Eastern Tamang Language Bible
१ ग्ले 8
परमेश्वरला कबुल थान्बा सन्दोस मन्दिररी भबा
२ काइ ५:२-६:२
जमाहेन्से दाऊदला सहर सियोनग्याम परमप्रभुला कबुल थान्बा सन्दोस भबाला लागिरी इस्राएलला गन्बागदे, वंश वंशला मूल म्हिगदेदेन इस्राएलला म्हेमे म्हेमेला मूल म्हिगदेदा यरूशलेमरी ह्रुप तउ भिसी ङ्योइबारी सोलोमन ग्लेसे म्हि पुइजी।1 दिङ्ला ल निस तमा अथवा एतानीम लरी तबा चाडला धुइरी इस्राएलला जम्मान म्हिगदे सोलोमन ग्ले मुबा ग्लारी ह्रुप तजी।2
इस्राएलला जम्मान गन्बागदे दोखमाहेन्से पूजाहारीगदेसे परमप्रभुला सन्दोस पुइजी। ओच्छे पूजाहारीगदेदेन लेवीगदेसे परमप्रभुला सन्दोसदेन ह्रुप तबा पाल ओच्छे थेरी मुबा जम्मान सामानगदे पुइसी तोर परमेश्वरला मन्दिररी भोर्जी। ओच्छे सोलोमन ग्लेदेन जम्मान इस्राएलीगदे परमप्रभुला सन्दोसला ङाच्छापट्टि ह्रुप तबा मुबा। थेनीगदेसे झ्यासीन झ्याबारी आखम्बाधोनाला ग्युगदेदेन म्हे बहरगदे बलि लजी।
जमाहेन्से पूजाहारीगदेसे परमप्रभुला कबुल थान्बा सन्दोस मन्दिरला जम्मान भन्दा चोखो ग्लारी भसी सन्दोस थान्बाला लागिरी स्होबा ग्लारी करूबगदेला भ्याप टारी थान्जी। सन्दोस थान्बा ग्लाथोरी करूबगदेसे भ्याप फेर्सी चिबा मुबा, ओच्छे सन्दोसदेन सन्दोसला नोलगदेदा करूबगदेला भ्यापसे घप्बा मुबा। थे सन्दोसला नोलगदे ल्हानान ह्रेङ्बा मुबा, थे नोलगदेला जो चोखो ग्लाग्याम च्यामा म्राङ्मुबा। तर मन्दिरला मङ्ग्यारग्याम च्यामा चा आम्राङ्मुबा। थे नोलगदे तिनीधोनाएनोन मुनोन मुला। थे सन्दोस न्हङ्री युङ्बाला पाटी न्ही बाहेक अर्गु तिगैनोन आरेमुबा। थे युङ्बाला पाटी मोशासे होरेब गङ्री मुबा धुइरी सन्दोसरी थान्बा मुबा। इस्राएलीगदेसे मिश्र य्हुल्सा ख्लासी खमा थेरीन परमप्रभुसे थेनीगदेदेन छ्याम कबुल लबा मुबा।3
पूजाहारीगदे चोखो ग्लाग्याम मङ्ग्यार खमाहेन्से परमप्रभुला मन्दिर खसुसे घप्जी।4 थेरी खसुन खसु तबासेलमा पूजाहारीगदेसे गे लबारी आखम्नी। तिग्दा भिसम परमेश्वरला मन्दिर परमप्रभुला घ्रेन शक्तिसे प्लिङ्बा मुबा।
जमाहेन्से सोलोमन ग्लेसे चुह्रङ् भिसी पाङ्जी, “ङा धोपधोप्बा खसु न्हङ्री चिला भिसी परमप्रभुसे सुङ्बा मुला। 5 दाहेन्से ह्राङ सदन धन्छ्याबा लागिरी ङाइ ल्हानान ज्यबा मन्दिर गिक स्होबा मुला।”
सोलोमनसे म्हिगदेदा पाङ्बा ताम
२ काइ ६:३-११
थेरी इस्राएलला जम्मान म्हिगदे राप्सी चिबा मुबा, ओच्छे म्हिगदेपट्टि दोःसी सोलोमन ग्लेसे म्हिगदेदा चुह्रङ् भिसी मोलम पिन्जी, “परमप्रभु इस्राएलला परमेश्वरला जयजयकार तगै, ह्राङसे ङाला आबा दाऊददेन छ्याम कबुल लबा अन्छार ह्राङसे ह्राङलान छ्याग्याम पूरा लबा मुला। तिग्दा भिसम ह्राङसे चुह्रङ् भिसी सुङ्बा मुला, ‘ङाइ ङाला म्हि इस्राएलदा मिश्र य्हुल्साग्याम तेःसी भबा धिनकुनुहेन्से तिनीला धिनकुनुधोना ङाला मिन चिगै भिसी मन्दिर गिक स्होबाला लागिरी ङाइ इस्राएलीगदेला वंश वंशला सहरगदे न्हङ्ला खजिबै सहर धम्बा आरे। तर ङाला म्हि इस्राएलगदेथोरी शासन लबाला लागिरी ङाइ दाऊददा धम्बा मुला।’6
“ङाला आबा दाऊददा परमप्रभु इस्राएलला परमेश्वरला लागिरी मन्दिर गिक स्होबा सेम मुबा।7 तर परमप्रभुसे ङाला आबा दाऊददा चुह्रङ् भिसी सुङ्जी, ‘ङाला लागिरी मन्दिर गिक स्होबाला लागिरी एला सेमरी म्हन्बा ताम ज्यबान मुला। तसैनोन एसे थे मन्दिर स्होआम्याङ्, तर ङाला लागिरी थे मन्दिर एलान झासे स्होला।’8
“ह्राङसे लबा कबुल परमप्रभुसे पूरा लबा मुला। ङाला आबा दाऊदला सम्पत्तिथोरी ङाइ हक याङ्बा मुला, ओच्छे परमप्रभुसे कबुल लबा अन्छार थेला साटोरी ङा इस्राएलला ठिरी चिबा मुला। ओच्छे परमप्रभु इस्राएलला परमेश्वरला लागिरी ङाइ चु मन्दिर स्होबा मुला। मन्दिर न्हङ्री ङाइ परमप्रभुला कबुल थान्बा सन्दोस थान्बाला लागिरी छुट्टन ग्ला स्होबा मुला। थे सन्दोसरी चा य्हाङला आखेम्हेमेगदेदा मिश्र य्हुल्साग्याम तेःसी भबा धुइरी परमप्रभुसे थेनीगदेदेन छ्याम लबा कबुल मुबा।”
सोलोमनसे लबा प्रार्थना
२ काइ ६:१२-४२
जमाहेन्से इस्राएलला जम्मान म्हिगदेला ओन्छाङ्री परमप्रभुला लागिरी बलि फुल्बा ग्लाला ङाच्छापट्टि राप्सी सोलोमन ग्लेसे ह्राङला या स्वर्गपट्टि थीजी। ओच्छे थेसे चुह्रङ् भिसी प्रार्थना लजी, “परमप्रभु इस्राएलला परमेश्वर, तोर स्वर्गरी ओच्छे मार जम्बुलिङरी ह्राङ ह्रङ्बा परमेश्वर अर्गु खालैनोन आरे। ह्राङसे ह्राङला गे लबा म्हिगदेदेन छ्याम लबा कबुल पूरा लबा मुला, ओच्छे ह्राङसे उन्बा ग्यामरी सेमहेन्सेन सदन भ्रबागदेदा ह्राङसे ह्राङला खाइमै आजिन्बा माया उन्बा मुला। ह्राङसे ह्राङला गे लबा म्हि ङाला आबा दाऊददेन छ्याम लबा कबुल पूरा लबा मुला। तिनी पूरा तबा चा ह्राङसेन लबा कबुल हिन्ना। चु ह्राङसेन पूरा लबा हिन्ना। थेतबासेलमा परमप्रभु इस्राएलला परमेश्वर, दाहेन्से ह्राङला गे लबा म्हि ङाला आबा दाऊददेन छ्याम लबा चु कबुल पूरा लउ। ह्राङसे सुङ्बा मुला, चुदे एला झागदे ए भ्रबा ह्रङ् लसीन होशियार तसी ङाला ङाच्छापट्टि भ्रजी भिसम खाइमै इस्राएलला ठिरी चिबा म्हिला खाँचो आत।9 इस्राएलला परमेश्वर, दाहेन्से ह्राङसे ह्राङला गे लबा म्हि ङाला आबा दाऊददा सुङ्बा बचन पूरा लसी पिन्गो।
“तर तिग परमेश्वर जम्बुलिङरी पक्कन धन्छ्याला? ह्राङ स्वर्गगदे भन्दाएनोन तोर नोबा स्वर्गरी मि आवाङ्मुला भिसम, ङाइ स्होबा चु मन्दिररी मि झन खाह्रङ् लसी वाङ्ला!10 तसैनोन परमप्रभु ङाला परमेश्वर, ह्राङला गे लबा म्हिसे लबा प्रार्थना ज्यना लसी सान्गो। ह्राङला गे लबा म्हिसे ह्राङलान ओन्छाङ्री तिनी प्रार्थना लबा मुला। धिन म्हुननोन ह्राङसे चु मन्दिररी स्हीगो, चु मन्दिरला बारेरी ह्राङसे चुह्रङ् भिसी सुङ्बा मुला ‘ङाला मिन थेरी तला।’ थेतबासेलमा ह्राङला गे लबा म्हिसे चुपट्टि दोःसी प्रार्थना लमा ह्राङसे सान्सी पिन्गो।11 ह्राङला गे लबा म्हि ङादेन ह्राङला म्हि इस्राएलीगदेसे चु ग्लापट्टि दोःसी प्रार्थना लमा ह्राङ धन्छ्याबा स्वर्गग्याम ह्राङसे थेनीगदेला प्रार्थना सान्गो। ओच्छे सान्माहेन्से ह्राङसे थेनीगदेदा माफ लसी पिन्गो।
“चुदे खजिबै म्हिसे ह्राङला खिम्जेमला बिरोधरी आज्यबा गे लसी चु मन्दिर न्हङ्री ह्राङला लागिरी बलि फुल्बा ग्लाला ङाच्छापट्टि घ्रान चपुङ्जी भिसम ह्राङसे स्वर्गग्याम सान्सी दोष मुबाला दोष उन्सी पिन्गो, ओच्छे थेसे लबा गेगदेला सजाय थेलान थोबोरी ल्हुसी ह्राङला गे लबा म्हिगदेला गुङ्री ठीक निसाफ लसी पिन्गो। ओच्छे दोष आरेबादा दोष आरेबान स्होसी थेदा दोष आरेबा म्हि दोसी कोङ्सी चिखम्बा म्हि स्होसी पिन्गो।
“ह्राङला बिरोधरी पाप लसी ह्राङला म्हिगदेसे शत्रुगदेदेन छ्याम ब्रेबा मुला, ओच्छे ह्राङला मिन किन्बान थेनीगदे चु मन्दिरपट्टि दोःसी सोझो तबान प्रार्थना लसी ह्राङपट्टि दोःजी भिसम ह्राङसे स्वर्गग्याम थेनीगदेला प्रार्थना सान्गो, ओच्छे ह्राङला म्हि इस्राएलला पाप माफ लसी पिन्गो। ओच्छे ह्राङसे थेनीगदेला आखेम्हेमेगदेदा पिन्बा य्हुल्सारी थेनीगदेदा दोःसी भउ।
“ह्राङला म्हिगदेसे ह्राङला बिरोधरी पाप लबासेलमा नाम आतइनी, ओच्छे थेनीगदेदा ह्राङसे दुख तना लबासेलमा ह्राङला मिन किन्बान थेनीगदेसे ह्राङ ह्राङला पाप ख्लासी चु मन्दिरपट्टि दोःबान प्रार्थना लजी भिसम ह्राङसे स्वर्गग्याम थेनीगदेला प्रार्थना सान्गो, ओच्छे ह्राङला म्हि इस्राएलला पाप माफ लसी पिन्गो। ह्राङसे थेनीगदेदा ज्यबा बानीबेहोर थोसी भ्रबारी लोप्गो, ओच्छे ह्राङसे ह्राङला म्हिगदेदा शासन लबारी पिन्बा य्हुल्सारी नाम ताइना लसी पिन्गो।”
“चुदे थेनीगदेला य्हुल्सारी अनिकाल तजी अथवा आपत विपत तजी, अथवा दोङगदे ह्रेसी निबादेन फुसा खना लबा रोग अथवा तिरीगदेदेन बत्तिरगदे खजी अथवा थेनीगदेला खजिबै सहररी शत्रुगदे क्युर्सीन खसी सहरदा गुङ्री झाङ्जी ओच्छे जस्तोन आपत विपत अथवा देशान खसैनोन ह्राङला म्हि इस्राएलीगदे न्हङ्ला खालै म्हिसे सोझो तसी बिन्ती लजी भिसम ओच्छे थेसे थेला सेमला दुख ढन्सी थेला या चु मन्दिरपट्टि थीजी भिसम ह्राङसे ह्राङ धन्छ्याबा स्वर्गग्याम थेनीगदेला बिन्ती सान्गो। ओच्छे थेनीगदेदा माफ लसी ह्राङसे थेनीगदेला लागिरी गे लसी पिन्गो। तिग्दा भिसम जम्मान म्हिला सेमला ताम था याङ्बा चा ह्राङ जे हिन्ना। थेतबासेलमा ह्राङसे थेदा थेसे लबा गे अन्छार निसाफ लसी पिन्गो। जमाहेन्से ह्राङसे ङन्ना आखेम्हेमेगदेदा पिन्बा य्हुल्सारी थेनीगदे सोसी चिदेधोना थेनीगदेसे ह्राङदा मान लगै।
“ह्राङला म्हि इस्राएलीगदे भन्दा अर्गु य्हुल्साला खजिबै म्हि ह्राङला मिन थेःसी थारेङ्ग्याम खसी थे म्हिसे ह्राङला जम्मान भन्दा घ्रेन मिनदेन ह्राङसे लबा उदेकला गेगदेला बारेरी थेःसी चु मन्दिरपट्टि दोःसी प्रार्थना लजी भिसम ह्राङसे थेनीगदेला प्रार्थना स्वर्गग्याम सान्गो, ओच्छे थे विदेशीसे ह्रीबा स्हे पिन्गो। तिग्दा भिसम ह्राङला म्हि इस्राएलीगदेसे ह्रङ् लसी जम्बुलिङला जम्मान म्हिगदेसे ह्राङदा ङोसेगै, ओच्छे ह्राङदा मान लगै। ओच्छे ङाइ स्होबा चु मन्दिररीन ह्राङला जयजयकार तातोःला भिबा ताम था याङ्गै।
“ह्राङसे जुन जुन ग्लारी ह्राङला म्हिदा थेनीगदेला खजिबै शत्रुगदेदेन छ्याम लडाइ लबारी पुइला, थे थे ग्लारी निमा थेनीगदेसे ह्राङसे धम्बा चु सहरदेन ङाइ ह्राङला लागिरी स्होबा चु मन्दिरपट्टि दोःसी प्रार्थना लला, थे धुइरी ह्राङसे थेनीगदेला बिन्तीदेन प्रार्थना स्वर्गग्याम सान्गो ओच्छे थेनीगदेदा ह्रो लउ।
“पाप आलबा म्हि खालैनोन आरे। थेतबासेलमा थेनीगदेसे ह्राङला बिरोध लसी पाप लजी भिसम, ओच्छे थेनीगदेदेन छ्याम बोमो खसी ह्राङसे थेनीगदेदा शत्रुगदेला यारी जिम्मा पिन्सी शत्रुगदेसे थेनीगदेदा थारेङ अथवा ङाम्ला य्हुल्सारी चुङ्सी भोर्जी भिसम, ओच्छे थेनीगदेदा चुङ्सी भोर्बा य्हुल्सारी थेनीगदेसे ह्राङ ह्राङला पाप ख्लासी थेनीगदेला सेम ह्राङपट्टि दोःसी बिन्ती लबान ‘ङन्से पाप लबा मुला, ओच्छे गल्ती लबा मुला, ङन्से नाइबा गे लबा मुबा’ भिसी पाङ्जी भिसम ओच्छे थेनीगदेदा चुङ्सी भोर्बा शत्रुगदेला य्हुल्सारीन थेनीगदेसे ह्राङला पूरन सेमदेन प्राणहेन्से ह्राङपट्टि दोःसी थेनीगदेला आखेम्हेमेगदेदा ह्राङसे पिन्बा य्हुल्सादेन ह्राङसे धम्बा चु सहर ओच्छे ङाइ ह्राङला लागिरी स्होबा चु मन्दिरपट्टि दोःसी थेनीगदेसे ह्राङदेन छ्याम प्रार्थना लजी भिसम थेनीगदेसे लबा प्रार्थनादेन बिन्ती ह्राङसे ह्राङ धन्छ्याबा स्वर्गग्याम सान्गो। ओच्छे थेनीगदे ह्राङपट्टि दोःबासेलमा थेनीगदेदा ह्रो लउ। ओच्छे ह्राङला बिरोधरी पाप लबा ह्राङला म्हिगदेदा माफ लसी पिन्गो, ओच्छे थेनीगदेसे लबा नाइबा गेगदेला लागिरी थेनीगदेदा माफ लसी पिन्गो। ओच्छे थेनीगदेदा ब्रेना लबागदेदा थेनीगदेथोरी दया लबा म्हि स्होउ। तिग्दा भिसम थेनीगदे ह्राङलान सम्पत्तिदेन म्हिगदे हिन्ना। थेनीगदेदा ह्राङसेन मिश्र य्हुल्सा अथवा फाइ ङ्युना लबा मे खाराङ्ग्याम तेःसी भबा हिन्ना।
“ह्राङला गे लबा म्हिला बिन्तीदेन ह्राङला म्हि इस्राएलीगदेला बिन्ती सान्बाला लागिरी ह्राङला स्य्हाल थेनीगदेपट्टि दोःगो। ओच्छे थेनीगदेसे ह्राङदेन छ्याम बिन्ती लमा ह्राङसे ज्यना लसी सान्गो। तिग्दा भिसम थेनीगदेदा ह्राङलान म्हि स्होबाला लागिरी ह्राङसे जम्बुलिङला य्हुल य्हुल्ला म्हिगदेला गुङ्ग्याम तेःसी भबा मुबा। परमप्रभु परमेश्वर ह्राङसे ङन्ना आखेम्हेमेगदेदा मिश्र य्हुल्साग्याम तेःसी भबा धुइरी ह्राङला गे लबा मोशाग्याम ह्राङसे चुह्रङ् भिसी सुङ्बा मुबा।”
सोलोमनसे म्हिगदेदा मोलम पिन्बा
परमप्रभुदेन छ्याम चु बिन्ती लसी जिन्माहेन्से सोलोमन ग्ले परमप्रभुला लागिरी बलि फुल्बा ग्लाला ङाच्छापट्टि राप्जी। थेरीन थेसे पुइ जुसी ह्राङला या स्वर्गपट्टि थीसी चिबा मुबा। राप्सी सोलोमन ग्लेसे घ्रेन काइ तेःसी चुह्रङ् भिसी जम्मान इस्राएलीगदेदा मोलम पिन्जी, “ह्राङला म्हि इस्राएलीगदेदेन छ्याम ह्राङसे कबुल लबा अन्छार शान्ति पिन्बा परमप्रभुला जयजयकार तगै। थेसे ह्राङला गे लबा मोशाग्याम लबा कबुलगदे न्हङ्ला गिकएनोन गेआखेल्बा तबा आरे।12 य्हाङला आखेम्हेमेगदेदेन छ्याम तबा ह्रङ्नोन परमप्रभु य्हाङला परमेश्वर य्हाङदेन छ्यामएनोन तगै। थेसे य्हाङदा खाइमै आम्लेःगै ओच्छे आख्लागै। य्हाङला सेम थेसे ह्राङपट्टि दोःना लगै। ओच्छे य्हाङ सदन थेसे म्हन्बा अन्छार भ्रबारी खम्गै। ओच्छे य्हाङ थेसे य्हाङला आखेम्हेमेगदेदेन छ्याम लबा कबुलदेन ठिमगदे अन्छार भ्रबारी खम्गै। ओच्छे तिनी बिन्ती लबान परमप्रभुला ओन्छाङ्री ङाइ पाङ्बा तामगदे परमप्रभु य्हाङला परमेश्वरला ङाच्छा धिन म्हुननोन तगै। ओच्छे तोःबा अन्छार जम्मान स्हे ह्राङला गे लबा म्हिदेन ह्राङला म्हि इस्राएलीगदेला लागिरी धिनहुँनोन पिन्गै। चुह्रङ् लसी परमप्रभुन परमेश्वर हिन्ना, ओच्छे थे बाहेक अर्गु परमेश्वर खालैनोन आरे भिसी जम्बुलिङला जम्मान म्हिगदेसे था याङ्गै। ओच्छे तिनीला धिनकुनु ह्रङ् लसीन थेसे सुङ्बा बचनग्याम सोबारीदेन थेसे कुल्बा अन्छार भ्रबाला लागिरी एनीगदेसे ह्राङला पूरन सेम परमप्रभु य्हाङला परमेश्वरपट्टि दोःगो।”
मन्दिर परमेश्वरला छ्यारी अर्पण लबा
२ काइ ७:४-१०
जमाहेन्से सोलोमन ग्ले ओच्छे थेदेन छ्याम मुबा जम्मान इस्राएलीगदेसे परमप्रभुला लागिरी बलि फुल्जी। सोलोमन ग्लेसे २२,००० म्हे बहरदेन १,२०,००० राग्युगदे परमप्रभुला ओन्छाङ्री ढिक्ना लबा बलि फुल्जी। चुह्रङ् लसीन सोलोमन ग्लेदेन जम्मान इस्राएलीगदेसे मन्दिर परमप्रभुला छ्यारी अर्पण लजी। ग्लेसे थेनोन धिनकुनु परमप्रभुला मन्दिरला ङाच्छापट्टिला ख्राङ्गाला गुङ्ला ग्लाएनोन अर्पण लजी। ओच्छे थेसे थेरी मेरी ख्राङ्सी फुल्बा बलि, अन्नबलिदेन ढिक्ना लबा बलिला छि फुल्जी। तिग्दा भिसम मेरी ख्राङ्सी फुल्बा बलि, अन्नबलिदेन ढिक्ना लबा बलिला छि फुल्बाला लागिरी परमप्रभुला ओन्छाङ्री मुबा काँसला बलि फुल्बा ग्ला ल्हानान जजा मुबा।
सोलोमन ग्लेसे झ्याङ्पट्टिला लेबो-हमातहेन्से लोपट्टिला मिश्र य्हुल्साला साँधधोना चिबा जम्मान इस्राएलीगदेला घ्रेन समूहदेन छ्याम थेनोन धिनकुनु चाड धाङ्जी। थेनीगदेसे निसरेथोरी अझै निसरे काप्सी च्युक ब्लि धिनधोना परमप्रभु य्हाङला परमेश्वरला ङाच्छा चाड धङ्बान चिजी। थेला न्हङ्गरदाङ सोलोमन ग्लेसे म्हिगदेदा विदा पिन्जी। म्हिगदेसे ग्लेदा मोलम पिन्जी, ओच्छे परमप्रभुसे ह्राङला गे लबा म्हि दाऊददेन ह्राङला म्हि इस्राएलीगदेला लागिरी जम्मान गे ज्यबा लबासेलमा थेनीगदे सेमहेन्सेन ताङ्सी ताङ्सी ह्राङ ह्राङला दिमरी निजी।
Source notes (12)
- Cross-reference २ शमू ६:१२-१६; १ काइ १५:२५-२९
- Cross-reference लेवी २३:२४
- Cross-reference ठिम १०:५
- Cross-reference थोन्बा ४०:३४-३५
- Cross-reference व्हाइ १८:११; ९७:२
- Cross-reference २ शमू ७:४-११; १ काइ १७:३-१०
- Cross-reference २ शमू ७:१-३; १ काइ १७:१-२
- Cross-reference २ शमू ७:१२-१३; १ काइ १७:११-१२
- Cross-reference १ ग्ले २:४
- Cross-reference २ काइ २:६
- Cross-reference ठिम १२:११
- Cross-reference ठिम १२:१०; यहो २१:४४-४५
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.