन बेन्यामीनना जम्मान म्हिगदेदा थेनीगदेला म्हेमे म्हेमे अन्छार ग्ला गिकरी ह्रुप लजी। ओच्छे थेनीगदेदा हजार गिक गिकदेन ग्यार्जा गिक गिकला समूहला सिपाहीगदेला हाकिमगदेला तहरी थान्जी। अमस्याह ग्लेसे बोगल गिक दिङ् तबादेन थे भन्दा ल्हाना दिङ् तबा म्हिगदेदा जे ह्रुप लजी। थेनीगदे लाख सोम मुबा। थेनीगदे जम्मान लडाइ लबारी खम्बा ओच्छे भालादेन ढाल चलब लबारी खम्बागदे मुबा। अमस्याह ग्लेसे ओस्पन ३,४०० किलो म्हुइ पिन्सी लडाइ लबारी खम्बा लाख गिक सिपाहीगदे इस्राएलग्याम भजी। तर थे मुबा ग्लारी परमेश्वरला म्हि गिक खसी चुह्रङ् भिसी पाङ्जी, “ङाला ग्ले, ह्राङसे इस्राएलला सिपाहीगदेदा ह्राङदेन छ्याम आभोर्गो। इस्राएलदेन छ्याम परमप्रभु आरे, एफ्राइमला खजिबै म्हिगदेदेन छ्याम परमप्रभु आरे। ह्राङसे आँट लसी लडाइ लसैनोन परमेश्वरसे ह्राङदा शत्रुगदेला ओन्छाङ्री ब्रेना लला। तिग्दा भिसम ढाना लबा कि ब्रेना लबा थे शक्ति परमेश्वरदेन छ्याम मुला।”
अमस्याह ग्लेसे परमेश्वरला म्हिदा चुह्रङ् भिसी पाङ्जी, “ङाइ इस्राएली सिपाहीगदेला लागिरी खर्च लबा ३,४०० किलो म्हुइला बारेरी चा तिग लसे?”
परमेश्वरला म्हिसे चुह्रङ् भिसी जोहाब पिन्जी, “ह्राङदा परमप्रभुसे थे भन्दा ल्हानान पिन्खम्ला।” थेतबासेलमा अमस्याह ग्लेसे एफ्राइमग्याम भबा सिपाहीगदेदा फेसी दिमरी पुइजी। जमाहेन्से थेनीगदे यहूदादेन छ्याम बोमो खजी, ओच्छे थेनीगदे बोमोसे मे दोसी ह्राङ ह्राङला दिमरी निजी।
जमाहेन्से अमस्याह ग्लेसे ह्राङला सिपाहीगदेदा आँट पिन्सी चजा भिबा होपरी भोर्जी। ओच्छे थेनीगदेसे थेरी सेइरला हजार च्युइ म्हिगदेदा साइजी। यहूदाला सिपाहीगदेसे हजार च्युइ म्हिगदेदा चा छोन्बोन चुङ्जी, ओच्छे पहराला जोरी भोर्सी थेग्याम मार भ्याङ्जी। थेग्याम मार ताइसी थेनीगदे जम्मान छ्याकछिक निजी।
थेनोन धुइरी अमस्याह ग्लेसे लडाइरी आभोर्ना दिमरी पुइबा सिपाहीगदेसे यहूदाला सामरिया सहरगदेहेन्से बेथ-होरोन सहरधोनाला म्हिगदेदेन छ्याम लडाइ लजी। थेनीगदेसे थे सहरगदेरी हजार सोम म्हिगदे साइजी, ओच्छे ल्हानान सामानगदे ब्यन्सी भोर्जी।
एदोमीगदेदा ब्रेना लसी दोःमा अमस्याह ग्लेसे सेइरला म्हिगदेला लागदे भसी ह्राङलान ला स्होजी। थेसे थेनोन लादा पूजा लजी, ओच्छे थे लाला लागिरी मेरी ख्राङ्सी बलि लजी। थेतबासेलमा परमप्रभु अमस्याहदेन छ्याम बोमो खसी अगमवक्ता गिक पुइखजी। ओच्छे थे अगमवक्तासे थेदा चुह्रङ् भिसी पाङ्जी, “ह्राङदान तेन्बा म्हिगदेदा मि एला याग्याम जोगब लबारी आखम्बा लाला लिच्छा ए तिग्दा भ्रबा?”
थे अगमवक्तासे थेह्रङ् पाङ्बान लमा ग्लेसे चुह्रङ् भिसी पाङ्जी, “तिग ग्लेदा सल्लाह पिन्बारी ङन्से एदा धम्बा मुला? कुटिसी चिउ। तिग्दा एसे ह्राङसे ह्राङदान गोजाला धाररी थान्बा?”
तर चु ताम पाङ्सी जे अगमवक्ता कुटिसी चिजी, “ह्राङसे ङाला सल्लाह आङ्यन्बासेलमा परमेश्वरसे ह्राङदा नाश लबारी पक्का लसी जिन्बा मुला भिबा ताम ङादा था मुला।”
इस्राएलदेन छ्याम लडाइ तबा
२ ग्ले १४:८-२०
जमाहेन्से यहूदाला ग्ले अमस्याहसे ह्राङदा सल्लाह पिन्बा म्हिगदेदेन छ्याम सल्लाह लजी। ओच्छे लडाइ लबाला लागिरी इस्राएलला ग्ले यहोआहाजला झा, येहूला छाया येहोआशदा, “खउ, य्हाङ ह्राङ ह्राङ न्हङ्री लडाइ लइ” भिसी धाक उन्जी। तर इस्राएलला ग्ले येहोआशसे यहूदाला ग्ले अमस्याहदा चुह्रङ् भिसी जोहाब भ्रिसी पुइजी, “लेबनान य्हुल्साला देस्याला दोङ गिकसे लेबनान य्हुल्सालान स्युक्पाला दोङ गिकदा चुह्रङ् भिसी समाचार पुइजी, ‘एला झामेदा ङाला झादेन छ्याम ब्याह लसी पिन्गो।’ जमाहेन्से लेबनान य्हुल्सालान ह्रि जन्तु गिक थे देस्याला दोङ मुबा ग्लाग्याम खजी। ओच्छे थे देस्याला दोङदा नाङ्सी निजी। ‘एदोमदा ढाजी’ भिसी एसे घमण्ड लबा मुला। ए ह्राङलान दिमरी चिउ। तिग्दा एसे ह्राङदाएनोन, यहूदादाएनोन नाश तना लबारी ह्राङलान ज्यान गोजाला धाररी थान्बा?”
तर अमस्याह ग्लेसे थे तामदा वास्तान आलनी। चु मि परमेश्वरसेन थेनीगदेदा येहोआशला यारी जिम्मा पिन्बारी छ्याइबा मुबा। तिग्दा भिसम थेनीगदेसे एदोमला लागदेदा तेन्बा मुबा। थेतबासेलमा इस्राएलला ग्ले येहोआश लडाइ लबाला लागिरी तयार तजी। ओच्छे यहूदाला ग्ले अमस्याहदेन छ्याम यहूदाला बेथ-शेमेश भिबा ग्लारी इस्राएलला ग्ले येहोआशसे लडाइ लजी। लडाइरी इस्राएलदेन छ्याम ब्रेबासेलमा यहूदाला जम्मान सिपाहीगदे य्हार्सी ह्राङ ह्राङला दिमरी निजी। ओच्छे येहोआशला झा, अहज्याहला छाया, यहूदाला ग्ले अमस्याहदा इस्राएलला ग्ले येहोआशसे बेथ-शेमेशरी चुङ्सी यरूशलेमरी भजी। जमाहेन्से येहोआश ग्ले यरूशलेमरी निसी एफ्राइम म्रापहेन्से कुने-म्रापधोनाला पर्खाल फुप्सी पिन्जी। थे म्राप न्हीला गुङ्ला पर्खाल चा ओस्पन ग्यार्जा न्ही मिटर ह्रेङ्बा मुबा। जमाहेन्से येहोआश ग्लेसे ओबेद-एदोमला जिम्मारी थान्बा परमेश्वरला मन्दिररी स्याप्बा जम्मान म्हार, म्हुइदेन जम्मान ताङ्गदे ओच्छे ग्लेखाङ्री मुबा ल्हानान महङ्गो स्हेगदे भोर्सी सामरियारी निजी। ओच्छे येहोआशसे अमस्याह ग्लेदेन छ्यामनोन थेला म्हिगदेदाएनोन चुङ्सी भोर्जी। यहोआहाजला झा इस्राएलला ग्ले येहोआश सिमाहेन्सेनोन योआशला झा यहूदाला ग्ले अमस्याह च्युक ङ्हा दिङ्धोना सोजी। अमस्याह ग्लेसे शासन लबा धुइला शुरूहेन्से थुम्बा धुइधोनाला जम्मान तामगदे यहूदादेन इस्राएलला ग्लेगदेला काइरन भ्रिबा किताबरी भ्रिबा मुला। परमप्रभुदा म्लेःसी निबा धिनकुनुहेन्सेन यरूशलेमरी अमस्याह ग्लेदा बिरोध लसी साइबारी जाल लबा मुबा। थेतबासेलमा अमस्याह ग्ले य्हार्सी लाकीश सहररी निजी। तर थेला लिच्छा लिच्छा म्हिगदे पुइसी थेदा लाकीशरीन साइजी। जमाहेन्से थेनीगदेसे थेला लाश तादा काप्सी यरूशलेमरी भजी। ओच्छे थेदाएनोन ग्लेगदेदा ल्हुबारी स्होबा दाऊदला सहररी मुबा धुर्सारी ल्हुजी।
Source notes (1)
- Cross-reference ठिम २४:१६
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.