Eastern Tamang Language Bible
२ काइ 1
सोलोमन ग्लेसे बुद्धि याङ्बाला लागिरी प्रार्थना लबा
१ ग्ले ३:१-१५
दाऊदला झा सोलोमन ग्लेसे ह्राङला शासन पूरन यारी किन्जी। तिग्दा भिसम परमप्रभु थेला परमेश्वर थेदेन छ्याम मुबा। परमप्रभुसे थेदा जम्मान भन्दा घ्रेन स्होजी।
जमाहेन्से सोलोमनसे इस्राएलीगदे जम्मालान मूल म्हिगदेदेन छ्याम ताम लजी। थेसे हजार हजार सिपाहीगदेला समूहला मूल म्हिगदेदेन ग्यार्जा ग्यार्जा सिपाहीगदेला समूहला मूल म्हिगदे, सरकारी हाकिमगदे ओच्छे वंश वंशला मूल म्हिगदेदेन छ्याम ताम लजी। ओच्छे सोलोमन ग्लेदेन जम्मान म्हिगदे गिबोनरी मुबा बलि फुल्बा नोबा ग्लारी निजी। तिग्दा भिसम थेरी परमेश्वर धन्छ्याबा पाल मुबा। थे पाल चा परमप्रभुला गे लबा म्हि मोशासे तोङ्तोङ्बा ग्लारी स्होबा मुबा। तर परमेश्वरला सन्दोस यरूशलेमरीन मुबा। तिग्दा भिसम दाऊद ग्लेसे ङाच्छान परमेश्वरला सन्दोस किर्यत-यारीमग्याम भसी ह्राङसेन स्होबा पालरी थान्बा मुबा।1 तर हूरला छाया, ऊरीला झा बजलेलसे स्होबा काँसला बलि फुल्बा ताङ् चा गिबोनरीन परमप्रभु धन्छ्याबा पालला ङाच्छापट्टि मुबा। थेतबासेलमा सोलोमनदेन जम्मान म्हिगदे थेरीन निजी।2 थेरी दोमाहेन्से सोलोमन परमेश्वर धन्छ्याबा पालरी परमप्रभुला ओन्छाङ्री मुबा काँसला बलि फुल्बा ताङ् थान्बा ग्लाधोनान निजी। ओच्छे थेसे थेरी हजार गिक जन्तु साइसी मेरी ख्राङ्सी बलि फुल्जी।
थेकुनु म्हुनङ् परमेश्वर सोलोमन मुबा ग्लारी फेप्खजी। ओच्छे परमेश्वरसे सोलोमनदा “एदा तिग तोःबा मुला, ङादा पाङ्गो। ङाइ एदा पिन्ना” भिसी सुङ्जी।
सोलोमनसे परमेश्वरदा चुह्रङ् भिसी जोहाब पिन्जी, “ह्राङसे ङाला आबा दाऊददा खाइमै आजिन्बा घ्रेन माया लजी। ओच्छे ह्राङसे ङादा थेला साटोरी ग्ले स्होबा मुला। परमप्रभु परमेश्वर, दाहेन्से ह्राङसे ङाला आबा दाऊददेन छ्याम लबा कबुल पूरा लउ। तिग्दा भिसम ह्राङसे ङादा जम्बुलिङला धुलु तेनोन झ्यासीन झ्याबारी आखम्बा म्हिगदेला ग्ले स्होबा मुला।3 चुदे ल्हानान म्हिगदेदा खाल्से शासन लबारी खम्ला? थेतबासेलमा दाहेन्से चु म्हिगदेथोरी शासन लबारी ङादा ज्ञान बुद्धि पिन्गो।”
परमेश्वरसे सोलोमनदा चुह्रङ् भिसी सुङ्जी, “एसे ह्राङला लागिरी धन सम्पत्ति, हक, मानदेन शत्रुगदेला ज्यान आह्रीनी, ओच्छे ल्हानान दिङ्धोना सोसी चिम्याङ्गै भिसीएनोन एसे ङादेन छ्याम आह्रीनी। तर ङाइ जुन म्हिगदेथोरी एदा ग्ले स्होजी थेनोन म्हिगदेथोरी शासन लबाला लागिरी ज्ञान बुद्धि ह्रीबासेलमा ङाइ एदा ज्ञान बुद्धि पिन्ना। ओच्छे ङाइ एदा ल्हानान धन सम्पत्ति, मानदेन हकएनोन पिन्ना। एसे याङ्बा चु तामगदेदा ए भन्दा ङाच्छाला खजिबै ग्लेसे याङ्बा आरे, ओच्छे ए भन्दा लिच्छाला ग्लेसेनोन याङ्सेला आरे।”
सोलोमन ग्लेला शक्तिदेन धन सम्पत्ति
१ ग्ले १०:२६-२९
जमाहेन्से सोलोमन ग्ले गिबोनना बलि फुल्बा नोबा ग्लारी मुबा परमेश्वर धन्छ्याबा पालग्याम यरूशलेमरी खजी। ओच्छे इस्राएलीगदेथोरी शासन लजी।
सोलोमन ग्लेसे ल्हानान रथगदेदेन तागदे पोप लजी। थेदेन छ्याम १,४०० रथगदेदेन १२,००० तागदे मुबा। थेसे कोइ कोइ चा रथ थान्बाला लागिरी स्होबा सहरगदेरी थान्जी, कोइ कोइ चा यरूशलेमरी ह्राङदेन छ्यामनोन थान्जी।4 सोलोमन ग्लेसे यरूशलेमरी म्हारदेन म्हुइ चा युङ्बा तेनोन ओच्छे स्युक्पाला सिङ चा न्हुपपट्टिला चेरी अञ्जीरला दोङ ते ल्हानान पोप लजी। सोलोमन ग्लेसे तागदे मिश्र य्हुल्सादेन क्यूएग्याम भमुबा। थे तागदे ग्लेला व्यापारीगदेसे क्यूएग्याम ग्लुसी भमुबा। थेनीगदेसे मिश्र य्हुल्साग्याम रथ गिकदा किलो निस म्हुइरी ओच्छे ता गिकदा चा किलो नाङ्से गङ्सल म्हुइरी ग्लुसी भमुबा। थे व्यापारीगदेसे चुह्रङ् लसी हित्तीदेन अरामीगदेला ग्लेगदेदा चूङ्मुबा।
Source notes (4)
- Cross-reference २ शमू ६:१-१७; १ काइ १३:५-१४; १५:२५-१६:१
- Cross-reference थोन्बा ३८:१-७
- Cross-reference ठुङ् १३:१६; २८:१४
- Cross-reference १ ग्ले ४:२६
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.