Eastern Tamang Language Bible
२ काइ 11
शमायाह अगमवक्तासे लबा अगमवाणी
१ ग्ले १२:२१-२४
रहबाम यरूशलेमरी दोखमाहेन्से इस्राएलदा दोःसी ह्राङला यारी किन्बाला लागिरी थेसे इस्राएलदेन छ्याम लडाइ लबारी यहूदादेन बेन्यामीन वंशला १,८०,००० सिपाहीगदेदा ग्ला गिकरी पोप लजी।
तर परमप्रभुसे परमेश्वरला म्हि शमायाहदा चुह्रङ् भिसी सुङ्जी, “सोलोमनना झा यहूदाला ग्ले रहबाम, यहूदादेन बेन्यामीन वंशला जम्मान इस्राएलीगदेदा चुह्रङ् भिसी पाङ्गो, ‘परमप्रभुसे चुह्रङ् भिसी सुङ्बा मुला, एनीगदेसे ह्राङलान इस्राएली ज्योज्यो आलेगदेला बिरोध लसी लडाइ लबारी तोर आनिउ। एनीगदे जम्मान ह्राङ ह्राङला दिमरी दोःसी निउ, तिग्दा भिसम चु गे ङाइनोन लबा हिन्ना।’” थेतबासेलमा थेनीगदे परमप्रभुला बचन अन्छार भ्रजी, ओच्छे यारोबामला बिरोध लसी लडाइ आलनी।
रहबामसे यहूदाला सहरगदेदा जोगब लबा
रहबाम यरूशलेमरी चिजी, ओच्छे यहूदाला कोइ कोइ सहररी जोगब तबाला लागिरी स्होसी थान्बा ग्लागदेदा थेसे जोगब लसी थान्जी। थेसे जोगब लसी थान्बा यहूदादेन बेन्यामीनरी मुबा सहरगदे चुनोन मुबा, बेथलेहेम, एताम, तको, बेथ-सर, सोखो, अदुल्लाम, गात, मारेशा, जीप, अदोरेम, लाकीश, आजेका, सोरा, अय्यालोनदेन हेब्रोन। थेसे थे सहररी जोगब तबाला लागिरी स्होबा ग्लागदेदा कोङ्ना लसी स्होजी ओच्छे थेला लागिरी हाकिमगदे धम्जी, ओच्छे थेरी चबा स्हे, जैतूनना छ्युगुदेन अङ्गुरला निङ्गुएनोन पोप लसी थान्जी। थेसे जम्मान सहररी ढालदेन भालागदे पोप लसी थान्जी, ओच्छे थे सहरला जोगब तबाला लागिरी स्होबा ग्लागदे कोङ्ना लसी स्होजी। चुह्रङ् लसी थेसे यहूदादेन बेन्यामीनदा ह्राङला तहरी थान्जी।
पूजाहारीगदेदेन लेवीगदे यहूदारी खबा
पूजाहारीगदेदेन लेवीगदे इस्राएल य्हुल्साला जम्मान ग्लाग्याम रहबाम मुबा ग्लारी खजी। जम्मान लेवीगदे ह्राङ ह्राङला ग्युगदे छाबा ग्लादेन आखेम्हेमेला भु व्हारागदे ख्लासी यरूशलेमरी चिबारी खजी। तिग्दा भिसम यारोबामदेन थेला सन्तानगदेसे थेनीगदेदा परमप्रभुला पूजाहारी दोसी गे लआपुङ्नी। नोबा नोबा ग्लारी यारोबामसे स्होबा रादेन म्हे बहरला मूर्तिगदेदा पूजा लबाला लागिरी यारोबामसे ह्राङलान पूजाहारीगदे धम्जी।1 परमप्रभु इस्राएलला परमेश्वरदा म्हाइबा सेम लबा इस्राएलला जम्मान वंशला म्हिगदे चा परमप्रभु थेनीगदेला आखेम्हेमेला परमेश्वरला लागिरी बलि फुल्बारी लेवीगदेदेन छ्याम यरूशलेमरी खजी। थेनीगदेसे यहूदा य्हुल्सादा कोङ्ना लजी, ओच्छे सोम दिङ्धोना थेनीगदेसे सोलोमन ग्लेला झा रहबाम ग्लेदा ह्रो लजी। ओच्छे थे धुइरी दाऊददेन सोलोमन ग्ले भ्रबा ह्रङ्नोन लसी थेनीगदेएनोन परमेश्वरदा सेम निबा ग्यामरी भ्रजी।
रहबामला म्हेमे
रहबामसे महलतदेन छ्याम ब्याह लजी। महलतला आबा चा दाऊदला झा यरीमोत मुबा। ओच्छे आमा चा यिशैला झा एलीआबला झामे अबीहेल मुबा। महलतग्याम न्हबा रहबामला झागदे येऊश, शमरयाहदेन साहम मुबा। जमाहेन्से थेसे अब्शालोमला झामे माकादेन छ्याम ब्याह लजी। माकाग्याम न्हाब रहबामला झागदे अबिया, अत्तै, जीजादेन शलोमीत मुबा। थेसे ह्राङला जम्मान म्रिङ्देन म्रिङ् ह्रङ्बान स्होसी थान्बा म्रिङ्म्हेमेगदे न्हङ्री माकादा ल्हानान माया लमुबा। थेला च्युक भ्रे म्रिङ्गदे मुबा, ओच्छे बोगल सोम म्रिङ्म्हेमेदा थेसे म्रिङ ह्रङ्बान स्होसी थान्बा मुबा। थेला झागदे बोगल गिकसे भ्रे मुबा, ओच्छे झामेगदे बोगल सोम मुबा।
रहबामसे माकाला झा अबियादा ह्राङ भन्दा लिच्छाला ग्ले स्होबा सेम लजी। थेतबासेलमा रहबामसे थेदा थेला जम्मान ज्योज्यो आलेगदे न्हङ्री मूल म्हि स्होजी। यहूदादेन बेन्यामीनना जम्मान ग्लागदेदेन जोगब लसी थान्बा जम्मान सहरगदे रहबामसे ह्राङला कोइ कोइ झागदेदा जिम्मा पिन्जी। चुह्रङ् लसी रहबामसे बुद्धि छ्योना लसी गे लजी। थेसे थेनीगदेला लागिरी चबा स्हेगदे तोःदेधोना पिन्जी। ओच्छे थेनीगदेदा ब्याह लसीएनोन पिन्जी।
Source notes (1)
- Cross-reference १ ग्ले १२:३१
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.