Eastern Tamang Language Bible
१ ग्ले 21
नाबोतला अङ्गुर व्हारा
उदि धिन लिच्छा यिजरेलला नाबोत मिन लबा म्हि गिकला अङ्गुर व्हाराला बारेरी चुह्रङ् लसी ताम गिक तजी। चु अङ्गुर व्हारा सामरिया सहरला ग्ले आहाबला ग्लेखाङ् ङाम्रीन मुबा। आहाब ग्लेसे नाबोतदा चुह्रङ् भिसी पाङ्जी, “एला अङ्गुर व्हारा ङाला ग्लेखाङ्ला ङाम्रीन मुबासेलमा ढापढुप ढ्वबाला लागिरी ङादा भउ। थेला साटोरी ङाइ एदा थे भन्दा ज्यबा अङ्गुर व्हारा गिक पिन्ना, अथवा एदा टाङ्गान तोःला भिसम थे अङ्गुर व्हाराला सय गादे हिन्ना ङाइ होत्तेन पिन्ना।”
तर नाबोतसे आहाब ग्लेदा चुह्रङ् भिसी पाङ्जी, “चु ङाइ ह्राङदा पिन्बारी आखम। तिग्दा भिसम परमप्रभुसे ह्राङला आखेम्हेमेला सम्पत्ति खालैदान आचूङ्गो” भिसी सुङ्बा मुला।
थेतबासेलमा आहाब ग्ले बोमोसे छ्योद्रोक तसी दिमरी निजी। तिग्दा भिसम यिजरेली नाबोतसे “ङाइ ङाला आखेम्हेमेहेन्सेला सम्पत्ति ह्राङदा पिन्बारी आखम” भिसी पाङ्बा मुबा। आहाब ग्ले बोमोसे छ्योद्रोक तसी काननोन आचना ह्राङला तिरी म्हेर्सी चिजी।
थेला म्रिङ ईजेबेल थे मुबा ग्लारी खसी थेदा चुह्रङ् भिसी पाङ्जी, “तिग्दा तिगै सोल्बा छ्योइबा आलना ह्राङ चुह्रङ् लसी बोमोसे छ्योद्रोक तसी स्युबा?”
थेसे ईजेबेलदा चुह्रङ् भिसी पाङ्जी, “यिजरेली नाबोतदा ङाइ एला अङ्गुर व्हारा ङादा चूङ्गो अथवा थे अङ्गुर व्हाराला साटोरी अर्गु किन्बा सेम मुसम पिन्ना। तर थेसे ‘ङाला अङ्गुर व्हारा ङाइ ह्राङदा पिन्बारी आखम’” भिसी पाङ्जी।
थेला म्रिङ ईजेबेलसे चुह्रङ् भिसी पाङ्जी, “इस्राएलला ग्ले तसीनोन ह्राङसे चुह्रङ्बा गे लबारी तला? रेःसी सोल्बा छ्योइबा लउ, ओच्छे ताङ्गो। ङाइ यिजरेली नाबोतला अङ्गुर व्हारा ह्राङला मिनरी तना लला।”
जमाहेन्से आहाब ग्लेला मिनग्याम ईजेबेलसे चिठीगदे भ्रिजी, ओच्छे लाहा छाप लसी ग्लेलान छाप ठोक्जी। ओच्छे थे चिठीगदे नाबोतला सहर यिजरेलला गन्बागदेदेन य्हुल्साला मूल म्हिगदेदा पुइजी। ईजेबेलसे चिठीगदेरी चुह्रङ् भिसी भ्रिबा मुबा, “धिन गिक फोइथान चिसी प्रार्थना लबाला लागिरी धिन तोगब लउ। ओच्छे जम्मान म्हिगदेदा ग्ला गिकरी पोप लउ। ओच्छे थेरी नाबोतदा मान लसी ठिरी थान्गो। तर थेला अर्गुपट्टि चा आज्यबा सेम मुबा म्हि न्हीदा थान्गो। ओच्छे नाबोतसे परमेश्वरदेन ग्लेदा केःबा मुला भिसी थे न्हीसे पाङ्गै। जमाहेन्से नाबोतदा मङ्ग्यार भोर्सी युङ्बासे छेक्सी साइगो।”
ईजेबेलसे चिठीग्याम कुल्बा अन्छार नाबोतला सहररी चिबा गन्बागदेदेन य्हुल्साला मूल म्हिगदेसे लजी। थेनीगदेसे फोइथान चिसी प्रार्थना लबा धिन तोगब लजी, ओच्छे म्हिगदेला ओन्छाङ्री नाबोतदा मान लसी ठिरी थान्जी। जमाहेन्से थे आज्यबा सेम मुबा म्हि न्हीएनोन खसी नाबोतला अर्गुपट्टि मुबा ठिरी चिजी। ओच्छे चुसे परमेश्वरदेन ग्लेदा केःबा मुला भिसी जम्मान म्हिगदेला ओन्छाङ्री दोष लजी। जमाहेन्से थेरी मुबा गन्बागदेदेन य्हुल्साला मूल म्हिगदेसे नाबोतदा सहरग्याम मङ्ग्यार भोर्सी युङ्बासे छेक्सी साइजी। जमाहेन्से थे सहरला गन्बागदेदेन य्हुल्साला मूल म्हिगदेसे “नाबोतदा युङ्बासे छेक्सी साइजी” भिसी ईजेबेलदा समाचार पुइजी।
नाबोतदा युङ्बासे छेक्सी साइजी भिबा ताम थेःमैछ्याम ईजेबेलसे आहाबदा चुह्रङ् भिसी पाङ्जी, “दाहेन्से फेप्सी यिजरेली नाबोतसे ह्राङदा चूङ्बारी आङ्यन्बा अङ्गुर व्हारा ह्राङला मिनरी स्होउ। थे आरे, थे सिसी जिन्बा मुला।” नाबोत सिजी भिबा ताम थेःमैछ्याम आहाबएनोन नाबोतला अङ्गुर व्हारा ह्राङला स्होबारी ढोङ् रेःसी निजी।
जमाहेन्से तिश्बीला एलिया अगमवक्तादा परमप्रभुसे चुह्रङ् भिसी सुङ्जी, “इस्राएलला ग्ले सामरियाला आहाबदा स्याप्बारी ए मार नाबोतला री निउ। आहाब थेरी नाबोतला अङ्गुर व्हारा ह्राङलान मिनरी स्होबाला लागिरी निबा मुला। थेदा चुह्रङ् भिसी पाङ्गो, ‘तिग एसे नाबोतदा साइसी थेला सम्पत्तीएनोन किन्बारी म्हाइबा? जुन जुन ग्लारी नाबोतला का नगीगदेसे ल्हेम्बा मुला थे थे ग्लारीन एला काएनोन नगीगदेसे ल्हेम्ला।’”1
ओच्छे आहाबसे एलियादा “ङाला शत्रु, एसे ङादा स्याप्जी आहिन?” भिसी पाङ्जी। एलियासेनोन थेदा चुह्रङ् भिसी पाङ्जी, “हिन्ना, ङाइ ह्राङदा स्याप्बा मुला। तिग्दा भिसम जुन ताम परमप्रभुला ङाच्छा आज्यबा मुला थेनोन ताम लबारी ह्राङसे ह्राङदान चूङ्बा मुला। थेतबासेलमा परमप्रभुसे चुह्रङ् भिसी सुङ्बा मुला, ‘दाहेन्से ङाइ एदा नाश लला। ओच्छे नोकर हिन्सै नोकर आहिन्सै ङाइ एला म्हेमेगदे न्हङ्ला जम्मान ह्रेम्फेबेगदेदा नाश लला। ङाइ एला म्हेमेदा नबातला झा यारोबामदेन अहियाहला झा बाशादा लबा ह्रङ्नोन लला। तिग्दा भिसम इस्राएलीगदेदा पाप लपुङ्सी एसे ङादा बोमो खना लबा मुला।’ ओच्छे ईजेबेलला बारेरी चा परमप्रभुसे चुह्रङ् भिसी सुङ्बा मुला, ‘ईजेबेलदा यिजरेल सहरला पर्खाल ङाम्रीन नगीगदेसे चला।’2 ओच्छे सहररी सिबा आहाबला म्हिगदेदा चा नगीगदेसे चला, ओच्छे ह्रिरी सिबागदेदा चा चरागदेसे चला।”
ह्राङला म्रिङ ईजेबेलसे थीबासेलमा जुन गे परमप्रभुला ङाच्छा आज्यबा मुबा थेनोन गे लबाला लागिरी ह्राङसे ह्राङदान चूङ्बा आहाब ह्रङ्बा अर्गु म्हि खालैनोन आरेमुबा। फट्टा लागदेदा तेन्बा एमोरीगदेदा परमप्रभुसे इस्राएलीगदेला ओन्छाङ्ग्याम ताप्बा मुबा। आहाबसे थेनोन एमोरीगदेसे ह्रङ्नोन जम्मान भन्दा नाइबा गे लजी।
चु ताम थेःमाहेन्से आहाबसे ह्राङला क्वान ढेजी ओच्छे बोराला क्वान क्वान्जी, थेसे कान चबारीनोन ख्लाजी। म्हेर्बा धुइरीनोन थे बोराला क्वान्नोन क्वान्सी म्हेर्जी, ओच्छे थेसे ह्राङसे ह्राङदान सोझो म्हि स्होजी।
जमाहेन्से तिश्बी एलियादा परमप्रभुसे चुह्रङ् भिसी सुङ्जी, “आहाबसे ह्राङसे ह्राङदान ङाला ङाच्छापट्टि सोझो म्हि स्होबा ताम एसे म्राङ्बा मुला? थेसे चुह्रङ् लसी ह्राङसे ह्राङदान सोझो म्हि स्होबासेलमा थे सोदेधोना ङाइ थेला म्हेमेदा नाश आल। तर थेला झाला पालोरी ङाइ थेला म्हेमेदा नाश लला।”
Source notes (2)
- Cross-reference १ ग्ले २२:३८
- Cross-reference २ ग्ले ९:३६
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.