Eastern Tamang Language Bible
१ ग्ले 17
एलिया अगमवक्ताला धुइरी खडेरी तबा
जमाहेन्से गिलादला तिश्बी भिबा ग्लाला एलियासे आहाबदा चुह्रङ् भिसी पाङ्जी, “ङाइ तेन्बा छोन्बो परमप्रभु इस्राएलला परमेश्वरला मिन किन्सी ङाइ घ्रान चबान पाङ्ला, दाहेन्से उदि दिङ्धोना ङाइ नाम ताइगो भिसी आपाङ्देधोना शीतएनोन आताइ, नामएनोन आताइ।”
जमाहेन्से परमप्रभुसे एलियादा चुह्रङ् भिसी सुङ्जी, “चु ग्ला ख्लासी स्यारपट्टि निउ, ओच्छे यर्दन स्योङ्ला स्यारपट्टि मुबा करीत स्योङ्री लासी चिउ। एसे थेनोन स्योङ्ला क्युइ थुङ्गो, ओच्छे एला लागिरी चबा स्हे भोर्सी पिन्गो भिसी ङाइ कावागदेदा कुल्बा मुला।”
थेतबासेलमा एलिया परमप्रभुसे सुङ्बा अन्छार यर्दन स्योङ्ला स्यारपट्टि मुबा करीत स्योङ्री निजी, ओच्छे एलिया थेनोन स्योङ्ला कुनीरी चिजी। एलियाला लागिरी ङ्यसे स्य्हो सदन कावागदेसे स्यादेन गेङ भसी पिन्मुबा, ओच्छे थेसे थेनोन स्योङ्ला क्युइ थुङ्मुबा। नाम आताइबासेलमा उदि धिन लिच्छा थे स्योङएनोन ङार्जी।
एलियादेन सारपतला ह्रेम्बो सिबा म्रिङ्म्हेमे
जमाहेन्से परमप्रभुसे एलियादा चुह्रङ् भिसी सुङ्जी, “दाहेन्से ए तुरून्तन सीदोनना सारपत नाम्सारी निउ, ओच्छे थेरीन चिउ। एदा चबा थुङ्बा पिन्बाला लागिरी ङाइ थेनोन ग्लाला ह्रेम्बो सिबा म्रिङ्म्हेमे गिकदा कुल्बा मुला।” थेतबासेलमा एलिया सारपतरी निजी। सारपतला मूल म्रापरी दोखमा थेसे थेरी सिङ म्हाइबान लबा ह्रेम्बो सिबा म्रिङ्म्हेमे गिकदा म्राङ्जी। थेसे घ्रेन काइ तेःसी थे म्रिङ्म्हेमेदा चुह्रङ् भिसी पाङ्जी, “दया लसी थुङ्बारी ङादा लोटारी जजाकी क्युइ भसी पिन्गो।” थे ह्रेम्बो सिबा म्रिङ्म्हेमे क्युइ किन्बारी निबानलमा थेसे घ्रेन काइ तेःसी थे म्रिङ्म्हेमेदा दोःसी चुह्रङ् भिसी पाङ्जी, “दया लसी ङादा गेङएनोन भसी पिन्गो।”
थे ह्रेम्बो सिबा म्रिङ्म्हेमेसे एलियादा चुह्रङ् भिसी पाङ्जी, “छोन्बो परमप्रभु ह्राङला परमेश्वरला मिन किन्सी घ्रान चबान ङाइ पाङ्ला, ताङ्री मुठी नाङ् भ्रादेन थोङ्री जजाकी छ्युगु बाहेक ङादेन छ्याम अर्गु तिगैनोन आरे। ङादेन ङाला झा थेनोन चबा स्हे स्होसी चबाला लागिरी चुरी सिङ म्हाइबान लबा हिन्ना। थे चमाहेन्से अर्गु तिगैनोन आरे, जमाहेन्से ङनी फोइथाननोन सिला।”
एलियासे थे म्रिङ्म्हेमेदा चुह्रङ् भिसी पाङ्जी, “आलोङ्गो, ए दिमरी निसी एसे पाङ्बा ह्रङ्नोन लउ। तर एदेन छ्याम तिग मुला थेलान जजाबा गेङ गिक ख्राङ्सी ङाच्छा ङादा भउ। जमाहेन्से एदेन एला झाला लागिरी तिगै चबा स्हे स्होउ। तिग्दा भिसम परमप्रभु इस्राएलला परमेश्वरसे चुह्रङ् भिसी सुङ्बा मुला, ‘परमप्रभुसे य्हुल्सारी नाम आपुइखदेधोना ताङ्री मुबा भ्रा आजिन, ओच्छे थोङ्री मुबा छ्युगुएनोन आजिन।’”
थे म्रिङ्म्हेमे दिमरी निसी एलियासे पाङ्बा अन्छार लजी। थेतबासेलमा एलियादेन थे म्रिङ्म्हेमे ओच्छे थेला झाला लागिरी धिन धिननोन चबाला लागिरी चबा स्हे छ्योजी। तिग्दा भिसम परमप्रभुसे एलियाग्याम सुङ्बा ह्रङ्नोन ताङ्ला भ्रा आजिन्नी, ओच्छे थोङ्ला छ्युगुएनोन आजिन्नी।
उदि धिन लिच्छा थे म्रिङ्म्हेमेला झा स्हु खजी। थेला झा झन ल्हानान स्हु खजी। ओच्छे स्हु खना खनान थेला झा सिजी। जमाहेन्से थे म्रिङ्म्हेमेसे एलियादा चुह्रङ् भिसी पाङ्जी, “परमेश्वरला म्हि, ह्राङसे तिग्दा ङादेन छ्याम चुह्रङ् लबा? तिग ङाइ लबा पाप परमेश्वरदा ढन्ना लबारीदेन ङाला झादा सिना लबारी ह्राङ चुरी फेप्खबा?”
एलियासे थे म्रिङ्म्हेमेदा चुह्रङ् भिसी पाङ्जी, “एला झा ङादा पिन्गो।” एलियासे थे म्रिङ्म्हेमेला झादा किन्सी ह्राङ चिबा तलाथोला कोठारी भ्रोर्जी। ओच्छे थेसे ह्राङला तिरी थान्जी। जमाहेन्से एलियासे घ्रेन काइ तेःसी परमप्रभुदा चुह्रङ् भिसी पाङ्जी, “परमप्रभु ङाला परमेश्वर, ङादा चुनोन म्रिङ्म्हेमेसे दया लसी क्योङ्मुबा। तर चुनोन म्रिङ्म्हेमेला झादा साइसी चु म्रिङ्म्हेमेथोरी तिग्दा चुह्रङ्बा आपत विपत तना लबा।” ओच्छे एलिया थे कोलाथोरी सोमरेमधोना तङ्गलङ् तसी घ्रेन काइ तेःसी परमप्रभुदेन छ्याम प्रार्थना लजी, “परमप्रभु ङाला परमेश्वर, दोःसी चु कोलादा सोना लसी पिन्गो।”1 परमप्रभुसे एलियाला बिन्ती सान्जी, ओच्छे थे कोलासे सा बुन्बारी छ्याइजी, ओच्छे थे कोला सोजी।
एलियासे थे कोलादा थीसी मार कोठारी भोर्जी। ओच्छे थे कोलाला आमादा एलियासे चुह्रङ् भिसी पाङ्जी, “च्यागो, एला झा मि छोन्बोन मुला।”
जमाहेन्से थे म्रिङ्म्हेमेसे एलियादा चुह्रङ् भिसी पाङ्जी, “ह्राङ परमेश्वरलान म्हि चिम, ओच्छे ह्राङला सुङग्याम थोन्बा परमप्रभुला बचन सत्य चिम भिसी ङाइ था याङ्जी।”
Source notes (1)
- Cross-reference २ ग्ले ४:३४-३५
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.